Մենք կարիք ունենք ԵԱՀԿ Մինսկի խմբի ուժեղ, շեշտում եմ՝ ուժեղ համանախագահության. ՀՀ արտգործնախարարը՝ ԵԱՀԿ նախագահին

Տարածաշրջանում վերջին զարգացումներն ընդգծեցին, որ մենք կարիք ունենք ԵԱՀԿ Մինսկի խմբի ուժեղ, շեշտում եմ՝ ուժեղ համանախագահության, որը կկարողանա առաջնորդել ԼՂ հարցի կարգավորման խաղաղ գործընթացը:

ԵԱՀԿ գործող նախագահ, Շվեդիայի ԱԳ նախարարի Անն Լինդեի հետ համատեղ հրավիրված ասուլիսում այս մասին հայտարարեց ՀՀ արտգործնախարար Արա Այվազյանը:

Նախարարը իր խոսքի սկզբում ցավով արձանագրեց, որ դեռեւս անցյալ տարվա սեպտեմբերին ծրագրված Լինդեի այցը հետաձգվել էր Արցախի դեմ Ադրբեջանի սանձազերծած պատերազմի հետեւանքով:

Այվազյանն ընդգծեց՝ Ադրբեջանի կողմից հակամարտության համատեքստում ուժի կիրառումը ԵԱՀԿ հանձնառությունների, այդ թվում՝ Հելսինկիի եզրափակիչ ակտի կոպտագույն խախտում էր:

«Պատերազմի ողջ ընթացքում ադրբեջանական զինված ուժերը Թուրքիայի գործուն աջակցությամբ, միջազգային հումանիտար իրավունքի բացահայտ խախտումներով զանգվածային ոճրագործություններ, այդ թվում՝ էթնիկ զտումներ եւ պատերազմական հանցագործություններ են իրականացրել արցախահայության դեմ՝ միտումնավոր թիրախավորելով խաղաղ բնակչությունը, այդ թվում՝ կանանց, երեխաներին եւ տարեցներին, քաղաքացիական ենթակառուցվածքները եւ մշակութային օբյեկտները: Ավելին՝ անգամ ռազմական գործողությունների ավարտից 4 ամիս անց Ադրբեջանը շարունակում է խախտել միջազգային հումանիտար իրավունքը եւ մարդու իրավունքները՝ գերեվարության մեջ պահելով հայ ռազմագերիներին եւ պատանդի կարգավիճակում հայտնված քաղաքացիական անձանց»,- շեշտեց նախարարը:

Արա Այվազյանն անդրադարձավ նաեւ պատերազմում Ադրբեջանի կողմից օտարերկրյա ահաբեկիչների ներգրավմանը՝ նկատելով, որ այն ԵԱՀԿ հանձնառությունների խախտում է: Բացի այդ, ըստ նախարարի, դրանով ձեւավորվեց 2 վտանգավոր նախադեպ՝

1. զանգվածային ոճրագործություններով եւ ուժի կիրառմամբ հակամարտության լուծման փորձը,

2. այլ տարածաշրջաններից ԵԱՀԿ պատասխանատվության գոտի զինյալ ահաբեկիչների մասսայական ներմուծումը, որը պետք է արժանանա միանշանակ դատապարտման: 

«Թուրք-ադրբեջանական ագրեսիան դադարեցնելու նպատակով ստորագրված եռակողմ հայտարարությամբ եւ Արցախում ռուս խաղաղապահների տեղակայմամբ հակամարտությունը թեւակոխեց նոր փուլ: Մենք եռակողմ հայտարարությունը դիտարկում ենք որպես հրադադարի վերականգնմանը եւ անվտանգության վերահաստատմանն ուղղված փաստաթուղթ: Թեեւ այն պարունակում է խաղաղ կարգավորմանն առնչվող որոշ դրույթներ, սակայն այն չի հասցեագրում դրա առանցքային տարրերը, որոնցից առաջնային է Արցախի կարգավիճակի հարցը՝ հիմնված արցախահայության ինքնորոշման իրավունքի վրա»,- ասաց ՀՀ արտգործնախարարը՝ շարունակելով.

«Հակամարտության վերջնական քաղաքական լուծումը հնարավոր է ԵԱՀԿ ՄԽ համանախագահության շրջանակներում: Տարածաշրջանում վերջին զարգացումներն ընդգծեցին, որ մենք կարիք ունենք ԵԱՀԿ Մինսկի խմբի ուժեղ, շեշտում եմ՝ ուժեղ համանախագահության, որը կկարողանա առաջնորդել խաղաղ գործընթացը՝ տարիների ընթացքում մշակված սկզբունքների եւ տարրերի հիման վրա: Մենք նաեւ կարիք ունենք ամուր եւ համախմբված ԵԱՀԿ-ի՝ որպես տարածաշրջանային անվտանգության եւ խաղաղության համար պատասխանատու մարմնի: Այս համատեքստում մենք կարեւորում ենք ԵԱՀԿ նախագահության, այդ թվում՝ ԵԱՀԿ գործող նախագահի անձնական ներկայացուցչի դերակատարումը»:

Ըստ Արա Այվազյանի՝ Հայաստանը եւ հայ ժողովուրդը մշտապես եւ անկեղծորեն հանդես են եկել խաղաղության ուղերձով: Ավելին՝ լինելով 20-րդ դարի առաջին ցեղասպանությունը վերապրած ժողովուրդ՝ մենք գիտենք խաղաղության եւ անվտանգության արժեքը: 

«Արցախի խաղաղ բնակավայրերի, այդ թվում՝ Հադրութի շրջանի ավերման, հայ բնակչության ոչնչացման եւ դրանց փոխարեն ադրբեջանական բնակավայրերի ստեղծման հիման վրա կառուցված խաղաղությունը չի կարող լինել հաստատուն եւ տեւական: Մենք շարունակելու ենք մեր պայքարը արդար եւ արժանապատիվ խաղաղության համար՝ սերտորեն համագործակցելով մեր միջազգային գործընկերների հետ»,- թեման եզրափակեց Արա Այվազյանը:

Այնուհետեւ նախարարը խոսեց Հայաստան-ԵՄ, Հայաստան-Շվեդիա հարաբերությունների մասին: Նաեւ տեղեկացրեց, որ ընթացիկ տարվա ապրիլ-օգոստոսին Հայաստանը ստանձնելու է ԵԱՀԿ որոշում ընդունող մարմիններից մեկի՝ անվտանգության համագործակցության ֆորումի նախագահությունը:

Հիշեցնենք, որ սա ԵԱՀԿ նախագահի պաշտոնում Անն Լինդեի առաջին այցն է տարածաշրջան: Նա Հայաստան է ժամանել երեկ՝ Բաքվից հետո: