Արթուր Աբրահամի կարիերայի 10 հիշարժան դրվագները․ նա հայտարարել է մարզական կարիերան ավարտելու մասին

Հայ լեգենդար բռնցքամարտիկ, աշխարհի նախկին չեմպիոն Արթուր Աբրահամը օրեր առաջ հայտարարեց մարզական կարիերան ավարտելու մասին: Ճիշտ է, Աբրահամն իր վերջին մենամարտն անցկացրել էր 2018թ.-ին, սակայն պաշտոնապես կարիերան ավարտելու մասին հայտարարեց միայն 2021թ.-ին:

Ավետիք Աբրահամյանը պրոֆեսիոնալ բռնցքամարտիկի կարիերան սկսել էր 2003թ.-ին՝ Արթուր Աբրահամ մականունով: Սիրողական բռնցքամարտում Ավետիք Աբրահամյանը մեծ հաջողություններ չուներ, թեև երեք անգամ դարձել էր Հայաստանի չեմպիոն: Սակայն միջազգային ասպարեզում Աբրահամյանին հազվադեպ էին հնարավորություն տալիս, և 2002թ.-ին նա վերադարձավ Գերմանիա, որտեղ բնակվում էր 15 տարեկանից (Հայաստան էր վերադարձել զինվորական ծառայության անցնելու համար): Այստեղ էլ սկիզբ առավ Արթուր Աբրահամ պրոֆեսիոնալ բռնցքամարտիկի կարիերան, որի ընթացքում նա անցկացրեց 53 մենամարտ. տարավ 47 հաղթանակ (30-ը՝ նոկաուտով) ու կրեց 6 պարտություն:

«Հայկական ժամանակն» առանձնացրել է Արթուր Աբրահամի կարիերայի ամենահիշարժան դրվագները:

1. 2003թ.-ի օգոստոսի 16-ին Արթուր Աբրահամն անցկացրեց իր առաջին մենամարտը պրոֆեսիոնալ ռինգում: Նրա մրցակիցը գերմանացի Ֆրենկ Կարի Ռոտն էր: Աբրահամը 4 ռաունդանոց մենամարտը շատ ակտիվ սկսեց, բացահայտ առավելություն ուներ և 3-րդ ռաունդում ռինգի մրցավարը կանգնեցրեց մարտը: Աբրահամը տարավ իր առաջին հաղթանակը:

2. Աբրահամն արագորեն դարձավ «Զաուերլենդ» ընկերության գլխավոր դեմքերից մեկը: Գերմանական փրոմոուշնը բավականին արագ կարողացավ Արթուրին հանել տիտղոսային մենամարտերի: 2004 և 2005թթ.-ին Աբրահամը կարողացավ նվաճել WBA միջմայրցամաքային չեմպիոնի կոչումը միջին քաշային կարգում, 2005թ.-ին հաղթեց կանադացի Յան Գարդներին, իսկ առաջին աղմկոտ հաղթանակը տարավ 2005թ.-ի հուլիսի 16-ին՝ բրիտանացի Հովարդ Իսթմանի նկատմամբ: Իսթմանը նույն թվականին արդեն մենամարտել էր աշխարհի չեմպիոնի տիտղոսի համար, բայց պարտվել էր Բեռնարդ Հոփքինսին: Բրիտանացի բռնցքամարտիկն առաջինն էր, որը կարողացավ լավ դիմադրություն ցույց տալ հայ բռնցքամարտիկին, բայց միևնույն է, մրցավարները հաղթանակը տվեցին Աբրահամին՝ միաձայն որոշմամբ:

3. 2005թ.-ի դեկտեմբերի 10-ին Աբրահամն առաջին անգամ հնարավորություն ստացավ մենամարտել աշխարհի չեմպիոնի տիտղոսի համար: IBF միջին քաշային կարգի չեմպիոնի թափուր գոտւ համար հայ մարզիկի մրցակիցը նիգերիացի Քինգսլի Իկեկեն էր: Աբրահամը բացահայտ առավելություն ուներ գոտեմարտի մեկնարկից և 5-րդ ռաունդում նոկաուտի ենթարկեց մրցակցին՝ նվաճելով չեմպիոնական գոտին:

4. Հետագայում Աբրահամը 10 անգամ հաջողությամբ պաշտպանեց չեմպիոնական գոտին, դրանց թվում ամենաբարդը 2006թ.-ի սեպտեմբերի 23-ին կոլումբացի Էդիսոն Միրանդայի հետ գոտեմարտն էր: Միրանդան գոտեմարտի հենց սկզբից «կեղտոտ» բռնցքամարտ էր վարում, հարվածում գլխով, հարվածում գոտկատեղից ներքև: Մրցավարները զգուշացնում էին Միրանդային, բայց մրցավարները ոչ միշտ էին արձագանքում դրանց: Չորրորդ ռաւնդում նմանատիպ հարվածներից մեկից հետո Աբրահամի ծնոտը կոտրվեց երկու տեղից (այդ մասին հայտնի դարձավ գոտեմարտի ավարտից հետո): Մնացած 8 ռաւոնդներն Արթուրն անցկացրեց վնասվածքով, բայց կարողացավ այնպես ծեծել մրցակցին, որ մցավարների մոտ գոտեմարտի ավարտից հետո կասկած չմնաց. Աբրահամը հաղթեց միաձայն որոշմամբ:

5. Միրանդայի հետ Աբրահամը ևս մեկ անգամ մենամարտեց 2008թ.-ի հունիսի 21-ին: Ընդ որում, չեմպիոնական գոտին չէր վիճարկվում: Միրանդան այնքան էր ցանկանում ռևանշի հասնել, որ համաձայն էր հաղթելու դեպքում չվերցնել Աբրահամի գոտին: Կոլումբացին վստահ էր, որ նախորդ գոտեմարտը հենց ինքն է հաղթել: Աբրահամը, իր հերթին, ուզում էր համոզիչ հաղթանակ տանել, և հենց սկզբից նետվեց ուժեղ գրոհների: 4-րդ ռաունդում Միրանդան չդիմացավ «Արթուր Արքայի» գրոհներին ու հայտնվեց նոկաուտում:

6. 2009թ.-ի հոկտեմբերի 17-ին Աբրահամն իր նորամուտը նշեց սուպերմիջին քաշային կարգում: Նա հրավեր էր ստացել մասնակցելու Super Six World Classic մրցաշարին՝ այդ քաշային կարգի ուժեղագույն բռնցքամարտիկների մասնակցությամբ: Աբրահամի առաջին մրցակիցը ամերիկացի Ժերմեն Թեյլորն էր, որը 2005-2007թթ.-ին միջին քաշային կարգում բացարձակ աշխարհի չեմպիոնի կոչումն էր կրում (միավորել էր երեք վարկածներով աշխարհի չեմպիոնի գոտիները՝ հաղթելով լեգենդար Բեռնարդ Հոփքինսին): Ճիշտ է, Թելյորի լավագույն տարիներն արդեն անցյալում էին, բայց Աբրահամի տարած հաղթանակն էլ տպավորիչ էր: Նա կարողացավ մրցակցին նոկաուտի ենթարկել վերջին՝ 12-րդ ռաունդի ընթացքում: 

7. 2010թ.-ի մարտի 10-ին Աբրահամն առաջին փորձն արեց նվաճելու Ամերիկան: Նախկինում նրա բոլոր գոտեմարտերն անցկացվել էին տանը՝ Գերմանիայում: Super Six World Classic մրցաշարի երկրորդ գոտեմարտում Աբրահամը հանդիպեց WBO վարկածով աշխարհի չեմպիոն Անդրե Դիրելին: Ամերիկացի բռնցքամարտիկը բացահայտ առավելություն ուներ, 11-րդ ռաունդում էլ Աբրահամը հարվածեց Դիրելին, երբ վերջինիս ոտքը սահեց ռինգի վրա, ինչի պատճառով մրցավարները որակազրկեցին «Արթուր Արքային»:  

8. Այդ պարտությունից հետո Աբրահամը ևս երկու անգամ պարտվեց Super Six մրցաշարում՝ Կառլ Ֆրոչին ու Անդրե Ուորդին: Ամերիկան նվաճելու փորձերը չստացվեցին, և Աբրահամը վերադարձավ Գերմանիա: Մի քանի միջակ մրցակիցների հաղթելուց հետո հայ բռնցքամարտիկը հնարավորություն ստացավ նորից պայքարել չեմպիոնական գոտու համար, այս անգամ՝ սուպերմիջին քաշային կարգում: 2012թ.-ի օգոստոսի 25-ին նրա մրցակիցը WBO վարկածով աշխարհի չեմպիոն Ռոբերտ Շտիգլիցն էր: Աբրահամը հաղթեց մրցավարների միաձայն որոշմամբ և նորից դարձավ աշխարհի չեմպիոն:

9. Շտիգլիցի հետ Աբրահամը հետագայում ևս 3 անգամ հանդիպեց: 2013թ.-ին պարտվեց ռևանշ-մենամարտում (Աբրահամի ունքն էր պատռվել, մենամարտը կանգնեցվեց 4-րդ ռաունդում): Սակայն 2014թ.-ի մարտի 21-ին հերթական ռևանշ-մենամարտում Աբրահամը նորից իր բարձրության վրա էր, և հաղթեց մրցավարների միաձայն որոշմամբ: Մրցակիցների 4-րդ գոտեմարտում՝ 2015թ.-ին, Աբրահամն արդեն հաղթեց նոկաուտով 6-րդ ռաունդում:

10. Շտիգլիցին երկրորդ անգամ հաղթելուց հետո Աբրահամը 5 անգամ պաշտպանեց չեմպիոնական գոտին, իսկ 2016թ.-ի հունվարի 16-ին ԱՄՆ-ում անցկացրած իր երրորդ մենամարտում նորից պարտություն կրեց, այս անգամ՝ մեքսիկացի Ժիլբերտո Մարտինեսից: Իսկ իր վերջին մենամարտը հայ բռնցքամարտիկն անցկացրեց 2018թ.-ի ապրիլի 28-ին՝ 38 տարեկան հասակում պարտության մատնելով դանիացի Պիտեր Նիլսենին: