Երբ հանցագործը ոստիկան է

Հայտնել էինք, որ վրաերթը տեղի էր ունեցել գիշեր ժամը 00:20-ի սահմաններում Երեւանի Կոմիտաս-Փափազյան փողոցների խաչմերուկում: Վրաերթ կատարած ավտոմեքենան հայտնաբերվել էր դեպքի վայրից քիչ այն կողմ` Կոմիտաս-Վաղարշյան փողոցների խաչմերուկում: «ՎԱԶ-2106» մակնիշի E-109 PH-26 ռուսական պետհամարանիշով ավտոմեքենան հարվածել էր «ՎԱԶ-2107» մակնիշի 22 ՏՍ 785 պետհամարանիշի տաքսի ավտոմեքենայի: Ենթադրվում է, որ Կարինեին ու Անահիտին վրաերթի ենթարկելուց հետո ռուսական պետհամարանիշով մեքենայի վարորդը` 32-ամյա Արթուր Հովհաննիսյանը (աշխատում է ՀՀ ոստիկանության Մալաթիայի բաժնին կից «Պահպանություն» միավորումում) ցանկացել է հեռանալ դեպքի վայրից, սակայն քիչ անց բախվել է նշված տաքսուն, եւ միայն դա է նրան ստիպել կանգ առնել, դուրս գալ մեքենայից եւ վեճի բռնվել տաքսու վարորդի հետ: Հայտնի է, որ բժշկական հետազոտման արդյունքում պարզվել է, որ վրաերթի հեղինակը եղել է ոչ սթափ վիճակում: Իսկ վթարված ավտոմեքենայի դիմապակու եւ կողքի դռան վրա ոստիկանության փորձաքրեագետները հայտնաբերել են կանացի մազեր, իսկ վնասված ավտոմեքենայի վրա` արյան հետքեր: Գործը ՀՔԾ-ում է Պարզելու համար, թե ինչ փուլում է գտնվում նշված գործով քննությունը, երեկ դիմեցինք ՀՀ Հատուկ քննչական ծառայություն: Մեր գրավոր հարցմանն ի պատասխան ստացանք հետեւյալ գրությունը. «2010 թվականի դեկտեմբերի 22-ի լույս 23-ի գիշերը Երեւանի Կոմիտասի պողոտայում տեղի ունեցած վրաերթի դեպքի առթիվ ՀՀ ոստիկանության Երեւան քաղաքի վարչության ճանապարհատրանսպորտային հանցագործությունների քննության բաժնում նույն օրը ՀՀ քրեական օրենսգրքի 242-րդ հոդվածի 2-րդ մասի (Ճանապարհային երթեւեկության եւ տրանսպորտային միջոցների շահագործման կանոնները խախտելը, որը անզգուշությամբ առաջացրել է մարդու մահ, պատժվում է ազատազրկմամբ` առավելագույնը հինգ տարի ժամկետով, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով) հատկանիշներով հարուցվել է քրեական գործ, որը հետագա նախաքննություն կատարելու համար ուղարկվել է ՀՀ հատուկ քննչական ծառայություն: Քրեական գործով այս պահին ձերբակալվածներ եւ կալանավորվածներ չկան: Վրաերթ կատարած անձին որպես մեղադրյալ ներգրավելու հարցը կքննարկվի դատաավտոտեխնիկական փորձաքննության եզրակացությունն ստանալուց հետո: Նախաքննությունը շարունակվում է»: Տուն էին վերադառնում 18-ամյա Անահիտ Գասպարյանը Ռուս-Հայկական (Սլավոնական) պետական համալսարանի տուրիզմի ֆակուլտետի 2-րդ կուրսի ուսանողուհի էր: Կարինե Գասպարյանը աշխատում էր որպես մատնահարդար: Գասպարյանների հարազատները մեզ պատմեցին, որ մայրն ու դուստրը երեկոյան գնացել էին բարեկամներից մեկի տուն, եւ արդեն տուն վերադառնալիս են եղել, երբ ոստիկանի վարած մեքենան վրաերթի է ենթարկել նրանց: Կարինեի ավագ դուստրը զանգահարել է մոր բջջային հեռախոսին, շուրջ մեկ ժամ նրա հեռախոսազանգերին ոչ ոք չի պատասխանել: Հետո հեռախոսազանգին պատասխանել է մի մարդ, որը ներկայացել է որպես ճանապարհային ոստիկանության աշխատակից եւ հայտնել տեղի ունեցածի մասին: Հարազատները համոզված են, որ եթե Արթուր Հովհաննիսյանը ժամանակին օգնություն ցուցաբերեր Գասպարյաններին, նրանք ողջ կմնային: Մահացածների հարազատների խոսքով, այն, որ Արթուր Հովհաննիսյանը դեռեւս գտնվում է ազատության մեջ, առնվազն անարդար է: «Պետք է 10 մարդ սպանե՞ր, որ կալանավորեին: Չնայած այդ դեպքում էլ գուցե չձերբակալեին: Եթե փաստն այն է, որ նա է եղել վրաերթի հեղինակը, ի՞նչն են հիմա ճշտում, ի՞նչ են պարզում: Ի՞նչ կապ ունի, թե փորձաքննությունները ինչ արդյունքներ ունեն: Նա երկու մարդու է կյանքից զրկել: Նա պետք է նստի»,- մեզ հետ զրույցում ասաց Անահիտ Գասպարյանի հորեղբայրը եւ ավելացրեց. «Իրավապահները, չձերբակալելով երկու հոգու մահվան մեջ մեղավոր ոստիկանին, մեզ են հանցագործության դրդում: Եթե աղջկա հայրը ողջ լիներ, նա մի րոպե չէր սպասի, նա կգնար ու կսպաներ այդ մարդուն: Հասկանո՞ւմ եք, չի կարելի այնպիսի իրավիճակ ստեղծել, երբ մարդիկ թողնեն ամեն ինչ եւ ինքնադատաստան անեն: Բայց այս դեպքում մեզ կարծես դրդեն դրան»: