Իսրայելի կառավարությունն արձակվում է չորրորդ անգամ. երկրում կրկին ընտրություններ տեղի կունենան

Իսրայելում սպասվում են 2 տարվա մեջ 4-րդ համապետական ընտրությունները: Պատճառն այն է, որ երկրի կոալիցիոն կառավարությունը այդպես էլ չի կարողացել համաձայնեցնել 2020 թվականի պետական բյուջեն՝ մինչեւ սահմանված վերջնաժամկետը:

Երեքշաբթի, Իսրայելի ժամանակով կեսգիշերին լրացել է պետբյուջեի հաստատման վերջնաժամկետը, եւ երկրի խորհրդարանը արձակվել է օրենքով սահմանված կարգով:

Դրան նախորդել է Կնեսետում (Իսրայելի խորհրդարան) կայացած հանդիպումը, որի ընթացքում խորհրդարանականները փորձել են հերթական անգամ  համաձայնության գալ բյուջեի հարցերի քննարկման ժամկետը երկարաձգող օրինագծի շուրջ, սակայն, հակառակ սպասումների, այն մերժվել է ձայների մեծամասնությամբ:

Իսրայելի խորհրդարանի հաջորդ ընտրությունները տեղի կունենան հաջորդ տարվա մարտի 23-ին:

Իսրայելն արդեն ծախսել է միլիարդավոր գումարներ՝ երեք նախորդ ընտրությունների կազմակերպման եւ անցկացման համար: Դրանք տեղի են ունեցել 2019 թվականի ապրիլին, այնուհետ՝ նույն տարվա սեպտեմբերին եւ 2020-ի մարտին:

Իշխող «Լիկուդ» կուսակցությանը՝ երկրի վարչապետ Բենյամին Նեթանյահուի գլխավորությամբ,  3-րդ փորձից է միայն հնարավոր եղել կոալիցիա ստեղծել իր հիմնական մրցակցի `«Կահոլ-Լավան»կուսակցության հետ, որը ղեկավարում է Իսրայելի գլխավոր շտաբի նախկին պետ Բենի Հանցը, որն  ընտրություններից հետո ստացել է  պաշտպանության նախարարի պորտֆելը: Այնուամենայնիվ, իսրայելցի շատ վերլուծաբաններ հենց սկզբից ասում էին, որ բյուջեի հարցը կարող է ոչնչացնել այս՝ առանց այդ էլ փխրուն դաշինքը:

Համաձայն հաստատված ռոտացիայի ՝ առաջին 18 ամիսներին վարչապետի պաշտոնը պետք է զբաղեցներ Բենյամին Նեթանյահուն, իսկ 2021 թվականի նոյեմբերից ՝ Հանցը: Այժմ Բենի Գանցը կարող է պատմության մեջ մտնել որպես ընտրված վարչապետ, որն այդպես էլ չի զբաղեցրել վարչապետի աթոռը: Նեթանյահուն էլ ռեկորդակիր է վարչապետի պաշտոնում անցկացրած տարիների քանակով. Նա այդ պաշտոնը նախ զբաղեցրել է 1996-99 թվականներին, իսկ հետո,  2009 թվականից անընդմեջ: Այժմ նա անցնում է կոռուպցիայի գործով որպես մեղադրյալ, բայց չի ընդունում իր մեղքը : Ավելին՝ ակնկալում է վեցերորդ անգամ զբաղեցնել վարչապետի պաշտոնը:

Ստեղծված իրավիճակի համար Նեթանյահուն ու Հանցը միմյանց են մեղադրում:

«Ես չէի ուզում այս ընտրությունները, «Լիկուդ»ն էլ չէր ուզում այս ընտրությունները: Մենք փորձեցինք կրկին ու կրկին կանխել դրանք, բայց, ցավոք, Բենի Հանցը հրաժարվեց համաձայնել մեզ հետ», -BBC-ի փոխանցմամբ, հայտարարել է Նեթանյահուն: Նա նաեւ համոզմունք է հայտնել, որ իր «Լիկուդ» կուսակցությունը ջախջախիչ հաղթանակ կտանի մարտի 23-ին:

Հանցը, ի պատասխան, հայտնել է, որ վարչապետի խոսքերի մի մասը սուտ է ու կեղծիք: Նա նշել է, որ Նեթանյահուն իսկապես ցանկանում էր այնպիսի իրավիճակ ստեղծել, որ  նոր ընտրություններ կայանան՝ կոռուպցիայի մեղադրանքով գործընթացից խուսափելու կամ այն ձգձգելու եւ ժամանակ շահելու համար:

2020-ի մարտի 2-ին կայացած ընտրություններից հետո Հանցի եւ Նեթանյահուի կուսակցությունների կողմից կայուն կոալիցիայի ստեղծմամբ վերջ էր դրվել ավելի քան 500 օր տեւած քաղաքական ճգնաժամին, որի ընթացքում իսրայելցիները ստիպված են եղել երեք անգամ գնալ ընտրատեղամասեր:

2 անգամ քաղաքական գործիչները չէին կարողացել կոալիցիա կազմել՝ քվեաթերթիկների հաշվարկի հիման վրա խորհրդարանում 120 տեղը բաշխելու բարդությունների պատճառով: Արդյունքում, այս ժամանակահատվածում Իսրայելն անցկացրել է իր պատմության մեջ առաջին կրկնակի ընտրությունները, և դրանցից անմիջապես հետո `մեկ այլ պատմական իրադարձություն՝ վերընտրություններ 2020-ի մարտի 2-ին:

Ուժերի ներկայիս դասավորվածությունը, ըստ սոցհարցումների, կրկին կանխատեսում է Նեթանյահուի հաղթանակը, բայց նրան էլ ավելի մեծ դժվարություններ են սպասվում կոալիցիա կազմելու հարցում, նշում է Times of Israel-ը:

Դեկտեմբերի 2-ին, 23-րդ գումարման Կնեսետն ընդունել էր ընդդիմության կողմից առաջ քաշված ինքնալուծարման օրենքի նախնական ընթերցումը: Նույնիսկ այդ ժամանակ կոալիցիայի մեջ խորը պառակտումը ակնհայտ էր դարձել, քանի որ «Կահոլ-Լավան» -ը պաշտպանում էր փաստաթուղթը: Առաջին ընթերցմամբ դրա քննարկումը նշանակված էր դեկտեմբերի 14-ին, բայց դա տեղի չունեցավ, քանի որ երկու շաբաթի օրվանից ակնհայտ դարձավ, որ կոալիցիան չի կարող համաձայնության գալ բյուջեի շուրջ, եւ Կնեսետի լիազորությունները կդադարեցվեն ավտոմատ կերպով ավելի արագ, քան ֆիզիկապես հնարավոր է դա անել  օրենքի ընդունմամբ:

Մինչեւ նոր ընտրությունների անցկացումը Բենյամին Նեթանյահուն կմնա Իսրայելի վարչապետ: Կոալիցիայի համաձայնությամբ կողմերը պայմանագիր են կնքել այն մասին, որ արտահերթ ընտրությունների դեպքում վարչապետի աթոռը ընտրություններից առաջ կփոխանցվի կոալիցիայի մեկ այլ առաջնորդի: Ստատուս քվոն, համաձայն համաձայնագրի, կմնա միայն այն դեպքում, եթե ընտրությունները խափանվեն բյուջեի շուրջ տարաձայնությունների պատճառով:

Հասարակական կարծիքի վերջին հարցումները ցույց են տվել, որ Հանցի կողմից ղեկավարվող «Կահոլ-Լավան» կուսակցությունը կորցրել է ժողովրդականությունը: Եվ չնայած «Լիկուդին» աջակցությունը նույնպես թուլացել է, վերլուծաբանները համաձայն են, որ այն կկարողանա վերականգնել իր դիրքերը՝ որպես երկրի ամենամեծ կուսակցություն: