ՄԱԿ-ը կոչ է անում Ղարաբաղի տարածքից հետ կանչել վարձկաններին, Պուտինը՝ խոսում հումանիտար աղետի մասին

Չորեքշաբթի օրը ՄԱԿ-ի՝ վարձկանների կիրառման հարցերով աշխատանքային խմբի կողմից տարածված հայտարարության մեջ ՄԱԿ-ի փորձագետները կոչ են անում Լեռնային Ղարաբաղի հակամարտության կողմերին հետ կանչել տարածաշրջանից բոլոր օտարերկրյա վարձկաններին: Մասնավորապես, ըստ ՄԱԿ-ի աշխատանքային խմբի, Ադրբեջանի կառավարությունը, Թուրքիայի օժանդակությամբ, սատարում է սիրիացի զինյալներին ՝ աջակցելու եւ շարունակելու ռազմական գործողությունները  Լեռնային Ղարաբաղի  հակամարտության գոտում, այդ թվում ՝ առաջնագծում:

Թուրքիան, ի պատասխան,  անհիմն է համարել Լեռնային Ղարաբաղի հակամարտությանը սիրիացի գրոհայինների մասնակցության վերաբերյալ  ՄԱԿ-ի աշխատանքային խմբի հայտարարությունը: Այս մասին այսօր  հայտարարել է Թուրքիայի ԱԳՆ խոսնակ Համի Աքսոյը:

«Այս հայտարարության մեջ պարունակվող անհիմն մեղադրանքներն ամբողջովին չեն համապատասխանում փաստերին: Այս կեղծ լուրերի շրջանառության պատճառը Հայաստանի կողմից «ապօրինի օկուպացիայից» ուշադրությունը շեղելու համար է, «միջազգային ահաբեկչության դեմ պայքարի զոհ դարձած երկրի» պատկեր ստեղծելու փորձ,  ասել է Աքսոյը:

Նրա խոսքով ՝ Հայաստանի կողմից տարածված տեսանյութերը , որոնք ապացուցում են  սիրիացի գրոհայինների մասնակցությունը Ղարաբաղում ռազմական հակամարտությանը, շինծու են: Միեւնույն ժամանակ, նա կեղծիք է համարել ՄԱԿ-ի հայտարարությունը՝ նշելով, որ այն արվել է «առանց Թուրքիայի կարծիքը հաշվի առնելու, հիմնված կեղծ պատկերների եւ լուրերի վրա, խարխլում է ՄԱԿ-ի կառույցների վստահելիությունը»:

Միեւնույն ժամանակ Թուրքիայի ԱԳՆ խոսնակը ՄԱԿ-ի հայտարարությունը շրջել է հայերի դեմ՝ ներկայացնելով, թե իբր ՄԱԿ-ը, հայտարարության մեջ նշելով «կողմեր» բառը, նկատի ունի հայկական կողմին, այնուհետ սեփական մեղքը բարդել հայերի վրա՝ նշելով, իբր  հայկական կողմը հակամարտության տարածքում Քրդստանի աշխատավորական կուսակցության (Սիրիայի քրդերի ինքնապաշտպանության ուժերի ահաբեկիչներին) զինյալների է ներգրավել:

Ղարաբաղյան հակամարտությունը շարունակում է այժմեական թեմա մնալ ոչ միայն ՄԱԿ-ի եւ Թուրքիայի, այլեւ Ռուսաստանի Դաշնության համար:

Վլադիմիր Պուտինը հայտարարել է, որ Լեռնային Ղարաբաղի վերաբերյալ Հայաստանի, Ադրբեջանի եւ Ռուսաստանի համատեղ հայտարարությունը հնարավորություն տվեց դադարեցնել արյունահեղությունը եւ կայունացնել իրավիճակը տարածաշրջանում:

Պուտինն այս մասին հայտարարել է այսօր՝  Լեռնային Ղարաբաղի հումանիտար հիմնախնդիրների լուծմանն առնչվող հանդիպման ընթացքում, որն անցկացվել է ՌԴ պաշտպանության նախարար Սերգեյ Շոյգուի, արտգործնախարար Սերգեյ Լավրովի, Անվտանգության դաշնային ծառայության տնօրեն Ալեքսանդր Բորտնիկովի եւև արտակարգ իրավիճակների նախարար Եվգենի Զինիչեւի հետ:

«Հուսով եմ, որ մենք այլեւս չենք օգտագործի այս արտահայտությունը՝ «Լեռնային Ղարաբաղի հակամարտություն». հուսով եմ, որ շուտով կշարունակենք քննարկել այլ հարցեր», - ասել է Պուտինը:

ՌԴ նախագահի խոսքով, զոհերի թիվը, այդ թվում ՝ Ղարաբաղի խաղաղ բնակչության շրջանում, մարտերի արդյունքում գերազանցել է չորս հազարը, ավելի քան 8 հազար մարդ վիրավորվել է, տասնյակ հազարավոր մարդիկ դարձել են փախստականներ:

«Լեռնային Ղարաբաղի հակամարտության գոտում ռազմական գործողություններից տուժած բնակչությանը բնականոն խաղաղ կյանքին վերադառնալուն օժանդակություն ցուցաբերելու հարցը շատ կարեւոր եւ արդիական է», - շեշտել է նախագահը:

Նա խնդրել է Արտակարգ իրավիճակների նախարարության ղեկավարին զեկուցել Ղարաբաղի բնակչությանը լրացուցիչ օգնություն ցուցաբերելու հնարավորության մասին: Զինիչեւն իր հերթին հայտնել է, որ գերատեսչությունը պատրաստ է 8 ժամվա ընթացքում 150 փրկարարների խումբ եւ 17 միավոր տեխնիկա ուղարկել Ղարաբաղ:

«Անհրաժեշտության դեպքում մենք պատրաստ ենք մատակարարել նաեւ օդային հիվանդանոց ՝ տեղի բնակչությանը բժշկական օգնություն ցուցաբերելու համար», - հավելել է նախարարը:

Ավելի քան 1100 ռուս խաղաղապահներ արդեն իսկ տեղակայվել են ԼՂ տարածքում: Այս մասին էլ  հաղորդել է Շոյգուն: «Այսօր մենք ավարտում ենք դիտարկման կետերի տեղակայումը  խաղաղապահ առաքելության հարավային գոտում: Լեռնային Ղարաբաղի հյուսիսում կտեղակայվի խաղաղապահների մեկ այլ ստորաբաժանում: Վաղը նախատեսվում է այս գոտում տեղադրել եւս ութ դիրք», - ասել է ռազմական գերատեսչության ղեկավարը:

Ղարաբաղում քաղաքացիական ենթակառուցվածքները վերականգնելու, տարածաշրջանի բնակիչներին օգնելու ամենաարդիական խնդիրները լուծելուն եւ փախստականներին վերադարձնելուն աջակցելու համար՝ Պուտինը հրամանագիր է ստորագրել մարդասիրական արձագանքման միջգերատեսչական կենտրոն ստեղծելու մասին: ՌԴ Պաշտպանության նախարարությունը վերահսկելու է գործընթացը:

ՌԴ նախագահի կարծիքով, պետք է կառուցողական, լիարժեք աշխատանք իրականացնել Կարմիր խաչի միջազգային կոմիտեի, ՄԱԿ-ի Մարդու իրավունքների գերագույն հանձնակատարի, ՄԱԿ-ի Փախստականների գործերով գերագույն հանձնակատարի վարչության, ՅՈՒՆԵՍԿՕ-ի հետ:

«Ակնկալում եմ նրանց աջակցությունը»- հայտարարել է Պուտինը:

Մատնանշելով փախստականների տեղափոխման ու վերադարձի, ինչպես նաեւ հումանիտար այլ հարցերի հետ կապված խնդիրները, Շոյգուն հայտարարել է, որ օրեցօր աճում են հումանիտար բնույթի խնդիրները: 

Բացի վերը նշված հանդիպման ընթացքում հրապարակված տեղեկություններից, ՌԴ ՊՆ-ն առանձին հայտարարություն է տարածել՝ Լեռնային Ղարաբաղի տարածքում ռուս խաղաղապահների տեղակայման եւ աշխատանքի մասին:

Հայտարարության մեջ նշվում է, որ Ռուսաստանը Հայաստան է ուղարկել խաղաղապահներով արդեն 42 ինքնաթիռ: Եւս 8 ինքնաթիռ Հայաստան է մեկնել ուրբաթ:

Նոյեմբերի տասներեքին Ուլյանովսկ-Վոստոչնի օդանավակայանից «Իլ -76» ութ ռազմական տրանսպորտային ինքնաթիռներ արդեն օդ են բարձրացել: Օդանավը Հայաստանի օդանավակայան կհասցնի ավելի քան 10 ծանր ամենագնաց մեքենա  եւ ավելի քան 100 զինծառայող», - ասվում է հաղորդագրության մեջ: