Լսում էի ռմբակոծությունների ձայներն ու նվագում, միջիս վախը կորել էր․ Էլեն Սահակյան

Դաշնակահարուհի Էլեն Սահակյանը մի քանի օր առաջ հրթիռակոծության ձայների ներքո Արցախում բացօթյա կատարել է Կոմիտասի գործերից մեկը՝ «Գարուն ա» ստեղծագործությունը։ Տեսահոլովակն արդեն հասանելի է Յութուբյան էջում, նպատակն է դիտումներից հավաքված գումարը փոխանցել «Հայաստան» համահայկական հիմնադրամին։

«Հայկական ժամանակը» Էլեն Սահակյանի հետ զրուցել է արտակարգ իրավիճակում տեսահոլովակ նկարահանելու եւ այլ մանրամասների շուրջ։ Դաշնակահարուհին անկեղծացավ, որ աշխատանքներն ավարտին հասցնելը շատ բարդ է եղել, կազմակերպվելն ու Արցախ հասնելն առավելեւս։ «Մինչեւ այս տեսահոլովակի նկարահանումը՝ հոկտեմբերի 8- ին՝ մեր ընկերների միջոցով ցանկանում էինք օգնություն հասցնել Արցախի հոսպիտալներից մեկին, մեզ թույլ չտվեցին սահման անցնել, օգնությունն այլ ճանապարհով փոխանցեցինք: Օր օրի էլ ավելի էր խստացվում մուտքը դեպի Արցախ։ Բայց քանի որ մեր նկարահանող խումբը աշխատում էր լրատվական կազմակերպությունում, կարողացանք անցնել սահմանները (սահմանին բնականաբար ներկայացրել ենք ինչ նպատակով ենք գնում Արցախ)»,- պատմեց Էլենը։

Վերջինս անկեղծացավ, որ սահմանն անցնելու պահից վախը իր մեջ էր․ լսում է ռմբակոծությունների ձայներն ու ամեն վայրկյան սպասում երկնքում ԱԹՍ-ի հայտնվելուն․ «Բայց ցանկությունս եւ նպատակս այնքան մեծ էր, որ ինձ ուժ էր տալիս իրականացնել այն մտահղացումը, ինչի համար գնացել էի Արցախ։ Հավատացնում եմ ձեզ Արցախում գտնվելուց մի քանի ժամ հետո եւ առավելեւս նվագելու ընթացքում միջիցս վախը կորել էր։ Լսում էի ռմբակոծությունների ձայները, բայց միտքս սահմանում կանգնած զինվորների հետ էր»:

Երաժշտի խոսքով՝ նպատակը կյանքի կոչելուն մեծ աջակցություն են ցուցաբերել նաեւ Արցախում ապրող մեր հայրենակիցները․ «Բոլորը պատրաստ էին մեզ օգնելու։ Բարդություններից մեկը հենց գործիքի գտնելն ու տեղափոխելն էր: Մեզ մեծ օգնություն ցուցաբերեց Ստեփանակերտում Կոմիտասի անվան Երաժշտական դպրոցի տնօրեն Արթուր Պետրոսյանը: Տրամադրեց գործիքն ու կազմակերպեց դրա տեղափոխությունը դեպի Շուշի»:

Էլեն Սահակյանից հետարքրքվեցինք, թե ինչով էր պայմանավորված միջոցառման վայրի ընտրությունը։ Նա նշեց, որ Արցախում նկարահանելը պարտադիր պայման էր, բայց ցավոք սրտի հրետակոծված վայրերն այնքան շատ են եղել, որ անգամ դժվարացել են տեղի ընտրության հարցում։ «Քանի որ գործիքի տեղաշարժումը բավականին դժվար էր, ընտրեցինք այնպիսի վայր, որում պարզ երեւում էր, թե ինչպես է 1 արկի հարվածն ու մեկ պայթյունը աղետալի հետեւանքներ թողել։ Որոշել էինք անպայման ներառել ավերակ դարձած բնակելի շենքերն ու բակային տարածքները»,- ասաց նա:

Դաշնակահարուհու խոսքով՝ նպատակն էր ամբողջ աշխարհին ցույց տալ, թե ինչպիսի բարբարոս եւ անմարդկային թշնամի ունենք․ ռմբակոծում են խաղաղ բնակավայրերը, հայկական մշակութային կոթողներն ու եկեղեցիները։ Ի դեպ տեսահոլովակում երեւացող վայրերից մեկը Շուշիի Սուրբ Ամենափրկիչ Ղազանչեցոց մայր տաճարն ու բակն է։ Հիշեցնենք, որ հենց այս եկեղեցում հրթիռակոծությունից ընդամենը օրեր անց Բելգիայում ապրող հայ երաժիշտ Սեւակ Ավետիսյանը թավջութակ էր նվագում, նա եւս կատարում էր Կոմիտասի ստեղծագործություններից։ Հայ երաժշտի լուսնակարներն ու տեսանյութը տարածվել էին համաշխարհային ամենահեղինակավոր լրատվամիջոցներով։

Էլեն Սահակյանից հետաքրքրվեցինք ստեղծագործության իրենց ընտրության պատճառների մասին։ նա պատասխանեց, որ Կոմիտասյան երգերի մեջ հայ ժողովուրդը գտնում է իր ոգին։

«Ներկայացրել եմ Կոմիտասի երգերից Ռոբերտ Անդրեասյանի մշակմամբ «Գարուն ա» ստեղծագործությունը: Կոմիտասը մեր ժողովրդի այցեքարտն է ու պատմությունը, եւ բնականաբար այն բոլոր տառապանքները, որոնց միջով անցել է հայ ժողովուրդը, զգացել է նաեւ Կոմիտասը դեռեւս 1915 թվականի եղեռնի ժամանակ։ Նա տեսել է այն վայրագությունները, որը տեսնում ենք այսօր մենք: Ես փորձեցի իմ նվագով ոչ թե հուսահատություն ներշնչել եւ թեւաթափ անել իմ ունկնդրին այլ փոխանցել այն լույսը, որ կա այս ստեղծագործության մեջ, ցույց տալ, որ մինչեւ օրս հայ ազգը կա, լինելու է ու հաղթելու ենք»,- ասաց Էլեն Սահակյանը:

Տեսահոլովակի նկարահանումներից հետո Էլենը ցանկացել է այն տեղադրել այնպիսի էջում, որը մեծ լսարան կունենա, այդ պատճառով դիմել են պատերազմական այս օրերին օնլայն հարթակում իր ակտիվությամբ աչքի ընկնող եւ իր ներդումն ունեցող Ռուբեն Եսայանին։ Ռուբենը ԻնստագրաԴ կոչվող էջ է բացել, ակտիվ են Ֆեյսբուքում, Իսնտագրամում եւ Յութուբում։ Խմբի անդամները պատերազմական առաջին իսկ օրվանից ակտիվ տարածում էին թշնամու հրետակոծության հետեւանքով առաջացած ավերածությունների լուսանկարները։ Թիրախավորելով առավել մեծ լսարան ունեցող հայտնիներին, իրենց մեսիջը տեղադրում էին վերջինիս փոստի կամ լուսանկարի մեկնաբանություններում, անձնական նամակներ գրում, եւ կարողանում հասնել նրան, որ համաշխարհային ճանաչում ունեցող աստեղը իր էջում կիսվի մեր երկրում կատարվածով, ու այն տարածի ի լուր աշխարհի։

ԻնստագրաԴի Յութուբյան էջում տեղադրվում են նաեւ տեսանյութեր, որոնց դիտումներից գոյացած հասույթը փոխանցվում է հիմնադրամին: Այս պահին Էլենի տեսանյութի դիտումների քանակը 70.000-ից ավելի է։ Այսօր տեսահոլովակի տեղադրման 3-րդ օրն է։ Ամսվա վերջում պարզ կլինի, թե ինչքան գումար է կուտակվել։ Էլենի խոսքով՝ այս ընթացքում ԻնստագրաԴում ընդհանուր 8 վիդեո էր տեղադրվել, դիտումների եւ բարերարների միջոցով կրկնապատկված գումարը կազմում է 20.000 $, որն արդեն փոխանցվել է հիմնադրամին:

 Տեսահոլովակ՝