Ադրբեջանը թքած ունի սեփական զոհերի վրա. Արծրուն Հովհաննիսյան

Հայաստանի համար սպասելի էր, որ Ադրբեջանը չի պահպանի հրադադարը: «Հայկական ժամանակ»-ի հետ զրույցում նման կարծիք հայտնեց ՀՀ պաշտպանության նախարարության ներկայացուցիչ Արծրուն Հովհաննիսյանը:

Հիշեցնենք, որ օրեր առաջ՝ հոկտեմբերի 9-ին, Մոսկվայում ավելի քան 10 ժամ տեւած բանակցություններից հետո պայմանավորվածություն էր ձեռք բերվել հոկտեմբերի 10-ին՝ ժամը 12։00-ից, հումանիտար հրադադար հաստատել՝ զոհերի մարմինների դուրսբերման ու ռազմագերիների փոխանակման համար։ Հաջորդ օրը, սակայն, հրադադարից րոպեներ առաջ հայկական կողմը հայտնեց, որ Ադրբեջանն այն չի պահպանում եւ Արցախի Հադրութ քաղաք ներթափանցման փորձ է իրականացրել, որի նպատակը Հադրութը գրավելն է եղել, ինչը, սակայն, նրանց չի հաջողվել։

- Պարոն Հովհաննիսյան, ըստ ձեզ, ինչո՞ւ Ադրբեջանը թեկուզ 5 րոպե չպահեց հրադադարի պայմանավորվածությունը, չհարգեց հրադադարը եւ հարձակում սկսեց հենց Հադրութի ուղղությամբ:

- Դժվար է կոնկրետ պատճառներ նշել, որը տրամաբանորեն բոլորի համար ընկալելի լինեն, որովհետեւ մենք գործ ունենք Ադրբեջանի հետ: Մենք գործ ունենք անհավասարակշիռ ղեկավարի հետ, որն առաջին իսկ օրվանից խաղաղ բնակիչների նկատմամբ զենք է կիրառել, հետեւաբար հստակ պատճառներ դժվար է հիմնավորել: Դեռ հրադադարից ժամեր առաջ իրենք կատարել էին մի քայլ, որն ակնհայտորեն բերելու էր հրադադարի, այսպես ասած, չգոյությանը: Նրանք դեպի Հադրութ քաղաք ուղղորդված դիվերսանտներ էին ուղարկել, որոնք հասկանալի պատճառով հասնելու էին քաղաքի մատույցները եւ հրադադարի իրավիճակից օգտվելով՝ փորձելու էին ինչ-որ բան անել, ու, բնականաբար, մենք ստիպված էինք լինելու իրենց հետ կռիվ տալ: Դա կարծես հենց նպատակային քայլ էր:

- Ինչո՞ւ են հենց վերջին օրերին Հադրութի ուղղությամբ ինտենսիվ մարտեր ընթանում:

- Ինչ-որ կողմից հասկանալի է, որովհետեւ արեւելյան սուլթանը Հադրութի անունը տվել է, հետեւաբար անտեսելով սեփական զոհերը, ռազմական տրամաբանությունը՝ պիտի ամեն ինչ անի, որ հասնի, ինքն ի սկզբանե այդպես է պատվիրակել իր զորքին:

- Պարոն Հովհաննիսյան, ինչո՞ւ Ադրբեջանը չի շտապում հնարավորություն ստեղծել զոհերի մարմինները դուրս բերելու, գերիներին փոխանակելու համար:

- Որովհետեւ թքած ունի սեփական զոհերի վրա: Ավելին ասեմ՝ շատ հնարավոր է նաեւ, որ ինքը չի էլ կարող մտածել հիմա այդ մասին, որովհետեւ, եթե այդ դիակները դուրս բերվեն, ի վերջո, գնալու են ադրբեջանական հասարակություն՝ առաջացնելով համապատասխան ռեակցիաներ: Իսկ այս պարագայում ինքը, օգտվելով պատերազմական դրությունից եւ երկիրը պահելով փակ ինֆորմացիոն բլոկադայի մեջ, տվյալ զոհված մարդկանց ընտանիքներին ուղղակի ոչ մի կերպ ինֆորմացիա չի տալիս, հայկական տիրույթից էլ նրանց ինֆորմացիան փակ է: Հետեւաբար նրանք կարող է ընդհանրապես տեղյակ էլ չլինեն, որ իրենց հարազատներն ու բարեկամները արդեն զոհվել են:

- Ադրբեջանը հարվածային անօդաչու թռչող սարքեր է կիրառում նաեւ Հայաստանի տարածքում, ինչո՞ւ են փորձում իրավիճակը լարել նաեւ ՀՀ տարածքում:

- Անկեղծ ասած՝ չեմ կարող ասել, որովհետեւ առաջին իսկ օրվանից կոնկրետ Վարդենիսի ուղղությամբ եղել են հարվածներ, ոտնձգություններ: Հետեւաբար՝ ինչո՞ւ են փորձում լարել, այս պահին ինձ համար այնքան էլ պարզ չէ: Առաջին պահից էլ այդպես է եղել, ու Հայաստանի Հանրապետության սահմանները այս կամ այն կերպ ընկել են հարվածի տակ, գրեթե՝ նույնքան:

- Պարոն Հովհաննիսյան, Ալիեւը պարբերաբար հայտարարում է, թե Ջաբրայիլը եւ էլի մի շարք հատվածներ «գրավել են»: Ի՞նչ նպատակ է հետապնդում նման կեղծիք տարածելը:

- Նա հիմար չէ, հասկանում է, որ իր ամբողջ բանակը, թուրքական բանակի մեծ ներուժը, այդքան ահաբեկիչներ, վարձկաններն իրենց հետ (որոնք պաշտպանության բանակին բազմապատիկներ անգամ գերազանցում են), ռազմական գիտության ու իրենց երազանքների համաձայն՝ տապալված են: 2 շաբաթ է՝ կռվում են եւ որեւէ նշանակալի, լուրջ տարածքային հաջողություն չունեն, հետեւաբար մարդիկ ունեն հսկայական կորուստներ: Հիմա հասկանալի է չէ՞, որ այդքանից հետո պիտի ինչ-որ բանով կերակրեն հասարակությանը: Ամեն մի փոքրիկ հաջողությունը, ամեն մի փոքրիկ լուրը, ամեն մի փոքրիկ կիսավեր բնակավայրը վերցնելուց պիտի այնպես ներկայացնեն՝ իբրեւ թե մի մոլորակ են ազատագրել: Սա է տրամաբանությունը, եւ այլ տրամաբանություն ուղղակի չկա: