Լուսին ու Մարս թռչելու, «պատուհաս» Բայդենի, Ամերիկան ազատագրելու և լավագույն նախագահ լինելու մասին. Թրամփի մեծ ելույթը

ԱՄՆ-ի գործող նախագահ Դոնալդ Թրամփը պաշտոնապես համաձայնել է առաջադրվել Հանրապետական կուսակցության կողմից որպես 2020 թվականի նախագահական ընտրություններում թեկնածու: Ելույթ ունենալով Սպիտակ տանը՝ Թրամփը շնորհակալություն է հայտնել համակուսակիցներին վստահության համար եւ ընդունել նրանց առաջարկը նոյեմբերյան ընտրություններում առաջադրվելու համար:

Թրամփը հայտարարել է, որ սպասվող ընտրությունները Միացյալ Նահանգների պատմության մեջ դառնալու են ամենակարեւորը:

«Չնայած բավական մեծ երկիր լինելուն՝ այն ամենը, ինչին հասել ենք մինչեւ այսօր, այժմ վտանգի տակ է: Սրանք ամենակարեւոր ընտրություններն են մեր երկրի պատմության մեջ», - ասել է ամերիկացի առաջնորդը:

«Նախկինում երբեք ընտրողները չեն հանդիպել ավելի հստակ ընտրության կուսակցությունների միջեւ՝ երկու տեսլական, երկու փիլիսոփայություն, երկու օրակարգ: Այս ընտրությունները կորոշեն՝ մենք պահո՞ւմ ենք «Ամերիկյան երազանքը», թե՞ թույլ կտանք, որ սոցիալիստական օրակարգը ոչնչացնի մեր նվիրական երազանքն ու ճակատագիրը: Այս ընտրությունները կորոշեն՝ մենք պաշտպանո՞ւմ ենք ամերիկյան կենսակերպը, թե՞ արմատական շարժումը թույլ կտա այն ամբողջովին ոչնչացնել: Դա տեղի չի ունենա»,- ընդգծել է Թրամփը:

Սպիտակ տան ղեկավարը կարծում է, որ վերջ է դրել երկրում «չկայացած քաղաքական դասի» կառավարմանը, որն առաջնորդվել է միայն սեփական շահերով եւ հաշվետու չի եղել հասարակ քաղաքացիների հետ:

«Այն օրից, երբ ես հետեւում թողեցի իմ նախկին կյանքը, որը չափազանց լավն էր, ես միայն ու միայն պայքարում եմ ձեզ համար».-ասել է Թրամփը՝ ուղիղ եթերում դիմելով ամերիկացիներին,- «Ես արել եմ մի բան, որը չեն կարողանում ինձ ներել: Խախտելով վաշինգտոնյան քաղաքականության  հիմնական դրույթները, ես կատարել եմ իմ բոլոր նախընտրական խոստումները: Միասին մենք վերջ ենք  դրել չկայացած քաղաքական ուժերին: Այժմ նրանք ամեն գնով փորձում են վերադառնալ իշխանության: Մենք սա տեսել ենք: Նրանք ինձ ատում են, որովհետեւ ես փոխանակ առաջին տեղում թողնեմ իրենց հետաքրքրությունները, հայտարարել եմ, թե առաջին տեղում պիտի լինի Ամերիկան»,-հայտարարել է նա:

Իր մեծ ելույթի ժամանակ Թրամփն անդրադարձել է նաեւ  կորոնավիրուսի համավարակի տարածմանը: Նախ, նա ասել է, որ ի տարբերություն  դեմոկրատ թեկնածու Ջոզեֆ Բայդենի,  ինքը Չինաստանին պատասխանատվության է ենթարկելու ամբողջ աշխարհով մեկ կորոնավիրուսը տարածելու համար:

«Չինաստանն աջակցում է Բայդենին եւ առանց հեռանկարի ցանկանում նրան հաղթանակ ԱՄՆ-ի նախագահական ընտրություններում: Չինաստանը կկարողանա իշխել մեր երկրին, եթե Բայդենն ընտրվի նախագահ, իսկ ես ցանկանում եմ նրանց ենթարկել ամենախիստ պատժի՝ համաշխարհային ողբերգության տարածման համար»,-ասել է Թրամփը:

Ի դեպ, սա ելույթի ընթացքում Բայդենի հասցեին Թրամփի կողմից հնչեցրած միակ արտահայտությունը չէ: 

«ԱՄՆ նախագահի դեմոկրատ թեկնածու Ջո Բայդենն ավելի հաճելի է, քան իր նախորդ Հիլարի Քլինթոնը, սակայն զիջում է նրան ինտելեկտով: Քլինթոնը նրանից խելացի է, բայց որպես մարդ՝ պակաս հաճելի: Ջոյի մոտ ամեն բան հակառակն է՝ նա խելացի չէ, բայց ավելի հաճելի անձնավորություն է…

Պուտինը, Սի Ծինփինը եւ Էրդողանը համաշխարհային դասի շախմատիստներ են: Բայդենը նրանց հետ աշխատել չի կարողանա, որովհետեւ քաղաքականության ասպարեզում նրա լավագույն տարիներն այդքան էլ հրաշալի չեն եղել…

Ամենամեծ խնդիրը դեմոկրատների մեջ է, ոչ թե Չինաստանի, Ռուսաստանի ու  Իրանի: Նոյեմբերին երկրում կայանալիք նախագահական ընտրությունների ժամանակ դեմոկրատներից ավելի շատ խնդիրներ կլինեն, քան Չինաստանից, Ռուսաստանից եւ Իրանից միասին վերցրած: Բայդենն ու դեմոկրատները ցանկանում են գողանալ ընտրությունները...»,-հայտարարել է ԱՄՆ-ի գործող նախագահը:

Թրամփը խոստացել է ստեղծել աշխարհի լավագույն հակահրթիռային պաշտպանությունը եւ կիբերանվտանգության համակարգը եւ հաղթել հինգերորդ սերնդի  հաղորդակցական ցանցերի զարգացման մրցավազքում: «Մենք կհաղթենք 5G մրցավազքում եւ կկառուցենք աշխարհի լավագույն կիբերանվտանգության և հակահրթիռային պաշտպանության համակարգը, եւ դա արդեն պատրաստման փուլում է», - հայտարարել է նա ու նաեւ խոստացել, որ ԱՄՆ-ին չի ներքաշի «անիմաստ եւ ծախսատար» պատերազմների մեջ:

«Ի տարբերություն նախորդ վարչակազմերի, ես Ամերիկան փրկել եմ նոր պատերազմներից, եւ մեր զորքերը վերադառնում են տուն», - ասել է ԱՄՆ-ի նախագահը:

Նա նաեւ ասել է, որ ընտրություններում հաղթելու դեպքում կսկսի պարտականություններ, հարկեր եւ տուրքեր սահմանել ամերիկյան այն ընկերությունների համար, որոնք արտադրությունը տեղափոխում են արտերկիր՝ աշխատուժն ու արտադրանքը դուրս բերելով երկրից: ըստ Թրամփի, դա իր վարչակազմի նախընտրական խոստում կարելի է համարել, քանի որ կարեւոր է աշխատատեղերը երկրում պահելու հարցը, հատկապես, եթե արտադրական ձեռնարկությունները տեղափոխվել են Չինաստան: Այս համատեքստում Թրամփը կրկին հիշատակել է Բայդենին՝ նշելով. «Բայդենի ծրագիրը գրվել է Չինաստանում, իմ ծրագիրը՝ ԱՄՆ-ում»: Այս խոսքերից հետո դահլիճում «Ամերիկա, Ամերիկա» վանկարկումներ եւ ծափահարություններ են հնչել:

Թրամփը խոստացել է, որ Միացյալ նահանգներն առաջիկա 4 տարիներին արտադրական գերտերություն է դառնալու աշխարհում՝ նոյեմբերին իր հաղթանակի ապահովման դեպքում: ԱՄՆ-ի նախագահը հավելել է, որ ինքն այժմ էլ աշխատատեղեր է ստեղծում երկրում եւ ջանքեր գործադրում՝ հարկային բեռը թեթեւացնելու համար, խոստացել է նաեւ առաջիկա 10 ամսում 10 միլիոն աշխատատեղ ստեղծել:

ԱՄՆ-ի նախագահը կրկին խոստացել է, որ Միացյալ Նահանգներն առաջինը կին տիեզերագնաց կուղարկի Լուսին՝ դառնալով նաեւ առաջին պետությունը, որը Մարսի վրա կբարձրացնի երկրի դրոշը: 

Թրամփի ելույթը տեղի է ունեցել ԱՄՆ-ի հանրապետական կուսակցության համագումարի շրջանակներում, որի ժամանակցույցը սահմանել այդպես էլ չէր հաջողվում երկար ժամանակ՝ կորոնավիրուսի համավարակի պատճառով: Թեպետ այն ի վերջո կայացել է, սակայն չի եղել լիարժեք, որովհետեւ տարատեսակ սահմանափակումների շրջանում հնարավոր չի եղել լրատվամիջոցների ներկայացուցիչների լիարժեք ներկայություն ապահովել:

Հիշեցնենք, Ջո Բայդենը վերջնականապես դարձավ ԱՄՆ-ի նախագահական ընտրությունների թեկնածու ՝ առաջադրվելով Դեմոկրատական կուսակցության կողմից օգոստոսի 21-ին: Միացյալ նահանգների հանրապետական կուսակցությունն էլ օգոստոսի 24-ին պաշտոնապես  առաջադրեց Սպիտակ տան գործող ղեկավար Դոնալդ Թրամփին նախագահի թեկնածու՝ երկրորդ նախագահական ժամկետով:

Ամերիկայի Միացյալ Նահանգների 59-րդ նախագահական ընտրությունները նշանակված են նոյեմբերի 3-ին: