Կառավարությունը ՍԴ դատավորի պաշտոնում առաջադրեց Վահրամ Ավետիսյանի թեկնածությունը․ նա ներկայացրեց իր մոտեցումները

ՀՀ Կառավարությունն այսօրվա նիստում որոշեց Սահմանադրական դատարանի դատավորի պաշտոնում առաջադրել Վահրամ Ավետիսյանի թեկնածությունը։

ՀՀ վարչապետ Նիկոլ Փաշինյանը թեկնածուին խնդրեց մի քանի բառով ներկայացնել իրեն Կառավարության անդամներին եւ հանրությանը. «1-2 բառով ձեր պատկերացումները ներկայացրեք ՍԴ-ում ձեր հնարավոր գործունեության վերաբերյալ։ Ինչո՞ւ հնարավոր, որովհետեւ թեկնածությունն առաջադրում է Կառավարությունը, եւ Ազգային ժողովում դեռ պետք է քննարկումներ ունենաք, եւ ընտրությունը պիտի կատարի Ազգային ժողովը»։

ՍԴ դատավորի թեկնածուն ասաց, որ եթե այդ հնարավորությունն ընձեռվի՝ Ազգային ժողովի կողմից որպես Սահմանադրական դատարանի դատավոր ընտրվելու, իր մոտեցումները Սահմանադրական դատարանի դատավորի պաշտոնում հետեւյալն են՝

Առավելագույնս ապահովել ՍԴ դատավորի անկախությունը, ապաքաղաքականացվածությունը, անաչառությունը։

«Ինչպես նաեւ հաշվի առնելով մեր երկրում ձեւավորված իրողությունները՝ ապահովել ժողովրդավարության ամրապնդման եւ զարգացման գործում Սահմանադրական դատարանի դերակատարությունը։ Մենք գիտենք, որ ժողովրդավարությունը եւ ժողովրդավարական արժեքները կարծրացած կայուն կատեգորիաներ չեն։ Հասարակության զարգացման հետ մեկտեղ նաեւ ժողովրդավարության եւ ժողովրդավարական արժեքների նկատմամբ մոտեցումներն ապրում են, այսպես ասած, էվոլյուցիա։ Ենթադրում եմ նաեւ, որ Սահմանադրական դատարանը, իհարկե, հիմքում ունենալով անհատի հիմնարար իրավունքներն ու ազատությունները, պետք է գործի այդ տրամաբանությանը զուգահեռ եւ արդյունավետ կերպով ապահովի օրենսդիր, գործադիր եւ դատական իշխանությունների ներդաշնակ գործունեությունը, նորմատիվ ակտերի սահմանադրականության որոշման արդյունավետության գործընթացը»,- ասաց Ավետիսյանը։

Նա նշեց, որ չէր տեղեկացվել, որ պետք է ելույթ ունենա եւ կփորձի հարցերի ձեւով ներկայացնել իր գնահատականները, մոտեցումները կոնկրետ երեւույթների նկատմամբ՝ հաշվի առնելով նաեւ ՍԴ դատավորի թեկնածուի վարքագծի նկատմամբ գոյություն ունեցող օրենսդրական սահմանափակումները. «Առավել հանգամանալից պլանավորում եմ իմ մոտեցումներն ու գնահատականները ներկայացնել ԱԺ-ին»։

Վարչապետը ՍԴ դատավորի թեկնածուին խնդրեց ներկայացնել իր կենսագրությունը եւ անցած աշխատանքային գործունեությունը։

«Մասնագիտական աշխատանքային գործունեությունը սկսել եմ 1999 թվականից դատախազությունում՝ ստաժոր ավագ քննիչի պաշտոնում։ Հետագայում՝ թեկնածուական ատենախոսությունս Ռուսաստանի Դաշնությունում պաշտպանելուց հետո, անցել եմ դասախոսական աշխատանքի, մասնավորապես՝ 2002 թվականից դասավանդում եմ Երեւանի պետական համալսարանում։ Ներկայումս զբաղեցնում եմ քաղաքացիական իրավունքի ամբիոնի վարիչի պաշտոնը»,- ասաց Ավետիսյանը։

Նա նշեց, որ զուգահեռ զբաղվել է նաեւ մասնավոր պրակտիկայով։

«Այսինքն՝ մեր հանրապետության մասշտաբով տարբեր խոշոր կազմակերպություններում զբաղեցրել եմ իրավաբանական ծառայության ղեկավարի պաշտոնը, գլխավոր իրավախորհրդատուի պաշտոնը։ Շատ կարճ ժամանակահատված պաշտոնավարել եմ դատախազությունում՝ որպես օտարերկրյա դատարաններում պետական շահերի պաշտպանության բաժնի ավագ դատախազ։ Նշեմ նաեւ, որ 2012 թվականից նշանակվել եմ ԱՊՀ միջխորհրդարանական վեհաժողովի Դեմոկրատիայի զարգացման միջազգային ինստիտուտի երեւանյան մասնաճյուղի տնօրեն։ Եվ պաշտնովարման այս 8 տարիների ընթացքում հաշվի առնելով տվյալ միջազգային կազմակերպությանն ընձեռված մանդատի շրջանակները՝ իրականացրել ենք դեմոկրատիայի, պարլամենտարիզմի եւ ընտրական իրավունքի իրականացման հետ կապված տարատեսակ ծրագրեր, ԱՊՀ մասնակից պետությունների տարածքում նաեւ դիտորդական առաքելություններ»,- նշեց նա։

Ավետիսյանի խոսքով՝ իր աշխատանքային փորձը ներառում է ինչպես մասնավոր հատվածը, այնպես էլ հանրային իրավունքի հատվածը՝ իր նշած դրսեւորումներով։

«Կարծում եմ, որ ունեմ անհրաժեշտ մասնագիտական գիտելիքներ, կենսափորձ եւ անհրաժեշտ սկզբունքայնություն, որպեսզի կարողանամ պատշաճ ձեւով իրականացնել Սահմանադրական դատարանի դատավորի պարտականությունները։ 2014 թվականին պաշտպանել եմ իմ դոկտորական ատենախոսությունը, 2015 թվականին նաեւ ստացել եմ պրոֆեսորի գիտական կոչում»,- ասաց Ավետիսյանը։

Արձագանքելով վարչապետ Նիկոլ Փաշինյանն ասաց. «Պարո՛ն Ավետիսյան, ձեզ հաջողություններ ենք մաղթում ԱԺ քննարկումներում եւ ընտրվելուց հետո նաեւ հաջողություններ ՍԴ դատավորի կարգավիճակում»։

Ավետիսյանն իր հերթին շնորհակալություն հայտնեց վարչապետին եւ Կառավարությանը՝ իրեն որպես ՍԴ դատավորի ապաքաղաքականցված թեկնածուի նկատմամբ ցուցաբերած վստահության համար։

«Կրկին ցանկանում եմ ընդգծել ՍԴ-ի առանցքային դերակատարությունը մեր հանրային կյանքում եւ ՍԴ դատավոր ընտրվելու պարագայում, ըստ էության, պարտավորվում եմ իմ մասնագիտական եւ մարդկային որակների առավելագույնը ներդնել ՍԴ-ի հանրային հեղինակությունը բարձրացնելու, ՍԴ դատավորի բարձր կոչմանը արժանի լինելու, ինչպես նաեւ ՍԴ-ի անկախությունն ու անաչառությունը ապահովելու գործում»,- ասաց Ավետիսյանը։