Ուզում են, որ «Սդղի գյոլ»-ում գուցե էլի մարդու աչք հանեն ու չդատվեն. Սիսակ Գաբրիելյան

Հունիսի 30-ին ընդունված օրենքը ոչ մի կապ չուներ այն հարցի հետ՝ դատավորների լիազորությունները դադարել են, թե ոչ։ 

Այսօր սահմանադրական փոփոխությունների թեմայով «Արարատ» մամուլի ակումբում հրավիրած ասուլիսում ասաց «Իմ քայլը» խմբակցության պատգամավոր, ԱԺ պետաիրավական հարցերի հանձնաժողովի անդամ Սուրեն Գրիգորյանը։

«Դատավորների լիազորությունները դադարել են հունիսի 26-ին, երեկ չէ առաջին օրը խորհրդարանում ընդունված օրենքը ընդամենը հետապնդել է հետևյալ նպատակները․ համապատասխանեցնել ՍԴ մասին օրենքը փոփոխություններին, որոնք հունիսի 26-ին ուժի մեջ էին մտել, քանի որ այնտեղ կային դրույթներ, որոնք համապատասխանում էին 2015-ի տեքստին, որը արդեն փոփոխվել էր։ Լուծել այն հարցը, որ այս 3 դատավորը, ում լիազորությունները դադարել էին պաշտոնավարման ժամկետը լրանալու հիմքով, նշանակվի կենսաթոշակ, և էլի փոքր տեխնիկական հարցեր, բայց փորձել ներկայացնել, որ մինչև այս օրենքը չմտնի, լիազորությունները չեն դադարում, իրականում իրավաբանորեն ոչ մի հենք չունի»,- նշեց Սուրեն Գրիգորյանը։

Ասուլիսի մյուս բանախոս, «Իմ քայլը» խմբակցության պատգամավոր Սիսակ Գաբրիելյանն էլ ընդգծեց՝ նախագահի՝ ՍԴ մասին օրենքը չստորագրելը չի նշանակում, որ Սահմանադրական դատարանի հարցը շարունակում է մնալ չլուծված։ «Երբ նախագահը հայտարարեց, որ չի ստորագրելու Սահմանադրական դատարանի մասին սահմանադրական օրենքում կատարված լրացումների և փոփոխությունների նախագիծը, էստեղ կար տարընթերցումներ շատերի կողմից, որ, ահա, ևս մեկ ամիս Սահմանադրական դատարանի հարցը առկախված է մնում կամ 21 օր առնվազն։ Ես ուզում եմ ասել, որ մենք համակարծիք չենք»,- շեշտեց նա։

Սուրեն Գրիգորյանն էլ հարգանքով է վերաբերում Հանրապետության նախագահի կայացրած որոշումներին, անկախ նրանից՝ սպասելի են դրանք, թե ոչ, ընդունելի են, թե ոչ։

Հիշեցնենք, որ նախագահ Արմեն Սարգսյանը հունիսի 30-ին տեղեկացրել էր, որ չի ստորագրելու նույն օրը Ազգային ժողովում ընդունված «Սահմանադրական դատարանի մասին» օրենքում փոփոխություններ և լրացումներ կատարելու մասին օրենքների փաթեթը։

Սիսակ Գաբրիելյանի կարծիքով էլ՝ որոշները ընդդիմանում են արդար դատարաններ ունենալուն. «Ակնկալում են, օրինակ, որ Հյուսիս-հարավի կերած փողերը չվերադարձվի, մարդիկ ընդդիմանում են արդար դատարաններ ունենալուն, որովհետև ուզում են, որ «Սդղի գյոլ»-ում մարդու աչք հանեն և չդատվեն կամ «Հարսնաքար»-ում, օրինակ, 1 ամիս մարդու վզից ցեպով կապեն և շան պես պահեն ու չդատապարտվեն: Էս օրինակները էնքան շատ են, և եթե մենք տեսնում ենք, թե որ հեռուստաընկերությամբ և հատկապես ով է ելույթ ունենում և ընդդիմանում, պարզապես պետք է «Գուգլ»-ում նայել՝ տվյալ անձնավորության վրա քանի քրեական գործ կա։

Պատգամավոր Սուրեն Գրիգորյանն էլ նկատեց՝ պետք է ավելի շատ ոչ թե լսել՝ ինչ է ասում, այլ պետք է ավելի շատ կենսագրությունը ուսումնասիրել, դա ավելի շատ ինֆորմացիա կտա, քան բուն տեքստերը։ «Ամենացավալին այն է, որ մեր նախկին իշխանության շատ ներկայացուցիչների համար հեղափոխությունը ազդակ չեղավ, որ իրենք հասկանան՝ իրենց մարտավարությունը և իրենց ստրատեգիան և իրենց մտածելակերպը հնացել է, իրենք շարունակում են գործել նույն տրամաբանությամբ, ոնց որ ժամանակին չէին հասկանում, որ ժողովուրդն է որոշում, և չի կարելի ժողովրդի ասածը հաշվի չառնել»,- ասաց նա։

Պատգամավորները նաև անդրադարձան քննադատությանը, ըստ որի՝ դատական բարեփոխումները ուշ են իրականացվում։ Սիսակ Գաբրիելյանը նշեց, որ հեշտ է մեկ զանգով հեռացնել դատավորներին, բայց նոր իշխանությունները օրինական ճանապարհով են ուզում լուծել խնդիրը։

Սուրեն Գրիգորյանն էլ ընդունեց, որ եղել է որոշակի հապաղում։ «Բայց ինչքանո՞վ է արդյունավետ խոսել բաց թողնված ժամանակի մասին, քան խոսել ապագայի մասին։ Հանրությունը, իշխանությունը, քաղհասարակությունը բախվում են նրան, որ խնդիրը ավելի բազմաշերտ ու նյուանսային է, քան ի սկզբանե կարող էր թվալ, քան հիմա կողքից թվում է»- նշեց Գրիգորյանը՝ ընդգծելով, որ իր համար ավելի կարևոր է, թե ինչ դատավորներ կգան ապագայում, քան այն, թե ովքեր են գնում։

Նանե Ավետիսյան