«Գրեմիի» առաջադրվածներից եւ ոչ ոք չի կարող կապ ունենալ առաջադրման գործընթացի հետ. Օրբելյանը 4-րդ անգամ էր ներկայացվում

Երեւանի Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնի գեղարվեստական ղեկավար Կոնստանտին Օրբելյանն այս տարի մասնակցում էր «Գրեմմի» 62-րդ մրցանակաբաշխությանը: Օրբելյանը 4-րդ անգամ էր ներկայացվել «Գրեմմի» հեղինակավոր երաժշտական մրցանակին, սակայն դեռեւս չի հաջողվել որեւէ մրցանակ ստանալ: 2020 թվականին եւ դրան նախորդած տարիներին «Գրեմմի» մրցանակաբաշխությանը մասնակցելու, մասնագիտական ձեռքբերումների եւ ակնկալիքների մասին «Հայկական ժամանակ»-ը զրուցել է Օրբելյանի հետ:

- Մաեստրո՛ Օրբելյան, այս տարի մասնակցում էիք «Գրեմմի» 62-րդ մրցանակաբաշխությանը: Եվ արդեն 4-րդ անգամ է, որ ներկայացված էիք «Գրեմմիի», այն ձեզ մասնագիտական ի՞նչ փորձ ու ձեռքբերումներ է տալիս:

- Յուրաքանչյուր արտիստի համար (եւ ոչ միայն արտիստի) մեծ պատիվ է առաջադրված լինել «Գրեմմի» մրցանակաբաշխությանը: Առաջադրումները կատարվում են NARAS-ի (Ձայնագրությունների արվեստի եւ գիտության ազգային ակադեմիա) կողմից, որը տարեկան ստանում է մոտավորապես 20.000 առաջարկություն, եւ դրանց հիման վրա կատարվում են առաջադրումները: Այնուհետեւ տարբեր ոլորտների ավելի քան 350 փորձագետ ստուգում է առաջադրումների համապատասխանությունը հատուկ պայմաններին եւ համապատասխան անվանակարգերին: Վերջնական առաջադրումները կատարվում են Ակադեմիայի քվեարկության իրավունք ունեցող անդամների քվեարկության արդյունքների հիման վրա՝ ընտրելով ընդամենը 5 առաջադրում յուրաքանչյուր անվանակարգում: Ինչ վերաբերում է մասնագիտական փորձ ձեռք բերելուն, ապա այն ձեռք է բերվում տարիների քրտնաջան աշխատանքի արդյունքում: Իսկ նման հեղինակավոր մրցանակաբաշխությանն առաջադրված լինելը արվեստագետի տարիների ստեղծագործական աշխատանքի բարձր գնահատականն է: Ձայնագրվել նման արտիստների հետ նույնն է, ինչ կերտել պատմություն: Այս ձայնագրությունները չեն արվել մրցանակ ստանալու ակնկալիքով, արվել են, որպեսզի պահպանվեն եւ հետագա սերունդներին փոխանցվեն կատարողական արվեստի բարձունքները նվաճած արտիստների ձայնագրությունները: Վերջին 4 տարվա ընթացքում շատ ձայնագրություններ եմ անում եւ հպարտ եմ դրանցից յուրաքանչյուրով: Ցավոք, երբ այնպիսի մեծ երգիչներ, ինչպիսին Դմիտրի Խվորոստովսկին էր, վաղաժամ հեռանում են կյանքից, ձայնագրությունների միջոցով ունենում ենք նյութեր, որոնց օգնությամբ կարող ենք հիշել նրանց հրաշալի ձայները եւ լսել այդ հանճարեղ արտիստների յուրօրինակ կատարումները:

- Ձեր ո՞ր գործերն էին այդ 4 անգամներին ներկայացվել մրցանակաբաշխությանը:

- Առաջին անգամ առաջադրվել եմ 2015 թ.՝ որպես դիրիժոր՝ նվագախմբի հետ լավագույն վոկալ ստեղծագործությունների ձայնագրության համար (Best Vocal Recital CD) ամերիկացի հրաշալի տենոր Լոուրենս Բրաունլիի եւ Կաունասի սիմֆոնիկ նվագախմբի մասնակցությամբ: 2 տարի անց՝ 2017 թ., առաջադրվել եմ Սվիրիդովի Russia Cast Adrift ձայնագրության համար, որը ձայնագրվել էր հանգուցյալ Դմիտրի Խվորոստովսկու հետ Սանկտ Պետերբուրգի ակադեմիական սիմֆոնիկ նվագախմբի մասնակցությամբ: Երրորդ անգամ առաջադրվել եմ 2018 թվականին «Լավագույն օպերային ձայնագրություն» (BEST OPERA RECORDING) անվանակարգում «Ռիգոլետտո» օպերայի ձայնագրությամբ՝ Դմիտրի Խվորոստովսկու, Նադին Սիերրայի (ամերիկացի աստղ-սոպրանո) եւ տենոր Ֆրանչեսկո Դեմուրոյի հետ: Եվ վերջինը, առաջադրվել եմ «А te о Cara» ձայնասկավառակի համար՝ Մետրոպոլիտան օպերայի մեներգիչ Սթիվեն Կոստելլոյի եւ Կաունասի սիմֆոնիկ նվագախմբի մասնակցությամբ:

- Դեռեւս ոչ մի անգամ կարծես թե մրցանակի չեք արժանացել, մտադի՞ր եք մրցանակաբաշխությանը մասնակցել այնքան, քանի դեռ հաղթանակ չեք գրանցել:

- Ինչպես նշեցի վերեւում, ձայնագրությունները կատարվում են պատմության համար: Առաջադրվածներից եւ ոչ մեկը չի կարող որեւէ կապ ունենալ առաջադրման գործընթացի հետ, գաղափար անգամ չենք ունենում, թե ով կարող է առաջադրվել: Ակադեմիան ունի առաջադրման իր գործընթացը, որը համառոտ նկարագրեցի վերեւում: Տեսնենք՝ ինչ կլինի հետագայում: Նշեմ, որ ավարտում ենք 2 ձայնասկավառակի ձայնագրություն մեր հայ աստղերի մասնակցությամբ՝ բարիտոն Գեւորգ Հակոբյանի և ֆանտաստիկ տենոր Հովհաննես Այվազյանի հետ: Մոտ ժամանակներում կթողարկվի իմ մասնակցությամբ ձայնագրությունների 5 ձայնասկավառակ՝ Վինչենցո Բելլինիի «Պուրիտաններ» օպերայի, հիասքանչ Լոուրենս Բրաունիի եւ սոպրանո Սառա Կոբուռնի հետ Կաունասի սիմֆոնիկ նվագախմբի եւ երգչախմբի մասնակցությամբ, այնուհետև՝ հիանալի ձայնասկավառակ՝ Վիվալդիի, Հասսեի եւ Գլյուկի արիաներով, որը ձայնագրել ենք հրաշալի սոպրանո հայուհի Իզաբել Բեյրաքդարյանի հետ, ձայնագրվել են նաև արիաներ հռչակավոր ռուս սոպրանո Եկատերինա Սիուրինայի և նրա ամուսնու՝ հրաշալի տենոր Չարլզ Կաստրոնովոյի հետ, այնուհետեւ՝ արիաների մի հիանալի ձայնասկավառակ՝ հիասքանչ սոպրանո Օքսանա Դայկայի հետ եւ արիաների գեղեցիկ ձայնասկավառակ՝ փառահեղ թավշյա ձայն ունեցող, մեցցո-սոպրանո Օքսանա Վոլկովայի հետ: Տեսնենք՝ ինչ կլինի ...