Քրեական ենթամշակույթ կրողների նկատմամբ պայքարն անզիջում կլինի. ՇՄ դատախազ

Շիրակի մարզի դատախազ Կարեն Գաբրիելյանն ամփոփել է 2019 թվականը: Որպես նախաբան՝ նշեց, որ 2018-ի համեմատությամբ մարզում հանցագործությունների թիվն ավելացել է 113-ով: Շիրակի մարզում արձանագրվել է հանցագործությունների 1422 դեպք՝ 2018 թ.-ի 1309-ի համեմատ: Հիմնականում աճել են միջին ծանրության հանցագործությունների թվերը: Անցած տարին աչքի է ընկել ավտոմեքենաներից կատարված գույքի գողություն մեծ թվով: 

Դատախազը սա պայմանավորեց 2019-ին ավտոմեքենաների մաքսազերծման գործընթացը Գյումրի տեղափոխելու հետ: Մարզի դատախազը նշեց, որ նաեւ քաղաքային տրանսպորտում են գողության դեպքեր արձանագրվել: Իրավապահների տեսադաշտում արդեն որոշ մարդիկ են հայտնվել: «Ձեռագիրը նույնն է, դեպքերն էլ հիմնականում նույն տարածքում են արձանագրվում՝ կենտրոնական շուկայի հատվածում: Սա վկայում է, որ հանցագործությունը կատարվում է նույն անձի կամ անձանց կողմից: Ինձ ոստիկանության աշխատակիցները հավաստիացրել են, որ ոստիկանության տեսադաշտում կան անձինք, որոնց հայտնաբերելու ուղղությամբ գործողությունները շարունակվում են»:

2019-ին Շիրակի մարզում արձանագրվել են սպանության 2 և սպանության փորձի 3 դեպք, որոնք բացահայտվել են։ Սպանության դեպքերից մեկը մոր կողմից մանկահասակ երեխային, երկրորդը որդու կողմից մորը սպանելու դեպքերն են եղել:  

Անցյալ տարի կոռուպցիոն բնույթի 189 նյութ է պատրաստվել, որոնցից 138-ով հարուցվել է քրեական գործ: Կաշառք ստանալու, կաշառք տալու դեպքերով 107 քրեական գործ է հարուցված: Կոռուպցիոն բնույթի հանցագործություններ են արձանագրվել սոցիալական ծառայություններում, բժշկական հիմնարկներում, «Արփի լիճ» ազգային պարկում, կրթության ոլորտում, տարբեր համայնքներում:

«Սեյսմիկ ծառայություններում կատարված հանցագործություններ եւս կան: Անձինք փաստացի չեն աշխատել, բայց նրանց տրվել են գումարներ: Կոռուպցիոն բնույթի հանցագործություններ հիմնականում արձանագրվել են սոցիալական ոլորտում, երբ որ նպաստառուներին նպաստ կամ դրամական օգնություն տալու համար պահանջել, վերցրել են որոշակի գումար»,- ասաց Կարեն Գաբրիելյանը: 2019-ին կաշառք տալու-վերցնելու մեխանիզմները փոխվել են, դրանք մեծ մասամբ աշխատասենյակներից, հաստատությունների տարածքներից դուրս են իրականացվել:

2019 թվականին Շիրակի մարզում նվազել են անչափահասների կողմից կատարված հանցագործությունների դեպքերը: 12 անչափահասի կողմից կատարված 14 հանցագործության դեպք է արձանագրվել, հիմնականում՝ ծեծ, միջանձնային հարաբերությունների պարզաբանումներ, գողություն: Արձանագրվել է նաեւ անչափահասի կողմից ծանր մարմնական վնասվածք պատճառելու մեկ դեպք:

Ընտանեկան բռնության 9 դեպք է արձանագրվել: Կարեն Գաբրիելյանն ասաց՝ չնայած բռնության ենթարկված կանայք բողոք չեն ներկայացրել, սակայն ինքն օգտվել է օրենքով ունեցած բացառիկ իրավունքից եւ հարուցել է քրեական գործեր: 7 գործ արդեն ուղարկվել է դատարան:

Ինչո՞ւ է ձգձգվում ՇՊՀ ռեկտորի պաշտոնակատար Երվանդ Սերոբյանի հետ առնչություն ունեցող քրեական գործի քննությունը, արդյոք կա՞ դատախազի կողմից հովանավորչություն: Կարեն Գաբրիելյանն ասաց՝ հովանավորչություն չկա, գործի ձգձգումն էլ հարցաքննություններով է պայմանավորված: Պաշտոնեական լիազորությունները չարաշահելու դեպքի առթիվ հարուցված քրեական գործի շրջանակում հարցաքննվել է 30-ից ավելի անձ՝ դասախոսներ եւ ուսանողներ: «Հովանավորչություն չկա, որեւէ մեկը չի կարող ինձ խնդրել ինչ-որ մեկի օգտին գործողություններ կատարել: Քննել ենք ամբիոնի վարիչին, որն ասում է՝ ինքը պարապել է, նաեւ ասում է՝ անձամբ ռեկտորից ստացել է այդ դասաժամերի գումարը: Բայց մյուս կողմից քննաթերթիկներում եւ աշխատանքային պլանում ստորագրությունները ռեկտորի պաշտոնակատարինն են: Քրեական գործին կցված են նաեւ առկա ձայնագրությունները: Այստեղ մենք պետք է քննարկենք նաեւ պաշտոնեական կեղծիք կատարելը»,- ասաց դատախազը: 

Քրեական ենթամշակույթին հարող անձինք եւս դատախազության ուշադրության կենտրոնում են: Նրանց դեմ պայքարը, ըստ Գաբրիելյանի, անզիջում է լինելու: «Կա՛մ նման անձինք հրաժարվելու են այդ մշակույթը կրելուց, կա՛մ հայտնվելու են քրեակատարողական հիմնարկներում: Ես դա խոստանում եմ»,- հավելեց Գաբրիելյանը:

Դիտարկմանը՝ Գյումրիում քրեական ենթամշակույթին հարողները ոչ թե անհատներ են, այլ գերդաստաններ, արդյոք նրանց դեմ հնարավոր կլինի՞ պայքարել, դատախազն ասաց՝ այո՛: «Կգնան, գերդաստաններով էլ կնստեն»: