Թրամփը դարձավ ԱՄՆ-ի պատմության՝ իմփիչմենտի ենթարկված 3-րդ նախագահը. ինչ է սպասվում հետո

Ինչպես արդեն հայտնել ենք, ԱՄՆ-ի Կոնգրեսի Ներկայացուցիչների պալատը իմփիչմենտ հայտարարեց նախագահ Դոնալդ Թրամփին: Այսպիսով, Թրամփը դարձավ ԱՄՆ-ի պատմության 45 նախագահներից երրորդը, ում օրենսդիր մարմինը իմփիչմենթի ենթարկեց:

BBC-ն անդրադարձ է կատարել իմփիչմենթի գործընթացին՝ վերլուծելով օրենսդիրի հետագա քայլերը, ներկայացնելով սպասվող գործընթացները եւ իրադարձության թեր եւ դեմ կողմերը:

Այսպես. Ներկայացուցիչների պալատի որոշումը այժմ փոխանցվում է Կոնգրեսի վերին պալատին՝ Սենատին եւ փաստացի այն կարող է հեռացնել Թրամփին պաշտոնից՝ նախագահական ընտրություններից մի քանի ամիս առաջ: Սակայն այս ամենի հավանականությունը բավական փոքր է, քանի որ սենատորների մեծ մասը Հանրապետական կուսակցության ներկայացուցիչներ են եւ Դոնալդ Թրամփի շրջապատից:

Նախագահի մեղադրանքները վերջնականապես հաստատելու համար հարկավոր է Սենատի 2/3-ի քվեարկությունը, կամ՝ 100 սենատորից 67-ինը:

100 սենատորներից 53-ը հանրապետականներ են: Սա նշանակում է, որ դեմոկրատներին հարկավոր է 20 հանրապետականների աջակցությունը, ինչպես նաեւ բոլոր 45 դեմոկրատների եւ 2 անկախ սենատորների ձայները:

Սենատում հանրապետականների առաջնորդ Միտչ Մաքքոնելն արդեն հայտարարել է, որ Թրամփի իմփիչմենտի գործընթացը քաղաքական է,  դատավարության հետ որեւէ կապ չունի ու ինքը կարծում է՝ Սենատում որոշում կկայացվի ներկուսակցական շահերից ելնելով, ինչպես արդեն տեղի ունեցավ Ներկայացուցիչների պալատում:

ԱՄՆ-ի ողջ պատմության ընթացքում իմփիչմենտ է հայտարարվել 2 նախագահի՝ Էնդրյու Ջոնսոնին, 1868 թվականին, եւ Բիլ Քլինթոնին՝ 1998-ին, երկուսն էլ արդարացվել են Սենատի կողմից: Բացի այդ, 1947 թվականին նախագահ Ռիչարդ Նիքսոնը իմփիչմենթի սպառնալիք տեսնելով ինքնակամ լքեց նախագահի պաշտոնը՝ չսպասելով Կոնգրեսի որոշմանը:

Եթե սենատորները գտնում են, որ նախագահը մեղավոր է, ուրեմն իմփիչմենտը համարվում է կայացած, երկրի ղեկավարը լքում է իր պաշտոնը, մինչեւ հաջորդ ընտրություններ նրան փոխարինում է երկրի փոխնախագահը, բայց ինչպես արդեն նշեցինք, նման նախադեպ Միացյալ Նահանգների պատմության մեջ դեռեւս չի գրանցվել: Սենատն անգամ կարող է քվեարկությամբ անմիջապես մերժել իմփիչմենտի գործընթացը՝ առանց մեղադրանքների մասին բերված ապացույցների ուսումնասիրման:

Նշվում է, որ դեմոկրատների կողմից Թրամփի իմփիչմենթի հարցով գործընթացը սկսելը մի շարք ռիսկներ էր պարունակում, հատկապես՝ նախընտրական շրջանում:

Դեմոկրատների ներկայացուցիչներն այս ամենը պարզաբանել են այն հանգամանքով, որ Թրամփը կատարել է քայլեր,  որոնց համար արժեր նրան ենթարկել իմփիչմենտի եւ իրենք, որպես օրենսդիրներ, պարտավոր էին դա անել, իսկ նման  գործընթաց չսկսելը կարող էր վատ օրինակ լինել հաջորդ նախագահների համար:

Թրամփը կատեգորիկ հերքում է իրեն ուղղված բոլոր մեղադրանքները, նա դրանք հերքել է նաեւ ԱՄՆ-ի Ներկայացուցիչների պալատի նախագահ Նենսի Փելոսիին ուղղված նամակում՝ մեղադրելով Փելոսիին ամերիկյան դեմոկրատիային պատերազմ հայտարարելու մեջ:

Washington Post-ն ու ABC-ն հրապարակել են քաղաքացիների շրջանում վերջին հարցումների արդյունքները, համաձայն որոնց՝ ամերիկացիների 49 %-ը կողմ է իմփիչմենտին , իսկ 46%-ը՝ դեմ:

 Հարցումների արդյունքների հրապարակումից հետո նշվել է, որ դժվար թե գործընթացը վնասի Թրամփին, որովհետեւ նա ունի սենատորների մեծ մասի աջակցությունը:

Սենատը Ներկայացուցիչների պալատի որոշումը կքննարկի հունվարի 7-ին:

Հիշեցնենք՝ Կոնգրեսի աշխատանքը խոչընդոտելու եւ իշխանության չարաշահման համար ԱՄՆ-ի Կոնգրեսի ներկայացուցիչների պալատի դեմոկրատները նախագահ Դոնալդ Թրամփի իմփիչմենթի գործով նրան 2 մեղադրանք են ներկայացրել։

Նշվում է, որ նախագահը մեղադրվում է լիազորությունների չարաշահման եւ Ուկրաինայի նախագահ Վլադիմիր Զելենսկիի վրա ճնշումներ գործելու մեջ՝ նրա միջոցով իր քաղաքական հակառակորդ Ջո Բայդենին վնաս հասցնելու եւ նրա որդու նկատմամբ գործ հարուցելու համար: