Խաչատուրովի նկատմամբ սահմանային էլեկտրոնային տեղեկատվական համակարգում արգելք կիրառված չէ․ մեղադրող դատախազ

Մարտի 1-ի գործով ամբաստանյալ Յուրի Խաչատուրովի նկատմամբ սահմանահատման արգելք կիրառված չէ, հետեւաբար միջնորդությունն անհիմն է։ Այս մասին այսօր՝ Մարտի 1-ի գործով դատական նիստի ժամանակ, հայտարարեց մեղադրող դատախազ Պետրոս Պետրոսյանը՝ դատարանին խնդրելով Խաչատուրովի պաշտպանի միջնորդությունը թողնել առանց քննության, քանի որ այն չի պարունակում քրեադատավարական պահանջ։

Ավելի վաղ Խաչատուրովի պաշտպան Միհրան Պողոսյանը միջնորդություն ներկայացրեց ամբաստանյալի ազատ տեղաշարժման խախտված իրավունքը վերականգնելու եւ նրա սահմանահատման վրա դրված արգելանքը վերացնելու մասին:

Պետրոսյանն ասաց, որ ներկայացված միջնորդությունը, որը պիտի հարուցվեր այս դատական քննության ընթացքում եւ քննության առարկա դառնար, պետք է վերաբերեր այն գործողություններին, որոնք իրականացվել էին այս վարույթի շրջանակներում, շարունակում էին առկա լինել, եւ որոնց արդյունքում միջնորդություն հարուցող անձը պետք է քրեադատավարական հստակ պահանջ ներկայացներ՝ դրա վերաբերյալ ակնկալելով դատարանի որոշում։

Սակայն, մեղադրող դատախազի համոզմամբ, հարուցված միջնորդությունն ուներ մոտավորապես հետեւյալ ձեւակերպումը․ «Մենք հարցումներ ենք կատարել եւ դրա արդյունքում վարույթն իրականացնող մարմնից ստացել տեղեկություններ, որ այս քրգործի շրջանակներում Խաչատուրովի սահմանային էլեկտրոնային տեղեկատվական համակարգում մուտքագրված արգելք կիրառված չէ»։

Հետեւաբար, թե պաշտպաններն ինչ են ակնկալում այս դատարանից, Պետրոս Պետրոսյանի համար անհասկանալի է․ «Վարույթի շրջանակներում մեզ տեղեկություններ հայտնի չեն, որ այս քրգործի շրջանակներում սահմանային էլեկտրոնային տեղեկատվական համակարգում պաշտպանի կողմից վկայակոչված կառավարության համապատասխան որոշման համատեքստում կիրառվել է արգելանք»,- ասաց նա՝ հավելելով, որ միջնորդությամբ դարձյալ փորձ կատարվեց ներկայացնել, որ այնպիսի գործողություններ են տեղի ունեցել, որոնք խախտում են անձանց իրավունքները։

«Պետք է փաստել, որ ներկայացված նյութերից եւ պաշտպանի կողմից ստացված պարզաբանումներից ինձ համար հասկանալի եղավ, որ որպես ամբաստանյալ սահմանային էլեկտրոնային տեղեկատվական համակարգում կիրառված արգելանք չկա, եւ ոստիկանության պարզաբանումից հասկանալի էր, որ ամբաստանյալը, լինելով գործով մասնակցող անձ, ունի պարտավորություն՝ այլ տեղանք չմեկնելու՝ վարույթն իրականացնող մարմնի թույլտվությամբ»։

Անդրադառնալով այս գործի շրջանակներում որպես միջնորդություն հարցված այս հանգամանքին՝ Պետրոս Պետրոսյանը փաստեց, որ դատարանի առջեւ կարող է բարձրացվել մեկ հարց․ արդյոք սահմանային էլեկտրոնային տեղեկատվական համակարգում արգելք կիրառվա՞ծ է, որը նախատեսված է օրենսդրությամբ։ Մեղադրող դատախազը հայտարարեց, որ պաշտպանի կողմից հարուցված միջնորդությունը քրեական գործի հետ աղերս չունի, եւ չի կարող դատարանից սպասել մի հետեւության, թե դատարանն ինչպիսի գործողություններ պետք է իրականացնի։

Միանալով Պետրոս Պետրոսյանի դիրքորոշմանը՝ մեղադրող մյուս դատախազ Գեւորգ Բաղդասարյանն էլ իր հերթին հայտարարեց, որ ներկայացված միջնորդությունը դատավարական առարկա չունի․

«Ակնհայտ էր, որ սույն գործով սահմանահատումների արգելք դրված չէ, եւ միջնորդությունից տպավորություն էր, որ էստեղ քննարկում ենք ՀՀ սահմանից ելումուտի ընդհանուր պրակտիկան։ Միջնորդությունը լրացնելիս հայտարարություններ հնչեցին, որ այդ տիպի սահմանափակումները պարբերական են եւ պիտի վերցվեն։ Ես վստահ եմ, որ դուք չեք կարող որոշել ՀՀ սահմանից մեղադրյալների ելումուտերի օրինականությունը»,- ասաց Բաղդասարյանը՝ հույս հայտնելով, որ սույն գործը վարույթ ընդունելիս Խաչատուրովի սահմանահատումների արգելք չի սահմանվել, իսկ միջնորդությունից պարզ էր, որ քննիչը եւս այդպիսի արգելք չի սահմանել։

Նշելով, որ Խաչատուրովի պաշտպանի ներկայացրած միջնորդությունը դատավարական որեւէ առարկա չունի՝ Բաղդասարյանը շեշտեց, որ այն չի կարող այստեղ քննարկվել․

«Դատարանն իրավասու չէ նաեւ ԱԱԾ-ից ու ոստիկանությունից պահանջել նախկինում կատարված գործողությունների կամ կայացրած որոշումների կամ գրած գրությունների հիմքեր, որովհետեւ դրանք սույն դատաքննության առարկա չեն կարող հանդիսանալ։ Այս պահին սահմանահատման արգելք չկա, նույնիսկ չլսեցի՝ ով է ուզել դուրս գալ ու արգելել են, հետեւաբար դատարանը որեւէ արգելք սահմանել կամ վերացնել կամ նախկինում կիրառվածի հիմքեր պահանջել չի էլ կարող»,- եզրափակեց մեղադրող դատախազ Գեւորգ Բաղդասարյանը։