Բուհից ոչ ոք դուրս չի մնա, իսկ նոյեմբերի բացակաները հաշիվ չեն. կայացավ Գեղամ Գեւորգյանի եւ ուսանողների հետ հանդիպումը

Երեւանի պետական համալսարանի պատմության ֆակուլտետում այսօր կայացավ ուսանողների եւ դասախոսների սպասված հանդիպումը բուհի ռեկտորի պաշտոնակատար Գեղամ Գեւորգյանի հետ:

Հանդիպման պատճառը բուհերի ոչ մասնագիտական ֆակուլտետներում հայոց լեզու, հայ գրականություն եւ հայոց պատմություն առարկաները ոչ պարտադիր դառնալու հեռանկարի վերաբերյալ ուսանողների եւ դասախոսների մտահոգությունն է, մասնակիցները՝ հայ բանասիրության, պատմության եւ այլ ֆակուլտետներից ուսանողներ, դասախոսական կազմից ներկայացուցիչներ:

Գեղամ Գեւորգյանն իր խոսքը հետեւյալ նախադասությամբ սկսեց. «Այս հանդիպումով վերջնական ոչ մի որոշում չի կայացվելու, ես պարզապես պատասխանելու եմ ներկաներին հուզող հարցերին»:

Մասնակիցներին հուզող հարցերը նույնն էին, հնչած որոշ պատասխաններ՝ եւս: Ինչպես նշեց ռեկտորի պաշտոնակատարը, ներկաները չպետք է զարմանան. իրեն 7 անգամ նույնը հարցնելով՝ 7 անգամն էլ նույն պատասխանն են ստանալու:

եթե Գեւորգյանն ուսումնական ծրագրերի ղեկավար լիներ

ԵՊՀ աշխատակից, ուսանողական ծրագրերի համակարգող Էդվարդ Գալստյանը հարցրեց, թե արդյոք հնարավոր է, որ «Բարձրագույն կրթության եւ գիտության» օրենքի նախագծի հաստատումից հետո ԵՊՀ-ում նորմ սահմանվի, որ գոնե միայն հայագիտական առարկաների համար սահմանվի պարտադիր դասաժամերի քանակ բոլոր ֆակուլտետներում: Գալստյանն իր մտահոգությունը հայտնեց. ֆակուլտետների դեկանները հնարավոր է՝ գերադասեն իրենց դասախոսներին ավելի շատ դասաժամ տրամադրել եւ չուսումնասիրել այս առարկաները:

Հարցին ի պատասխան՝ Գեւորգյանը նշեց, որ համոզված է՝ բուհի ֆակուլտետների մեծամասնությունում, անկախ օրենքի ընդունումից, տվյալ առարկաները կուսումնասիրվեն, իհարկե, ոչ այն ձեւաչափով, ինչ այժմ:

Թեեւ ռեկտորի պաշտոնակատարն իր կարծիքին է մնում, որ որեւէ առարկա օրենքի ուժով պարտադրելը ճիշտ չէ, այնուամենայնիվ, եթե ուսումնական ծրագրերի ղեկավար լիներ, ապա մի քանի փոփոխություն կառաջարկեր: Ֆակուլտետներում հայոց լեզուն 2 կիսամյակ 2 ժամով անցնելու փոխարեն անցնել 1 կիսամյակ 4 ժամով, ընդ որում, տարբեր ֆակուլտետներ՝ կախված մասնագիտությունից, իրենք կընտրեին, թե որ կիսամյակում անցնել:

«Իսկ «հայոց պատմություն»-ը կտանեի 3-4-րդ կուրս, այս առարկան հասկանալն ավելի հասուն կենսափորձ է պահանջում»,- նշեց Գեւորգյանը:

երկուստեք անհաջող հանդիպում

Հայ բանասիրության ֆակուլտետի 4-րդ կուրսի ուսանող Գեւորգ Գյուլումյանը պնդեց. Գեւորգյանի դիրքորոշումն են ցանկանում իմանալ պրոֆեսորադասախոսական կազմի հետ կայացած հանդիպման ընթացքում Կրթության, գիտության, մշակույթի եւ սպորտի նախարար Արայիկ Հարությունյանի անհարգալից պահվածքի հետ կապված: 

Ի պատասխան՝ ռեկտորի պաշտոնակատարը նշեց, որ այդ հանդիպումը պատառիկներով է դիտել, կարծում է, որ մի կողմում հավաքված մասնակիցներին հաջողվեց նախարարին հունից հանել: «Այլեւս չփորձեք ստանալ գնահատականի գնահատական՝ երկուստեք անհաջող հանդիպում էր»,- նշեց Գեւորգյանը:

նոյեմբերի բացակաները հաշիվ չեն

Ներկա ուսանողներին նաեւ այլ հարցեր էին մտահոգում. դասադուլի պատճառով բացակաները շատ են, հնարավո՞ր է՝ հետագայում խնդիրներ առաջանան:

Հայ բանասիրության ֆակուլտետի 4-րդ կուրսի ուսանող Իշխան Թովմասյանը նշեց, որ մամուլում լուրեր են տարածվել, թե նախարարն իր մտերիմների մոտ ասել է, որ դասադուլներին միացածները բուհից դուրս են մնալու:

Գեւորգյանը չցանկացավ մեկնաբանել մի բան, որի մասին անձամբ չի լսել, սակայն հիշեցրեց՝ առաջին օրվանից բողոքի ակցիայի մասնակիցներին հանդիպել է, ասել, որ իրենց գործողությունների մեջ ազատ են, կարեւորը շենքում անկարգություն չանեն:

Մի փոքր ուշ ռեկտորի պաշտոնակատարի հայտարարությունն ուսանողների սրտով էր. «Դասադուլի պատճառով գոնե այս կիսամյակ ոչ ոք դուրս չի մնա բուհից, բայց եթե անպատրաստ գաք քննության, անպայման անբավարար կստանաք»,- նշեց Գեւորգյանը՝ ավելացնելով՝ ինչքան էլ պնդեն, իր կարծիքին է մնալու՝ սա ոչ թե դասադուլ է, այլ դասի չնստել, քանի որ ուսանողների բողոքը, պահանջն իրենից չէ, օրենքից է:

Գեւորգ Գյուլումյանն իր հերթին հավելեց՝ հատկապես «արտակարգ իրավիճակների եւ քաղաքացիական պաշտպանության հիմնահարցեր» առարկայի դասախոսները բացակայությունների նկատմամբ խիստ զգայուն են, իսկ ինքը, լինելով նախաձեռնության հեղինակ, չի ցանկանում, որ ուսանողները հետագայում խնդիրներ ունենան: Համեմատության համար Գեւորգը հիշեցրեց՝ անցած տարի, երբ երկրում հազարավորներն էին դասադուլ անում, բացակայությունները հաշվի չառան:

Այս դիտարկման պատասխանը եւս ոգեւորեց ներկաներին: «Ես ցուցում կտամ, որ այս առարկայի նոյեմբեր ամսվա բացակայությունները չհաշվեն»,- ասաց Գեւորգյանը՝ հավելելով, որ խոսքը միայն այդ ամսին է վերաբերում:

կիսադատարկ ֆակուլտետներ

Հայ բանասիրության ֆակուլտետի դասախոսներից մեկը նշեց, թե արդյոք այս նախագիծը չի նպաստի, որ հետագայում լինեն հայ բանասիրության եւ պատմության կիսադատարկ ֆակուլտետներ, քանի որ վերջին տարիներին ուսանողների շրջանում այս ֆակուլտետների նկատմամբ ակտիվությունն է նվազել:

Ռեկտորը կիսեց այն համոզմունքը, որ ընդունվողների քանակի նվազում կա, սակայն համաձայն չէ, որ հայագիտական առարկաների նկատմամբ վերաբերմունքը կարող է այսուհետ ավելի նվազել: Օրենքը կապ ունի ոչ թե ֆակուլտետի գոյության կամ չգոյության, այլ որոշ հաստիքների հետ:

եթե չլինեն «բարի դասախոսները»

Ռեկտորի պաշտոնակատարը հանդիպման ընթացքում անդրադարձավ նաեւ այն փաստին, որ բուհի հեղինակությունն այսօր ինչ-որ չափով ընկել է գործատուների համար, իսկ մեղավորը «բարի դասախոսներն» են: Նրանք, ովքեր ուղղակի նշանակում են քննություն, բարձր գնահատականներ, արդյունքում այդ կեղծ գնահատականով ավարտած շրջանավարտներին չի ընդունում գործատուն եւ սկսում է չվստահել բուհին: «Եթե ուզում ենք բարձրացնել բուհի վարկանիշը, պետք է գնահատականները լինեն հավաստի»,- նշեց Գեւորգյանը:

Ռեկտորի պաշտոնակատարը մեկ այլ առաջարկ արեց. իսկ եթե ընդհանրապես բուհում լուծարքները դուրս գա՞ն, ինչպես շատ առաջատար բուհերում: Գոյություն ունի մեխանիզմ, որն առաջարկում է ուսանողին կիսամյակի ընթացքում իրենց դրական գնահատականն ապահովել՝ առանց քննության ներկայանալու:

Գեւորգյանը խոստովանեց, որ ինքը ցանկանում է հասնել դրան, սակայն միայնակ չի կարող, ներկաների օգնությունն է անհրաժեշտ:

Անի Ավագյան

Տպել
660 դիտում

Մեր նպատակը կապիտալ ծախսերի խթանման միջոցով նոր աշխատատեղերի ստեղծումն է. վարչապետ (տեսանյութ)

ՀՀ քաղաքացիական ավիացիայի կոմիտեն լիցենզիայից չի զրկվել. կոմիտեն հայտարարություն է տարածել

Վերակենդանացման բաժանմունքներում 25 հիվանդ կա. նրանցից 1-ի վիճակը ծայրահեղ ծանր է

Կորոնավիրուսը, Արմեն Մուրադյանը եւ նախարարի պորտֆելը

ՀՀ մարզերում ձյուն է տեղում, Լարսը բաց է միայն բեռնատարների համար

Արցախում առայսօր կորոնավիրուսային վարակի դեպք չի գրանցվել, մեկուսացվածներ ևս չկան

Աբովյանի բնակարաններից մեկում 62-ամյա տղամարդու դի է հայտնաբերվել

Ապրիլի 6-ին Մոսկվայից կազմակերպվող չարտերային թռիչքի ուղևորներն ընտրվել են ըստ առաջնահերթության

Ապրիլի 4-ին Արցախում աճել է ադամաթզի, սոխ գինը, անկել՝ վարունգի, բենզինի, կիտրոնի, լոլիկի և այլ ապրանքների գները

ՀՀ ՊՆ պարզաբանումը լրատվամիջոցներում հրապարակված բաց նամակի կապակցությամբ

Երևանում բետոնե պատշգամբ է փլուզվել

Մեր «մշտական կորոնավիրուսը»

«Աղավնո», «Խարխափուտ», «Խնձորեսկ» բժշկասանիտարական հսկիչ կետերում ջերմաչափվում են Արցախ մեկնող բոլոր քաղաքացիները

Մոսկվա-Երևան չարտերային թռիչքի ապրիլի 6-ի տոմսերը սպառված են. երկրորդ թռիչքի անհրաժեշտություն կա

Ապրիլի 6-ին, ժամը 18.30-ից Նիկոլ Փաշինյանը ֆեյսբուքի իր էջի ուղիղ եթերում կպատասխանի քաղաքացիների հարցերին

Վթարի ենթարկված շտապօգնության մեքենայում կորոնավիրուսով հիվանդ 3 պացիենտ է գտնվել. Ալինա Նիկողոսյան

2017թ-ից հետախուզման մեջ գտնվող տղամարդը ներկայացել է ոստիկանության Արաբկիրի բաժին

ԱԻՆ-ը Երևանում 49 սուպերմարկետ և 128 հանրային տարածք է վարակազերծել

Կենտրոն համայնքում քամին ծառեր է տապալել

Հայաստանում կորոնավիրուսով վարակվածներից 500-ը բուժման կարիք չունի, նրանք նաև ջերմություն չունեն. Նիկոլ Փաշինյան