Հանցագործներին «Արցախը փրկողներ» անվանել չի կարելի․ դա նրանց առանձնապես չի էլ օգնի

30/11/2019 schedule16:35

Արցախի հարցը միշտ էլ ներքաղաքական շահարկումների առարկա է եղել, բայց այն, ինչ տեղի է ունենում այս օրերին, իսկապես աննախադեպ է եւ վտանգավոր, որովհետեւ ոչ միայն հասարակության մեջ կասկածամտություն է սերմանում, այլեւ քարոզչական նպատակներով կարող է օգտագործվել մեր հակառակորդների կողմից:

Տեսեք, թե ինչ է տեղի ունենում: Հայաստանում մեկը մյուսի ետեւից աղմկահարույց քրեական գործեր են հարուցվում նախկինում կատարված հանցագործությունների փաստերով, եւ դրանցում, որպես կանոն, շոշափվում են նախկին բարձրաստիճան պաշտոնյաների անուններ: Տվյալ դեպքում նույնիսկ էական չէ, թե ինչ հանցանքների մասին է խոսքը՝ պաշտոնեական լիազորությունների գերազանցո՞ւմ, ապօրինի հարստացո՞ւմ, թե՞, ասենք, շարքային քաղաքացիների նկատմամբ բռնություններ, ունեզրկում եւ այլն: Էականն այն է, որ հանրային գիտակցության մեջ բոլոր այդ նախկին պաշտոնյաները հանցագործներ են: Ընդ որում՝ նրանց պաշտպանությանը լծված քարոզիչները չեն էլ փորձում վիճարկել նրանց հանցագործ լինելը: Դրա փոխարեն հայտարարում են, թե այդ գործերը քաղաքական նպատակներով են հարուցվել, եւ թիրախն Արցախն է: Իբր՝ իշխանությունները մտադիր են «հանձնել Արցախը» եւ նախապես մեկուսացնում են բոլոր նրանց, ովքեր կարող են խանգարել եւ խափանել այդ ազգադավ ծրագիրը: Հասկացա՞ք: Ասենք՝ մեկին դատում են պետությունից տասնյակ միլիոններ թալանելու համար, մյուսին՝ բանակի հաշվին ահռելի հարստություն կուտակելու համար, երրորդին՝ թմրաբիզնեսի կամ սովորական բանդիտիզմի համար, ու «պարզվում է», որ այդ ամենն արվում է «Ղարաբաղը ծախելու» նպատակով:

Մի պահ ենթադրենք, թե «երկու կողմերն» էլ իրավացի են, այսինքն՝ այդ մարդիկ իսկապես ծանրագույն հանցանքներ են կատարել, բայց իրավապահները նրանց մեկուսացնում են ոչ թե դրա համար, այլ իշխանությունների հրահանգով՝ որպեսզի առանց խոչընդոտների «ծախեն Ղարաբաղը»: Ի՞նչ է ստացվում: Ստացվում է, որ մեր հասարակության ամենահայրենասեր խավը հանցագործներն են՝ կոռումպացվածները, ընտրակեղծիքներով իշխանություն պահածները, պետության հաշվին միլիարդներ կուտակածները, զինված բանդաներ ունեցողները, ժողովրդի վրա կրակածները եւ այլն, իսկ հանցագործներին պատասխանատվության ենթարկելու եւ օրենքի առջեւ բոլորի հավասարության կողմնակիցներն «ապազգային տարրեր» են, պարզ ասած՝ ազգի դավաճաններ: Իրականում, իհարկե, այդպես չէ, բայց նախկինների կողմից ուղղորդվող քարոզչամեքենան հենց այդպես է ներկայացնում վիճակը: Ով հայտնվում է ճաղավանդակների ետեւում կամ կանչվում է հարցաքննության՝ միանգամից դառնում է Արցախի պոտենցիալ փրկիչ (որը կարող է կանխել գոյություն չունեցող դավադրությունը):

Հիմա փորձենք հասկանալ, թե ովքեր կարող են լինել այս ապաշնորհ եւ վտանգավոր քարոզչության արտաքին շահառուները: Կարող են, չէ՞, մեր հակառակորդները հայտարարել, օրինակ, թե տեսեք՝ ովքեր են Հայաստանում ամենամաքսիմալիստական պահանջներ ներկայացնողները, ամեն մեկի վրա մի քանի քրեական գործ կա, դրանք բոլորը հանցագործներ են: Ո՞ր մեկին պիտի բացատրենք, որ այդ մարդկանց արցախյան խնդիրն առանձնապես չի հետաքրքրում (եթե հետաքրքրեր՝ անձնական հարստության մոլուցքով չէին դատարկի երկիրը), այդ մարդիկ ընդամենն ուզում են իրենց հանցանքների համար անխուսափելի պատասխանատվությունը մատուցել որպես «պատիժ հայրենասիրության համար»: Հույս ունենալով, որ հանրությունը կենթարկվի այդ քարոզչական մանիպուլյացիաներին եւ այդպես էլ «գլխի չի ընկնի», որ իսկական հայրենասիրությունը նորմալ, ժամանակակից պետություն ունենալն է: Որովհետեւ դա նշանակում է ունենալ ուժեղ տնտեսություն, աճող բնակչություն եւ հզոր բանակ:

Իսկ հանցագործներին հայրենասերներ հռչակել չի կարելի: Դա նրանց առանձնապես չի օգնի, իսկ ահա հայրենասիրության գաղափարին կարող է լրջորեն վնասել:

Տպել
2022 դիտում

Նորք-Մարաշ եւ Նուբարաշեն վարչական շրջաններում դիտարկված 36 տնտեսվարողից 21-ի մոտ ԱԱՏՄ-ն խախտումներ է արձանագրել

Երկրորդ զորամիավորումում հայտարարվել է ուսումնական տագնապ

Արտաքին տուրիզմի մասին խոսելը վաղ է, բայց ներքին տուրիզմի հնարավորությունների հետ պետք է հաշվի նստենք. Տիգրան Պետրոսյան

ՄԻԵԴ-ի վճիռը կարևոր նշանակություն կունենա էթնիկական ատելության հիմքով հանցագործությունների կանխման համար․ Արման Թաթոյան

Ճանապարհաշինություն, մշակույթի տան հիմնանորոգում ու ոչ միայն. Լոռիում եւս 10 սուբվենցիոն ծրագիր է հաստատվել

«Կացնով մարդասպանը», հունգարական անմեղությունն ու արդարությունը՝ 16 տարի անց. միջազգային անդրադարձը՝ ՄԻԵԴ վճռին

Ոստիկանները գրպանահատության հերթական դեպքն են բացահայտել. բերման է ենթարկվել 42-ամյա տղամարդ

Աշխարհը դարձավ անհոտ ու անհամ, աննկարագրելի թույլ էի․ պատմում է COVID-19-ը հաղթահարած լրագրողը

Հրազդանի ոստիկաններն ապօրինի թմրաշրջանառության դեպք են բացահայտել. բերման է ենթարկվել 58-ամյա տղամարդ (տեսանյութ)

Մեկնարկել է «Պատերազմի պայթյունավտանգ մնացորդների և Ականների ռիսկի կրթական ծրագիրը»

Գո՞հ չեք, մենք գոհ ենք․ վարչապետը՝ տրանսպորտի ոլորտում իրանացվելիք նոր ծրագրի մասին

Վախեցնում ես մեզ, որ ի՞նչ անես. մենք վաղուց ավարտել ենք. Սերգեյ Բագրատյանը՝ Նազելի Բաղդասարյանին

Գյումրու պոլիկլինիկաները ստացել են համապատասխան պարագաներ և ցուցումներ. կորոնավիրուսի դրական դեպքերը հսկվում են տանը

2 անչափահաս երեխա, ամուսինն էլ՝ սահմանին. բուժքույրը հերթափոխով աշխատել չի կարող, տնօրենն էլ ասում է՝ պայմանը միայն դա է

Սիրուշոն տեսակապով խոսել է «Թղթե տունը» սերիալի երգչուհու հետ. վերջինս խոստովանել է, որ նոր եթերաշրջան է լինելու

Խախտման մասին արձանագրությունը կներկայացվի պարետատուն. ՍԱՏՄ

«Սրանից հետո դուք եք հերքելու ամեն ինչ. դե, գնացեք հերքեք, տեսնեմ՝ ոնց եք հերքում». Նիկոլ Փաշինյանը՝ ԼՀԿ պատգամավորին

Ունենք կորոնավիրուսի 2 օջախ․ մեկը տուն-ինտերնատն է, մյուսը՝ մանկատունը․ Արսեն Թորոսյան

ԱՆ-ն ձեռք է բերել 500 մատնային պուլսօքսիմետր. դրանք արդեն իսկ բաշխվել են մարզերի եւ Երեւանի հիվանդանոցներին

Իսպանիայում ֆուտբոլասերները գուցե կարողանան մարզադաշտ գնալ հաջորդ մրցաշրջանում