Ես հիմա ո՞ւմ գնամ-խնդրեմ՝ երաշխավորի․ դատարանը Սեյրան Օհանյանին թույլատրեց բուժման նպատակով բացակայել երկրից

Երեւան քաղաքի ընդհանուր իրավասության դատարանի Շենգավիթի նստավայրում Մարտի 1-ի գործով դատական նիստի ժամանակ գործով ամբաստանյալ Սեյրան Օհանյանի պաշտպան Ինեսա Պետրոսյանը դատարանին խնդրեց Սեյրան Օհանյանին թույլատրել բուժման նպատակով երկշաբաթյա ժամկետով մեկնել Գերմանիայի Դաշնություն։

Պաշտպանը դատարանին ներկայացրեց բժշկական կենտրոնից ուղարկված հրավերի բնօրինակն ու հայերեն թարգմանած օրինակը․

«Նկատի ունելավ, որ դուք մինչեւ հոկտեմբերի 7-ն եք հետաձգում դատական նիստը, իսկ պարոն Օհանյանի հրավերում նշված է, որ նա հոկտեմբեր 21-ի առավոտյան գտնվի հիվանդանոցում, խնդրում եմ, երկշաբաթյա ժամկետով թույլատրել բացակայել Հանրապետությունից։ Բուժումը կապված է իր հաշմանդամության հետ. երկու տարին մեկ պարոն Օհանյանը անցնում է համապատսխան զննությունը եւ այդ կապակցութամբ հենց ԲԿ-ից է ուղարկված հրավերը»,- ներկայացրեց Պետրոսյանը։

Նախագահող դատավոր Աննա Դանիբեկյանը, դիմելով Օհանյանի պաշտպանին, ասաց, որ համապատասխան հրավերում խնամքի սկիզբը նախատեսված է սույն թվականի հոկտեմբերի 21-ից, այսինքն՝ դեռեւս առկա է բավարար ժամանակ։ Դանիբեկյանը Սեյրան Օհանյանի պաշտպանից հետաքրքրվեց այն, որ Քոչարյանի պաշտպան Հայկ Ալումյանը ցանկություն է հայտնել իրեն՝ նախագահող դատավորին, ինքնաբացարկի միջնորդություն ներկայացնել, Պետրոսյանը հնարավոր համարո՞ւմ է նախքան այդ միջնորդության լուծումը քննարկել այլ միջնորդություն։

Ինեսա Պետրոսյանը պատասխանեց, որ, նկատի ունենալով առողջական վիճակի հետ կապված հանգամանքը եւ նաեւ այն, որ Օհանյանը նախ պետք է մուտքի թույլտվություն ստանալու համար դիմի դեսպանատուն, անցնի համապատասխան ընթացակարգերով, պետք է հավելյալ մի քանի օրվա թույլտվություն՝ այդ գործողությունները հասցնելու եւ ճիշտ ժամանակին բժշկական կենտրոնում լինելու համար։

Նախագահող դատավորը Քոչարյանի պաշտպան Հայկ Ալումյանին հարցրեց՝ վերջինիս միջնորդությունը չքննարկած լինելու պայմաներում հնարավոր համարո՞ւմ է քննարկել այլ միջնորդություն։ Ալումյանը պատասխանեց, որ քանի դեռ Դանիբեկյանը վարույթում է, այս եւ ցանկացած հարց լուծելու որեւէ խոչընդոտ չկա։ Պաշտպանները միացան Ինեսա Պետրոսյանի միջնորդությանը։ Միացավ նաեւ Ռոբերտ Քոչարյանը:

Երբ դատարանը մեղադրող կողմի դիրքորոշումը լսելու նպատակով դիմեց դատախազներին՝ Ռոբերտ Քոչարյանը տեղից արձագանքեց․ «Մտածելու բան էլ կա՞, ուղղակի ամոթ է»։

Մեղադրող դատախազ Գեւորգ Բաղդասարյանն ասաց, որ Սեյրան Օհանյանին բուժման մեկնելու հնարավորություն տալու սկզբունքային առարկություն չունեն, սակայն պետք է ունենան երաշխիքներ, որ նա վերադառնալու է նշված ժամկետում, դրա համար անհրաժեշտ է այլ խափանման միջոցի կիրառում, մասնավորապես՝ անձնական երաշխավորություն խափանման միջոց։

Տուժող կողմի ներկայացուցիչ Սեդա Սաֆարյանը եւս չառարկեց քննության առնել Սեյրան Օհանյանի պաշտպանի միջնորդությունը, սակայն միեւնույն ժամանակ կարծիք հայտնեց, որ միջնորդությունը պետք է քննարկվի մինչեւ ինքնաբացարկի միջնորդությունը․

«Պարոն Օհանյանի պաշտպանի միջնորդությունը պետք է քննվի ինքնաբացարկի միջնորդությունից առաջ, եթե Հայկ Ալումյանը չի պնդի այդ միջնորդությունը, որովհետեւ վստահ եմ՝ եթե պարոն Օհանյանի միջնորդությունը քննության առնեք, վաղը պաշտպանության կողմը որպես քրեադատավարական օրենքի խախտում դրա մասին կնշի, այսօր ասում է՝ չեմ անի, բայց կարող է անել»,- նկատեց Սաֆարյանը։

Տուժող կողմի ներկայացուցիչ Տիգրան Եգորյանը համաձայնեց Սեդա Սաֆարյանի մտահոգության հետ։ Նա նաեւ ասաց, որ անհրաժեշտ են լրացուցիչ երաշխիքներ՝ Օհանյանի հետ վերադառնալու հանգամանքն ապահովելու համար։

Սեյրան Օհանյանի պաշտպան Ինեսա Պետրոսյանը հայտարարեց, որ տուժող կողմի մտավախությունները տեղին չեն, քանի որ Հայկ Ալումյանը որեւէ առարկություն չուներ, որ մինչեւ ինքնաբացարկի միջնորդությունը քննարկվի իրենց միջնորդությունը։ Բացի այդ, Պետրոսյանն ասաց, որ եթե մեղադրող կողմը անձնական երաշխավորության խնդիր է առաջ քաշում, իրենք դա կքննարկեն եւ հարցը կլուծեն։

Նախագահող դատավոր Աննա Դանիբեկյանը Սեյրան Օհանյանին հարցրեց՝ ե՞րբ է վերադառնալու Գերմանիայից։ Օհանյանը պատասխանեց․

«Կախված է աշխատանքներից, որն իմ պրոտեզի վրա իրականացնելու են բժիշկները, նշված է մեկ-երկու շաբաթ, կարծում եմ, որ ընդհանուր 15 օր, ինչքան շուտ լինի, այնքան շուտ կգամ, մտահոգություններ կան, բայց իմ կողմից հավաստիացումները 100 տոկոսից ավելի են, իմ ընտանիքը այստեղ է։ Դուք երաշխավորեք, դատարանը թող երաշխավորի, ո՞ւմ ես հիմա գնամ-խնդրեմ՝ երաշխավորի եւ ինչի՞ համար գնամ խնդրեմ»,- արձագանքեց Օհանյանը։

Ռոբերտ Քոչարյանի պաշտպան Հայկ Ալումյանն էլ իր հերթին հայտարարեց, որ միջնորդությունը ձեւակերպելու համար իրեն ժամանակ է պետք, բայց ինքը չառաջարկեց քննարկել նիստը հետաձգելու հարց․

«Ես չեմ միջնորդել էսօր դատական նիստը ավարտել։ Ես ասել եմ, որ ինքնաբացարկի միջնորդությունը գրավոր ձեւակերպելու համար անհրաժեշտ է մեկ օր, երբ կտաք այդ մեկ օրը՝ նշանակություն չունի։ Իսկ այսօրվա դատական նիստը հետաձգելու միջնորդություն չի եղել, դատարանի կողմից նիստը հետաձգելու որոշում չի եղել, եւ կարծում եմ՝ պետք չէ ստեղծել տպավորություն, թե մեր շահերի մեջ կա որեւէ հակասություն»։

Դատավոր Աննա Դանիբեկյանը հայտարարեց, որ Սեյրան Օհանյանի նկատմամբ առկա է խափանման միջոց՝ ստորագրություն չհեռանալու մասին, եւ երկրից դուրս գալու համար անհրաժեշտ է վարույթն իրականացնող մարմնի թույլտվությունը, որը չի ենթադրում այլ խափանման միջոցի կիրառում։ Դատարանը բավարարեց Սեյրան Օհանյանի պաշտպանի միջնորդությունը եւ թույլատրեց նրան Հայաստանի Հանրապետությունից բացակայել հոկտեմբերի 18-ից մինչեւ նոյեմբերի 4-ը։