Վրաստանում բացահայտել են գործարար Պատարկացիշվիլիի սպանության նախապատրաստման գործը

Աուդիոձայնագրություններից մեկում, որը դատախազությունն է հրապարակել, ասվում է, որ միլիարդատիրոջ սպանությունն արտոնել է անձամբ Վրաստանի նախկին նախագահ Միխայիլ Սահակաշվիլին: Այս մասին հայտնում է jnews.ge-ն։

Վրաստանի գլխավոր դատախազությունը հայտարարում է, որ բացահայտել է վրացի միլիարդատեր Բադրի Պատարկացիշվիլիի սպանության նախապատրաստման փաստը։ Գործարարը մահացել է տասը տարի առաջ Լոնդոնից ոչ հեռու Լեզերհեդ քաղաքի իր տանը:

Դատախազության հրապարակած աուդիոձայնագրություններից մեկում ասվում է, որ միլիարդատիրոջ սպանությունն արտոնել է անձամբ Վրաստանի նախկին նախագահ Միխայիլ Սաակաշվիլին:

Պաշտոնեական լիազորությունների չարաշահման և ծանրացնող հանգամանքներով սպանության նախապատրաստման փաստի առնչությամբ ձերբակալվել է Միխայիլ Սաակաշվիլիի կառավարության ՆԳՆ 3 նախկին պաշտոնյա: Այս մասին ասվել է հատուկ բրիֆինգի ժամանակ հոկտեմբերի 17-ին:

Մեղադրող կողմը հիմնվում է 2007թ.-ին արված աուդիոձայնագրությունների վրա, որտեղ ձերբակալվածները խոսում են Պատարկացիշվիլիի սպանության նախապատրաստման մասին:

Հոկտեմբերի 17-ին դատախազությունը հրապարակել է այդ ձայնագրությունները: Դատախազությունում հայտարարում են, որ դրանք հայտնաբերել են գրեթե 10 տարի անց՝ 2016թ.-ի դեկտեմբերին մեղադրյալներից մեկի տանը:

Միլիարդատեր Բադրի Պատարկացիշվիլին վաղաժամ մահացել է 2018թ-ի փետրվարին Լոնդոնում՝ իր սեփական տանը: Բժշկական եզրակացությունում ասվում է, որ մահվան պատճառը սրտային անբավարարությունն է եղել:

Վրաստանի այն ժամանակվա իշխանությունների ոխերիմ ընդդիմադրի և «Իմեդի» ընդդիմադիր հեռուստաալիքի տիրոջ այդ անսպասելի մահը շատ հարցեր առաջացրեց: Սակայն Սքոթլենդ-Յարդը, որը զբաղվում էր Պատարկացիշվիլիի մահվան գործով, հետաքննություն անցկացնելուց հետո կասկածելի ոչինչ չհայտնաբերեց և որպես մահվան պատճառ նշեց սրտի նոպան:

Չնայած դրան՝ Սաակաշվիլիի ընդդիմադիրները մինչ այսօր կարծում են, որ Պատարկացիշվիլիի մահվանը հաղորդակից են եղել վրացական հատուկ ծառայությունները:

Մահվանից բառացիորեն մի քանի ամիս առաջ Պատարկացիշվիլին ուժեղ ակտիվացել էր Վրաստանի քաղաքական դաշտում:

2007թ-ի դեկտեմբերին՝ Պատարկացիշվիլիի մահվանից երկու ամիս առաջ, վրացական իշխանությունները գաղտնի արված ձայնագրություն էին հրապարակել, որն ապացուցում էր, որ օլիգարխը պատրաստվում էր Վրաստանում իշխանությունը զավթել:

Վրաստանի ՆԳՆ բարձրաստիճան ներկայացուցիչ Երեկլե Կոդուայի հետ զրույցում Պատարկացիշվիլին նրան գումար է առաջարկում երկրում պետական հեղաշրջում կատարելու և ներքին գործերի նախարար Վանո Մերաբիշվիլիին հեռացնելու կամ լիկվիդացնելու համար:

Զրույցը կայացել է Լոնդոնում՝ Պատարկացիշվիլիի տանը: Չնայած մանրազնին խուզարկությանը, Կոդուան, որն օլիգարխի մոտ էր ուղարկվել Վրաստանի իշխանությունների կողմից, կարողացել էր կոշիկի մեջ ձայնագրիչ ներս տանել և օլիգարխի հետ երկու ժամ տևած զրույցի ամբողջական աուդիոձայնագրությունն անել:

Պատարկավիշվիլին, որն իր կարողությունը դիզել էր Ռուսաստանում, ռուս օլիգարխ Բորիս Բերեզովսկու ընկերն ու բիզնես-գործընկերն էր: Սակայն կյանքի վերջին տարիներին նրանց հարաբերությունները փչացել էին:

Ձայնագրություններից մեկում Սահմանադրական անվտանգության դեպարտամենտի (ՍԱԴ) բարձրաստիճան պաշտոնյա Գեորգի Դգեբուաձեն խոսում է Պատարկացիշվիլիի անվտանգության ծառայության աշխատակցի հետ՝ փորձելով նրան ներգրավել միլիարդատիրոջ սպանության նախապատրաստման գործում: Խոսակցության մեջ Դգեբուաձեն հաստատում է, որ Պատարկացիշվիլիի սպանության նախապատրաստումն արտոնել է Վրաստանի այն ժամանակվա նախագահ Միխայիլ Սաակաշվիլին:

Ձայնագրությունում ասվում է, որ Պատարկացիշվիլիի լիկվիդացիան վստահվել է ՍԱԴ-ին:

Երկրորդ աուդիոձայնագրությունն, ինչպես պնդում է դատախազությունը, արվել է ՆԳՆ «Մոդուլ» շենքում: Դատախազության պնդմամբ՝ այդ ձայնագրությունում ներկայացված է ՍԱԴ բարձրաստիճան պաշտոնյաների խորհրդակցությունը, որտեղ նրանք քննարկում են, թե որտեղից ձեռք բերել տեղեկատվություն միլիարդատիրոջ տան անվտանգության ծառայության և սպասարկող անձնակազմի մասին:

Ձայնագրությունում լսվում է, որ նիստին հանդիպման մասնակիցները բացահայտ խոսում և պլանավորում են, թե ինչպես «ճիշտ» լիկվիդացնել Պատարկացիշվիլիին: Մի քանի վարկած է քննարկվում, այդ թվում՝ հետաքրքրվում են թունավոր նյութով, որը բնական մահ է առաջացնում:

Ավելին, այնտեղ խոսվում է, որ Պատարկացիշվիլիի լիկվիդացիայի բոլոր դետալները համաձայնեցվում են Դաթո Ախալայայի՝ ՍԱԴ այն ժամանակվա ղեկավարի հետ: [Ախալայան ներկա պահին Վրաստանում չէ, նա լքել է երկիրը 2012թ-ի իշխանափոխությունից անմիջապես հետո: Վրաստանում նրա դեմ քրեական գործ է հարուցվել: Նրա ձայնը չկա նաև դատախազության հրապարակած աուդիոձայնագրություններում-JAMnews]:

Մեղադրյալներին 16-20 տարվա ազատազրկում է սպառնում: