Տնտեսագիտական համալսարանի ուսանողները կարող են ընտրել դասախոսներին, սովորել՝ առանց բուհում լինելու

Հայաստանի պետական տնտեսագիտական համալսարանում (ՀՊՏՀ) արմատական փոփոխություններ են նախատեսվում: Առաջիկա տարիներից սկսած՝ այս բուհի ուսանողները հնարավորություն կունենան ավելի մեծ թվով` երեք անգամ ավելի շատ դասընթացներ ընտրել՝ ըստ սեփական նախասիրությունների, որոշել, թե որ դասախոսը պետք է իրենց դասավանդի, ցանկության դեպքում բարձրագույն կրթություն ստանալ էլեկտրոնային համալսարանի տարբերակով՝ հեռավար՝ առանց բուհի տարածքում գտնվելու, վիդեոդասախոսություններ լսել:

Այս եւ մի շարք այլ փոփոխություններ ամրագրվել են ՀՊՏՀ 2018-2022թթ. զարգացման ռազմավարության եւ գործողությունների ծրագրում: «Կարելի է պնդել, որ Տնտեսագիտական համալսարանի զարգացման ռազմավարական նոր ծրագրով համալսարանում ամեն բան փոխվելու է»,- նկատում է բուհի ռեկտոր Կորյուն Աթոյանը: Ըստ էության, 2018 թվականը ռազմավարությունում դիտարկված է իբրեւ նախապատրաստական փուլ, որի նպատակն այդ բոլոր փոփոխությունների համար մեթոդաբանական, կադրային, տեխնիկական բազայի ձեւավորումն է՝ 2019 թվականից դրանք կյանքի կոչելու համար:

«Առաջին կարեւոր բանը, որ ուսանողների կյանքում փոխվելու է, նրանց կամ ընտրության հնարավորությունների շեշտակի աճն է, որն ընդհուպ մոտ կլինի եվրոպական բարձրագույն կրթական տարածքի երկրների բուհերի մակարդակին: Սա կատարվելու է կրթական ծրագրերում ընտրովի դասընթացների եւ մոդուլների տեսակարար կշռի շուրջ 3 անգամ ավելացման հաշվին»,- նշում է ռեկտորը: Ավելի ուշ՝ 2020 թվականից, ուսանողին հնարավորություն կընձեռվի ինքնուրույն կառուցել իր անհատական կրեդիտային բեռնվածքը: Այսինքն՝ որոշել՝ ամբողջ ուսումնառության ընթացքում անհրաժեշտ կրեդիտները ցանկանում է հավաքել 4, 5, թե՞ առավելագույնը մինչեւ 8 տարում: 4 տարուց ավելի ուսումնառության պարագայում ուսման վարձերի բարձրացում չի ծրագրվում: «Ուսանողները, բացի դասընթացների ընտրությունից, հնարավորություն կունենան ընտրել դասավանդողներին: Սա կբերի դասավանդողների միջեւ ներքին մրցակցության ձեւավորմանը, ինչը դասընթացների որակի բարձրացման առանցքային միջոց է»,- փաստում է ռեկտոր Կորյուն Աթոյանը:

Տնտեսագիտական համալսարանում նաեւ «հանրաքվեներ» կկազմակերպվեն՝ լսելու այս կամ այն հարցի շուրջ ուսանողների կարծիքը, եւ որոշումներ կայացնելիս առաջնորդվել նաեւ դրանով: «Ըստ էության, եթե մինչ օրս համալսարանի ուսանողների ներգրավվածությունը բուհի կառավարման մարմիններում 25% էր կազմում, ապա հետայսու մոդուլից, դասավանդողից, բուհի կրթական ենթակառուցվածքներից ու ռեսուրսներից բավարարվածության հարցումների միջոցով ուսանողները հնարավորություն են ունենալու իրենց սեփական ձայնով էական ազդեցություն ունենալ հարցման արդյունքների վրա, որոնցից էլ կախված են լինելու համալսարանում կայացվող կառավարչական որոշումները»,- վստահեցնում է նա:

Տնտեսագիտական համալսարանի նոր ռազմավարական ծրագրի համաձայն, էական փոփոխության են ենթարկվելու նաեւ մագիստրոսական կրթական ծրագրերը: Նախատեսվում է մշակել միջոլորտային բազմաթիվ մասնագիտությունների կրթական ծրագրեր: Այդ առումով նախնական հետազոտության արդյունքներ այստեղ արդեն իսկ ունեն եւ պատրաստվում են բանակցություններ սկսել ինչպես Հայաստանի, այնպես էլ արտերկրի գործընկերների հետ՝ համատեղ կրթական ծրագրերի իրականացման ուղղությամբ, ինչն ուսանողներին հնարավորություն կընձեռի որակավորում ստանալ միանգամից մի քանի բուհերի կողմից՝ ընդհուպ ուսումնառության որոշակի շրջանն անցկացնելով արտերկրում: Ի դեպ, բուհում նման նախադեպ արդեն կա:

Առանցքային փոփոխություններ են սպասվում նաեւ գրադարանային ռեսուրսի ընդլայնման ուղղությամբ: Բուհի ղեկավարությունը խոստանում է, որ մի շարք արտասահմանյան վճարովի գրադարանային ռեսուրսներ անվճար հիմունքներով հասանելի կդառնան իրենց ուսանողներին:

Ինչ վերաբերում էլեկտրոնային համալսարանին, ռեկտոր Կորյուն Աթոյանը նշում է. «Ընդհանրապես այն նոր թրենդ է բարձրագույն կրթության բնագավառում եւ առավելապես իրականացվում է կրթության ֆիզիկական մատչելիության բարձրացման նկատառմամբ: Սա ենթադրում է համալսարանում էլեկտրոնային դեկանատի համակարգի ներդրում, ուսանողներին եւ համալսարանի աշխատակիցներին անձնական կոդերի տրամադրում եւ ըստ այդ կոդերի համալսարանի էլեկտրոնային հարթակներին մուտքի ապահովում, անցում էլեկտրոնային փաստաթղթաշրջանառության, Moodle համակարգի ներդրում եւ համակարգում բոլոր կրթական ծրագրերի եւ դասընթացների ծրագրերի էլեկտրոնային բազաների, ինչպես նաեւ դասընթացների յուրացման նպատակով էլեկտրոնային գրականության ու այլ նյութերի բազաների ձեւավորում ու ներբեռնում, վիդեոդասախոսությունների բազայի ձեւավորում, ուսանող-դասախոս արտալսարանային խորհրդատվության էլեկտրոնային հարթակի մշակում»:

Նկատենք, որ վերոնշյալ փոփոխություններից շատերն արտացոլված են «Բարձրագույն կրթության մասին» նոր օրենքի նախագծում, որը, սակայն, արդեն տեւական ժամանակ է օրենք չի դառնում: Եթե Ազգային ժողովն այն այդպես էլ չընդունի, արդյոք բուհը խոչընդոտներ չի՞ ունենա՝ նշված նպատակներին հասնելու ճանապարհին: Այստեղ բացասական պատասխան են տալիս՝ հղում անելով գործող իրավական ակտերին, որոնք որոշ փոփոխությունների հնարավորություններ տալիս են կամ էլ չեն արգելում դրանք իրագործել:

Հավելենք, որ Հայաստանի պետական տնտեսագիտական համալսարանի ռազմավարական ծրագրով նաեւ նախատեսվում է օպտիմալացնել բուհի կրկնվող ստորաբաժանումներն ու հաստիքները: Բայց թե ո՞ր ստորաբաժանումների գործունեությունը կդադարեցվի եւ քանի՞ հաստիք կկրճատվի ընդհանուր առմամբ, առայժմ չի նշվում: Պատճառաբանվում է, որ 2018 թվականի համար նախատեսված է բոլոր հաստիքների գործառույթների նկարագրման եւ դրանց արդյունավետության գնահատման գործընթաց, եւ այդ փուլի ավարտից հետո միայն հնարավոր կլինի խոսել կադրային ու կառուցվածքային փոփոխությունների մասին: