Երևան
20 °C
2018 թվականի հուլիսի 14-ին հայտնի դարձավ, որ կառավարությունը հրաժարվում է թերթերի բաժանորդագրությունից: Սրան զուգահեռ տարածվեց տեղեկություն, որ կառավարությունում թերթեր «կարդացող-պատմողներ» կան: Ավելին՝ վարչապետի աշխատակազմի ղեկավար Էդուարդ Աղաջանյանն էլ իր հարցազրույցներից մեկի ժամանակ նշել էր, որ կառավարությունում ոչ ոք բաժանորդագրված թերթերից չի օգտվում: Այդ իսկ պատճառով գերատեսչությունը հրաժարվում է թերթերից եւ գումար է խնայում: «Հայկական ժամանակ»-ի գրավոր հարցմանն ի պատասխան կառավարության աշխատակազմից փոխանցեցին, որ այս պահի դրությամբ որեւէ թերթի կամ ամսագրի բաժանորդագրված չեն:
Սակայն կառավարության պաշտոնյաներն իրենց մասին մամուլի հրապարակումներից անտեղյակ չեն մնում: Վարչապետի աշխատակազմի հաշվեկշռում գործում է ՊՈԱԿ, որը մոնիթորինգի է ենթարկում լրահոսն ու յուրաքանչյուր պաշտոնյայի հետ կապված հրապարակման մասին զանգով տեղյակ է պահում: Խոսքը «Հանրային կապերի եւ տեղեկատվության կենտրոն» ՊՈԱԿ-ի մասին է, որը նախկինում գտնվում էր ՀՀ նախագահի աշխատակազմի հաշվեկշռում: 2015 թվականի Սահմանադրական փոփոխություններով՝ 2018-ի ապրիլի 9-ից այս ՊՈԱԿ-ը տեղափոխվեց վարչապետի աշխատակազմ, իսկ կառավարության հաշվեկշռում առկա նմանատիպ ՊՈԱԿ-ը լուծարվեց: Պատճառն այն էր, որ նոր Սահմանադրությամբ նախագահի լիազորությունները սահմանափակվում են:
«Մոնիթորինգի ենք ենթարկում մամուլի հրապարակումները եւ ներկայացնում ենք համապատասխան գերատեսչությանը, որ այսինչ թերթում խնդիր են բարձրաձայնում, որը կապված է ձեր կառույցի հետ: Մենք իրենց թերթեր չենք տրամադրում, կառույցները իրենց համար բաժանորդագրված են»,- «Հայկական ժամանակ»-ի հետ զրույցում ասաց ՊՈԱԿ-ի ղեկավար Հովհաննես Մովսիսյանը, պարզաբանելով, թե ինչպես են պաշտոնյային տեղեկացնում իր կառույցի հետ կապված հրապարակման մասին:
ՀԺ-ի հարցին՝ ի՞նչ տարբերակով են տեղեկացնում կառույցի ղեկավարին, արդյո՞ք պաշտոնական գրություն են ուղարկում, թե ֆեյսբուքյան մեկ հաղորդագրությունն էլ է բավարար, ՊՈԱԿ-ի տնօրենն ասաց. «Կապի բոլոր ձեւերն օգտագործվում են: Դա լինում է էլեկտրոնային փոստի կամ զանգի միջոցով»:
«Հանրային կապերի եւ տեղեկատվության կենտրոն» ՊՈԱԿ-ի ղեկավարի խոսքով՝ իրենք ոչ միայն կառավարության, այլեւ նախարարությունների աշխատակազմերին են տեղյակ պահում հրապարակումների մասին: Հարկ է ընդգծել, որ կառավարության, նախարարությունների աշխատակազմերում առկա են մամուլի խոսնակներ եւ տեղեկատվության վարչություններ: Այս դեպքում արդյո՞ք լրացուցիչ ֆինանսական ծախս չի կատարվում ՊՈԱԿ-ի գոյության համար: Հովհաննես Մովսիսյանը նշեց, որ ՊՈԱԿ-ը աջակցում է, որ կառավարության աշխատանքն ավելի թափանցիկ դառնա: «Մենք իրենց գործառույթը չենք անում: Ես չգիտեմ՝ որ կառույցում քանի հոգի է աշխատում: Մեր կատարած աշխատանքն աջակցություն է, որպեսզի ավելի բաց դառնա կառավարության աշխատանքը»:
Կառավարության աշխատակազմի տեղեկատվության եւ հասարակայնության հետ կապերի վարչությունից ՀԺ-ին փոխանցեցին, որ նշյալ վարչությունն ունի 14 հաստիք: Այս պահին կա 8 աշխատակից, վեց հաստիք թափուր է:
Վարչապետի աշխատակազմի ղեկավար Էդուարդ Աղաջանյանը, պատասխանելով «Հայկական ժամանակ»-ի հարցին, փոխանցեց, որ կառավարության տեղեկատվության եւ հասարակայնության հետ կապերի վարչության գործառույթներում մոնիթորինգ իրականացնելը նախատեսված չէ: «Կառավարության տեղեկատվության վարչությունն այլ գործառույթներ է իրականացնում: Վարչության գործառույթն է՝ լրագրողներին անցագրեր տրամադրել, մամուլի հաղորդագրությունները հրապարակել եւ վարչապետի մամուլի խոսնակին աջակցել՝ վարչապետի գործունեությունը լուսաբանելու հարցում: Հաշվի առնելով, որ վարչությունն այլ գործառույթ է իրականացնում, ուստի չի կարող մոնիթորինգ իրականացնել: ՊՈԱԿ-ն այլ գործառույթներ է իրականացնում, այդ թվում նաեւ մոնիթորինգի գործառույթը: Ունենք տարածաշրջանի երկրների մեդիա դաշտն ապահովող առանձին խումբ՝ ադրբեջանագետներից, թուրքագետներից բաղկացած, որոնք շատ կարեւոր գործառույթ են իրականացնում»,- ասաց Աղաջանյանը:
Հովհաննես Մովսիսյանը, խոսելով իր կողմից ղեկավարվող կառույցի գործառույթների մասին, նշեց. «Մեր ՊՈԱԿ-ի գործառույթը կառավարության աշխատանքն ավելի թափանցիկ դարձնելն է: Եթե ինչ-որ խնդիրների մասին մամուլը գրում է, մենք այդ ամեն ինչը տեղ ենք հասցնում, որպեսզի պետական կառույցները տեղյակ լինեն այդ խնդիրներին ու անդրադառնան: Այնպես չստացվի, որ լրատվամիջոցներում, հասարակությունում ինչ-որ թեմա է քննարկվում, իսկ կառավարությունը դրան չի անդրադառնում:
Թափանցիկ աշխատանքի մեջ մտնում է ուղիղ եթերների ապահովումը, որը մեր ՊՈԱԿ-ի միջոցով եղավ: Սոցցանցերի էջերն ենք ակտիվացրել, քանի որ այս հարթակից հիմա հասարակությունն ավելի ակտիվ է օգտվում: Հիմնական ֆունկցիաները սրանք են»,- պարզաբանեց նա:
Ի դեպ, այս ՊՈԱԿ-ը հսկայական բյուջե ունի, որը տրամադրում է կառավարությունը՝ դրամաշնորհի տեսքով: «Հանրային կապերի եւ տեղեկատվության կենտրոն» ՊՈԱԿ-ի բյուջեն կազմում է 582 միլիոն ՀՀ դրամ: Այս գումարի 372 միլիոն դրամն ուղղվում է աշխատավարձերին: Սրան զուգահեռ 2017 թվականի հուլիսի 1-ից մինչեւ 2018 թվականի հունիսի 30-ը ՊՈԱԿ-ի աշխատակիցներին ընդհանուր 40 միլիոն դրամի պարգեւավճար է տրվել:
Ի դեպ, «Հանրային կապերի եւ տեղեկատվության կենտրոն» ՊՈԱԿ-ն ունի 142 հաստիքային աշխատակից, սակայն հունիսի 30-ի դրությամբ համալրված էր 97-ը: «Հանրային կապերի եւ տեղեկատվության կենտրոն» ՊՈԱԿ-ի աշխատակազմը տեղակայված է մի քանի գրասենյակներում: Մասնավորապես, ՊՈԱԿ-ը գրասենյակներ ունի Երեւանի Օրբելի 23, Արշակունյաց 44, Արշակունյան 2ա եւ Բյուզանդի 1/3 հասցեներում: Տարածքները տրամադրված են անհատույց:
Այստեղ ուշագրավն այն է, որ նման ֆինանսական, տարածքային եւ կադրային ռեսուրսներ ունեցող պետական կառույցը նախկինում այլ գործառույթ է իրականցրել: Այն նախկին իշխանության օրոք հայտնի էր որպես ֆեյքեր «պահող» ՊՈԱԿ: Բանն այն է, որ կային ֆեյսբուքում մեծ լսարան ունեցող էջեր, որոնք զբաղված էին ազատ մամուլի հրապարակումները եւ ընդդիմադիր գործիչների աշխատանքները սեւացնելով: Վարչապետի աշխատակազմի ղեկավարը ՀԺ-ի հետ զրույցում հաստատեց տեղեկությունները, որ ՊՈԱԿ-ում եղել են գրանցված աշխատակիցներ, ովքեր, սակայն, կանոնադրությունից դուրս աշխատանք են իրականացրել: «Այդ տեղեկատվությունը կար: Սոցիալական հարթակներում կային հայտնի դեմքեր, ովքեր եղել են ՊՈԱԿ-ում գրանցված աշխատող, օրինակ հակաադրբեջանական քարոզչություն իրականացնող թիմի մեջ, բայց դրան զուգահեռ այլ գործառույթներ են իրականացրել, կամ միայն այլ գործառույթ են իրականացրել: Այս պահին այդ պրակտիկան դադարեցված է եւ յուրաքանչյուր աշխատող իրականացնում է այն գործառույթները, որ կանոնադրությամբ վերապահված է իրեն»:
Հ.Գ. Անդրադառնալով բաց եւ թափանցիկ աշխատելու կառավարության աշխատակազմի որդեգրած սկզբունքին, նշենք, որ հայտարարույթուններն այնքան էլ իրականությանը չեն համապատասխանում: Մասնավորապես, տեղեկատվության հարցումներին կառավարությունից պատասխանում են «Տեղեկատվության ազատության մասին» ՀՀ օրենքի կոպիտ խախտումներով:
Մասնավորապես, «Հայկական ժամանակ» օրաթերթը մայիսի 16-ին հարցում էր ուղարկել ՀՀ կառավարություն՝ վարչապետ Նիկոլ Փաշինյանի՝ մայիսի 13-14-ին Սոչի կատարած այցի ծախսերի վերաբերյալ: Պատասխանը ստացվել էինք հունիսի 7-ին՝ օրենքի պահանջի 5-օրյա ժամկետի խախտումով: Հունիսի 1-ին հարցում էինք ուղարկել առաջին փոխվարչապետ Արարատ Միրզոյանին, խնդրելով տեղեկություն՝ Դուշանբե կատարած այցի ծախսերի մասին: Պատասխանը փոխանցել էին հունիսի 22-ին: Երկու դեպքում էլ նախապես չի տեղեկացվել լրացուցիչ 30-օրյա ժամկետի անհրաժեշտության մասին: ՀԺ-ն նաեւ գրավոր հարցումով հունիսի 28-ին տեղեկություններ էր խնդրել «Կոնդի առանձնատների տնտեսություն» ՊՈԱԿ-ի մասին: Երկու ամիս անց կառավարության աշխատակազմից տեղեկացրեցին, որ հարցումը չեն ստացել, իսկ մինչեւ այդ հաստատել էին, որ պատասխանի տրամադրումն ընթացքի մեջ է:
Մայիսի 9-ին ՄԻՊ-ն արտակարգ ռեժիմով կաշխատի
Հուսամ՝ շարժումը հրապարակ հասնելուց հետո Քոչարյանի խմբակցությունը կպատասխանի տվածս պարզ հարցին. Ալեքսանյան
ԲԿ-ներից մեկում բուժում ստացող կալանավորի սենյակից կասկածելի իրեր են հայտնաբերվել, վերելակի աթոռի տակից՝ թմրանյութ
Նախագահը Սան Ֆրանցիսկոյի և հարակից շրջանների հայ համայնքին է ներկայացրել ՀՀ-ում տեղի ունեցող իրադարձությունները
Նոր նշանակում ՀՀ քննչական կոմիտեում
Մեծ Բրիտանիան կարտաքսի ՌԴ ռազմական կցորդին․ ռուսների համար դիվանագիտական վիզաների նոր սահմանափակում կգործի
Նորագյուղում Իվան Պասկևիչի հուշարձանի մոտից հեռացրել են հայկական դրոշը՝ թողնելով միայն ռուսականը. տելեգրամ ալիքներ
Կիրանցում այսօր սահմանազատում չի կատարվում
Կալանավայրում գտնվող քաղաքացին իր ծանոթի հետ կատարել է 152 դրվագ համակարգչային հափշտակություն․ վնասի չափը 102 մլն դրամ է
Եկեղեցին ՀՀ սահմանադրական կարգը տապալելու հայտարարություններ է անում, պետք է իրավական գնահատական տրվի. Առաքելյան
Աղետալի կարկտահարության հետևանքները․ Սուրենյանը տեսանյութ է հրապարակել Կարբիից
Դոլարը թանկացել է․ ինչ փոփոխություններ է արձանագրել տարադրամի շուկան մայիսի 8-ին
Երևանում առանց պետհամարանիշի ռուսական դրոշներով մեքենաներ են շրջում
«Ամիօ ժամանակաշրջան». կրթությունը հնարավորություն է, որը փոխում է կյանքը
Յունիբանկը բիզնեսին առաջարկում է «Պարզեցված» վարկ` առանց վերլուծության
Կոնվերս Բանկը ՎԶԵԲ տարեկան ժողովի գլխավոր հովանավորն է
Քննարկվել են պարենային անվտանգության ոլորտում փոխադարձ հետաքրքրության հարցեր. հանդիպում ՆԳՆ ոստիկանությունում
Ucom-ի ֆիքսված ցանցը արդեն գործում է Արտաշատում
Հրդեհ մայրաքաղաքի Աբովյան փողոցում
Զախարովան մանրամասնել է՝ ինչ են քննարկելու Պուտինն ու Փաշինյանը
Վիտալի Բալասանյանը միացել է Բագրատ սրբազանի գլխավորած շարժմանը
Հայաստանի և այլ երկրների համար ԵԱՏՄ-ին մասնակցությունը լի է առաջին հերթին իրենց համար օգուտներով. Կրեմլ
ՌԴ ԱԳՆ-ն ողջունել է Ադրբեջանի և Հայաստանի արտգործնախարարների առաջիկա հանդիպումը Ղազախստանում
Անթույլատրելի է Եկեղեցու՝ ինքնիշխանության դեմ քաղաքական պայքարի «թամադայությունը» ստանձնելու կարգավիճակը. Վարդապետյան
Նիկոլ Փաշինյանը ժամանել է Մոսկվա (տեսանյութ)
Կրեմլում անհրաժեշտ և սպասված են անվանել Պուտինի և Փաշինյանի առաջիկա բանակցությունները
Մայր Աթոռում քանի՞սն են պատրաստ բարոյական պատասխանատվություն կրել հակապետական քաղաքականության համար. Չախոյան
Ստամբուլի օդանավակայանում արտակարգ դեպք է գրանցվել (տեսանյութ)
«Անկախություն» ու «ազատություն» բառերը քանի՞ անգամ են օգտագործվել. Բաբաջանյանը՝ Գերագույն հոգևոր խորհրդին
Սերբիայի ԱԳ նախարարը լավատես է Հայաստանի հետ համագործակցության հեռանկարների առումով
Ռուսաստանի և Վրաստանի սահմանին անբարենպաստ եղանակի պատճառով մի քանի հարյուր բեռնատար է կուտակվել
Աստծո անունը քաղաքական կապիտալի վերածելը աստվածահաճո գործ չէ. Ռուբեն Ռուբինյանը՝ Միքայել արքեպիսկոպոս Աջապահյանին
Որոշ շրջաններում կդիտվի -1, -2 աստիճան ցուրտ, անձրևն ու ամպրոպը ՀՀ մի հատվածում կվերածվի կարկուտի
Պուտինը շնորհավորական ուղերձ է հղել Նիկոլ Փաշինյանին
Շվեդիայի եկեղեցու Վեստերիսի եպիսկոպոսն այցելել է Հայոց ցեղասպանության հուշահամալիր
17-ամյա անչափահասին դանակահարել են, հափշտակել ոսկյա թևնոցը. կալանավորվել է նրա համադասարանցին
Միասնական ջանքերով կարող ենք զարգացնել համագործակցությունը․ Միրզոյանը՝ Սերբիայի ԱԳ նախարարին
Փոփոխություններ երեխաներին հանրակրթության մեջ ընդգրկելու և տեղափոխելու կարգում. ԿԳՄՍՆ
Դատախազության կողմից պետությանը վերադարձված 1 հա մակերեսով երկու հողամասն ամրացվել է Պետգույքի կառավարման կոմիտեին
Գողացել է փողոցում նվագողի՝ մետաղադրամներով լցված արկղը և դիմել փախուստի
© 2024 Հայկական ժամանակ