Հակոբ Հակոբյանն ապօրինի կառուցապատում է իրականացնում եւ սպառնում բնակիչներին. ԵԼՔ դաշինք

Երեւան քաղաքի Արաբկիր համայնքի Մամիկոնյանց փողոցի հ․42-44 եւ հ․ 40 շենքերի միջանկյալ հատվածում՝ հ․ 42/1 հասցեում, այս պահին ընթանում է են 16 հարկանի բազմաբնակարան շենքի շինարարական աշխատանքներ։ Այս մասին ասված է Երեւանի ավագանու ԵԼՔ խմբակցության տարածած հայտարարության մեջ: 

Դեռեւս 2013 թվականի սեպտեմբերին Մամիկոնյանց փողոցի հ․42-44 եւ հ․ 40 հասցեի բնակիչները երկու բարձրահարկ շենքերի միջեւ կառուցվող բազմաբնակարան շենքի շինարարական նորմերի խախտումների վերաբերյալ ահազանգել են Երեւանի քաղաքապետարան։ 

Բազմաթիվ դիմում-բողոքներից հետո Քաղաքապետարանի աշխատակազմի Քաղաքաշինական գործունեության հատուկ Կարգավորման ծրագրերի բաժնի պետ Արբակ Վարդանյանը քաղաքացիներին պատասխանել է, որ «իրենց կողմից բարձրացված հարցերը ուսումնասիրվել են Երեւանի գլխավոր ճարտարապետի կողմից եւ ըստ նախնական արդյունքների խնդիրը մանրամասն ուսումնասիրման կարիք ունի՝ կապված երկու բարձրահարկ շենքերի միջանկյալ տարածքի հեռավորության եւ արեւահարման ռեժիմի նորմերի պահպանման հետ»։

Նշվել է նաեւ, որ գլխավոր ճարտարապետի զեկույցի հիման վրա Երեւանի քաղաքապետին առաջարկվել է նախքան խնդրի կարգավորումը ժամանակավորապես դադարեցնել շինարարական աշխատանքները։

Պատասխանից մեկ ամիս հետո շինարարական աշխատանքները դադարել են եւ վերսկսվել են 2018 թվականի մայիսին։

Գրավոր դիմել էի քաղաքապետին եւ խնդրել  տրամադրել տեղեկատվություն այն մասին, թե երբ է կառուցապատող «Մաքս Նիկել Դիվելըփմենթ» ՍՊԸ-ին տրվել շինթույլտվության փաստաթուղթ։

Պարզվեց, որ հողի նախկին սեփականտիրոջը քաղաքապետարանի կողմից «Ժայռ» ՍՊԸ-ին 2007 թվականին տրամադրվել է ճարտարապետահատակագծային առաջադրանք, իսկ 2008 թվականին համաձայնեցվել է նախագիծ (նախագծող «Նորգալ» ՍՊԸ), որի համար հիմք է հանդիսացել  իրավասու կազմակերպության կողմից փորձաքննության ենթարկված դրական երաշխավորմամբ եզրակացությունը եւ 2012 թվականին տրամադրվել է շինարարության թույլտվություն։ Նույն թվականին հողամասի փոխված սեփականատիրոջը «Մաքս Նիկել Դիվելոփմընթ» ՍՊԸ-ին տրվել է նոր՝ փոփոխված ճարտարապետահատակագծային առաջադրանք, որից հետո 2013 թվականին վերահամաձայնեցվել է  «Երեւաննախագիծ» ՓԲԸ-ի կողմից մշակված նախագիծը։ Շինարարական աշխատանքների՝ 6-րդ հարկի երկաթբետոնե կարկասի կառուցման փուլում  շինարարական աշխատանքները դադարեցվել են եւ սկսել 2018 թվականին։

Քաղաքապետի կողմից ստացված գրության մեջ նաեւ նշվում է, որ շինարարության թույլտվությամբ սահմանված ժամկետը լրացել է 2016 թվականին եւ համաձայն ՀՀ Կառավարության 19․03․2015 հ․ 596-Ն որոշման հ․1 հավելվածի 130-րդ կետով սահմանված պահանջի՝ շինարարության թույլտվության ժամկետի երկարաձգման համար անհրաժեշտ է վերահամաձայնեցման ներկայացնել նոր փորձաքննության ենթարկված նախագիծ, որը չի ներկայացվել։

Մամիկոնյանց 42-44 շենքի բնակիչների կողմից պատվիրվել է փորձաքննություն «Եվրոպական փորձագիտական ինստիտուտ»ՍՊԸ-ին՝ պարզելու արդյոք Մամիկոնյանց 42-44 եւ 42/1 շենքերի միջեւ հեռավորությունը համապատասխանում է քաղաքաշինական նորմերին թե՞ոչ։

Հետազոտումը կատարվել է 2018 թ․ մայիսի 30-ից մինչեւ հունիսի 8-ը։ Այն հաստատել է կառուցապատողի կողմից շինարարական նորմերի կոպիտ խախտումները։ Հետազոտության եզրակացության մեջ նշվում է, որ «Երեւան քաղաքի Մամիկոնյանց փողոցի 42-44 եւ Մամիկոնյանց փողոցի թիվ 42/1 հասցեներում գտնվող շենքերի միջեւ հեռավորությունը կազմում է 7․4մ, ինչը չի համապատասխանում ՀՀ Քաղաքաշինության նախարարի 14․10․2014 թվականի թիվ 263-Ն հրամանի թիվ 79 կետով առաջադրված պահանջներին։ Շենքի վրա առկա են բացվածքներ, որոնց դիտելիությունը ուղղված է Մամիկոնյանց փողոցի 42-44 շենքի ուղղությամբ»։

Ես այս խնդիրը բարձրաձայնել էի Երեւանի ավագանու մայիսի 30-ին կայացած նիստում եւ դիմել քաղաքապետին՝ խնդրին լուծում տալու նպատակով։ Ինձ պատասխանեցին, որ շինարարությունը դադարեցված է, այնինչ աշխատանքները կանգնեցվել են ընդամենը մեկ օր, որից հետո շարունակել ավելի արագ տեմպերով։ Այս եւ բազմաթիվ օրինակներ փաստում են, որ Երեւանի քաղաքապետարանը ի զորու չէ վերահսկել քաղաքում իրականացվող ապօրինի շինարարությունները եւ կանգնեցնել ապօրինի կառուցապատողներին։

Մաքս Նիկել Դիվելոփմընթ ՍՊԸ-ի հիմնադիրն է ԱԺ նախկին պատգամավոր, գործարար Հակոբ Հակոբյանը` հայտնի Ճոյտ մականունով, որի մասնակցությունը համաձայն ՀՀ Կառավարության Էլեկտրոնային ռեգիստրի այս պահին դադարեցվել է։

Բնակիչները հայտնեցին, որ Հակոբ Հակոբյանի հետ հանդիպման ժամանակ վերջինս կոպտել է կանանց եւ փորձել հարվածել։ Մանրամասները ներկայացված են տեսանյութում։