Ի վերջո, ե՞րբ լուսանկարիչները թանգարան կունենան. Տարոն Մարգարյանը Վահան Քոչարին խոստացել է

Լուսանկարում՝ լուսանկարիչ Վահան Քոչար

Այսօր Թեքեյան արվեստի կենտրոնում տեղի ունեցավ «Ֆոտոպոդիում- Մենք 10 տարեկան ենք» խորագրով միջազգային շարժական  լուսանկարչական ցուցահանդեսի բացումը: Հոբելյանական ցուցահանդեսին մասնակցում է 80 հեղինակ՝ յոթ տարբեր երկրներից՝ Հայաստանից, ԱՄՆ-ից, Գերմանիայից, Իսրայելից, Լեհաստանից, Ռուսաստանից եւ Վրաստանից:Յուրաքանչյուր հեղինակից ընտրված մեկական լուսանկար մեկ ամիս ցուցադրվելու է Երևանում, ապա նկարները տեղեփոխվելու են մնացած յոթ երկրներ:

«Թեքեյան Կենտրոն»  հիմնադրամի տնօրեն Արմեն Ծուլիկյանը ողջունելով ներկաներին, նշեց, որ ներկայացված աշխատանքները շատ տպավորիչ են, թե՛ ներկայացուցչական, թե՛ ոճային եւ թե՛ բովանդակային առումով. «Որպես շարքային արվեստագետի կարծիք, կարող եմ ասել, որ շատ հետաքրքիր ֆորմատ է սա, քանի որ երբ ազատ է թողնվում հեղինակը, որևէ ոճի կամ խորագրի տակ չեն սահմանափակվում հեղինակները՝ հնարավորություն են ունենում ծավալվելու»,-ասաց Ծուլիկյանը:

Հիմնադրամի տնօրենը հույս հայտնեց, որ Հայաստանում կբացվի լուսանկարիչների միության թանգարան, քանի որ լուսանկարչությունը մշակույթի կարևորագույն ճյուղերից մեկն է, եւ պետք է ամեն կերպ քաջալերել ու աջակցել լուսանկարիչներին:

Ֆոտոպոդիումին ներկա «Հայաստանի լուսանկարիչներ» գրքի հեղինակ եւ լուսանկարիչ Վահան Քոչարը «ֆոտոպոդիում»-ի անդամ չէ, սակայն հրավիրված էր, եւ իր աշխատանքներից ներկայացրել էր «Մենախոսություն երկխոսություն» շարքից «Տեսակետ» կոչվող աշխատանքը: Վահան Թեքեյանը «Հայական ժամանակ»-ի հետ զրույցում ասաց, որ արդեն մի քանի տարի է, ինչ տարբեր միջոցառումների ժամանակ լուսանկարիչների թանգարան հիմնելու հարցն է բարձրացնում, սակայն դեռ  չիրականացված խոստումներ են միայն:

«Վերջերս լուրեր են պտտվում, որ պետք է բացվի Արա Գյուլերի անվան լուսանկարչական թանգարան, ձևակերպումն այստեղ անհասկանալի է, Արա Գյուլերի անվան լուսանկարչական թանգարան ի՞ր գործերի համար. թե՛ ընդհանուր ցուցադրության կենտրոն՝ ուղղակի իր անունը կրող, որը ընդհանուր գաղափարի հետ այնքան էլ չի համապատասխանում, քանի որ հարց է առաջանում, թե ինչու հենց իր անունով, որովհետև շատ բարձր մակարդակի լուսանկարիչներ կան»-ասաց Քոչարը՝ բերելով իր հոր՝ Անդրանիկ Քոչարի օրինակը, որը 47 թվականից մինչև կյանքի վերջ նվիրել է լուսանկարչությանը:

Մեր այն հարցին, թե գուցե լուսանկարիչը ցանկանում է, որ իր հոր՝ Անդրանիկ Քոչարի անունո՞վ լինի թանգարանը. Քոչարը նշեց, որ չի ցանկանում հոր անունով լինի, այլ ընդամենը ուզում է, որ լինի լուսանկարչության թանգարան, որտեղ ամեն մի լուսանկարիչ, այդ թվում եւ իր հայրը՝ կունենան իրենց արժանի անկյունը: Վահան Քոչարն ասաց, որ դեռ երկու տարի առաջ թանգարան բացելու խնդրանքով դիմել է Երևանի քաղաքապետարան. «Ինձ անձամբ Տարոն Մարգարյանն է ասել, որ թանգարան լինելու է», -ասաց Քոչարը:

Լուսանկարիչների միության նախագահ Սերգեյ Հակոբյանը, ողջունեց  Ֆոտոպոդիում ծրագրի բոլոր մասնակիցներին, ասելով, որ այսօրվա բարդ օրերում միշտ որտեղ չի հաջողվում անել այն ամենը, ինչ- որ պիտի անեն կազմակերպությունը՝ անում են լուսանկարչության ոլորտում ավագ սերնդի ներկայացուցիչները, որոնք աջակցում են ամեն ինչով: Վերջինս նշեց Վահան Քոչարի եւ մի շարք այլ ավագ սերնդի լուսանկարիչների անուններ:

Հոբելյանական 10 ամյակին գյումրեցի լուսանկարիչ Ռուբեն Չախմախչյանը ներկայացրել էր «Գյումրի» կոչվող լուսանկար: «Հայկակակն ժամանակ»-ի հետ զրույցում նկարիչն ասաց, որ դա իր կնոջ լուսանկարն է, որին նա նկարել է մի քանի տարի առաջ: «Ցուցահանդեսի համար պահանջեցին մեկ նկար: Ես երեք նկար էի տվել՝ ընտրվել է մեկը՝ կնոջս նկարը»,- ասաց Ռուբեն Չախմախչյանը:

Ռուբեն Չախմախչյանի «Գյումրիում» լուսանկարը

Չախմախչյանն արդեն 8-9 տարի է ինչ «Ֆոտոպոդիում»-ի անդամ է գրանցված է PHOTOPODIUM.COM կայքում, ասում է, որ կայքի միջոցով են ավելի շատ շփվում բոլոր յոթ երկրների ներկայացուցիչները, ինչն էլ համախմբել է բոլոր լուսանկարիչներիմ:  Չախմախչյանի խոսքով միշտ ակտիվ քննարկումներ են ունենում լուսանկարիչները, խուսում են միմյանց աշխատանքների մասին, ինչն էլ ավելի շատ է զարգացնում արվեստը, սակայն շատ լավ կլինի, եթե լուսանկարիչների թանգարան բացվի:

 Աղունիկ Հովհաննիսյան