ԱԻՆ-ում ով ոնց ուզում՝ հագնվում է. Դավիթ Տոնոյանն անզո՞ր է (լուսանկարներ)

Արտակարգ իրավիճակների նախարարությունում Արմեն Երիցյանի մահից հետո նախարարության որոշ աշխատակիցներ ավելի ազդեցիկ երեւալու համար կոպտորեն խախտում են համազգեստ կրելու կարգը, եւ դա կատարվում է նորանշանակ նախարար Դավիթ Տոնոյանի աչքի առաջ:

ՀՀ կառավարության 2006 թվականի փետրվարի 2-ի եւ 2012 թվականի դեկտեմբերի 27-ի որոշումներով սահմանվել եւ փոփոխվել է արտակարգ իրավիճակների նախարարության Փրկարարական ծառայության համազգեստի ձեւն ու կրման կարգը: Վերջին փոփոխությամբ սահմանվել է փրկարարական ծառայության գնդապետից մինչեւ փրկարարական ծառայության ենթասպա կոչում ունեցող ծառայողների տոնական են ամենօրյա համազգեստի ձեւը:

Տոնական կիտելը պետք է լինի մուգ կապույտ կիսաբրդյա կտորից, մետաքսյա աստառով, 4 ոսկեգույն, 22 մմ կոճակները տեղադրված են մեկ շարքով, 2 ներկարված գրպան` կափույրներով և 2 վրադիր գրպան` կափույրներով՝ կրծքավանդակին, 2 ծոցագրպան: Տոնական ուսանշանները` մուգ կապույտ: Տոնական տաբատ` կիսաբրդյա, մուգ կապույտ գույնի եզրագծերով կիսաբրդյա, մուգ կապույտ կտորից, 2 ներկարված կողային գրպանով, հետևի մասում` մեկ գրպան` կափույրով:

Ամենօրյա համազգեստ` փիրուզագույն (կանաչակապտագույն) կիսաբրդյա, ուղիղ գոտիով, ուսանշանները` հանովի, ծալովի օձիքով: Օձիքի առաջամասում երկկողմանի խորհրդանիշը: Կոճկվում է շղթայով, որը երեսապատված է կտորով: Ներքևի մասում երկկողմանի ներկարված թեք գրպաններ են, առանց կափույրի, շղթայով: Տաբատը` ազատթող փողքերով, 2 կողային ներկարված գրպանով, հետևի մասում` մեկ գրպան` կափույրով:

Կառավարության նույն որոշմամբ սահմանված է նաեւ, թե ինչպես պետք է լինի փրկարարի ամառային եւ ձմեռային գլխարկը, փողկապը, ուսադիրները եւ այլն:  

ՀՀ ԱԻՆ Փրկարարական ծառայության մեջ մտնող Քաղաքացիական պաշտպանության վարչության համազգեստի համար սակայն, այլ ձեւ է սահմնաված  օրենքով: «Քաղաքացիական պաշտպանության ստորաբաժանումների» մասին ՀՀ օրենքի 3-րդ գլխի 15-րդ հոդվածը սահմանում է. «Քաղաքացիական պաշտպանության ստորաբաժանումների զինծառայողները կրում են Հայաստանի Հանրապետության զինված ուժերի միասնական համազգեստ, զինվորական կոչումներ և քաղաքացիական պաշտպանության ստորաբաժանումների տարբերանշաններ, ինչպես նաև միջազգային տարբերանշաններ և կրում են մարտական ու ծառայողական զենք»:

Նշենք, որ Քաղաքացիական պաշտպանության վարչության ներկայացուցիչների գործառույթը բոլորովին այլ է: Քաղպաշտպանության վարչությունը կառուցվածքային ստորաբաժանում է, որն իր իրավասության սահմաններում իրականացնում է քաղաքացիական պաշտպանության պլանների մշակման ու դրանց կատարման ապահովման, տարհանման պլանների և ծրագրերի մշակման, ՀՀ տնտեսության օբյեկտների կայուն գործունեության ապահովման եւ այլ գործառույթներ: Վարչության աշխատակիցներն օրինակ՝ հսկողություն են իրականացնում Տավուշի մարզի սահմանամերձ ջրամբարների վրա, որպեսզի հակառակորդը չփորձի ջրմաբարի միջոցով վնաս պատճառել քաղաքացիներին:

Քաղպաշտպանության վարչության համազգետն այսօր լայնորեն տարածվել է արտակարգ իրավիճակների նախարարության աշխատակիցների շրջանում: Փրկարարական ծառայության ղեկավար Մուշեղ Ղազարյանն, օրինակ, հաճախ է կրում Քաղպաշտպանության վարչության համազգեստն այն դեպքում, երբ օրենքը հստակ սահմանել է փրկարարական ծառայության ենթասպայից մինչեւ գնդապետի համազգեստի կրման ձեւը: Ավելին, արտակարգ իրավիճակների նախարար Դավիթ Տոնոյանը 2017 թվականի մարտի 29-ի հրամանով սահմանել է այդ ծառայության համազգեստը կրելու կարգը:

Համազգեստի խախտման դեպքերն ԱԻՆ-ում նոր թափ է ստանում: Մուշեղ Ղազարյանի օրինակին հետեւողները շատանում են, նրա տեղակալները նույնպես սկսել են կրել նման համազգեստ: Նախարարությունը նշված մարդկանց չի տրամադրում քաղպաշտպանության վարչության համազգեստից, այլ նրանք իրենց միջոցներով են ձեռքբերում:

Մուշեղ Ղազարյանից հետաքրքվեցին, թե ինչո՞ւ է կառավարության սահմանած կարգի խախտմամբ համազգեստ կրում: Մեր հարցերին նա պատրսատ էր պատասխանել, սակայն երբ հարցը լսեց՝ հրաժարվեց դրան պատասխանելուց: Հարցին, թե ինչո՞ւ հրաժարվեցիք պատասխանել հարցերին, նա ասաց. «Հեռախոսով նման հարցերի չեմ պատասխանում, որ գաս դեմս նստես կպատասխանեմ»:

Նշենք, որ սահմանված կարգի խախտմամբ կրած համազգեստով Փրկարարական ծառայության պետը հանդիսավոր կերպով ուղեկցել է վարչապետ Կարեն Կարապետյանին եւ Դավիթ Տոնոյանին, ՀՀ-ում ՌԴ դեսպան Իվան Վոլինկինին եւ այլ պաշտոնատար անձանց: Նա նույնիսկ աշխատանքայի խորհրդակցության ժամանակ է նախարարի հրամանի խախտմամբ  համազգեստ կրել: