Փաստաբանները պատրաստ են ընդհուպ մինչեւ գործադուլի. խուզարկությունները անտանելի են դառնում

Քրեակատարողական հիմնարկներում զննության անվան տակ փաստաբանների խուզարկությունները սկսում են համատարած բնույթ կրել: Այսօր «Նուբարաշեն» ՔԿՀ-ում այսպիսի իրավիճակի է ականատես եղել փաստաբան Երվանդ Վարոսյանը: Վերջինս որպես ստեղծված իրավիճակի ելք չի բացառել նաեւ գործադուլի եւ բոյկոտի դիմելը:

- Պարոն Վարոսյան, ի՞նչ է տեղի ունեցել ձեզ հետ, ի՞նչ իրավիճակի եք ականատես եղել «Նուբարաշեն» ՔԿՀ-ում:

- Չգիտեմ ի դժբախտություն, թե երջանկություն ինձ՝ իմ հետ ոչինչ տեղի չի ունեցել: Այսօր ես ականատես եղա, որ բազմաթիվ փաստաբաններ «Նուբարաշեն» քրեակատարողական հիմնարկ մուտք գործելու խնդիր ունեին, փորձ էր կատարվում նրանց ենթարկել խուզարկության: ՔԿՀ աշխատակիցները մասնավորապես պարտադրում էին փաստաբաններին, որ բացեն ճամպրուկներն ու պայուսակները՝ ցույց տալու համար պարունակությունը: Շատ փաստաբաններ հրաժարվեցին, հետ գնացին, որովհետեւ պայման էր դրված, որ հակառակ պարագայում չեն կարող մուտք գործել քրեակատարողական հիմնարկ:

- Ինչո՞ւ են դեմ փաստաբանները, որպեսզի իրենց իրերի զննում իրականացվի:

- Իրականում դա ոչ թե զննություն էր, այլ խուզարկություն: Մարդիկ երկար տարիներ զննությունն ու խուզարկությունը իրարից չեն տարբերում: Օրենքով մենք ունենք այդ երաշխիքը, ոչ ոք մեզ խուզարկելու իրավունք չունի: Խուզարկությունից խուսափելով մենք ոչ միայն պաշտպանում ենք մեր իրավունքները, այլեւ մեր պաշտպանյալների իրավունքները: Որովհետեւ քրեակատարողական հիմնարկ ոչ ոք ժամանակ անցկացնելու համար չի գնում. եթե դու գնում ես, ունես փաստաթղթեր, այդ փաստաթղթերը բնականաբար պետք է վերաբերվեն քո պաշտպանյալի քրեական գործին, շատ դեպքերում դրանք նաեւ փաստաբանական գաղտնիք են պարունակում, որը եւս պաշտպանված է օրենքով: Ոչ ոք, առավելեւս պետության ներկայացուցիչը փաստաբանական գաղտնիքին չպետք է ծանոթանա, անկախ նրանից՝ դրա անունը դնում ես զննությո՞ւն, թե՞ խուզարկություն: Էդ վերջին միտքը, որ պետք է զննել՝ առանց բովանդակությանը ծանոթանալու, ինձ մոտ միայն ծիծաղ է առաջացնում:

- Այսինքն դա անհնա՞ր եք համարում:

- Հնարավոր է, եթե հայերենին չտիրապետող այլազգիների բերես եւ իրականացնեն զննում:

- Արդեն բավական ժամանակ է, որ այս մասին ահազանգում եք դուք եւ ձեր գործընկերները: Ինչո՞վ եք պայմանավորում այս երեւույթը հենց այս շրջանում:

- Այսպես ասեմ. ժամանակ առ ժամանակ սա սկսում է տեղի ունենալ եւ հիմնականում չգիտես ինչու կապված է լինում հենց քաղաքական ենթատեքստ ունեցող քրեական գործերի հետ: Սկսվում է դրանցով, հետո տարածվում մյուսների վրա, հետո մարում: Մարդիկ մեկ էլ մոռանում են, որ դա պիտի արվեր: Անցնում է 1-2 տարի, նորից հիշում են:

- Կոնկրետ այս շրջանում ինչո՞վ կարող է պայմանավորված լինել այդ մասին հիշելը:

- Դե քանի որ այս ամենը սկսվեց փաստաբան Մուշեղ Շուշանյանից՝ Ժիրայր Սեֆիլյանի պաշտպանից, կարող ենք ողջամիտ կասկած ունենալ, որ ամեն ինչ կապված է հենց այդ դեպքի հետ: Շուշանյանից սկսվեց, հետո տարածվեց նաեւ մնացածի վրա:

- Ելքը ո՞րն է, ըստ ձեզ ի՞նչ պետք է անել:

- Սա շատ հեշտ լուծելի խնդիր է: Եթե ցանկություն ունենան լուծելու՝ կլուծեն րոպեների ընթացքում: Քրեակատարողական հիմնարկի աշխատակիցները իրականացվող խուզարկությունը բացատրում են նրանով, թե հնարավոր է փաստաբանները արգելված իր հետները տանեն, փոխանցեն իրենց պաշտպանյալներին: Չբացառելով նրանց այս ենթադրությունը, այնուամենայնիվ պետք է փաստել հետեւյալը, որ կալանավորված անձինք նախքան տեսակցելը եւ տեսակցությունից հետո խուզարկվում են, ինչը բացառում է նրանց որեւէ իր կամ առարկա փոխանցելը, այսինքն անիմաստ է դա դարձնում: Եվ երկրորդ. բոլոր քրեակատարողական հիմնարկները սկաներ սարքերով կահավորված են: Եթե որեւէ մեկի պայուսակը, ճամպրուկը եւ այլն կասկած հարուցի, կարող են տեղադրել սկաներ սարքում եւ եթե կասկածելի իր տեսնեն, կարող են խնդրել փաստաբանին այն ցույց տալ, փարատել  այդ կասկածները: Բացարձակապես կարիք չկա մտնել մարդկանց պայուսակները՝ հատկապես կանանց դեպքում:

- Դուք առաջարկել էիք բոյկոտի, գործադուլի միջոցով խնդրի լուծմանը հասնելու տարբերակը: Սա հավանակա՞ն է իրականացվի:

- Եթե իրավիճակը լուծում չստացավ՝ իհարկե ինչ-որ քայլեր պիտի ձեռնարկենք: Ինչ քայլեր կձեռնարկենք՝ դա կորոշվի, բայց եթե վիճակը այսպես շարունակվի, ապա այո՛, ես էլ գուցե նախաձեռնեմ որոշակի քայլեր:

- Փաստաբան Ալեքսանդր Սիրունյանը դատարան դիմելու մտադրության մասին է հայտարարել: Դա ռեա՞լ տարբերակ է՝ փաստաբանների իրավունքները վերականգնելու հետ կապված:

- Ես ծանոթ եմ, որ մեր որոշ գործընկերներ որոշել են ՔԿՀ ծառայողների գործողությունները վիճարկել դատարանում, ողջունում եմ այդ  քայլը, կարծում եմ որ դա էլ պայքարի տարբերակներից մեկն է: Ես հույս ունեմ, որ իրավիճակը չի հասնի դատարան դիմելուն կամ գործադուլին, որովհետեւ ցանկության դեպքում սա շատ հեշտ լուծելի պրոբլեմ է:

Հիշեցնենք, որ Ժիրայր Սեֆիլյանի կողմից Հայոց բանակի 25‐ամյակի առթիվ արված շնորհավորական ուղերձի հրապարակումից հետո փաստաբան Մուշեղ Շուշանյանը հայտարարել էր, որ աննախադեպ խուզարկություններ են սկսվել, առգրավվել էին անգամ քարտեզներ: Այս կապակցությամբ Շուշանյանը հանցագործության մասին հաղորդում էր ներկայացրել ՀՀ գլխավոր դատախազություն: