Ադրբեջանը «հուշտ է լինում», Ադրբեջանի մոտ ամնեզիա է. Էդվարդ Նալբանդյան

Նախորդ տարին ՀՀ արտաքին դիվանագիտության համար մարտահրավերներով լի էր: Մենք բախվեցինք ադրբեջանական ագրեսիային, սակայն միջազգային հանրության հետ միասին քայլեր ձեռնարկվեցին Ադրբեջանին իրականության դաշտ բերելու համար: 2016 թվականի դիվանագիտական տարվա ամփոփմանը նվիրված այսօրվա մամուլի ասուլիսին այս մասին հայտարարեց ՀՀ արտգործնախարար Էդվարդ Նալբանդյանը:

Որպես անցած տարվա կարեւոր իրադարձություններ նա առանձնացրեց նաեւ ՀԱՊԿ-ում Հայաստանի նախագահության փաստը: «Շարունակվեցին ջանքերն՝ ուղղված ՌԴ-ի հետ դաշնակցային հարաբերությունների խորացմանը, կարեւոր տեղ զբաղեցրեց նաեւ ԱՄՆ-ի եւ ԵՄ-ի հետ համագործակցությունը: Շարունակվեցին քայլերն ԱՊՀ երկրների հետ ավանդական կապերի ամրապնդման ուղղությամբ: Աշխատանքներ տարվեցին արաբական երկրների հետ, Հայաստանն ակտիվ գործունեություն ծավալեց ԵԱՏՄ կազմում, խորացրեց հարաբերությունը միջազգային կառույցների հետ, բնականոն զարգացան ՆԱՏՕ-ի հետ հարաբերությունները: 2016 թվականին տեղի ունեցավ 120-ից ավելի փոխայցելություն»,- նշեց Էդվարդ Նալբանդյանը՝ հույս հայտնելով, որ նույնքան արդյունավետ կլինի նաեւ 2017 թվականը:

Անդրադառնալով ղարաբաղյան հակամարտության կարգավորման խնդրին՝ ՀՀ արտգործնախարարն ընդգծեց, որ Ադրբեջանը փորձում է խոչընդոտել ՀՀ-ի եւ եռանախագահների կողմից խնդրի խաղաղ կարգավորման գործընթացին, կասկածի տակ դնում կամ աղավաղում Վիեննայում եւ Սանկտ Պետերբուրգում ձեռք բերված պայմանավորվածությունները:

Խոսելով դեկտեմբերի 29-ին ադրբեջանական կողմի դիվերսիոն գործողությունների մասին՝ Էդվարդ Նալբանդյանը նկատեց. «Ոմանք հարց են տալիս՝ ով է դիվերսիոն հարձակման հրաման տվել՝ ադրբեջանական իշխանությո՞ւնը, թե՞ տեղական հրամանատարությունը: Իհարկե, հրամանն Ադրբեջանի ղեկավարությունն է տվել: Ոչ ոք կասկած չունի, որ Բաքուն կարող էր նման հրաման արձակել: Եթե հրաման տային տեղական հրամանատարները, կնշանակեր՝ նրանք թքած ունեն իրենց իշխանությունների վրա, դա կնշանակեր՝ այնտեղ բեդլամ է (խմբ.- ամենաթողություն): Ենթադրենք՝ ինչ-որ խելագարված դիվերսանտներ են դա արել, ինչ է դա նշանակում: Դա նշանակում է, որ գործ ունենք ամբոխային խելագարության հետ, մանավանդ, որ այդ երկրի 92 տոկոս բնակչությունը կողմ է ուժի կիրառմամբ հակամարտության լուծմանը: Ժամանակն է սթափեցնել Ադրբեջանին, որը կորցրել է իրականության զգացումը»:

ՀՀ արտաքին գերատեսչության ղեկավարը տեղեկացրեց նաեւ, որ Հայաստանի եւ Ադրբեջանի արտգործնախարարների մակարդակով հանդիպում առաջարկվել է եռանախագահների կողմից: «Մենք, հայտնի է, մենք երբեք չենք հրաժարվում հանդիպումներից, սակայն այս պահին հանդիպման մասին տեղեկությունը չեմ կարող հաստատել: Ինչ խաղեր կտա այս անգամ Ադրբեջանը, ոչ ոք չգիտի: Եթե Ադրբեջանը չհրաժարվի, հանդիպում անպայման կլինի: Սկզբում պայմանավորվում ենք, սակայն հետո նրանք հրաժարվում են, ընդհուպ հաճախ հայտարարում են, որ հանդիպում չի եղել:

Սա այն դեպքում, երբ այդօրինակ հանդիպումներին ներկա են լինում նաեւ իրենք՝ եռանախագահները: Ակնհայտ է՝ ով է  հրաժարվել Կազանից, Սոչիից, Մոսկվայից, Աստրախանից կամ ով է «հուշտ լինում» եռանախագահող երկրների մակարդակով արված կարեւորագույն 5 հայտարարությունից. իհարկե՝ Ադրբեջանը: Ադրբեջանի մոտ ամնեզիա է, որոշ բաներ հիշում են, որոշ բաներ չեն հիշում, ժողովուրդն էլ ընկնում է ամբոխային խելագարության մեջ»,- նկատեց Էդվարդ Նալբանդյանը:

Հարցին՝ ինչպես  է վերաբերում ԵԱՀԿ Մինսկի խմբի այս կամ այն համանախագահի փոփոխությանը, ՀՀ արտգործնախարարը պատասխանեց՝ եռանախագահողներն արտահայտում են իրենց երկրների մոտեցումները, եւ անձերի փոփոխությունը հակամարտության կարգավորման գործընթացի վրա չի կարող էական ազդեցություն ունենալ:

Նալբանդյանը եւս մեկ անգամ շեշտեց, որ Մադրիդյան սկզբունքները մշակված եւ ներկայացված են որպես մեկ ամբողջական փաթեթ, հետեւաբար խնդրի լուծումը պետք է լինի փաթեթային:

Վերջում արտգործնախարարն անդրադարձավ նաեւ ադրբեջանցի դիվերսանտի մարմնի վերադարձի հարցին՝ նկատելով, որ հայկական կողմը երբեք չի հրաժարվել դրանից, հակառակը՝ մարդասիրությունը ժխտողի դիրքերից մշտապես հանդես է եկել Ադրբեջանը: Որպես օրինակ Նալբանդյանը հիշեցրեց 2014 թվականին հայկական ուղղաթիռի՝ ադրբեջանցիների կողմից խոցելու փաստը, երբ ադրբեջանցիների անընդհատ կրակահերթերի տակ հայկական կողմը չէր կարողանում դուրս բերել մեր տղաների մարմինները: «Ի վերջո, դա մեզ հաջողվեց հատուկ օպերացիայով, ինչին ադրբեջանական կողմը չէր հավատում»,- նկատեց արտգործնախարարը: