Բակլան Աշոտյանինն էր, խաշած էր ցանում. Բորիս Մակիչյանի արձագանքը կեղծված դիպլոմների խնդրին

Ոչ պետական երեք բուհերում կեղծ հիմքերով դիպլոմներ տրամադրելու դեպքերի մասին ՀՀ ազգային անվտանգության ծառայության՝ օրերս տարածած անանուն հայտարարությունը որոշակի դժգոհություն է առաջացրել մասնավոր բուհերի ղեկավարների շրջանում:

Նրանք համարում են, որ կեղծիք թույլ տված բուհերն անվանական չնշելով` ստվեր է ընկնում բոլորի հեղինակության վրա: Ոչ պետական բուհերի ռեկտորների խորհրդի նախագահ, Հյուսիսային համալսարանի ռեկտոր Բորիս Մակիչյանն այդ մասին նաեւ հայտնել է շաբաթ օրը ԱԱԾ-ում հյուրընկալվելու ժամանակ: Նրան պարզաբանել են, թե կարծում են, որ դիպլոմներ կեղծելու տհաճ երեւույթը բազմացման, շարունակվելու միտում ունի, ուստի իրենք հետապնդել են կանխարգելելու նպատակ:

«Եվ այնտեղ ինձ ցույց տվեցին, որ մի խումբ ուսանողներ, որոնք ուսումնական պրոցեսներին չեն մասնակցել, դիպլոմ են ստացել: Եղել են ուսանողներ, որոնք ուսումը կիսատ են թողել երկրորդ կուրսից, երրորդ կուրսից, բայց էլի դիպլոմ են ստացել: Եղել են օտարերկրյա քաղաքացիներ, որոնք երբեւէ Հայաստանի Հանրապետությունում չեն եղել, ձեւակերպված են եղել ուսանողներ եւ դիպլոմներ են ստացել: Ոչ պետական բուհերի ռեկտորների խորհրդում ընդգրկված են 12 բուհեր, բարեբախտաբար, մեր բուհերից ոչ մեկից գոնե մի փաստ նրանք չունեին: Ինձ հրավիրելը նույնպես այս երեւույթի կանխարգելման միջոց էր հանդիսանում: Ես բոլոր ոչ պետական բուհերի ռեկտորներին այս տեղեկատվությունն ուղարկելու եմ, իրենք թող ծանոթանան, որ զգույշ լինեն, նման դեպք, նման փաստ ոչ մի բուհում չկրկնվի»,- ասաց Բորիս Մակիչյանը:

Այդուհանդերձ, նա ընդգծեց, որ անկախ ոչ պետական բուհերի ռեկտորների անձից, այդ բուհերում կաշառակերության երեւույթը գրեթե չկա: ԱԱԾ ուշադրության կենտրոնում հայտնված երեք բուհերում նույնպես, Մակիչյանի համոզմամբ, կոռուպցիան մեծ տարածում չունի: Հիշեցնենք, որ մեր նախորդ հրապարակման մեջ տեղեկացրել էինք, որ թեպետ Ազգային անվտանգության ծառայությունը չի նշում կոռուպցիային առնչվող բուհերի անունները, մեզ հաջողվել է պարզել, որ խոսքը վերաբերում է Երեւանում գործող Սուրբ Թերեզայի անվան բժշկական եւ Ավետիք Մկրտչյանի անվան տնտեսաիրավագիտական համալսարաններին, ինչպես նաեւ Գյումրու «Պրոգրես» համալսարանին: Այսինքն` մեղադրանք է առաջադրվել այս բուհերի ռեկտորների նկատմամբ:  

Ոչ պետական բուհերի ռեկտորների խորհրդի նախագահը եւս անուններ չհրապարակելով,  նկատեց, որ խնդրո առարկա բուհերում կազմակերպվում է արտասահմանյան ուսանողների կրթություն: Նա կարծիք հայտնեց, որ առկա իրավիճակը ՀՀ կրթության եւ գիտության նախկին նախարար Արմեն Աշոտյանի գործունեության հետեւանք է, որը ոչ պետական բուհերի ընդունելությունը նույնպես դարձրեց միասնական քննակարգով, ինչը, Բորիս Մակիչյանի խոսքով, ապօրինի էր ու հանգեցրել է դիմորդների թվի էական կրճատման.   

««Բարձրագույն կրթության մասին» օրենքի 6-րդ հոդվածում գրած է, որ ընդունելությունը բուհի իրավասությունն է, բայց դարձրին միասնական: Այդ միասնական ընդունելությունն էլ անարդար են կազմակերպում»:

Անարդարությունն, ըստ նրա, ոչ պետական բուհերի նկատմամբ է` անհավասար պայմաններ ստեղծելով, պետական բուհերի նկատմամբ դրանց ունեցած առավելությունները (ինչպես օրինակ հավատարմագրված լինելն է) ընդունելության ժամանակ քողարկելով եւ այլն:

«Հավատարմագրված, օրենքի գերակայությամբ գործող ոչ պետական բուհերի ընդունելությունը Աշոտյանի կամայականության արդյունքում վերջին վեց-յոթ տարում էապես նվազում էր, նրանց գործունեությունը նախկին նախարարը կազմալուծեց: Օրենքի համաձայն` պետական բուհերը պետպատվերով կրթություն են կազմակերպում: Մասնավոր բուհերում էլ դա պիտի արվեր, բայց այդ հնարավորությունը չէր տրվում: Միայն այս տարի մի բուհում 4 տեղ էր հատկացվել, էլի Արմեն Աշոտյանի կարգադրությամբ: Մասնավոր բուհերը, եթե նույնիսկ առաջարկում էին իրենց միջոցների հաշվին անվճար ուսուցում, դա էլ չէր գրվում հայտարարության մեջ: Դժվար է ասել` այսօր ոչ պետական բուհերում ինչպիսի անօրինականություններ կան: Այդ ամեն ինչը Արմեն Աշոտյանի կամայականության, տերը ես եմ, բակլան խաշած եմ ցանում աշխատանքի ոճի արդյունքն էր»,- ասաց Հյուսիսային համալսարանի ռեկտորը:

Այս բուհի ուսանողների թիվն, ի դեպ, վերջին տարիներին կիսով չափ կրճատվել է`      3 000-ից  հասնելով 1 500-ի: Հարցին, թե ինչու ԱԱԾ ուշադրության կենտրոնում հայտնվեցին ոչ թե պետական, այլ մասնավոր բուհերը, Մակիչյանը պատասխանեց. «Պետական բուհերն, իմ կարծիքով, ինչ-որ մի տեղ պաշտպանված են, եւ Ազգային անվտանգության մարմինները, առանց նրանց կառավարման խորհուրդների համաձայնության, այնտեղ չեն մտնի»: Հայտնի է, որ պետական բուհերի խորհուրդները նախագահում են պետական բարձրաստիճան պաշտոնյաներ, այդ թվում` երկրի առաջին դեմքերը: Մակիչյանը կարծում է, որ նրանք այդ բուհերի համար տանիքի դերակատարում ունեն:

«Երբ կառավարման խորհրդի նախագահները բարձրաստիճան պաշտոնյաներ են, քաղաքացիներն էլ շատ ժամանակ դիմում են այնտեղ, երեք անգամ ավելի վարձ են տալիս, քան թե մասնավորում: Այդ մարդկանց գործոնը բարձրացնում է պետական բուհերի հեղինակությունը, ժողովուրդն ինչ-որ մի տեղ մտածում է` դե իշխանությունը նրանց ձեռքին է, որոշ հարցերում կաջակցեն, շրջանավարտները աշխատանքի կանցնեն: Ես համոզված եմ, որ այսօր ոչ պետական մի շարք բուհերում կրթության որակին ավելի շատ մեծ տեղ է հատկացվում, ավելի մեծ աշխատանք են կատարում, քան բարձր հեղինակություն վայելող որոշ բուհերում»: