Ինչքան էլ ձեզ բերման ենթարկեն, մի մասնակցեք, հիվանդացեք. Փոստանջյանը՝ պատգամավորներին

Այսօր ԱԺ-ում ԵՏՄ հարցով քննարկման ժամանակ «Ժառանգության» պատգամավոր Զարուհի Փոստանջյանը ընթերցեց մի ռուս մտավորականի բնութագրում՝ Ռուսաստանում այսօր ստեղծված ծանր եւ բարդ իրավիճակի մասին:

Որոշ պատգամավորներ վրդովվեցին եւ սկսեցին տեղերում աղմկել՝ նկատելով, թե պատգամավորը խախտում է Լեզվի մասին օրենքը՝ ռուսերեն խոսելով Ազգային ժողովում:

«Մի մտահոգվեք, որ այսպես շարունակեք, շուտով դուք էլ եք այս ամբիոնից ռուսերեն խոսելու»,- գործընկերներին հանգստացրեց Փոստանջյանը:  

Այնուհետեւ նկատեց, որ Հայաստանը բռնակցվում է մի միության, որն ըստ էության տնտեսություն չունի:

«Փաստացի մենք այսօր հայտնվել ենք նույն իրավիճակում, ինչի մասին խոսել է Խրիմյան Հայրիկը: Երկաթյա շերեփը, որով մենք կարողացանք մեր հայրենիքը ազատագրել, այսօր այդ երկաթյա շերեփը փոխում ենք թղթե շերեփով»,- հայտարաեց Փոստանջյսանը՝ նկատելով, որ ցավ է ապրում, երբ այդ գործընթացին մասնակցում է նաեւ պատմություն ունեցող ՀՅԴ կուսակցությունը:

«Միգուցե անտարբեր եք կամ կարող եք ասել՝ բացակայում ենք, բայց պետք է պատկերացնել, թե ինչ է տեղի ունենալու մեզ հետ: Միանում ենք մի երկրի, որը գտնվում է  աշխարհի հետ առճակատման մեջ, որի տնտեսությունը գահավիժում է, եւ մենք նորից ընկնելու ենք ոտքի տակ»,- ասաց Փոստանջյանը եւ հավելեց. «Ինչքան էլ որ ձեզ բերման ենթարկեն, դուք մի մասնակցեք, հիվանդացեք, մնացեք տանը...»:

Վերջին խոսքը եւս որոշներին վրդովեցրեց:

«Այո, բերման են ենթարկում, դուք չունեք ձեր խղճի հետ հաշտ լինելու հնարավորությունը, դուք գալիս եք այստեղ եւ այդ պատվերի ներքո անում եք հայտարարություններ»,-պատասխանեց պատգամավորը: