Բայց այս ընթացքում նա խոսում է նաեւ ամենահրատապ երկու հարցերի` մայիսի 12-ին կարկուտից տուժած Արմավիրի գյուղերի եւ գազի թանկացման մասին: Առաջին հայացքից, այս երկու հարցերի մեջ ուղիղ կապ չկա: Սակայն կապը ստեղծում է հենց վարչապետը: Արմավիրի գյուղերի մասին խոսելիս վարչապետը մի այնպիսի սկզբունքային դիրք է բռնել, որը նույնիսկ զարմանալի է: Նա ասում է, որ պետությունը ոչ մի դեպքում չի փոխհատուցի կարկուտի հետեւանքով տուժած գյուղացիների վնասները, այլ կօգնի նրանց: Սա խիստ գաղափարական մոտեցում է, այսպես ասած՝ ժամանակակից միջազգային չափանիշներին համապատասխան մոտեցում: Ազատական, շուկայական, մրցակցային տնտեսվարմանը հարիր ոչ պոպուլիստական մոտեցում: Իրոք, այդ չափանիշների համաձայն, պետությունն այն կառույցը չէ, որ տնտեսվարողների վնասներ փոխհատուցի: Վնասներ փոխհատուցում են ապահովագրական ընկերությունները: Պետությունը կարող է օգնել: Ընդ որում, այդ օգնությունը կարող է ավելի մեծ լինել, քան այն փոխհատուցումը, որը կարող է տեսականորեն լինել: Բայց փոխհատուցման եւ օգնության տարբերությունը գաղափարական է: Եւ ուրեմն, այս դեպքում  Տիգրան Սարգսյանը խիստ գաղափարական դիրքերից է հանդես գալիս:

Մայիսի 26-ին` կիրակի օրը, ՀՀ չորս համայնքներում տեղի կունենան համայնքի ղեկավարի հերթական ընտրություններ: Արմավիրի մարզի Վարդանաշեն համայնքի ղեկավարի պաշտոնի համար ընտրապայքար է ծավալվել 5 թեկնածուի միջեւ: Նրանք են` Աշոտ Հայրապետյանը, Գրիգոր Սահակյանը եւ Արթուր Մանուկյանը (գործող գյուղապետ), երեքն էլ անկուսակցական եւ Հայաստանի Հանրապետական կուսակցության ներկայացուցիչներ Հայկ Սահակյանը եւ Գրիգոր Սահակյանը: Կոտայքի մարզի Նոր Հաճն քաղաքում պայքարում է երեք թեկնածու` Հովհաննես Ադամյանը եւ Շուշանիկ Նազարյանը, երկուսն էլ անկուսակցական, ինչպես նաեւ գործող ԲՀԿ-ական քաղաքապետ Գագիկ Մաթեւոսյանը: Կոտայքի մարզի Նուռնուս գյուղում առաջադրվել են անկուսակցական Վանիչկա Ոսկանյանը եւ գյուղապետ ԲՀԿ-ական Մնացական Գեւորգյանը: Շիրակի մարզի Ախուրիկ համայնքում առաջադրվել են անկուսակցական Հայկ Մովսիսյանը եւ ՀՀԿ-ական Վարդիթեր Գասպարյանը` գործող գյուղապետը:  Հունիսի 23-ին համայնքի ղեկավարի արտահերթ ընտրություններ կկազմակերպվեն Արարատի մարզի Սուրենավան գյուղում: Սուրենավանի նախկին գյուղապետը` Վարդգես Ղազարյանը, հիշեցնենք, մարտի 19-ին ավտովթարի զոհ էր դարձել: Սուրենավանում թեկնածուների գրանցումը տեղի կունենա հունիսի 2-ից 4-ը:  Մայիսի 26-ի ՏԻՄ ընտրություններին դիտորդական առաքելություն իրականացնելու նպատակով ԿԸՀ-ում գրանցվել է 3 տեղական կազմակերպություն` «Շահեն»-ը (24 դիտորդ), «Թրանսփարենսի ինթերնեշնլ հակակոռուպցիոն կենտրոն»-ը (11 դիտորդ) եւ «Իրավունքի Եվրոպա միավորում»-ը (11 դիտորդ):

Կանադական «KNM aviation» ընկերությունը օրերս նամակով դիմել է Հայաստանի կառավարությանն առընթեր քաղավիացիայի գլխավոր վարչությանը` առաջարկելով իրենց աջակցությունը ավիացիայի ոլորտում փոփոխություններ իրականացնելու հարցում: Կանադական ընկերությունում գտնում են, որ ՀՀ կառավարությունը պետք է վարի բաց օդային քաղաքականություն` մատնանշելով, որ հենց մենաշնորհային դիրքն ու պետական աջակցությունն էր պատճառը, որ «Արմավիա»-ն սնանկացավ: Առաջարկվում է նաեւ Երեւանի «Զվարթնոց» օդանավակայանը վերածել Եվրոպան եւ Ասիան կապող օղակի: «KNM aviation»-ը նաեւ առաջարկում է ոչ թե սնանկացնել «Արմավիա»-ն, այլ վաճառել այլ ընկերության: Կանադական կողմը վստահ է, որ ճիշտ մենեջմենթի արդյունքում «Արմավիա»-ն կարող է շատ ավելի ցածր գներով տոմսեր առաջարկել: Ներկայումս կանադական ընկերությունը սպասում է քաղավիացիայի գլխավոր վարչության պատասխանին:

Բաքվի օդանավակայանում երեկ բերման է ենթարկվել վրացական «Իմեդի» հեռուստաընկերության նախագահ Մարգարիտա Ախվլեդիանին, ով Թբիլիսիից ժամանել է Բաքու: Այս մասին երեկ տեղեկացրել են ադրբեջանական լրատվամիջոցները: Պատճառը նրա անձնագրում Լեռնային Ղարաբաղ այցելության մասին կնիքն է եղել: Նշենք, որ ԼՂՀ այցելած անձինք Ադրբեջանի ԱԳն-ի կողմից հայտարարվում են «անցանկալի անձինք» եւ արգելվում է նրանց մուտքը Ադրբեջան: Ախվլեդիանին հայտարարել է, որ իր անձնագրում ԼՂՀ այցելության ոչ մի կնիք էլ չկա, ապա հավելել է, որ ինքը որպես լրագրող կարող է այցելել, ուր որ ցանկանա: Ախվլեդիանին ամենայն հավանականությամբ օդանավակայանի տարածքից կարտաքսվի Թբիլիսի:

Այն, որ հատկապես բյուջետային աշխատողները եւ թոշակառուները առանց դրսից ստացած տրանսֆերտների կամ կողմնակի եկամուտների չեն կարող «ծայրը ծայրին հասցնել» իրենց ծիծաղելի ու նվաստացնող աշխատավարձով ու թոշակով, հանրահայտ ճշմարտություն է: Իսկ ինչպե՞ս են ապրում հայրենի կառավարության անդամները: Երեկ մեր հարցերին պատասխանել է կապի եւ տրանսպորտի նախարար Գագիկ Բեգլարյանը եւ արդարադատության նախարար Հրայր Թովմասյանը:

- Պարոն Բեգլարյան, վերջին թանկացումները ձեր ընտանիքի բյուջեի վրա ինչպե՞ս են ազդել, նկատե՞լ եք այդ թանկացումները:
- Թանկացումներ կնկատվեն գազի թանկացումից հետո:

- Մինչեւ գազի թանկացումները այլ թանկացումներ են եղել, խոսքն այս մասին է, օրինակ՝ դուք գիտե՞ք կաթն ի՞նչ արժե:
- Չէ, գիտե՞ք, մեր տան առեւտուրը անում է տիկինս: Ընդհանրապես ես երեխա ժամանակվանից չեմ սիրում առեւտուր անել: Թույլ կտա՞ք ես հետաքրքրվեմ, հետո այդ պատասխանը տամ: Գիտե՞ք, ես որ ռեստորան եմ գնում, մենյուն նայած չկամ:

Գյուղատնտեսության նախարար Սերգո Կարապետյանն արդեն մի քանի օր է, խիստ անկումային տրամադրությունների մեջ է: Լրագրողները նրան օր ու արեւ չեն տալիս Արմավիրի կարկտահարության խնդրով: Երեկ էլ ԱԺ-կառավարություն հարցուպատասխանի ժամանակ ԱԺ ՀՅԴ խմբակցության քարտուղար Աղվան Վարդանյանը նրան հարց ուղղեց այդ խնդրի վերաբերյալ: Նյարդայնացած նախարարը մոտենալով ԱԺ ամբիոնին, ասաց, որ հարցը սպասելի էր իր համար, քանի որ վերջին օրերին շատ է շահարկվել եւ սկսեց կարդալ մի տեքստ: «Ես կուզեի անդրադառնալ հարցին քաղաքական համատեքստում, մանավանդ, որ տնտեսական մասով շատ է խոսվել: Մայիսի 12-ի բնական աղետից տուժել են ոչ միայն Արմավիրի գյուղացիները, այլեւ ես, դուք, հարգելի պատգամավորներ: Ժողովրդական մի լավ խոսք կա, ասում է` կարկուտը բարեկամ ու թշնամի չունի: Կարկուտը նոր երեւույթ չէ, միշտ եղել է եւ կլինի: Մեր աշխատասեր ու ուշիմ ժողովուրդը մեկ անգամ չէ, որ ցույց է տվել դրանց հաղթահարելու իր խելքն ու շնորհքը: Արմավիրցին այսօր օգնության կարիք ունի, պետական օգնության կարիք, տրամաբանված ու հասցեական: Արմավիրցին սրտաճմլիկ ամբիոնային ելույթների ու մեկ օրում գյուղատնտես դարձած հրապարակախոսների կարիք չունի, արմավիրցին հպարտ եւ աշխատասեր մարդ է»,- կարդում էր նախարարը: Աղվան Վարդանյանը, ուսերը թոթվելով, զարմացած արձագանքեց. «Ես առաջարկում եմ` ձեր աշխատողը, որ այդ տեքստը գրել եւ ձեր ձեռքն է տվել, հիմա վերադարձեք նախարարություն եւ ազատեք աշխատանքից: Ես ձեզ կոնկրետ 3 հարց եմ տվել, իմ այդ հարցերին կոնկրետ պատասխանելու փոխարեն դուք այստեղ ի՞նչ եք անում: Կարդում եք, որ ի՞նչ անեք»:

Մարտունիի Վերին Գետաշեն գյուղի բնակիչ, սպանված զինծառայող Լյուքս Ստեփանյանի հայրը` Աշխարհիկ (Իշխան) Ստեփանյանը մեզ հետ զրույցում պատմել էր, որ ճանապարհին համագյուղացիները, հարազատները բռնության են ենթարկվել: Վերջինս մեզ հետ հարցազրույցի ժամանակ մասնավորապես նշել էր. «Մարտունիից մինչեւ Սեւան ռազմական ոստիկանության մեքենան շուռ էր տալիս մեքենաս, աջից-ձախից խփում էր: Հիմա իմ մեքենան ջարդված, գառաժում դրած ա: Ես տեսա, որ իմ ժողովրդին, համագյուղացիներին վտանգ ա սպառնում ու բախումներից խուսափելու համար ժողովրդին ասեցի, որ իմ էրեխուն տանում ենք գյուղ, քանի դեռ մեզ ստեղ չեն կոտորել»,- նշել էր սպանված զինվորի հայր Աշխարհիկ Ստեփանյանը: Երեկ «Առաջին լրատվական»-ին սպանված զինծառայող Լյուքս Ստեփանյանի եղբայրը` Ալիկ Ստեփանյանը պատմել է. «Հենց գյուղից դուրս գալուց ամեն ինչ անում էին, որ մենք չհասնենք Երեւան, հարեւան գյուղի տեր հայրը փոխանակ հորդորելու, հանգստացնելու, մեքենաս շուռ էր տալիս, դագաղը մեջը»: «Առաջին լրատվական»-ի տեսանյութում երեւում է, թե ինչպես են հարվածում սպանված զինծառայողի հարազատներին, ինչպես են բռնության ենթարկվում կանայք եւ տղամարդիկ` մինչեւ ոստիկանապետ Վովա Գասպարյանի եւ պաշտպանության նախարար Սեյրան Օհանյանի ժամանելը: Լյուքս Ստեփանյանի հորեղբոր կինը եւս զերծ չի մնացել հարվածներից: Վերջինս պատմել է, որ ամբողջ մարմինը պատված է այտուցներով, կապտուկներով: «Շրջան կազմած մեզ հարվածում էին, մի քաչալ գլխով սալդատի հրաման էին տալիս, թե խփի, մենք էլ ասեցինք, թե էդ անմեղ սալդատին ինչի եք բերել, որ մեզ խփի: Մենք իրանց խնդրում էինք, թե դագաղը մի շուռ տվեք, էրեխեն մեջն ա, բայց նրանք ոչ մի պատասխան մեզ չտվեցին, դրանից հետո իրանք ինձ հարվածեցին, հետո շուռ եկան Ալիկին հարվածեցին (Լյուքս Ստեփանյանի եղբորը` Ալիկ Ստեփանյանին): Ինձ ու Ալիկին հարվածելուց հետո ինչ-որ բան դեմքիս փչեցին, ես շնչահեղձ եղա, աչքերս սեւացավ ու ինձ նորից հարվածեց (ռազմական ոստիկանը), էդ հարվածից հետո ձեռքս կապտած ա ու չեմ կարողանում շարժեմ»,- պատմել է Լյուքսի հորեղբոր կինը:

Մայիսի 23-24-ին հանրապետությունում սպասվում է առավելապես առանց տեղումների եղանակ, 25-27-ին գիշերվա առաջին կեսին եւ օրվա երկրորդ կեսին շրջանների զգալի մասում սպասվում է կարճատեւ անձրեւ եւ ամպրոպ, առանձին վայրերում հնարավոր է կարկուտ: Ամպրոպի ժամանակ սպասվում է քամու ուժգնացում 18-23մ/վրկ: Օդի ջերմաստիճանը 23-25-ին աստիճանաբար կբարձրանա 4-6 աստիճանով: Երեւանում մայիսի 23-24-ին սպասվում է առավելապես առանց տեղումների եղանակ, 25-27-ին գիշերվա առաջին կեսին եւ օրվա երկրորդ կեսին` կարճատեւ անձրեւ եւ ամպրոպ, ամպրոպի ժամանակ քամու ուժգնացում` 18-23 մ/վրկ:

Ճանապարհային ոստիկանությունը երեկ տեղեկացրել է, որ 2013 թվականի ապրիլի 15-ից գործում է տեսանկարահանող եւ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով կայացված որոշումների վերաբերյալ sms հաղորդագրություն ստանալու համակարգը: sms հաղորդագրություն ստանալու համար անհրաժեշտ է գրանցվել ՀՀ Ոստիկանության հետ համագործակցող «Նիկիտա Մոբայլ» ընկերության եւ «Մայքրոսոֆթ» ինովացիոն կենտրոնի կողմից համատեղ մշակված «www.4car.am» կայքում: Գրանցման համար անհրաժեշտ է` հաստատել հեռախոսահամարը, լրացնել անձնական տվյալները, լրացնել մեքենայի հաշվառման համարանիշը եւ հաշվառման վկայագրի համարը: Եթե մուտքագրված տվյալները ճիշտ են, ապա հաստատվում է կայքի կողմից եւ 1 ժամվա ընթացքում քաղաքացին ստանում է մինչ այդ պահը կատարված խախտումների պատմությունը, որից հետո յուրաքանչյուր նոր հայտնաբերված խախտման վերաբերյալ քաղաքացին ստանում է sms հաղորդագրություն, որին մանրամասն կարելի է ծանոթանալ «4car.am» կայքում: Կայքում հնարավորություն կա նաեւ տեսնել տեսագրությունը եւ կատարել վճարում: Բացի այդ, մինչեւ հուլիսի 1-ը տեսանկարահանող եւ լուսանկարահանող սարքերով հայտնաբերված ճանապարհային երթեւեկության կանոնների խախտումների վերաբերյալ գործերով կայացված որոշումների վերաբերյալ ամբողջական տեղեկատվությունը կտեղադրվի նաեւ ՀՀ Ոստիկանության «www.police.am» պաշտոնական կայքում եւ յուրաքանչյուր վարորդ` մինչեւ սահմանված կարգով (փոստային առաքմամբ) որոշման ստացումը, ավտոմոբիլի համարանիշն ու հաշվառման վկայագրի համարը մուտքագրելով կկարողանա տեղեկանալ տվյալ ավտոմոբիլով կատարված խախտումների մասին:

Սերժ Սարգսյանը երեկ շնորհավորական հեռագիր է հղել Հայաստանի ազգային հերոս, աշխարհահռչակ շանսոնյե Շառլ Ազնավուրին` ծննդյան օրվա առթիվ: «Սիրելի Շառլ, սրտանց շնորհավորում եմ Ձեզ ծննդյան օրվա կապակցությամբ:Դուք մեր ժամանակի մեծագույն արվեստագետներից մեկն եք, ով նաեւ բարձր է պահում հայի անունն ու պատիվն աշխարհում: Մաղթում եմ Ձեզ առողջություն, երիտասարդական ուժ ու կորով` շարունակելու ստեղծագործական ու հասարակական այն փառահեղ գործունեությունը, որ ծավալել եք մինչեւ այսօր: Մենք սիրում ենք Ձեզ եւ հպարտանում Ձեզնով»,- ասված է շնորհավորական հեռագրում:

Հարցազրույց ՀՀ-ում ԵՄ պատվիրակության ղեկավար, դեսպան Տրայան Հրիստեայի հետ

- Պարոն դեսպան, Արեւելյան գործընկերության շրջանակներում Հայաստանը որոշակի ֆինանսական աջակցություն նախորդ տարիներին ստացել է: Առաջիկայում Հայաստանին ֆինանսական աջակցություն տրամադրելը ինչքանով է ներառված ԵՄ համաժողովի օրակարգում եւ որքան կլինի հնարավոր հատկացվելիք գումարի չափը:
- Եվրոպական միությունը եւ Հայաստանը ավելի եւ ավելի են մոտենում իրար: Եվրոպական Միությունը պատրաստ է աջակցել Հայաստանին իր բարեփոխումների ճանապարհին: 2011-2013 թթ. Ազգային ինդիկատիվ ծրագրի շրջանակներում Հայաստանը օգտվում է ինդիկատիվ բաշխումից 157 մլն եվրոյով: Առնվազն 32 մլն եվրո հատկացվել է Պետական կառավարման մարմինների զարգացման համապարփակ ծրագիրն ամրապնդելու համար, հիմնականում ինստիտուցիոնալ բարեփոխումները Խորը համապարփակ ազատ առեւտրի համաձայնագրի (ԽՀԱԱՀ) բանակցությունների համատեքստում: Բացի այդ, Հայաստանը շարունակում է օգտվել ԵՀԳԳ-ի (Եվրոպական հարեւանության եւ գործընկերության գործիք) տարածաշրջանային եւ միջտարածաշրջանային եւ մի շարք թեմատիկ ծրագրերից, ինչպիսիք են Եվրոպական գործիքներ ժողովրդավարության եւ մարդու իրավունքների համար: Սրան ի հավելումն ասեմ, որ 2012 թվականին 15 մլն եվրո արդեն իսկ ավելացվել է ԵՀԳԳ «ավելին ավելիի դիմաց» սկզբունքով իրականացվող երկկողմ ծրագրին: 6 մլն եվրո հատկացվել է մասնագիտական կրթության եւ ուսուցման բյուջետային ծրագրին եւ լրացուցիչ 9 մլն եվրո հատկացվել է արդարադատության բարեփոխումների ծրագրին:

Շատերը փորձում են հասկանալ, թե որն էր Հայաստանը ներկայացնող «Դորիանս» խմբի` վերջին հորիզոնականներում հայտնվելու պատճառը: Հերթական անգամ չի շրջանցվում նաեւ «Եվրատեսիլ»-ում անարդարությունների հանգամանքը: Բայց արդյո՞ք մեր իսկ երկրում միջազգային այդ մրցույթի նախընտրական փուլն արդար է անցնում: Արդյո՞ք այս կամ այն տարվա «Եվրատեսիլ»-ում Հայաստանի ներկայացուցիչը կամ երգը ընտրվում են հենց այդ սկզբունքներին դավանելով: Հայտնի է, որ որպես կանոն միշտ էլ նախապես են հանրության սեփականությունը դառնում այն անունները, որոնք պետք է հաղթող դառնան հայաստանյան նախընտրական փուլում: Ինչ վերաբերում է  այս տարվան, ապա Հանրային հեռուստաընկերությունն իրեն տրված լիազորությունների շրջանակում, միանձնյա որոշեց, որ «Եվրատեսիլ»-ին մասնակցելու է «Դորիանս» ռոք խումբը, իսկ ահա քվեարկության արդյունքում պետք է ընտրվեր «Եվրատեսիլ»-ում խմբի կատարելիք երգը: Մարտի 2-ին Հանրայինի ուղիղ եթերում կայացավ նախընտրական փուլը: Հայտարարվեց հաղթող երգի անունը, այն է` հռչակավոր երաժիշտ Թոնի Այոմի համահեղինակությամբ գրված «Lonely Planet»-ը: Հետագա իրադարձությունները ստիպում են մտածել, որ այս երգի հաղթանակը կանխորոշված էր: Այսպես, մարտի 3-ին «tert.am»-ին տված հարցազրույցում պատասխանելով այն հարցին, թե «Դորիանս»-ի մենակատար Գոռ Սուջյանը որ երգն է նախընտրում, խմբի պրոդյուսեր Արա Թադեւոսյանը պատասխանել էր. «Կա չորս երգ եւ մենք նախընտրություն չունենք»: Ավելի ուշ հայտնի դարձավ, որ դա այնքան էլ այդպես չէ եւ հենց Ա.Թադեւոսյանն է դիմել Թոմի Այոմիին` նրանից երգ ստանալու ակնկալիքով: Մայիսի 3-ին համացանցում տարածվեց «Black Sabbath» խմբի կիթառահար Թոնի Այոմիի հարցազրույցը, որը նա տվել էր «Eurovision.tv»-ին:

Վաղը` մայիսի 24-ին, հանրակրթական ուսումնական հաստատություններում կհնչի վերջին զանգը: Դպրոցներում կկազմակերպվեն «Վերջին դաս»-ի միջոցառումներ: Այդ օրվա առիթով Ազատության հրապարակում կազմակերպվելու է համերգ: Թե ովքեր են ելույթ ունենալու միջոցառման ժամանակ, քաղաքապետարանը չի մանրամասնում: «Վերջին զանգի» առիթով երեկ հայտարարություն է տարածել նաեւ ՀՀ ոստիկանությունը: «Ոստիկանությունը մայիսի 24-ին ողջ ծավալով իրականացնելու է հասարակական կարգի ապահովմանն ուղղված իր գործառույթներն ու շատ խիստ է լինելու օրինականության խախտման ցանկացած դրսեւորման հանդեպ: Այդ խստությունը կարող է նույնիսկ անհարկի թվալ, բայց ավելի լավ է մեզ քննադատեն խստության համար, քան սթափվենք, երբ դժբախտությունն արդեն պատահած կլինի...»,- հայտարարել է ոստիկանությունը:

Դասական տարբերակով այս հարցերի տեղերը պետք է փոխեի ու առաջինը նշեի 2-րդ հարցը՝ Վարդանյանը կարող է՞ ղեկավարել հայկական սպորտը, որից հետո նոր պետք է հետեւություններ լինեին, թե ինչ օգուտ կարող է տալ: Բայց Հայաստանը իր օրենքներով է ապրում ու նպատակահարմար եմ գտնում նախ հասկանալ, թե ինչ զարգացումներ են սպասվում ընդհանրապես հայկական սպորտում:

Վերջին մեկ շաբաթվա ընթացքում առիթ ունեցա նախ մեկնել Գյումրի, Վանաձոր, ապա՝ Կապան: Կարելի է ասել` Հայաստանը հատեցի հյուսիսից-հարավ: Երեւանից դուրս` հայաստանյան կյանքի, գյուղացիների սոցիալ-տնտեսական վիճակի մասին շատ է գրվում ու խոսվում. ներկայացնեմ այն մի փոքր այլ, եթե կարելի է այսպես ձեւակերպել՝ «սպորտային» տեսանկյունից: Նշեմ միանգամից. սարսափելի տեսարան է: Հայաստանի շրջաններում ապրողների 90 տոկոսը մեծահասակներ ու երեխաներ են ու շատ քիչ տոկոս են կազմում տղա երիտասարդները ու բնականաբար միանգամից ծագում է առաջին միտքը. եթե պակասում են մարդիկ, երիտասարդները, ապա ապագայում էլ ավելի վատ վիճակում է հայտնվելու մեր սպորտը:

Հունիսի 12-ին Իրանում կայանալիք նախագահական ընտրություններին մասնակցելու է 8 թեկնածու: Սահմանադրության պահապանների խորհուրդը ընտրություններին մասնակցելու դիմում ներկայացրած 686 թեկնածուներից երեկ թույլտվություն է տվել միայն 8 հոգու: Նրանք են` միջուկային ծրագրի շուրջ բանակցություններում Իրանի ներկայացուցիչ Սայիդ Ջալիլին, Նպատակահարմարության խորհրդի ռազմավարական հետազոտությունների կենտրոնի նախագահ Հասան Ռոուխանին, արտաքին գործերի նախկին նախարար Ալի Աքբար Վելայաթին, Իսլամական հեղափոխության պահապանների կորպուսի նախկին հրամանատար Մոհսեն Ռեզային, Մեջլիսի նախկին նախագահ Գոլամ Ալի Հադադ-Ադելը, կապի նախկին նախարար Մոհամադ Խարազին, նախկին փոխնախագահ Մոհամադ Ռեզա Արեֆը եւ Թեհրանի քաղաքապետ Մոհամադ Բաքեր Քալիբաֆը: Հավանություն ստացած բոլոր թեկնածուները խիստ պահպանողական գործիչների համբավ ունեն եւ սերտորեն կապված են իրանական կրոնական վերնախավի հետ:

Այդպիսով, Սահմանադրության պահապանների խորհուրդը ընտրություններին մասնակցելու հնարավորությունից զրկել է մի շարք ազդեցիկ քաղաքական գործիչների: