Արթուր Պետրոսյանն իր մարզչական շտաբով կարող է փոխել մթնոլորտը մեր ֆուտբոլային աշխարհում

Երեկ Հայաստանի ֆուտբոլի ֆեդերացիայի գործադիր կոմիտեն մեր ընտրանու գլխավոր մարզչի պաշտոնում հաստատել է Արթուր Պետրոսյանի թեկնածությունը, որից հետո կայացել է ՀՖՖ նախագահ Ռուբեն Հայրապետյանի եւ նոր գլխավոր մարզչի մամուլի ասուլիսը: 45-ամյա Արթուր Պետրոսյանը երկար տարիներ հանդես է եկել մեր ազգային հավաքականում, համարվում է մեր ընտրանու ամենաճանաչված ֆուտբոլիստներից մեկը, մարզչական գործունեությամբ էլ զբաղվում էր Շվեյցարիայում՝ գլխավորում էր «Ցյուրիխ» ակումբի երիտասարդական թիմը: Մեր նոր գլխավոր մարզչի հիմնական մտքերն ու հավաքականի խաղի մասին դատողությունները ներկայացնեմ համառոտ:

«Մենք կարող ենք հաջողության, դրական արդյունքի հասնել, հակառակ դեպքում առաջարկը չէի ընդունի: Տանը նստած չէի ու ոչ էլ գործի կարիք ունեի: Ուղղակի վստահ եմ, որ կարող ենք մի բան փոխել: Երկար տարիներ խաղացել եմ հավաքականում եւ շատ լավ գիտեմ «խոհանոցը»... Անպայման լինելու են փոփոխություններ եւ այդ փոփոխությունները դուք ուրբաթ օրը՝ ամսի 11-ին, կտեսնեք: Ցանկանում եմ, որ հարձակվողական ֆուտբոլ խաղանք, տիրապետենք գնդակին, սակայն պետք է հասկանանք, թե ինչ ֆուտբոլիստներ ունենք ու ինչ մրցակցի դեմ ենք խաղալու... Խնդիրներ շատ կան: Ամենաբարդը ֆուտբոլիստների հոգեբանական վիճակն է: Մեր խնդիրը 3-4 օրվա ընթացքում ֆուտբոլիստների հոգեբանական վիճակը բարելավելն է եւ մարտավարություն մշակելը: Խաղային սխեման իմ գլխում արդեն ունեմ, որին քայլ առ քայլ պետք է հասնենք... Երկրպագուների աջակցության կարիքն ունենք: Հարկավոր է լավ խաղով ու արդյունքներով այնպես անել, որ հիասթափված եւ որոշ չափով ագրեսիվ տրամադրված երկրպագուները կրկին մեծ քանակությամբ գան ստադիոն, աջակցեն ազգային հավաքականին»,- ասել է Արթուր Պետրոսյանը:

Ասուլիսի ընթացքում քննարկվել է նաեւ Յուրա Մովսիսյանի հարցը. Արթուր Պետրոսյանն անկեղծորեն խոստովանել է, որ ցանկանում էր հավաքական հրավիրել Յուրային, սակայն ՀՖՖ նախագահը թույլ չի տվել: «Բոլորդ էլ գիտեք պարոն Հայրապետյանի պատասխանը: Այդ պատասխանն իմանալով հանդերձ՝ ես համաձայնվել եմ գլխավորել հավաքականը: Յուրայի հարցը այլեւս չի քննարկվում»,- հայտարարել է Պետրոսյանը: ՀՖՖ նախագահն էլ Յուրա Մովսիսյանին հավաքական հրավիրելու արգելքը պարզաբանել է նախ վերջինիս վատ խաղով եւ ցածր կարգապահությամբ: «Յուրան բարձր որակներով ֆուտբոլիստ է եղել, բայց վերջին 3 տարիներին՝ Իտալիայի հետ խաղից հետո, գոնե 1 խաղ լավ չի խաղացել: Իր պահվածքով, ցածր կարգապահությամբ էլ մեծ վնաս է հասցնում հավաքականին»,- մասնավորապես, հայտարարել է ՀՖՖ նախագահը:

Ներկայացվել է նաեւ մեր ընտրանու մարզչական շտաբը. Արթուր Պետրոսյանին օգնելու են Հայաստանի ազգային հավաքականում նրա նախկին խաղընկերներից Սարգիս Հովհաննիսյանը եւ Ռազմիկ Գրիգորյանը: Տեղեկություններ կան, որ շուտով մարզչական շտաբը համալրելու է մեր թիմի նախկին ավագ Ռոման Բերեզովսկին: Հավաքականի մարզչական շտաբն ամբողջապես կազմավորված է լինելու մեր ընտրանու նախկին հայտնի ֆուտբոլիստներից, եւ բոլոր հույսերը կան, որ ապագայում մեր թիմը լավ խաղ ու արդյունքներ կցուցադրի: Ամեն դեպքում, ֆուտբոլում կա մարզչի աշխատանքի մեկ գնահատական՝ արդյունքները:

Ասուլիսի ընթացքում ՀՖՖ նախագահը տեղեկացրել է նաեւ, որ շուտով Մադրիդի «Ատլետիկոյի» թիմի նախկին համակարգող Պակո Լոբատոն կդառնա ՀՖՖ-ի տեխնիկական տնօրենը: Իսպանացի մասնագետը Հայաստան է գալու իր թիմով՝ 6 այլ մարզիչներով, որոնք աշխատելու են Ավանի ակադեմիայում եւ համակարգելու են մանկապատանեկան ֆուտբոլը: Սա թերեւս ավելի կարեւոր է, քան մեր ազգային հավաքականի առաջիկա խաղն ու արդյունքը: Հայկական ֆուտբոլի ապագան ոչ թե Չեռնոգորիայի հետ խաղն է, այլ մեր մանկապատանեկան ֆուտբոլը, եւ ֆուտբոլային աշխարհում ճանաչում եւ հեղինակություն վայելող Մադրիդի «Ատլետիկոյի» մարզադպրոցի համակարգողը կարող է լրջագույն առաջընթաց ապահովել այս բնագավառում: Թերեւս շատ ավելի լավ կլիներ, եթե Պակո Լոբատոն համակարգեր նաեւ Գյումրիի, Վանաձորի ակադեմիաների աշխատանքը, ստեղծեր մանկապատանեկան ֆուտբոլի միասնական ծրագիր բոլոր մարզադպրոցների համար:

Արթուր Պետրոսյանը եւ իր երիտասարդ օգնականները կարող են փոխել մթնոլորտը մեր ֆուտբոլային աշխարհում, իսկ իսպանացի Պակո Լոբատոն կարող է  փոխել մեր ամբողջ մանկապատանեկան ֆուտբոլային համակարգը: