Գյումրիում տոն է. ի թիվս այլ հյուրերի՝ հայրաքաղաքում է Երևանի քաղաքապետ Հրաչյա Սարգսյանը (լուսանկարներ)

Շունչը՝ տոնական, տրամադրությունը՝ բարձր: Գյումրին հերթական անգամ իր տոնն է նշում: Դեռ առավոտից քաղաքն ընդունում է հյուրեր մայրաքաղաքից, մոտակա համայնքներից, մեծաթիվ են նաև արտերկրի զբոսաշրջիկները:

Այսօր միասին Գյումրու պատմական միջուկում տոնական ու բարձր տրամադրությամբ բոլորին ժպտում են երկու քաղաքապետները. Վարդգես Սամսոնյանն ու Հրաչյա Սարգսյանը շրջեցին թանգարաններում, քայլեցին դեպի Աբովյան փողոց, բոլորի հետ միասին հիացան արվեստագետների ձեռքի աշխատանքներով:

Աբովյան և հարակից փողոցներում կազմակերպված է «Գյումրի. վարպետաց քաղաք» խորագրով արհեստի ու արվեստի տոնավաճառ, որին 20 արվեստագետ է մասնակցում Գյումրիից և Երևանից:

Հրաչյա Սարգսյանը նկատեց՝ ջերմ, գրկաբաց ու երաժշտական տրամադրություն է այսօր Գյումրիում: Նրա կարծիքով՝ երեկոյան համերգն առավել մեծ էմոցիաներ է հաղորդելու ներկաներին:

«Վստահ եմ՝ այսօրվանից հետո նոր մտքեր են ծնվելու, որը Գյումրու հետ համատեղ իրականացնելու ենք: Այս պահին Գյումրու հետ առանձին ծրագիր չունենք: Մանկապատանեկան սիմֆոնիկ նվագախումբ ենք ուզում հավաքենք ամբողջ Հայաստանից, և, կարծում եմ, մինչ տարեվերջ մեծ համերգ կիրականացնենք: Հաստատ տաղանդաշատ գյումրեցի երեխաները ևս մասնակցություն կունենան և իրենց հրաշալի բույրով կլցնեն այդ միջոցառումը»,- լրագրողների հետ զրույցում ասաց Երևանի քաղաքապետը:

Գյումրեցիներին ուղղված մեկ մաղթանք ուներ Սարգսյանը. «Բացարտությունը, յուրահատուկ մտածելակերպը, հումորն անպակաս լինեն: Կարծում եմ, որ սա է ստիպում, որ գյումրեցիներն էլ ավելի ստեղծագործ լինեն: Փոքր քանակի մեջ բավական մեծ արվեստագետներ կան, թող իրենց արվեստով լցնեն Հայաստանը»:

Տոնի օրը շնորհավորանքներ ընդունելուն և փոխադարձ պատասխանելուն զուգահեռ Գյումրու համայնքապետ Վարդգես Սամսոնյանն անկեղծացավ՝ անելիք դեռ շատ կա: Նա նաև խոսեց արդեն հաջողությամբ կատարված աշխատանքներից՝ ընդգծելով մեկնարկած լայնածավալ փողոցաշինությունը, բացօթյա առևտրի կասեցումն ու նոր շուկայի հիմնման աշխատանքների մեկնարկը:

Իր պատմությամբ, մշակույթով, նիստ ու կացով Գյումրին շարունակում է մնալ Հայաստանի ամենատուրիստական քաղաքներից մեկը: Հատկապես վերջին տարիներին պատմական այս քաղաքը ձգում է աշխարհի տարբեր անկյուններում ապրող ինչպես մեր հայրենակիցներին, այնպես էլ Գյումրու ճարտարապետությամբ ու կենցաղավարությամբ հետաքրքրված զբոսաշրջիկներին ու արվեստագետներին։ Սամսոնյանի խոսքով՝ նրանց միշտ նորովի պետք է ներկայանալ:

«Պետք է յուրաքանչյուր գյումրեցի կարողանա ճիշտ հյուրընկալել զբոսաշրջիկներին, ծառայությունները լավ ու գրագետ մատուցի, որ մեկ անգամ եկողը էլի ուզենա գալ, իր հետ ուրիշներին նաև բերի»,- ասաց Գյումրու համայնքապետը:

Այսօր Գյումրի այցելած Երևանի քաղաքապետարանի պաշտոնյաներից Գևորգ Օրբելյանը ևս գյումրեցիներին ամենայն բարիք մաղթեց: Նա գնահատեց «Երևանի օրերը Գյումրիում» միջոցառման շրջանակներում անցկացվող ցուցահանդես-տոնավաճառի արդյունավետությունը:

«Գյումրիում շատ հաճելի ու տրամադրող միջավայր է, կարծում եմ՝ վարպետների շփումը ստացված է: Գյումրեցի հենց ասում ենք, միանգամից պատկերացնում եմ այս ջերմ քաղաքը՝ իր հյուրընկալությամբ, իր գողտրիկ ճարտարապետությամբ, և այն ամենը, ինչը կոլորիտային է: Միշտ այսպիսին մնացեք»,- ասաց Օրբելյանը:

Նշենք, որ քաղաք այցելած հյուրերից շատերը կրում են Գյումրին խորհրդանշող հումորային գրառումներով շապիկներ:

Գյումրիում այսօր նաև հետևյալ միջոցառումներն են անցկացվում. Ժամը 12։00-ից սկսած՝ մինչև 19։00-ն գյումրեցիներին և քաղաքի հյուրերին Թատերական հրապարակում համերգային ծրագրով ներկայանում են Գյումրու և Երևանի մանկական ու երիտասարդական խմբերը:

Թանգարանները մինչև ժամը 19:00-ը կհյուրընկալեն այցելուներին:

Մարիամ և Երանուհի Ասլամազյան քույրերի պատկերասրահում կբացվի «Գյումրի եւ անդին» խորագրով գեղագետ, արվեստաբան և գծանկարիչ Լևոն Լաճիկյանի գծանկարների ցուցահանդեսը: Եվս մեկ ցուցահանդես էլ կա Գյումրու համայնքային ցուցասրահում:

Տոնի առիթով Գյումրու մանկական փողային նվագախմբին Երևանը երաժշտական գործիքներ կնվիրաբերի:

«Գյումրու օր» և «Երևանի օրերը Գյումրիում» տոնակատարությունների ավարտը կազդարարվի շքեղ համերգով. ժամը 19:00-ից Վարդանանց հրապարակի գլխավոր բեմում կլինեն Հայաստանի պետական սիմֆոնիկ նվագախումբը և «Ռեինկարնացիան»:

Այս պահին հրապարակի այդ հատվածում կազմակերպչական աշխատանքներն են ընթացքի մեջ:

Սամսոն Մատինյան