25 տարի է՝ սպասում եմ արդարադատությանը. Մանվել Գրիգորյանի եղբորորդու գործով Մհեր Պողոսյանի որդին իրավահաջորդ ճանաչվեց

ՀՀ վերաքննիչ քրեական դատարանում՝ դատավոր Լուսինե Աբգարյանի նախագահությամբ, այսօր մեկնարկեց գործարար Մհեր Պողոսյանի մահվան գործով 25 տարի վաղեմության դատավճռի վերաբերյալ զինվորական դատախազության կողմից ներկայացված վերաքննիչ բողոքի քննությունը:

ՀՀ զինվորական դատախազ Վահե Հարությունյանը վերաքննիչ բողոք էր ներկայացրել՝ պահանջելով նոր երեւան եկած հանգամանքի հիմքով բեկանել սպանության գործով կայացված դատավճիռը եւ գործն ուղարկել առաջին ատյանի դատարան՝ նոր քննության:

Էդուարդ Պողոսյանը 2018 թվականի հուլիսին ոստիկանության Վաղարշապատի բաժին հաղորդում է ներկայացրել, որ 1994-ի ապրիլի 16-ին Արմավիրի մարզի Տարոնիկ գյուղի տարածքում գործող ռեստորանային համալիրում վիճաբանության ընթացքում իր հորը՝ Մհեր Պողոսյանին, դիտավորյալ սպանել է Հրանտ Գրիգորյանը, որը ԱԺ նախկին պատգամավոր Մանվել Գրիգորյանի եղբորորդին է: Վերջինս այս գործով ընդամենը 1 տարվա ազատազրկման էր դատապարտվել զենքի հետ վարվելու կանոնների խախտման արդյունքում կյանքի հետ անհամատեղելի վնասվածքներ հասցնելու համար։

Հրանտ Գիրգորյանը այսօր նույնպես մասնակցում էր նիստին. նա օժտված է թե' մեղադրյալի, թե' ամբաստանյալի եւ թե դատապարտյալի կարգավիճակով:

Նիստի սկզբում քննարկվեց Մհեր Պողոսյանի որդու՝ Էդգար Պողոսյանի դիմումը իրեն սույն գործով տուժողի իրավահաջորդ ճանաչելու վերաբերյալ: Դիմումում Պողոսյանը նշել է հետեւյալը. «1994 թ.-ի ապրիլի 16-ին՝ ընդամենը 8 տարեկանում, ես զրկվեցի իմ հորից՝ Մհեր Պողոսյանից: Այդ ժամանակ, բնականաբար, չէի կարող հորս ու մեր ընտանիքի իրավունքները պաշտպանել դատարանում: 25 տարի է՝ սպասում եմ արդարադատությանը, ու այսօր, երբ նոր երեւան եկած հանգամանքների հիմքով վարույթ է հարուցվել եւ 25 տարվա վաղեմության դատավճիռը քննության նյութ է դարձել ՀՀ վերաքննիչ դատարանում՝ Ձեր նախագահությամբ, կարող եմ վերջապես արդարադատության իրականացման հույս ունենալ: Ուստի, խնդրում եմ ինձ տալ տուժողի իրավահաջորդի կարգավիճակ, որպեսզի կարողանամ լիարժեք օգտվել բոլոր դատավարական իրավունքներից՝ իրացնելով դրանք եւ որպես տուժողի իրավահաջորդի ներկայացուցիչ ճանաչել փաստաբան Զարուհի Մեջլումյանին, ում սույն թվականի հունիսի 3-ին արդեն իսկ լիազորել եմ ներկայացնել իմ շահերը հորս՝ Մհեր Պողոսյանի մահվան գործով: Խնդրում եմ չանտեսել լսված լինելու նաեւ մեր իրավունքը՝ ելնելով դատարանի մրցակցային լինելու եւ կողմերի հավասարության սկզբունքներից: Տուժող կողմն առանց այդ էլ տուժել է 25 տարի առաջ եւ 25 տարի շարունակ՝ չգտնելով արդարադատություն: Մենք դատարանում ասելիք ունենք, հետեւաբար մասնակցության եւ դիրքորոշում հայտնելու մեր իրավունքը խնդրում եմ իրացնել իրավունքի գերակայության ուժով»:

Գործով դատախազ Վահան Հարությունյանը չառարակեց, որպեսզի Պողոսյանը գործով ներգրավվի որպես տուժողի իրավահաջորդ՝ նշելով, որ կողմն իրավունք ունի օգտվել իրավահավասարության սկզբունքից:

Հրանտ Գրիգորյանի փաստաբան Հովսեփ Սարգսյանը, սակայն, իր անհամաձայնությունը հայտնեց՝ նշելով, որ այս բողոքի քննության ընթացքում քրեական գործով վարույթ չի իրականացվում եւ որ այս քրեական գործով վարույթը ավարտված է եւ դատախազն այժմ բողոք է բերել, որպեզի վարույթը վերսկսվի: Դատավոր Մնացական Հարությունյանի դիտարկմանը՝ եթե շարժվենք այն տրամաբանությամբ, որ չկա քրեական գործի վարույթ, ապա ձեր ներկայությունն այստեղ եւս իրավաչափ չԷ, Հովսեփ Սարգսյանը համաձայնեց՝ նշելով. «Չկա որեւէ կարգավիճակ, քանի որ գործն ավարտված է: Այստեղ գործը վերաբացելու մասին է: Եթե մենք դատավարական կարգավիճակի առումով ենք քննարկում, ապա Հրանտ Գրիգորյանը այն ժամանակ եղել է մեղադրյալի, ամբաստանյալի, դատապարտյալի կարգավիճակում եւ այստեղ նրա շահերը շոշափվում են»:

Տեղում խորհրդակցելով՝ դատարանը որոշեց բավարարել Էդգար Պողոսյանի դիմումը եւ նրան սույն գործով ճանաչել տուժողի իրավահաջորդ:

Այնուհետեւ փաստաբան Զարուհի Մեջլումյանը նշեց, որ հնարավորություն չի ունեցել ավելի վաղ ծանոթանալու քրեական գործի հանգամանքներին, ուստի միջնորդեց հետաձգել նիստը: Հրանտ Գրիգորյանի փաստաբան Հովսեփ Սարգսյանը, սակայն, առարկեց՝ ասելով, որ իր կարծիքով՝ տուժող կողմը գործի նյութերին ծանոթ է, նաեւ հղումներ է կատարում գործի նյութերից:

Դատարանը, այնուամենայնիվ, հետաձգեց նիստը՝ հնարավորություն ընձեռելով կողմերին ծանոթանալ նյութերին:

Ավելի վաղ դատախազությունը մանրամասն հաղորդագրություն էր տարածել, որից հաստատվում է մամուլում բացմիցս հրապարկված այն տեղեկությունը, որ սպանության մասին իմացել եւ լռել են նաեւ ՀՀ պաշտպանության նախարարությունում. մասնավորապես, ՊՆ-ից կեղծ փաստաթուղթ են տվել այն մասին, թե իբր Մհեր Պողոսյանը զոհվել է ծառայողական պարտականությունները կատարելիս, այն դեպքում, երբ Պողոսյանը զինվորական չի էլ եղել: Նշված փաստաթղթի տակ ստորագրել է ՀՀ պաշտպանության նախարարի նախկին տեղակալ Աստվածատուր Պետրոսյանը:

Մեր հարցին՝ վերոնշյալի առնչությամբ քննություն իրականացվում է, թե՝ ոչ, ՀՀ գլխավոր դատախազի խորհրդական Գոռ Աբրահամյանը ասաց, որ Է. Պ.-ի դիմումի հիման վրա նախապատրաստված նյութերով 2018թ. օգոստոսի 6-ին ՀՀ քրեական օրենսգրքի 314-րդ հոդվածի 1-ին մասով հարուցվել է քրեական գործ՝ պաշտոնատար անձի կողմից անձնական այլ դրդումներով կամ խմբային շահերից ելնելով պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելու, կեղծում կատարելու դեպքի առթիվ: «Ներկայումս ընթանում է նախաքննություն, որի շրջանակներում միջոցներ են ձեռնարկվում պարզելու Մ. Պ.-ի՝ ծառայողական պարտականությունների կատարման ժամանակ զոհված լինելու վերաբերյալ տեղեկանքի հետ կապված բոլոր հանգամանքները»,- ասաց Աբրահամյանը՝ հավելելով, որ գործի շրջանակում դեռ կասկածյալի կամ մեղադրյալ դատավարական կարգավիճակ ունեցող անձ չկա:

Մհեր Պողոսյանը, հիշեցնենք, սպանվել է 1994 թվականի ապրիլի 16-ին Արմավիրի մարզի Տարոնիկ գյուղի տարածքում գործող ռեստորանային համալիրում:

Տպել
1227 դիտում

ՔԿ-ն ստուգում է Վայոց Ձորի մարզպետի մասնակցությունը մարզում տեղի ունեցած աղմկահարույց միջադեպին

Ունեմ տվյալներ, որ դեբետային գումարների մի մասը վերադարձվելու է Ս․ Սարգսյանի եղբոր ընտանիքի կազմակերպություններից մեկին

Շոու-բիզնեսի ներկայացուցիչը պետբյուջե չի վճարել ավելի քան 21 միլիոն դրամ հարկ. ՊԵԿ-ում քրգործ է հարուցվել

Ազատոճայիններն աշխարհի առաջնությունից գալիս են առանց մեդալների ու օլիմպիական ուղեգրերի

ՀՀ գլխավոր դատախազությունը տեսակապի միջոցով հարցաքննություն կատարելու իրավական հիմքերի ստեղծման նախագիծ է առաջարկել

Լոս Անջելեսը կլինի հայ-կալիֆորնիական համագործակցության խորացման հիմնական կիզակետը. վարչապետ

Մենք առաջ ենք գնում տնտեսական հսկայական փոփոխությունների իրականացմամբ. վարչապետը հանդիպել է Լոս Անջելեսի քաղաքապետին

ՀՀ 6 մարզում և մայրաքաղաքում այսօր էլեկտրաէներգիայի անջատումներ կլինեն

Երևանում և Սյունիքի մարզի Մեղրի քաղաքում անվտանգ տարածք են տեղափոխել օձերին

Զինծառայող Հայկ Խաչատրյանի վիճակը ծանր է. հնարավորության դեպքում կտեղափոխվի Երեւան. Հովհաննիսյան

Գիշերը հակառակորդը ձեռնարկել է դիվերսիոն ներթափանցման փորձ, սահմանին թողել 1 դի ու հետ շպրտվել

Հայկ Մարությանի որոշմամբ Երեւանի 3 դպրոցների տնօրեններ ազատվել են աշխատանքից

Արցախում մարտական դիրքից հրազենային վնասվածքով, ծայրահեղ ծանր վիճակում զինվոր է տեղափոխվել հոսպիտալ

Աշխարհի առաջնություն. ծանրորդ Անդրանիկ Կարապետյանը նվաճեց փոքր բրոնզե մեդալ

1 օրում գրանցվել է խոտածածկ տարածքներում բռնկված 34 հրդեհ

Խաչիկ գյուղում բռնկված հրդեհը մարվել է. այրվել է մոտ 52.2 հա խոտածածկ տարածք

Վարչապետը Լոս Անջելեսում հանդիպել է Կալիֆորնիայի հայ համայնքի կառույցների ղեկավարներին

Մեր ընթացիկ խնդիրը հայեցակարգային եւ գաղափարական առումով Հայաստան-Սփյուռք սահմանները վերացնելն է․ վարչապետ

Թող 98թ․-ից առաջ միլիոններ կուտակեին, առյուծներ քշեին. Փաշինյանը՝ Քոչարյանի եւ Սարգսյանի շնորհավորական ուղերձների մասին

Լինելով ԱԱԾ տնօրեն՝ նա հայտարարություն է անում գերագույն հրամանատարի դեմ․ սպայի պատվին դրանից մեծ անարգանք չկա․ վարչապետ