Եթե հարցն առկախենք ու տուն գնանք, անառողջ զարգացումներ են լինելու. Գյուրջինյանը՝ ԵՊՀ ռեկտորի լիազորությունների մասին

Երեւանի պետական համալսարանի հոգաբարձուների խորհրդի արտահերթ նիստը, որը հրավիրված էր փետրվարի 28-ին, ավարտվեց՝ այդպես էլ օրակարգը չհաստատված: Քննարկման էր դրվել մեկ հարց՝ ռեկտոր Արամ Սիմոնյանի լիազորությունների վաղաժամ դադարեցումը:

Խորհրդի նախագահ Գեւորգ Մուրադյանը նախ անդրադարձավ վերջին օրերին հաճախ հնչող այն հարցին, թե ինչպես պատահեց, որ նման օրակարգ է առաջ քաշվում այն դեպքում, երբ ընդամենը մեկ ամիս առաջ նույն այդ խորհուրդը միաձայն հաստատել է ռեկտորի կատարողականի հաշվետվությունը: Նա տարօրինակ համարեց, որ ուշադրություն չի դարձվում նախորդ նիստի ժամանակ հնչած հայտարարություններին: «Ես լրագրողների հարցերին պատասխանելիս էլ նշել եմ, որ ցավոք մեկ շաբաթ ժամանակը չափազանց կարճ էր մեզ ներկայացված փաստաթղթերը մանրամասն ուսումնասիրելու համար, նույնիսկ նախնական ծանոթության մակարդակում առաջանում են բազմաթիվ հարցեր թե՛ ֆինանսական, թե՛ ռազմավարական կառավարման էֆեկտիվության տեսակետից: Նաեւ նշել էի, որ կարծում եմ՝ հոգաբարձուների խորհուրդը պետք է ավելի շատ ժամանակ ունենա ուսումնասիրությունների համար»,- մասնավորապես ասաց Մուրադյանը:

Ապա, անդրադառնալով Արամ Սիմոնյանի լիազորությունները դադարեցնելու պատճառներին, նա թվարկեց. «Ուսանողների թվի բացասական դինամիկա,  ֆինանսական կառավարման էֆեկտիվության իմ կարծիքով ցածր աստիճան, նոր մասնագիտությունների բացման եւ խրախուսման միջոցով տնտեսության մեջ ԵՊՀ ներգրավվածության շատ ցածր դինամիկա, ինովացիոն գործունեության համարյա բացակայող քաղաքականություն, արտասահմայան ուսանողների ներգրավման խնդիր եւ այլն: Դրան գումարած՝ ստեղծված իրավիճակում ունենք միջազգային հարթակներում ԵՊՀ հեղինակության խաթարում: Այս ամենը ինձ բերում են այն եզրահանգման, որ ժամանակի մարտահրավերներին դիմակայելու, հանրապետությունում տեղի ունեցող նախկինում տեսակարար կշիռը վերականգնելու, դասախոսությունների որակական եւ գիտակրթական մակարդակները բարձրացնելու համար, համալսարանը կարիք ունի որակական եւ քանակական արագ փոփոխությունների: Վերոհիշյալ հանգամանքներում Երեւանի պետական համալսարանի հոգաբարձուների խորհրդի ուղղակի պարտականությունն է (եւ ես չեմ կարծում, որ մենք պետք է փախչենք այդ պարտականությունից) բարձրացնել ռեկտորի լիազորությունները շարունակելու կամ չշարունակելու հարցը»,- նշեց հոգաբարձուների խորհդրի նախագահը:

Շեշտադրեց, որ համալսարանի շուրջ ստեղծված իրավիճակը տարբեր շահեր հետապնդող խմբեր փորձում են օգտագործել բուհի շահերի հետ ոչ մի աղերս չունեցող նպատակներով:

Ռեկտոր Արամ Սիմոնյանի լիազորությունները վաղաժամկետ դադարեցնելու հարցը, սակայն, խորհրդի՝ բուհի կողմից ներկայացված անդամների շրջանում հանդիպեց դիմադրության: Պետության եւ իրավունքի տեսության ամբիոնի ղեկավար Արթուր Վաղարշյանը փորձեց հիմնավորել, որ ոլորտը կարգավորող օրենքների միջեւ առկա են հակասություններ եւ չկան ռեկտորի լիազորությունները վաղաժամ դադարեցնելու իրավական հիմքեր: «Ստեղծվել է կազուս: Չկա դրա օրենսդրական լուծումը»,- ասաց նա: Բայց այդ դիտարկումներն այնքան էլ համոզիչ չէին խորհրդի տարբեր անդամների համար: Կարծիք հնչեց, որ կարելի է ի վերջո բողոքարկել որոշումը, եթե, իհարկե, դա ընդունվի, եւ ռեկտորն ունենա անհամաձայնություն:

Վաղարշյանն առաջարկեց օրակարգի հարցը ձեւակերպել հետեւյալ կերպ՝ Համալսարանի շուրջ ստեղծված իրավիճակի քննարկում: Առաջարկը համախոհներ գտավ ԵՊՀ ներկայացուցիչ մյուս անդամների շրջանում: Կարծիքներ հնչեցին, որ ռեկտորին անվստահություն հայտնելուց առաջ պետք է խորքային քննարկումներ անել, վերլուծել փաստերն ու համոզիչ կերպով հիմնավորել, որ Արամ Սիմոնյանն այլեւս չպետք է պաշտոնավարի: Գեւորգ Մուրադյանն ընդգծեց, որ բերված օրակարգով այսպես թե այնպես քննարկում լինելու է: Բայց թե՛ ի սկզբանե որոշված եւ թե՛ առաջարկված փոփոխություններով օրակարգը չհաստատվեց՝ բավարար չափով քվե չստանալով:

Լեզվի կոմիտեի նախագահ Դավիթ Գյուրջինյանը ճիշտ չհամարեց համալսարանի հարցը այդպես առկախելն ու տուն գնալը: «Անառողջ զարգացումներ են լինելու»,- կանխատեսեց նա: Առաջարկեց մեկտեղել վերոնշյալ երկու հարցերը՝ երկուսն էլ ընդգրկելով օրակարգ՝ 1. Բուհի շուրջ ստեղծված իրավիճակի քննարկում եւ 2. Ռեկտորի լիազորությունների դադարեցում: Սա նույնպես բավարար ձայներ չստացավ, ու նիստը հայտարարվեց փակված:

ԵՊՀ ռեկտոր Արամ Սիմոնյանը, նիստից հետո պատասխանելով լրագրողների հարցերին, հայտարարեց, որ ինքն ինքնակամ հրաժարական չի տալու, ընդգծեց, որ իր լեգիտիմությունը կասկածի տակ դնել ոչ ոք չի կարող ու որ դեռ մեկ տարի պաշտոնավարելու իրավունք ունի: Առաջարկեց նաեւ չհավատալ այն պնդումներին, թե համալսարանը ճահիճ է, թե տրամադրում է ցածրորակ կրթություն: Ասաց, որ այսպիսի ֆինանսական կայունություն բուհը երբեք չի ունեցել եւ նախկինում չեն եղել այսքան մեծ թվով միջազգային գործընկերներ:

Սիմոնյանը համոզմունք հայտնեց, որ իրեն առնչվող քրեական գործերով իր մեղքը չի կարող ապացուցվել: Հերթական անգամ պնդեց, որ ենթարկվում է քաղաքական հետապնդումների ու որ դրանց հեղինակը կրթության եւ գիտության նախարար Արայիկ Հարությունյանը եւ նրա խորհրդական Սամվել Կարաբեկյանն են՝ երկուսն էլ համալսարանական: Լրագրողների դիտարկումներին, թե Հանրապետական կուսակցության տարբեր ներկայացուցիչներ շարունակում են պաշտոնավարել, այդ թվում՝ նույն կրթության եւ գիտության նախարարությունում, Արամ Սիմոնյանն արձագանքեց, որ ուրիշների մասին խոսել չի կարող: Այդուհանդերձ ռեկտորն ընդունեց, որ հոգաբարձուների խորհրդի նիստն անցավ ժողովրդավարության սկզբունքներին համապատասխան:

Հ.Գ. Նիստը սկզբում դռնբաց էր, եւ դրան ներկա էին բոլոր ցանկացողները: Երկու միջադեպից հետո, սակայն, որոշում ընդունվեց այն անցկացնել դռնփակ՝ թույլատրելով միայն լրագրողների ներկայությունը: ՀՀ նախկին ոստիկանապետ Վլադիմիր Գասպարյանի խորհրդական, ԵՊՀ նախկին դասախոս, ակտիվիստ Նարեկ Մալյանը, որոշած լինելով, որ Արամ Սիմոնյանը հետապնդումների է ենթարկվում, որովհետեւ վարչապետի տիկին Աննա Հակոբյանի ղեկավարած «Իմ քայլը» հիմնադրամին գումար չի փոխանցել, արկղով բերած մանրադրամները լցրեց հոգաբարձուների խորհրդի նախագահի առաջ՝ սեղանին՝ առաջարկելով այն փոխանցել հասցեատիրոջը: Այնուհետեւ ելույթ ունենալու ցանկություն հայտնեց մի տղամարդ: «Ես էն մարդն եմ, ում 30 միլիոն ոտի վրա գցել է»,-հայտարարեց նա՝ մեղադրելով Արամ Սիմոնյանին:

Տպել
1119 դիտում

Սեպտեմբերի 16-ին էլեկտրաէներգիայի մինչեւ 6-ժամյա անջատումներ կլինեն Երևանում և 8 մարզում

Մեղրիի բնակարաններից մեկում գազի արտահոսք է եղել՝ հրդեհի բռնկմամբ

Ըմբշամարտի աշխարհի առաջնություն. Արթուր Ալեքսանյանը 5:0 հաշվով հաղթանակ է տարել

«Մաեստրո Մանսուրյան-80». Գյումրիում կայացավ մեծ համերգ՝ կարեւոր առաքելությամբ

Չանկախություն. «Գազպրոմի» ֆորպոստը

Աղմկահարույց սպանության հետքերով. իրավապահները լռում են, որ շատ բան իմանան

«Հայամերիկյան» օպտիկական խաբկանք. անվճար վճարովի ակնոցներ

Արագած լեռան վրա արջի հարձակումից տուժած Լեհաստանի քաղաքացին մահացել է

Վարչապետն ընտանիքի հետ ներկա է գտնվել Սեւանի թերակղզում կազմակերպված ձկան փառատոնի բացմանը (լուսանկարներ)

Փաշինյանն ընդդեմ նախկինների. հաշիվն այսօր 10:3 է՝ հօգուտ Փաշինյանի․ Կարեն Անդրեասյան

ԱԺ նախագահն ընդունել է Ֆրանսիա-Հայաստան բարեկամական խմբի փոխնախագահի գլխավորած պատվիրակությանը

Երեւանում Ջերմուկի բնակիչների հետ համատեղ քայլերթ է իրականացվելու՝ ընդդեմ Ամուլսարի հանքի շահագործման

Թրամփը հայտնել է, որ ամերիկացի ուժայինները ոչնչացրել են «Ալ-Քաիդայի» հիմնադիր Բեն Լադենի որդուն

Սփյուռքի գլխավոր հանձնակատարը հանդիպել է «Էրմիտաժ» թանգարանի տնօրենի հետ

«Սեքյուրիթի դրիմ» ընկերության հիմնադիրը գրավի դիմաց ազատ է արձակվել

Արագած լեռան վրա Լեհաստանի Հանրապետության երկու քաղաքացի ենթարկվել է արջի հարձակման

ՀՀ ԱԳ նախարար Զոհրաբ Մնացականյանն ընդունել է Ֆրանսիայի Ազգային Ժողովի պատգամավորներին

Հենրիկ Նավասարդյանն ազատվել է Երեւանի քաղաքապետարանի տրանսպորտի վարչության պետի պաշտոնից

Մեր ժառանգությունը չի ճանաչում ժամանակային սահմաններ. ՀՀ ԱԳ նախարար

Նախարարությունը մշակել է ծայրահեղ աղքատ ընտանիքներին աջակցող որոշման նախագիծ