Կիպրոսից մինչեւ վարկային կազմակերպություն. ՊԵԿ պաշտոնյաների բիզնես հետաքրքրությունները

Հայաստանում տարածված տեսակետ է, որ կոռուպցիոն դրսեւորումները տարածված են բացառապես բարձրաստիճան պաշտոնատար անձանց շրջանում, սակայն իրականությունը մի փոքր այլ է: Իհարկե բարձրաստիճան պաշտոնատար անձանց պատկառելի ցանկ կարելի է կազմել, որոնք պետական պոշտոնը համատեղում են բիզնեսի հետ եւ մեծ կարողություն են հասցրել կուտակել: Բայցեւայնպես միջին օղակը նույնպես լի է այնպիսի պաշտոնավորներով, որոնք մեծ հարստություն են դիզում պետական պաշտոն զբաղեցնելով հանդերձ:

Մի քանի ամիս է, ինչ բարձրաստիճան պաշտոնատար անձանց էթիկայի հանձնաժողովում հրապարկվում են պետական եկամուտների կոմիտեի պաշտոնյաների ունեցվածքի մասին տվյալները: «Հայկական ժամանակը» գրեթե կամընտրությամբ առանձնացրել է ՊԵԿ թվով 3 պաշտոնատար անձի, որոնց ունեցվածքի եւ բիզնեսների կողքով հնարավոր չէ անտարբեր անցնել:

ՊԵԿ Ստուգումների կազմակերպման եւ դիտարկման վարչության պետի տեղակալ Արամ Սարգսյան: Համաձայն հայտարարագրի Արամ Սարգսյանն ունի 2 բնակարան, 1 առանձնատուն, 1 ավտոտնակ, 2 հողամաս, «Honda CR-V» տեսակի 1 ավտոմեքենա: 5 տարբեր ընկերություններում ՊԵԿ պաշտոնյան ունի բաժնեմասեր եւ բաժնետմոսեր հետեւյալ արժեքներով՝ 2500 դրամ, 10 հազար դրամ, 5 միլիոն դրամ, 52 եւ 56 միլիոն դրամ: Արամ Սարգսյանը տարբեր անձանց տրամադրել է 3.8 միլիոն դոլար, 365 հազար դոլար, 1 միլիոն դոլար, կրկին 1 միլիոն դոլար եւ 2.8 միլիոն դոլար արժեքով փոխառություններ, որոնք ընդհանուր վերցրած կազմում են շուրջ 9 միլիոն ԱՄՆ դոլար: Պաշտոնը ստանձնելու ժամանակ Սարգսյանն ունեցել է հազար եվրո, 17 հազար ԱՄՆ դոլար, 8.3 միլիոն եվրո, 550 հազար դրամ: ՊԵԿ Ստուգումների կազմակերպման եւ դիտարկման վարչության պետի տեղակալի պաշտոնում նշանակվելու օրվա դրությամբ նա ստացել է շուրջ 230 միլիոն դրամ եկամուտ:

Իրավաբանական անձանց պետական ռեգիստրի գրանցամատյանից տեղեկանում ենք, որ Արամ Սարգսյանը 2009 թվականին հիմնադրել է «Էրգիր-ծաղկի» ՍՊԸ-ն: «Էքսպրես Կրեդիտ ունվերսալ վարկային կազմակերպություն» ՓԲԸ-ի պաշտոնական կայքից էլ տեղեկանում ենք, որ «Էրգիր-ծաղկի» ՍՊԸ-ին է պատկանում ՓԲԸ-ի 25 տոկոս բաժնետմոսերը: ՊԵԿ պաշտոնյան կապ ունի նաեւ «Թել Սել» ընկերության հետ, որը վճարահաշվարկային ծառայություններ է մատուցում: Ընկերության 2016 թվականի տարեկան հաշվետվության մեջ նշված է, որ «Թել Սել» ՓԲԸ-ի մայր ընկերությունը «Ռենոմաքս Էլ ԹԻ ԴԻ» ընկերությունն է, որը գրանցված է Կիպրոսում եւ միակ բաժնետերն է Սատիրիոս Պիտտասը: 2016 թվականի դեկտեմբերի 31-ի դրությամբ ընկերության բաժնետերերի կառուցվածքը հետեւյալն է՝ «Ռենոմաքս Էլ ԹԻ ԴԻ»-56.28 տոկոս, Սարգսյան Արամ Նորիկի-37.91 տոկոս, Տաթեւիկ Արտաշեսի Ավետիսյան-5.81 տոկոս: Կիպրոսը համարվում է օֆշորային գոտի:

ՊԵԿ Օպերատիվ հետախուզության վարչության պետի տեղակալ Արտաշես Բեգլարյան:  Վերջինս կնոջ՝ Արմինե Հարությունյանի հետ հաշվառված է Արաբկիր վարչական շրջանում: Արմինե Հարությունյանը Սահմանադրական դատարանի նախագահ Գագիկ Հարությունյանի դուստրն է: Օպերատիվ հետախուզության վարչության պետի տեղակալը հայտարագրել է երկու բնակարան եւ երկու հողամաս: Նա ունի «BMW 750» մակնիշի մեկ ավտոմեքենա: Արտաշես Բեգլարյանը 50 միլիոն դրամ փոխառություն է տրամադրել: Վերջինս սեր ունի թանկարժեք նկարների հետ: Համաձայն հայտարարգրի, Բեգլարյանն ունի 8 միլիոն դրամը գերազանցող 3 հատ նկար: Բացի դա ՊԵԿ պաշտոնյան 3 հատ էլ 8 միլիոն դրամը գերազանցող ժամացույց ունի: 2017 թվականին նշանակվելով Օպերատիվ հետախուզության վարչության պետի տեղակալի պաշտոնում, Բեգլարյանը հայտարարգրել է 15 միլիոն դրամ, 95 հազար ԱՄՆ դոլար եւ 110 հազար եվրո: Այդուհանդերձ Արտաշես Բեգլարյանի եկամուտը հարկային տարում կազմել է ընդամենը 2 միլիոն 350 հազար դրամ:

Արտաշես Բեգլարյանի կինը՝ Արմինե Հարությունյանը զբաղեցնում է «Բեգլարյան բժշկական կենտրոն»-ի օպերատիվ գինեկոլոգիայի բաժանմունքի վարիչի պաշտոնը: ԲԿ-ն պատկանում է ամուսնու ընտանիքին, մասնավորապես սկեսրայրին՝ Արտաշես Բեգլարյանին: Արմինե Հարությունյանը հասցրել է նաեւ մամուլի ուշադրության կենտրոնում հայտնվել իր եւ հայտնի վիրաբույժ Արտավազդ Սահակյանի մասնակցությամբ սկանդալով: ԱԺ պատգամավորներից մեկի որդու ծննդյան արարողության ժամանակ Հարությունյանը «հարձակվել» էր Սահակյանի վրա՝ վերջինիս տված հարցազրույցի պատճառով, իսկ Սահակյանը քննադատաբար էր խոսել կոռուպցիայի եւ այլ արատավոր բաների մասին:

ՊԵԿ Իրավախախտումների հայտնաբերման ու վարչական վարույթների իրականացման վարչության պետ Սամվել Սինանյան: Վերջինիս հայտարարգրել է 2 առանձնատուն, 2 հատ հասարակական շինություն եւ բազմաբնակարան շենքի ոչ բնակելի 1 տարածք: ՊԵԿ շատոնյան ունի երկու հատ «Mitsubishi Pajero» տեսակի ավտոմեքենա: Սամվել Սինանյանը փոխառության տեսքով մեծ գումարներ է տրամադրել տարբեր անձանց, որոնք ընդհանուր առմամբ կազմում են 20 միլիոն դրամ: Պաշտոնը ստանձնելու օրվա դրությամբ նա ունեցել է 22 միլիոն դրամ, 16 հազար ԱՄՆ դոլար, 12 հազար եվրո, 650 հազար ռուսական ռուբլի, իսկ որպես եկամուտ հայտարագրում նշել է, որ ստացել է 8.7 միլիոն դրամ: Սամվել Սինանյանի պաշտոնական կենսագրության մեջ նշված է, որ վերջինս 2014-15 թվականներին եղել է «Արմենիան ադվենտուրես» ՍՊԸ տնօրենը: Դրանից առաջ եղել է Արմավիրի մարզի դատախազը, հետո ոստիկանապետի գլխավոր խոհրդականը եւ այլն: Իրավաբանական անձանց պետական ռեգիստրի գրանցամատյանից տեղեկանում ենք, որ «Արմենիան ադվենտուրես» ՍՊԸ-ն Սամվել Սինանյանը ումն Էդգար Ազարյանի հետ հիմնադրել է 2014 թվականին: Հետագայում դադարեցրել է իր մասնակցությունն ընկերությունում: «Արմենիան ադվենտուրես» ՍՊԸ-ն իրականացնում է տուրիստական օպերատորի ծառայություններ: Ընկերության պաշտոնական կայքից տեղեկանում ենք, որ իրենց հիմնական նպատակը զբոսաշրջությունն է, ինչից ելնելով ընկերությունը համագործակցում է միջազգային ավիափոխադրող ընկերությունների և հայտնի տուրիստական գործակալությունների հետ` զբոսաշրջության շուկայում առաջարկելով տուրիստական որակյալ փաթեթներ և ավիատոմսեր բոլոր ուղղություններով:  «Արմենիան ադվենտուրես» ՍՊԸ-ի մյուս հիմնադրի՝ Էդգար Ազարյանի անունը կապվում է «Գրիար տելեկոմ» ՍՊԸ-ի հետ, որը հայտնի օֆշորային սկանդալից հետո պարզ դարձավ, որ հեռահաղորդակցության ծառայություններ է մատուցել ԴԱՀԿ նախկին պետ Միհրան Պողոսյանին:

Հ.Գ. 2016 թվականի դեկտեբերին ՊԵԿ նախագահ Վարդան Հարությունյանը հայտարարել էր, որ իրեն հարկավոր է հանուն հայրենիքի 50-70 հազար դրամ աշխատավարձով ազնվորեն աշխատելու պատրաստ 2000-2500 հարկային տեսուչ, համակարգում կաշառակերությունն ու կոռուպցիան արմատախիլ անելու համար: Վերը շարադրվածը փաստում է, որ ՊԵԿ նախագահի՝ կոռուպցիան արմատախիլ անելու ցանկությունը հավանաբար ցանկություն էլ կմնա:

Հոդվածը հրապարակվել է «Հայկական Ժամանակ» օրաթերթի հունվարի 27-ի համարում: