Կոռուպցիայում ներգրավված պաշտոնյան չպետք է հանգիստ քնի. գլխավոր դատախազ (տեսանյութ)

Հայաստանում ԵՄ-ի պատվիրակության, ԵԱՀԿ-ի Երեւանյան գրասենյակի, քաղաքացիական հասարակության եւ կառավարության ներկայացուցիչների մասնակցությամբ այսօր Երեւանի «Մարիոթ» հյուրանոցում մեկնարկեց հակակոռուպցիոն 2-րդ համաժողովը, որին մասնակցում էր նաեւ ՀՀ գլխավոր դատախազ Արթուր Դավթյանը: Armtimes.com-ի հետ զրույցում նա անդրադարձավ կոռուպցիայի դեմ պայքարին եւ բանակում խաղաղ պայմաններում մահացած զինծառայողների գործերի վերանայմանը:

- Պարոն Դավթյան, վարչապետը կառավարության նախավերջին նիստում ձեզ խնդրեց ուշադրություն դարձնել խաղաղ պայմաններում բանակում մահացած զինծառայողների ընտանիքների անդամների բարձրաձայնած խնդիրներին: Դատախազությունն, իհարկե հայտարարեց, որ զինծառայողների գործերը պահանջել է: Այս պահին ո՞ր փուլում է գործընթացը, քանի՞ զինծառայողի գործ եք արդեն ստացել:

- Բոլոր գործերն էլ պահանջվել են, բոլոր գործերն էլ արդեն ուսումնասիրվել են եւ մեր ընթացիկ գրաֆիկով պայմանավորված՝ հանդիպումների, ընդունելությունների փուլն է իրականացվում: Ընդունելության են հրավիրվում ծնողները, նրանց հնարավորություն է տրվում ընդունելությանը մասնակցել իրենց ներկայացուցիչների հետ, իրենց փաստարկները ներկայացնել: Իմ գնահատմամբ, արդյունավետ է անցնում, մենք կունենանք նաեւ արդյունքներ այն մասով, որ արդեն իսկ վարույթը կասեցված քրեական գործը կվերսկսենք, կշարունակենք նախաքննությունը, որովհետեւ կարծում ենք, որ որոշակի գործողություններ հնարավոր է անել առանձին գործերով, որից հետո արդեն պարզ կլինի արդյունքը:

- Անձամբ հանդիպե՞լ եք ծնողների հետ:

- Իհարկե: Հանդիպել ենք ծնողներից Նանա Մուրադյանի հետ: Կարծում եմ՝ բավականին արդյունավետ ընդունելություն է իրականացվել, նաեւ ներկայացուցիչն է շատ ակտիվ եղել, իրենք ներկայացրել են փաստարկներ, մենք՝ մեր փաստարկները, որոշակի ընդհանուր հայտարար ունենք:

- Իհարկե, գործերը բազմահատոր են, բայց նոր երեւան եկած հանգամանքները հաշվի առնելով՝ ձեր վերաբերմունքն ինչպիսի՞ն է:

- Իմ վերաբերմունքը հետեւյալն է՝ օրենքով տրված բոլոր հնարավորությունները պետք է օգտագործել ու սպառել այս դեպքերով վերջնական գնահատական ունենալու համար, որպեսզի ե՛ւ ծնողի համար, ե՛ւ հանրության համար, որեւէ մեկի համար չմնա անպատասխան հարց:

- Նոր կառավարության գործունեության ընթացքում Երեւանի քաղաքապետարանի վարչություններից մեկի պետը ձերբակալվեց ԱԱԾ-ի կողմից: Ձեր կարծիքով, կոռուպցիան այդ օղակո՞ւմ է, թե՞ ավելի բարձր:

- Ես միայն այդ դեպքը չէի շեշտի: Վերջին երեք ամիսների ընթացքում բավականին լուրջ այդպիսի բացահայտումներ ենք ունեցել: Ի վերջո, հանրությանը քաջ հայտնի է, մենք ունեցանք դատավորի բացահայտում: Կալանքով ապահովվեց նրա քրեական պատասխանատվությունը, ներկայումս գործն ուղարկվել է դատարան: Մեր դիտարկմամբ, ըստ էությամբ, երեւույթը հետեւյալն է՝ որտեղ որ կա կոռուպցիոն դրսեւորում, մենք խնդիր ունենք բացահայտելու դա, մեղավոր հայտնաբերելու, պատասխանատվության ենթարկելու: Սրանով կապահովենք նաեւ լուրջ կանխարգելիչ արդյունք, նշանակություն, եւ ի վերջո, պետք է հասնենք այն հանրային գիտակցմանը նաեւ պաշտոնյաների շրջապատում, որ որեւէ պաշտոնյա, որը ներգրավվեց որեւէ կոռուպցիոն գործընթացի մեջ, նա չպետք է հանգիստ քնի:

- Դուք միշտ ասել եք, որ այս հարցում պետք է փաստական խոսել: Հասարակությունն ասում է՝ օլիգարխներ կան, պետական կառավարման ապարատում է հենց կոռուպցիան: Հասարակությունը կոնկրետ անուններ է տալիս, մամուլը գրեթե ամեն օր մի դեպքի մասին գրում է, բայց ձերբակալվում է մի դատավոր 1000 դոլար կաշառք վերցնելու պահին, ինչ-որ վարչության պետ, որը շինթույլտվություն է տվել: Այս խնդրին ինչպե՞ս եք վերաբերվում:

- Իհարկե, ես այն կարծիքին չեմ, թե մեր կոռուպցիոն երեւույթները միայն նրանք են, որոնք հնարավոր են բացահայտել: Իհարկե՝ կա կոռուպցիա, եւ սա գաղտնիք չէ ցանկացած պետությունում, երկրում: Կոռուպցիոն հանցագործություններն ունեն լատենտայնության բավականին բարձր մակարդակ եւ մեր խնդիրն է նաեւ քաղաքացիական հասարակության հետ ակտիվ համագործակցության արդյունքում հասնել այդ լատենտային իրավիճակի փոփոխման: Այսինքն՝ հասնել նրան, որ այդ երեւույթի վերաբերյալ իրազեկ ցանկացած, այդ թվում՝ քաղաքացին բարձրաձայնի, ինքը հետեւողական լինի, պահանջատեր լինի: Դրանով մեզ մեծապես կաջակցի, որպեսզի մենք հնարավորություն ունենաք բացահայտելու այդ դեպքը, տեղեկանալու դրա մասին, եւ բնականաբար, ապահովելու մեղադրանքի հիմնավորվածությունը, արդյունքում՝ արդարացի պատասխանատվությունը: Բոլորիս շահերից բխող է սա եւ պետք է բոլորս ուժերը համատեղենք այս հարցում:

Առավել մանրամասն՝ տեսանյութում: