Կարեն Կարապետյանը դեռ խաղում է հանձնարարված խաղը, բայց երկար չի դիմանա. Լեւոն Բարսեղյան

Եթե գալիք խորհրդարանական ընտրություններում ՀՀԿ-ն ստանա վստահության քվե եւ կազմի իշխանություն, ապա կառավարությունը շարունակելու է գլխավորել գործող վարչապետ Կարեն Կարապետյանը: Այս մասին շաբաթ օրը ՀՀԿ 16-րդ համագումարում հայտարարել էր Սերժ Սարգսյանը:

Ինչո՞ւ է Սարգսյանն այսպիսի հայտարարություն անում, ո՞ւմ է ուղղված այս մեսիջը եւ ինչ խնդիր է լուծվում սրանով: Հիշեցնենք, որ Սահմանադրական փոփոխությունների հայեցակարգի նախագծի քննարկման ժամանակ Սերժ Սարգսյանը նաեւ հայտարարել էր.

«Ձեր առաջ պաշտոնապես հայտարարում եմ, որ ես՝ Սերժ Սարգսյանս, այլեւս երբեք չեմ առաջադրվելու ՀՀ նախագահի պաշտոնի համար: Եթե վերջնական քննարկումների արդյունքում իմ ցանկությանը չհամապատասխանող ուղի ընտրվի, նկատի ունեմ պառլամենտական կառավարման մոդելը, ապա ես չեմ հավակնի նաեւ վարչապետի պաշտոնին»:

Գյումրիի «Ասպարեզ» լրագրողների ակումբի խորհրդի նախագահ Լեւոն Բարսեղյանը կարծում է, որ նախկինում իր արած այդ հայտարարությամբ, հիմա էլ Կարապետյանի անվան շրջանառմամբ Սարգսյանը փորձում է փրկել ՀՀԿ-ի վարկանիշը.

«ՀՀԿ-ն գիտի, որ խայտառակ ցածր վարկանիշ ունի եւ Սերժ Սարգսյանի առաջադրումը որպես վարչապետի թեկնածու կարող է խայտառակ ազդեցություն ունենալ՝ որոշել է մեջների մաքուր մարդուն (հարաբերական իմաստով) առաջ քաշել, նրա անվան տակ 2017-ի ընտրություններում ունենալ համեմատաբար լավ արդյունքներ: Դուք տեսաք, որ վերջերս Կարապետյանի անվան տակ կարողացան բավականին մարդկանց հանրապետականացնել: Դա ցույց է տալիս, որ ՀՀԿ-ն՝ իր պարագլխի հետ տոտալիտար մտածողությամբ մարդիկ են: Իրենց համոզմամբ հանրության տոտալացումը իրական ազդեցություն ունի ընտրությունների վրա: Ինչ-որ տեղ ճիշտ են, որովհետեւ հանրությունը ահագին աղքատացած է, հրով-սրով մտցրել են կուսակցության շարքերը՝ դրանով հոգեբանորեն ազդել, որ ուրիշ ավելի հարմար տեղ չկա, եթե ուզում եք երկրի երեսին մնալ, աշխատանք չկորցնել, ապրել, ավելի լավ է լինեք գլխավոր պարտիայի շարքերում: Այս իմաստով Կարապետյանի անվան շահարկմամբ այդպիսի մի ակցիա արեց ՀՀԿ-ն»,- մեր զրույցում նկատեց Բարսեղյանը:

Նրա տպավորությամբ Կարեն Կարապետյանի վրա պլան է դրված. «Իր պլանը այդ 7000 շունչն էր, որ մտցրեց ՀՀԿ: 7000 շնչի հանրապետականացումն էր: Հետո նոր ընտրություններից հետո հնարավոր է ինչ-որ ժամանակ մնա: Բայց ես անկեղծ ասած չեմ կարծում, որ Կարեն Կարապետյանը շատ զահլա ունի լինել այս կեղտի, ցեխի մեջ: Ամենայն հավանականությամբ իրեն Մոսկվայից ուղարկել են, ասել են՝ գնա-նայի ինչ ես անում, Կորեայից եկած էն երիտասարդը լավ չի կառավարում գուբերնիան: Բայց նա բիզնեսի մարդ է, պիտի որ երկար չդիմանա: Պիտի ասի ախպեր, թարգեք, ես գնամ իմ բիզնեսին, իմ փողերին: Ես այդպիսի տպավորություն ունեմ: Բայց առայժմ իր խաղը խաղում է՝ ոնց հանձնարարել են»,- ընդգծեց Գյումրիի ավագանու անդամը:

Հարցին, թե արդյո՞ք ՀՀԿ-ին կհաջողվի Կարեն Կարապետյանի անվան շնորհիվ առաջիկա ընտրություններում հասնել ցանկալի արդյունքի՝ Բարսեղյանը պատասխանեց, որ հանրության թուլացվածությունը եւ ճնշումները կբերեն նրան, որ հաջովի: Սա, ըստ Բարսեղյանի, դեռ չի նշանակում, որ վարչապետի հեղինակությունը կարող է ազդեցություն ունենալ, մանավանդ որ քաղաքական իմաստով ՀՀԿ մտնելուց հետո նրա հեղինակությունն ահագին տուժել է:

Անդրադառնալով նախօրեի համագումարում կուսակցության համագումարի եւ նախագահի ընտրության հստակ ժամկետի պահանջի վերացմանը՝ Բարսեղյանը ընդգծեց, որ կարող էին ավելի համեստ գտնվել եւ չփոխել այդ կետը, բայց նորմալ է.

«Իրենց բրեժնեւային համակարգն են ստեղծում: Հետո կոմերիտական համակարգ կստեղծեն, հետո հոկտեմբերիկների, կսկսեն կրծքանշաններ տալ: Սա հին, սովետական փորձված համակարգ է: Սրանք ակնհայտ ախտանշաններ են, որոնք ցույց են տալիս իրենց նկատմամբ վստահության զառամումը: Ուզում են ամբողջը իրենց տակ լինի: Այդ է իրենց կուսակցության ժողովրդավարությունը: Էս ամբողջը այդքան ողբերգական չէր լինի, եթե Հայաստանում կուսակցությունները կայանալու մարդկային եւ նյութական ռեսուրս ունենային եւ մրցակցեին: Իշխողները թուլացրել են հայ հասարակությանը, այնպես որ սրանց դեմ իրոք քաղաքական խաղ չկա, իրենք տիրում են բոլոր վարչական, նյութական ռեսուրսներին, քաղաքական ռեսուրսներին, զավթում ու վերազավթում են»,- եզրափակեց Լեւոն Բարսեղյանը: