Ի՞նչ է տալու բանակին ՀՀԿ-ի կրծքանշանը. Հանրապետականի քարոզչության իրավո՞ւնք

Պաշտպանության նախարար Վիգեն Սարգսյանը լրատվամիջոցների հետ հանդիպմանն ասել է, որ ՀՀԿ-ի նոյեմբերյան համագումարին անդամակցելու է կուսակցությանը: Թե ինչ վտանգ է ներկայացնում ԶՈՒ ղեկավարի կուսակցական լինելը, այս մասին Armtimes.com-ը զրուցել է Միջազգային եւ անվտանգության հարցերի հայկական ինստիտուտի հիմնադիր Ստյոպա Սաֆարյանի հետ.

- Պարոն Սաֆարյան, նախարարը հայտարարել է իշխող ուժին անդամակցելու որոշման մասին, բայց չէ՞ ոչ բանակն ապազգային կառույց է, ինչպե՞ս կարող է ԶՈՒ հրամանատարը կուսակցական լինել:

- Պաշտպանության նախարարի պաշտոնը ապաքաղաքական պաշտոն է, եւ այդ պաշտոնում նշանակվողները հակառակ քայլը պետք է անեն՝ առնվազն ժամանակավորապես դադարեցնեն որեւէ կուսակցության անդամակցությունը: Մենք բոլորս հասկանում ենք, որ իշխանությունը ձեւավորողը ՀՀԿ-ն է, եւ բնականաբար, ՊՆ-ն իրականացնում է այն քաղաքականությունը, որ իրենք են նախագծել: Սակայն միեւնույն է, դա չի նշանակում, որ նախարարը նույնպես պետք է լինի կուսակցական: Կոչ կանեմ ձեռնպահ մնալ նման քայլից, որովհետեւ այն իրականում ոչինչ չի փոխում. բոլորս հասկանում ենք, որ Վիգեն Սարգսյանն իրականացնելու է Սերժ Սարգսյանի  եւ ՀՀԿ-ի պաշտպանական քաղաքականության թեզերը, բայց չեմ հասկանում ինչ է տալու բանակին ՀՀԿ-ի կրծքանշանը:

- Պաշտպանության նախարարի՝ կուսակցական լինելը վտանգ ներկայացնո՞ւմ է:

- Չեմ կարծում, որ առանձնապես վտանգ է ներկայացնում, բայց  այն արտացոլում է այն խախտումը, հռչակված սկզբունքը, որ բանակը, ԶՈՒ-ն ապակուսակցական է եւ ապաքաղաքական: Ինչի՞, որ կրծքանշանը չլիներ, մենք չգիտեի՞նք, որ Վիգեն Սարգսյանը ՀՀԿ-ի ծրագրով սահմանված պաշտպանական քաղաքականությունն է իրականացնում:

- Ընդունված է, որ ուժային կառույցների ղեկավարները կուսակցական չլինեն, որպեսզի որեւէ կերպ կաշկանդված չլինեն իրենց որոշումներում, Սարգսյանի՝ ՀՀԿ-ին  անդամակցությունից հետո հնարավո՞ր է ոստիկանապետը եւս կուսակցական դառնա:

- Իհարկե, այն վատ նախադեպ կդառնա, եւ ոստիկանապետն էլ կարող է շատ հանգիստ իրեն թույլ տալ ՀՀԿ-ի կրծքանշանը կոստյումին կրել, արդյոք այն ճի՞շտ բան է: Բավականին շատ մեղադրանքներ են հնչել սահմանադրական փոփոխությունների ժամանակ, որ իշխող կուսակցությունը երկիրը տանում է կուսակցականության. այս կերպ իրենք ապացուցում են, որ ընդդիմախոսները ճի՞շտ են:

- Վիգեն Սարգսյանն իր նշանակումից հետո պարբերաբար շեշտում է, որ ՊՆ-ն քաղաքական պաշտոն է, եւ խոսում է ազգ-բանակ կոնցեպցիայի մասին: Սրանով չե՞ք կարծում, որ փորձ է արվում պաշտպանության նախարարին ԶՈՒ-ի բացթողումների համար պատասխանատվությունից հանել՝ թողնելով, որ այն ԶՈՒ ԳՇ շտաբի վրա լինի:

- Ոչ, չկա նման բան, քանի որ ողջ պաշտպանական քաղաքականության համար պատասխանատու է նախարարը: Ես գոնե երբեք չեմ ասի, որ շտաբն է միայն պատասխանատու: Քանի դեռ նախարարն իր կոնցեպցիան չի հրապարակել, մեզ մնում է միայն կռահումներ անել թե՛ ազգ-բանակի,  թե՛ նաեւ պատասխանատվության մասին:

- Այն հանգամանքը, որ նախարարն անդամակցելու է որեւէ ուժի, չի՞ ենթադրում, որ ունի իրավունք նաեւ կուսակցական գաղափարախոսությունը բանակում իրականացնել:

- Եթե կրծքանշանը համարելու ենք քարոզչություն, դա ուրիշ խնդիր է, բայց թերեւս կարծում եմ՝ պետք է աչալուրջ լինի, որ իսկապես իր մասնագիտական գործունեությունը ծավալի, ինչը չի ենթադրի կուսակցության քարոզչություն:

- Երբ Սեյրան Օհանյանը սահմանադրական փոփոխությունների ժամանակ քարոզչություն իրականացրեց, այն բավականին բուռն քննարկվեց, այս անդամակցությամբ զինվորականները չե՞ն կաշկանդվելու եւ արդյոք այն չի՞ անդրադառնալու ընտրությունների վրա:

- Քարոզչության իրավունք չի տրվում որեւէ մեկին՝ թե՛ Սեյրան Օհանյանին, թե՛ Վիգեն Սարգսյանին: Կարծում եմ այս որոշմամբ՝ ՀՀԿ-ն հասկացնում է, որ խորհրդարանական ընտրություններից հետո հնարավոր կոալիցիա կազմելու դեպքում ՊՆ-ն ՀՀԿ-ին պատկանող պաշտոն է: Եթե այլ երկրում ապրեինք, զինվորականը չէր կաշկանդվի, բայց մեր երկրում, իհարկե կաշկանդվելու է. այն, թերեւս, անուղղակի քարոզչության առիթ է լինելու: