Քաղաքական դաշտում կռիվ է ընկել. Ինչու են Սեյրան Օհանյանին ձեռքից ձեռք քաշքշում

Խորհրդարանական ընտրություններից առաջ Հայաստանում եւ Հայաստանից դուրս երկրաչափական պրոգրեսիայով աճում է նորաստեղծ քաղաքական միավորների թիվը: Պարզվում է` վերջերս ստեղծվել է կամ մոտ ժամանակներս ստեղծվելու է  «Միացյալ Արմենիա» անունով կազմակերպություն, որի հիմնադիրներն են բարերար Վահագն Հովնանյանի փեսան եւ դուստրը`ազատամարտիկ Արթուր Ալեքսանյանն ու Նինա Հովնանյանը, Գերագույն խորհրդի նախկին պատգամավոր Ազատ Արշակյանն ու ազատամարտիկ Արամ Ավետիսյանը:

Արթուր Ալեքսանյանը երեկ «Իրավունքին» ասել է, թե 2017 թվականի խորհրդարանական ընտրություններին մասնակցելու մտադրություն  իրենք առայժմ չունեն: «Պարզապես ցանկանում ենք ազգը համախմբել, որ գալիք ԱԺ-ն ընտրություններից հետո լինի երկպալատանի խորհրդարան, սփյուռքը խորհրդարանում տեղ ունենա»,- ասել է նա:

Ազատ Արշակյանը «Ժողովրդին» ասել է, որ  իրենք ներկայում իրենց հռչակագիրն են ձեւավորում եւ բանակցությունների մեջ են սփյուռքի հայ համայնքների հետ: «Միացյալ Արմենիայի» հռչակագրի անկյունաքարը լինելու է «Արցախ-Սփյուռք-Հայաստան համերաշխության եւ ՀՀ ԱԺ երկրորդ պալատի ստեղծման գաղափարը»: Ասել է նաեւ, որ իրենք լինելու են իրական, իսկական ընդդիմություն:

Հիշեցնենք, երկպալատ խորհրդարանի եւ դրանում սփյուռքի ներգրավվածության  գաղափարի հեղինակը, որքան էլ դա հաճելի չլինի «Միացյալ Արմենիայի» անդամներին, Սերժ Սարգսյանն է: Դեռեւս 2011 թվականի փետրվարին սփյուռքի նախարար Հրանուշ Հակոբյանը Կալիֆորնիայի հայ համայնքի հետ հանդիպմանը հայտարարել էր, որ Սերժ Սարգսյանը մտադրություն ունի սահմանադրական փոփոխությամբ խորհրդարանը երկպալատ դարձնել, «ինչը հնարավորություն կընձեռի խորհրդարանի Վերին պալատի կազմում ընդգրկել նաեւ աշխարհասփյուռ հայրենակիցների ներկայացուցիչներին»:

Հայաստանի քաղաքական ուժերն այնքան էլ ոգեւորությամբ չարձագանքեցին սույն հայտարարությանը, թեպետ սփյուռքն էլ առանձնապես հետաքրքրություն ցույց չտվեց դրա նկատմամբ: Ի վերջո, սահմանադրական փոփոխություններում խորհրդարանի բաժանում չնախատեսվեց: Հրանուշ Հակոբյանն էլ բացատրեց, որ երկքաղաքացիության մասին օրենքի ընդունումից հետո երկպալատ խորհրդարան ունենալու անհրաժեշտությունը վերացել է, քանի որ բոլոր այն սփյուռքահայերը, ովքեր կուզեին մասնակցել Հայաստանի քաղաքական կյանքին, կարող են ՀՀ քաղաքացիություն ստանալ եւ մասնակցել ցանկացած ընտրության:

Ինչու է «Միացյալ Արմենիան» թարմացնում Սերժ Սարգսյանի երբեմնի առաջ քաշած օրակարգը, դժվարանում ենք ասել: Ակնհայտ է, սակայն, որ սփյուռքի մեր հայրենակիցները առայժմ իրենք էլ ձեռնպահ են մնում հայրենիքում քաղաքականությամբ ուղիղ զբաղվելուց: Նրանք ավելի շատ նախընտրում են դեկլարատիվ բնույթի հայտարարությունները, կամ առավելագույնը որեւէ հայաստանյան քաղաքական ուժի թիկունքից են միջամտում Հայաստանի ներքին գործերին: Սա բացատրում են նրանով, որ հայաստանցիներն իրենց թույլ չեն տալիս ավելին անել, համարելով, որ իրենք ներհայաստանյան իրողությունները լավ չեն հասկանում: 2017-ի ընտրություններից առաջ, ճիշտ է սփյուռքում մեծ ակտիվություն է նկատվում, բայց առայժմ անհասկանալի է, թե ով ում բարեկամն է:

Ինչ վերաբերում է նորաստեղծ «Միացյալ Արմենիային», նշենք, որ այս նախաձեռնության մասին լրատվության մեջ անսպասելիորեն կենտրոնական տեղ գրավեց Սեյրան Օհանյանը: Ընդհանրապես, պաշտպանության նախկին նախարարը հայտնվել է պոտենցիալ բոլոր քաղաքական ուժերի ու միավորումների ուշադրության կենտրոնում: Նրան այսկողմ-այնկողմ են քաշքշում եւ ձեռքից ձեռք խլում:

Երկար ժամանակ լրատվամիջոցները գրում էին, որ Օհանյանը գլխավորելու է Վիկտոր Դալլաքյանի նոր ստեղծվելիք կուսակցությունը: Այս լուրը առավել ինտենսիվ տարածվում էր Դալլաքյանի հանդեպ բարեհաճ տրամադրված լրատվամիջոցներով: Մի փուլ եկավ, որ նրանք սկսեցին միահամուռ գրել, թե իշխանությունները ամեն կերպ փորձում են խոչընդոտել Սեյրան Օհանյանի եւ Վիկտոր Դալլաքյանի էպիկական միավորմանը:

Երեկ էլ գրվեց, որ Օհանյանին անհայտ ուժերն ուղղորդում են դեպի «Միացյալ Արմենիա»: Նման վերլուծության հիմքում Արթուր Ալեքսանյանի հետ Օհանյանի քավոր-սանիկ հարաբերություններն էին: Դալլաքյանական թեւը խուճապի մեջ ընկավ: Բարձր լրագրողական պրոֆեսիոնալիզմով, երկու ժամվա ընթացքում առաջին ձեռքից ինֆորմացիա հայտնվեց, որը հերքում էր Օհանյանի հնարավոր համագործակցությունը «Միացյալ Արմենիայի» հետ: Արթուր Ալեքսանյանն իրեն ուղղված հարցին ի պատասխան ասաց, որ այդ լուրերն իրականությանը չեն համապատասխանում, ու թեեւ ինքն ու նախկին նախարարը քավոր-սանիկական հարաբերություններ ունեն, սակայն քաղաքական դաշտում իրար հետ չեն շփվում:

Սեյրան Օհանյանի կերպարի նկատմամբ անառողջ հետաքրքրության պատճառը, թերեւս, Վազգեն Սարգսյանի եւ Սերժ Սարգսյանի թողած խորը ենթագիտակցական հետքն է առ այն, որ պաշտպանության նախկին նախարարները քաղաքականության մեջ հզոր են լինում: Մինչդեռ, նախադրյալներ, թե Օհանյանը ի վիճակի է լրացնել այս շարքը, չեն նշմարվում: Քաղաքականության մեջ նա ավելի շուտ Վազգեն Մանուկյանին կնմանվի, քան Սարգսյաններին: Այնպես որ, կարծում ենք, միանգամայն անտեղի է նրա շուրջ այս աժիոտաժը:

Հ.Գ. Երեկ տեղեկություն եղավ նաեւ, որ Վիկտոր Դալլաքյանի կուսակցական գործընթացը կասեցվել է, ֆինանսավորումը դադարել: Դալլաքայնն իր հայտնի ասուլիսում խոստացավ հոկտեմբերի վերջին եւս մեկ ասուլիս հրավիրել եւ  ավելի կոնկրետ հայտարարություններ անել կուսակցության անվան եւ անդամների մասին: Մինչեւ այժմ նման բան տեղի չի ունեցել:

Հետեւություններ անել, թե սա նշանակում է, որ ինչ-ինչ խնդիրներ այնուամենայնիվ ծագել են, ամեն դեպքում վաղ է: Դալլաքյանը շատ լուրջ էր տրամադրված իր գործին: Նա նույնիսկ ֆիլմ հրապարակեց, թե ինչպես է լողավազանում շաբաթը երկու անգամ լողում, կամ ընկերների հետ ֆուտբոլ խաղում: Դրանք իհարկե այնքան էլ էսթետիկական տեսարաններ չէին, սակայն Վիկտոր Դալլաքյանին թվացել էր, թե մեծ զարկ կտան իր նոր կուսակցությանը: