Սերժ Սարգսյանի թույլիկ այցը Ամերիկայի Միացյալ Նահանգներ

08/05/2015 schedule18:40

Երեկ ավարտվել է Սերժ Սարգսյանի աշխատանքային այցը ԱՄՆ: Այն չի կարելի հաջողված համարել՝ բարձր մակարդակի հանդիպումների բացակայության պատճառով: Սերժ Սարգսյանը այսօր Միացյալ Նահանգներից մեկնել Մոսկվա:

Այնտեղ նա մասնակցելու է Եվրասիական տնտեսական միության խորհրդի նիստին, Հայրենական մեծ պատերազմում տարած հաղթանակի առթիվ կազմակերպված միջոցառումներին:

              ***

Աշխատանքային երկօրյա այցով ԱՄՆ-ում գտնվող Սերժ Սարգսյանը այդպես էլ որեւէ բարձրաստիճան պաշտոնյանի հետ հանդիպում չունեցավ:

Իշխանական կուլիսներում տեղեկություններ կան, որ ԱՄՆ-ում Հայաստանի դեսպան Տիգրան Սարգսյանին հանձնարարված է եղել հանդիպում կազմակերպել ԱՄՆ պետքարտուղար Ջոն Քերիի հետ, ինչը, սակայն, չի հաջողվել: Սույն այցի ընթացքում ամենամեծ հաջողությունը, թերեւս, այն էր, որ «Ամերիկայի ձայնի» փոխանցմամբ՝ նախատեսվում էր ԱՄՆ փոխնախագահ Ջո Բայդենի ներկայությունը Վաշինգտոնի ազգային մայր տաճարում Հայոց ցեղասպանության տարելիցին նվիրված միջկրոնական աղոթքին: Ավելին՝ երեկ կայքերից մեկը գրեց, որ նախօրեին Սերժ Սարգսյանի ունեցած հանդիպումներից մեկին ավելի լուրջ նշանակություն տալու համար պաշտոնապես սխալ տեղեկատվություն է տարածվել: Սարգսյանի մամուլի ծառայությունը հայտնել էր, որ Սարգսյանը հանդիպում է ունեցել ԱՄՆ սենատի հանրապետական մեծամասնության ղեկավար Միտչ Մըքոնելի եւ դեմոկրատական փոքրամասնության ղեկավար Հարրի Ռիդի հետ: Այնինչ՝ պաշտոնական հաղորդագրությանը կից ներկայացված լուսանկարներում պատկերված էր ոչ թե Հարրի Ռիդը, այլ դեմոկրատ սենատոր Ֆրենսիս Ռիդը: Այդուհանդերձ, Սարգսյանի լրատվական ծառայությունը պնդում էր, թե դեմոկրատական փոքրամասնության ղեկավարի հետ հանդիպում եղել է, պարզապես լուսանկարչի օբյեկտիվը չի հասցրել ֆիքսել Հարրի Ռիդին: Սույն բացատրությունը զավեշտական է հնչում, քանի որ հանդիպումից հետո արարողակարգային լուսանկար է արվել, եւ դժվար թե լուսանկարիչը չսպասեր, մինչեւ որ հանդիպման բոլոր մասնակիցները դիրքավորվեին նկարվելու համար: Ուշագրավ է, որ Սարգսյանի այցը եւ Վաշինգտոնում Հայոց ցեղասպանությանը նվիրված միջոցառումները լուսաբանող հրապարակումներ ամերիկյան մամուլում գոնե երեկվա դրությամբ չկային: Եւ կեսգիշերին դեռ հայտնի չէր՝ արդյո՞ք ԱՄՆ փոխնախագահ Ջո Բայդենն իսկապես ներկա է գտնվել Վաշինգտոնի մայր տաճարի միջոցառմանը, որտեղ, ի դեպ, պետք է ելույթ ունենար նաեւ Սերժ Սարգսյանը: Թե ի՞նչ է վերջինս ասել երեկվա իր ելույթում՝ հայտնի կդառնա այսօր միայն՝ հաշվի առնելով մեր եւ ԱՄՆ ժամային տարբերությունը:  Միացյալ Նահանգների Հայ դատի գրասենյակը ֆեյսբուքյան իր էջում տարածեց, որ ԱՄՆ Սենատի երեկվա նիստը մեկնարկել է Արամ Առաջին կաթողիկոսի աղոթքով: Մեծի Տանն Կիլիկիո կաթողիկոսն արդարության կոչ է արել Հայոց ցեղասպանության զոհերի նկատմամբ: Գրասենյակը հաղորդում է նաեւ, որ Սենատում Արամ Ա-ն հանդիպում է ունեցել դեմոկրատական փոքրամասնության ղեկավար Հարրի Ռիդի եւ դեմոկրատների ներկայացուցիչ Ջեք Ռիդի հետ: Ավելի ուշ Ջեք Ռիդը, ըստ նույն աղբյուրի, հայտարարել է, թե ոչ ոք չի կարող այնպես առաջ մղել խաղաղության գաղափարը, ինչպես Արամ Ա-ն:

ՀՀ արտգործնախարարությունն էլ փոխանցում էր, որ Սերժ Սարգսյանի պատվիրակության կազմում ԱՄՆ-ում գտնվող ԱԳ նախարար Էդվարդ Նալբանդյանը երեկ ԱՄՆ մամուլի ազգային ակումբում հանդես է եկել մամուլի ասուլիսով եւ ներկայացրել Հայաստանում եւ աշխարհում Հայոց ցեղասպանության 100-րդ տարելիցին նվիրված ոգեկոչման միջոցառումները եւ դրանց խորհուրդը: Նալբանդյանը հայտարարել է, որ Ցեղասպանության ժխտումը հաշտեցման դուռ չի բացում: «Հիշատակման օրերը կարող էին հնարավորություն հանդիսանալ՝ ընդունելու անցյալը եւ առավել լավ ապագայի հիմքեր ստեղծելու։ Մենք հուսով էինք, որ Թուրքիան կընթանա այդ ճանապարհով, քանզի խորապես համոզված ենք, որ կա ավելի լավ ընտրություն, քան՝ Ցեղասպանությունը իրականացնողների արդարացումը։ Նախորդ տարվա օգոստոսին Անկարայում ես Թուրքիայի նախագահին փոխանցեցի Հայաստանի նախագահի հրավերը՝ մասնակցելու Երեւանում 100-րդ տարելիցի միջոցառումներին։ Թուրքիան կրկին հրաժարվեց սեղմել իրեն մեկնած ձեռքը»,- ասել է Նալբանդյանը ամերիկյան լրատվամիջոցներին եւ նշել, որ որպես Ցեղասպանության արհավիրքներով անցած ժողովուրդ՝ Հայաստանը խորը բարոյական պատասխանատվություն է զգում՝ բարձրացնելու այս Եղեռնի շուրջ համաշխարհային իրազեկվածությունը եւ անելու առավելագույնը՝ մարդկության դեմ հանցագործությունների կանխարգելման նպատակով։ Նալբանդյանը, ըստ ԱԳՆ-ի, պատասխանել է բազմաթիվ հարցերի, որոնց մասին, սակայն, կեսգիշերի դրությամբ ամերիկյան մամուլում որեւէ հրապարակում չկար:

Սերժ Սարգսյանի այցի ընթացքում ամերիկյան կողմի հետ ստորագրված միակ փաստաթուղթը Հայաստանի Հանրապետության եւ Ամերիկայի Միացյալ Նահանգների միջեւ Առեւտրի եւ ներդրումների շրջանակային համաձայնագիրն է։ Այն Սերժ Սարգսյանի ներկայությամբ ստորագրել են Էդվարդ Նալբանդյանն ու ԱՄՆ առեւտրի ներկայացուցչի տեղակալ Դեն Մուլանին: Հայաստանը եւ Միացյալ Նահանգները, ըստ փաստաթղթի, հավաստում են իրենց մտադրությունը՝ ստեղծելու բարենպաստ պայմաններ ներդրումների եւ երկու երկրների միջեւ ապրանքաշրջանառության, առեւտրի խրախուսման համար։ Նախատեսվում է ձեւավորել Առեւտրի եւ ներդրումների հայ-ամերիկյան խորհուրդ, որի հանդիպումներն անց են կացվելու առնվազն տարին մեկ անգամ։ Խորհուրդը կոչված է՝ բացահայտելու երկկողմ ներդրումներ եւ առեւտրի նոր ոլորտներ եւ աշխատանքներ տանելու դրանց զարգացման ու այդ ճանապարհին հնարավոր խոչընդոտների վերացման ուղղությամբ։

Թե ի՞նչ կարիք կար, որ այս ամենի համար Սերժ Սարգսյանը հասներ Միացյալ Նահանգներ՝ անհասկանալի է: Բոլոր այդ միջոցառումները, թերեւս, կարելի էր անցկացնել ԱՄՆ մեկնած Էդվարդ Նալբանդյանի, սփյուռքի նախարար Հրանուշ Հակոբյանի եւ Ամենայն հայոց կաթողիկոսի ու Մեծի Տանն Կիլիկիո կաթողիկոսի մասնակցությամբ: Իշխող մեծամասնության շրջանակներում երեկ տեղեկություններ կային, որ Սերժ Սարգսյանը խիստ նեղսրտած է ԱՄՆ-ում ՀՀ դեսպան Տիգրան Սարգսյանից, ում չի հաջողվել բարձր մակարդակով հանդիպումներ կազմակերպել իր համար:

Տպել
2752 դիտում

Մեծ պատիվ է. Համբարձումյանը՝ Մխիթարյանի բացակայության պայմաններում ավագի թեւկապը կրելու մասին

Թիմը դժվարությամբ էր ըմբռնում նոր մարզչի ասածները. ՀՀ ֆուտբոլի հավաքականի ֆուտբոլիստը՝ պարտության մասին

Նախկին պատգամավոր Ալիկ Պետրոսյանը կալանավորվեց. դատարանը հրապարակեց որոշումը

Տղաները մաքսիմում նվիրվեցին, բայց որակական առումով զիջեցինք. ՀՀ ֆուտբոլի հավաքականի մարզիչը՝ Հունաստանին պարտվելու մասին

Քիմ Քարդաշյանն ու Քանյե Ուեսթը վաճառում են իրենց առանձնատունը․ այն գնահատել են 3,5 միլիոն դոլար

Վերջ. ՀՀ ֆուտբոլի հավաքականը պարտվեց դժգույն խաղով ու պաշտոնապես հրաժեշտ տվեց Եվրո 2020-ին

Երեւանում 37-ամյա կինը լույս աշխարհ է բերել 11-րդ երեխային

Քեզ հետ ենք, Վենետիկ․ Իտալիայում ՀՀ դեսպանությունը զորակցություն է հայտնում հեղեղվող քաղաքի բնակչությանը

Նախագահ Արմեն Սարգսյանի հրամանով հետմահու Արիության մեդալով է պարգեւատրվել հրշեջ-փրկարար Սամվել Վարդանի Դևելյանը. ԱԻՆ

Վյաչեսլավ Հարությունովի պաշտպանը դատարանին միջնորդեց դատակոչել Գագիկ Ծառուկյանին, Էդուարդ Բաբայանին, Իվետա Տոնոյանին

Նախագահ Արմեն Սարգսյանն ընդունել է Վրաստանի Համագործակցության հիմնադրամի նախագահին

Բազմամարդ բողոքի ակցիա Թբիլիսիում՝ արտահերթ ընտրությունների պահանջով. 2 օր է՝ երթեւեկելի պողոտան փակ է

Նախագահ Արմեն Սարգսյանը հյուրընկալել է Ղազախստանի խորհրդարանի Սենատի նախագահ Դարիգա Նազարբաևային

Գործկո՛մ, դո՛ւրս. ՀՀ ֆուտբոլի հավաքականի երկրպագուները պահանջում են ՀՖՖ գործկոմի հրաժարականը

Բացառվում է, որ ցանկապատի մեջ ապրենք. Մխիթար Սեբաստացի կրթահամալիրի աշակերտները կենդանի պատ են կազմել

Իսրայելը և Միացյալ Նահանգները ոչ մի բարեկամ չունեն. Հասան Ռոհանի

Վարչապետն ընդունել է Ղազախստանի խորհրդարանի Սենատի նախագահին

Բացահայտվել է Հայոց ցեղասպանության բանաձևն արգելափակած ամերիկացի սենատորի կապը թուրք լոբբիստների հետ

«Իմ Սարյանը» ցուցահանդեսը կշարունակվի մինչև նոյեմբերի 19-ը

ՃՈ-ն ուժեղացված ծառայություն է իրականացնում Ֆրանսիայի հրապարակում