Լուրջ զրույց` «32 ակումբի» մասնակցությամբ

Կարեն Բաբաջանյանը հայտնեց, որ «32 ատամը» օգոստոսից գնում է արձակուրդի. «Օգոստոս ամսին գնում ենք հանգիստ, ինչպես բոլոր մարդիկ։ Դեկրետ գնացող չկա, սեպտեմբերից սպասվում է նոր անակնկալ նախագիծ»,- հայտնեց պրոդյուսերը։ Բաբաջանյանն ավելացրեց նաեւ, որ հայտարարվել է «32 քասթինգ» նախագիծ, որի համար կարող են գրանցվել 15-ից բարձր տարիքի մարդիկ։ «Ընդունվում են նաեւ էն տաղանդավոր մարդիկ, ովքեր տանը հետեւելով մեզ` ուզում են իրենց փորձել բեմում, նաեւ` դառնալ հանրաճանաչ եւ դարձնել դա գումար աշխատելու միջոց»,- ասաց Կ. Բաբաջանյանը։ Ի դեպ՝ «32 քասթինգ» նախագծի ընդունող հանձնաժողովի նախագահն է դերասան, հումորիստ, շոումեն Վահագն Գրիգորյանը, ով վստահեցնում է՝ դիմորդների մեջ շատ տաղանդավոր ու արժանի մասնակիցներ կան, որոնցից լավագույններին ընտրելը շատ բարդ է լինելու։

Իսկ մինչ արձակուրդը, ակումբում կազմակերպվելու են մի քանի համերգներ։ Մասնավորապես, հուլիսի 25-ին այնտեղ կհյուրընկալվի «Դորիանս» ռոք խումբը, որի ծրագրում հավանաբար կլինեն նաեւ Մայքլ Ջեքսոնի հիշատակին նվիրված երգեր։ Սա այն համերգների շարքից է, որը ակումբը խոստացել էր կազմակերպել` համերգային ալտերնատիվ ստեղծելու նպատակով։

Ակումբում արդեն կայացել են Արամ MP3-ի, «Ռեինկարնացիա» խմբի համերգները։ Ինչ վերաբերում է «Դորիանսին», ապա երեկ Կարեն Բաբաջանյանը նախ խոսեց այն մասին, թե ինչու է ռոք խմբերից ընտրել հենց այս մեկը. «Այս խումբն այն խմբերից է, որն իր գործունեությամբ համապատասխանում է մեր սկսած գործին։ Կարծում եմ` մամուլին հայտնի է, որ ստեղծում ենք մի համերգային սրահ` ակումբ, որտեղ առաջնային տեղում է արվեստը, բեմը, շոուն, նոր` մնացած բոլոր էլեմենտները, որոնք, ցավոք, գերակշռող մաս են կազմում մեր շոու-բիզնեսում... Նոր բան չենք հորինում աշխարհում, պարզապես նոր բան ենք ստեղծում Հայաստանում։ Այսինքն` կազմակերպել որակով համերգ, որտեղ կա շոու, որտեղ ձայնը, լույսը, բեմադրությունը, ներկայացումը լինում են համահունչ, եւ «գռդոն» համերգ չի լինում, երբ պատին մի հատ պաստառ են խփում, դեմը մի հատ բարձրություն սարքում, վրան կանգնում ու երգում»,- ասաց ակումբի պրոդյուսերը։

Արտահայտելով կարծիքն այն մասին, թե ռոքը մեռնում է, Կ. Բաբաջանյանը պնդեց հակառակը` հիշեցնելով, օրինակ, որ «Եվրատեսիլ 2009»-ի հայաստանյան նախընտրական փուլի ժամանակ, մրցույթին մասնակցել են նաեւ ռոք խմբեր։ Թե ինչու են Հայաստանից գնում այդ խմբերից շատերը, այդ մասին Կ. Բաբաջանյանն ասաց. «Պետք է մի ժամ խոսենք, որ պետությունն է մեղավոր, որ տեղ չունեն, մի ժամ էլ կարող ենք խոսել, որ իրենք են մեղավոր, որ տեղ չունեն»։

Թեմայի մասին իր կարծիքն արտահայտեց նաեւ «Դորիանս» խմբի պրոդյուսեր Վահագն Գեւորգյանը։ «Ես չեմ համաձայնի այն կարծիքի հետ, որ ռոքը ծանր վիճակում է գտնվում, չեմ կարծում, որ մյուս ոճերն ավելի լավ վիճակում են, քան ռոքը»,- ասաց նա։ Իսկ արդյո՞ք արդեն մեկ տարուց ավելի գոյություն ունեցող «Դորիանս» խումբը իր երգերով ինչ-որ խնդիր է ուզում լուծել։ «Ես չեմ կարծում, որ եթե դու ռոք երաժիշտ ես, ուրեմն անպայման պետք է բողոքես, ինձ թվում է` դա հնարած միֆ է։ Ես կողմնակից եմ լավ երաժշտության, եւ ցանկացած մարդ, որ լսում է դա, իր խնդիրներն է տեսնում քո երաժշտության մեջ։ Եւ միգուցե դու շատերին կարողանում ես օգնել քո երաժշտությամբ` լուծել իր խնդիրը, որի մասին դու նույնիսկ տեղյակ չես»,- ասաց «Դորիանսի» պրոդյուսերը։

Նշենք, որ խմբի երգերի երաժշտությունը հիմնականում գրում է խմբի մենակատար Գոռ Սուջյանը, իսկ բառերի հեղինակը Վարդան Զադոյանն է։ Թե ինչու են խմբի բոլոր երգերը անգլերեն, այդ մասին Գոռ Սուջյանն ասաց. «Անգլերենը ավելի երգեցիկ է ռոքի համար։ Հայերենը արդեն հայկականացնում է։ Երբ սկսում եմ հայերեն երգել, ռոքն ինձ համար ռոք չի լինում։ Անգլերենով ավելի հեշտ եմ արտահայտվում»։ Երգերի անգլերեն լինելու մյուս պատճառն էլ, ըստ երաժիշտների, այն է, որ խումբը նպատակ ունի արտահանել իր երաժշտությունը։ Այդ ուղղությամբ արդեն աշխատանքներ տարվում են։ «Դորիանսի» անդամները տեղեկացրին նաեւ, որ ամռանը Սեւանում անցկացվելու է ռոք փառատոն, որին մասնակցելու են նաեւ Վրաստանից հրավիրված խմբեր։