Շոյգուի տեղեկալը կալանավորվել և ուղարկվել է քննչական մեկուսարան. ինչով է նա հայտնի և ինչում է մեղադրվում

Ռուսաստանի Դաշնության պաշտպանության նախարարի տեղակալ Տիմուր Իվանովը կալանավորվել է:

Վերջինս բավական հեղինակություն ունեցող պաշտոնյա է, նա պաշտպանության փոխնախարարի պաշտոնը զբաղեցնում է 2016 թվականից և համարվում է Շոյգուի դաշնակիցը։

Ուժայիններին մոտ կանգնած «Վորստկա»-ի աղբյուրի փոխանցմամբ՝ հենց Շոյգուն է Իվանովին 2013 թվականին բերել նախարարության կառույցներ։ Մինչ այդ նրանք միասին աշխատել են Մոսկվայի մարզի կառավարությունում։

Ինչով է հայտնի Իվանովը

Իվանովը պատասխանատու է ռազմական արտադրանքի գնումների համար և վերահսկում է պաշտպանության նախարարության օբյեկտների շինարարությունը, վերակառուցումը և հիմնանորոգումը, այդ թվում՝ Ուկրաինայից բռնազավթված տարածքներում։

Փոխնախարարը ղեկավարում էր շինարարական ամենախոշոր նախագծերը՝ Մարիուպոլի վերականգնումը, ՌԴ ԶՈւ գլխավոր տաճարի, Վոստոչնի տիեզերակայանի կառուցումը, ՊՆ՝ Covid-19-ով հիվանդների բուժման բժշկական կենտրոնները։

2022 թվականի նոյեմբերին Ալեքսեյ Նավալնիի գործընկերները հրապարակել էին հետաքննություն, որում խոսում էին փոխնախարարի և նրա նախկին կնոջ՝ Սվետլանայի ունեցվածքի և ֆինանսական խոշոր միջոցների մասին։

Հետաքննությունը պնդում էր, որ Տիմուր Իվանովն ու նրա ընտանիքը ամառային արձակուրդներն անցկացրել են Ֆրանսիայի Լազուրե ափում և թանկարժեք խնջույքներ կազմակերպել։ 2022 թվականից ի վեր Տիմուր Իվանովը գտնվում է ԱՄՆ-ի և ԵՄ-ի պատժամիջոցների տակ, սակայն նրա կինը կարողացել է խուսափել պատժամիջոցներից և պատերազմի սկսվելուց հետո շարունակել է ճանապարհորդել Եվրոպայում

BBC-ի փոխանցմամբ՝ մեկ այլ հետաքննություն, որը հրապարակվել է վեց ամիս անց, հայտարարել է, որ Իվանովը նոր կին ունի՝ ՌԴ ՊՆ ղեկավարի նախկին խորհրդական Մարիա Կիտաևան։ Ուկրաինայում ռուսական գործողության մեկնարկից հետո նա ևս  մեկնել է Եվրոպա, քանի որ պատժամիջոցների տակ չի եղել:

Ինչում է մեղադրվում Իվանովը

Մոսկվայի Բասմանի դատարանը երկու ամսով կալանավորել է պաշտպանության փոխնախարար Տիմուր Իվանովին, որը ձերբակալվել էր նախորդ գիշերը՝ ապրիլի 23-ին, կաշառք վերցնելու կասկածանքով։ Իվանովը երկար տարիներ է՝  Սերգեյ Շոյգուի տեղակալն է և մտերիմը, եղել է Ալեքսեյ Նավալնիի մերձավորների հակակոռուպցիոն հետաքննության կենտրոնում:

Հետաքննությունը կարծում է, որ Իվանովը հանցավոր դավադրության մեջ է մտել երրորդ անձանց հետ՝ առանձնապես խոշոր չափերով կաշառք ստանալու նպատակով՝ ՊՆ կարիքների համար պայմանագրային և ենթապայմանագրային աշխատանքներ իրականացնելիս։

ՌԴ Քննչական կոմիտեի տվյալներով՝ Իվանովի դեմ գործ է հարուցվել ՌԴ քրեական օրենսգրքի մի կետով, որը վերաբերում է առանձնապես խոշոր չափերով կաշառքին, այսինքն՝ 1 միլիոն ռուբլուց ավելի:

Այս հոդվածով նախատեսված առավելագույն պատիժը նախատեսում է մինչև 15 տարվա ազատազրկում։

Իվանովի հետ երկու ամսով կալանավորվել է կաշառքի գործով մեկ այլ մեղադրյալ՝ փոխնախարարի ծանոթ Սերգեյ Բորոդինը։ Նա նույնպես դատական կալանքի է ենթարկվել մինչև հունիսի 23-ը։

Ըստ РБК-ի, անվտանգության ուժերը Իվանովի գործի հետ կապված տասնյակ խուզարկություններ են իրականացնում, այդ թվում՝ Կրասնոդարի և Ստավրոպոլի երկրամասերում։

РБК-ի զրուցակցի խոսքով՝ Տիմուր Իվանովը բերման է ենթարկվել երեքշաբթի՝ ժամը 17:00-ին, իր աշխատասենյակից։ Նույն օրը՝ մինչ ձերբակալությունը,  ՌԴ ժամանակով 11:00-ին պաշտպանության նախարարությունում տեղի է ունեցել կոլեգիայի նիստ, որին մասնակցել են և՛ Շոյգուն, և՛ Իվանովը։ Քրեական գործի նյութերը վերաբերում են պաշտոնատար անձանց ծառայողական պարտականությունների չկատարմանը կամ թերի կատարմանը, լիազորությունների անցմանը։ Գործը կարող է դառնալ բազմադրվագ, քանի որ հետաքննությունը հարցաքննում է  հանցավոր գործունեության հնարավոր այլ մասնակիցների:

Երեկ  ՌԴ նախագահի մամուլի քարտուղար Դմիտրի Պեսկովը հայտնել է, Վլադիմիր Պուտինը տեղեկացվել է Իվանովի կալանավորման մասին։

«Պաշտպանության նախարար Սերգեյ Շոյգուն նույնպես նախապես տեղեկացված է եղել»,- լրագրողներին ասել է Պեսկովը։