Պետը 100 դրամ խնայեց

Նախապես հայտարարվել էր, որ Երեւանի քաղաքապետարանի ու վարչական շրջանների աշխատակազմերի աշխատակիցները երթեւեկելու են հասարակական տրանսպորտով: Արդյոք բոլո՞րն են այդպես վարվել, հայտնի չէ: Բայց ահա քաղաքապետարանի տրանսպորտի վարչության պետ Հենրիկ Նավասարդյանը երեկ հրաժարվել է ծառայողական մեքենայից եւ աշխատանքի է գնացել ավտոբուսով ու երթուղային տաքսիով: Դավթաշենում բնակվող պաշտոնյան «36 Ա» համարի ավտոբուս է բարձրացել այդ իրադարձությունը տեսանկարահանող օպերատորի ուղեկցությամբ, իսկ ահա երթուղային տաքսում օպերատորը տեղավորվել չի կարողացել, մանավանդ որ մտավախություն է ունեցել, թե տեխնիկան կարող է վնասվել: Ավտոբուսի վարորդը երեկ մեզ հետ զրույցում պատմում էր, որ օպերատորի հետ իր կոստյումավոր ուղեւորը տրանսպորտ է բարձրացել պիկ ժամի` առավոտյան 8.30-ի սահմաններում: Այն պահին, երբ ինքը նկատել է Հենրիկ Նավասարդյանին, թեեւ չճանաչելով, վերջինս կանգնած է եղել: Իսկ հետո, արդեն ճանաչելով, հրաժարվել է ուղեվարձ ստանալ: «Էն կամերան էլ մեկ էստեղից էր նկարում, մեկ էնտեղից: Ես աշխատեցի էնպես անեմ, չերեւամ: Էնքան էի լարվել, որ երեւի կեսից շատը իջան, գնացին, փող էլ չվերցրի»,- նկատեց մեր զրուցակիցը, որն ինչպես նկարահանվելիս է փորձել թաքնվել, այնպես էլ անգամ չցանկացավ հրապարակել իր անունը: Անդրադառնալով իր երեկվա երթեւեկությանը` քաղաքապետարանի տրանսպորտի վարչության պետ Հենրիկ Նավասարդյանը հայտարարեց. «Վաղ առավոտյան ես պլանավորել էի իմ երթուղին կազմակերպել` 2 տրանսպորտային միջոցների ուսումնասիրություն կատարելով` ավտոբուսային եւ միկրոավտոբուսային երթուղիներում: «36 Ա» համարի ավտոբուսով հասել եմ մինչեւ Վաղարշյան փողոցի եւ Կոմիտաս պողոտայի խաչմերուկ: Ավտոբուսը սանիտարական նորմալ վիճակում էր, կանգառներում նորմալ էր կայանում, սակայն վարորդը դիտողություն ստացավ դռները բաց ավտոմեքենան կանգառից շարժվելու համար: Անվտանգությունը ապահովելու համար պետք է դռները փակած լիներ, նոր շարժվեր: Վարորդն ընդունեց իր սխալը, եւ հուսով ենք, որ նման դեպքեր իր մոտ չեն կրկնվի»,- ասաց վարչության պետը` չբացառելով, որ դռները ժամանակին չփակելը կարող էր վարորդի հուզմունքի պատճառով լինել: Իսկ ահա այդ պիկ ժամին, որքան էլ տարօրինակ է, Նավասարդյանին ազատ նստատեղերով միկրոավտոբուս է հանդիպել: «Նույն կանգառից նստել եմ 8-րդ համարի երթուղային տաքսի, որ հասնեմ իմ աշխատանքի վայրը: Երբ միկրոավտոբուսը եկավ, ի զարմանս ինձ` 4 ազատ նստատեղ կար: Կանգառում մարդիկ կային, նրանք ինձ կարծես նաեւ բարձրացրին մեքենա: Առաջին 4 ուղեւորներս հնարավորություն ունեցանք նստել, բայց մյուսները կանգնած մնացին: Եւ մինչեւ քաղաքապետարան միկրոավտոբուսը եկավ գերբեռնված»,- մանրամասնեց նա: Իսկ ի՞նչ են տալիս նմանատիպ մոնիտորինգները: Ոչ վաղ անցյալում էլ այսպիսի մի ակցիա էր կազմակերպվել, դրանից հասարակական տրանսպորտի «կյանքում» ինչ-որ բան փոխվե՞ց: Նախորդ անգամ, ըստ վարչության պետի, ինքը կեղտոտ ավտոբուս էր նկատել, երեկ այն մաքուր էր: Անցյալում տրանսպորտի մեջ գազի բաց բալոններ կային, այս անգամ իրեն սպասարկած տրանսպորտը գազով չի եղել: Ամենալուրջ ձեռքբերումը, որ գրանցվել է նախորդ մոնիտորինգից հաջորդն ընկած ժամանակահատվածում, ծխող վարորդների թվի կրճատումն է: Հենրիկ Նավասարդյանն ընդունո՞ւմ է, որ այսօր Երեւանում շահագործվող մեքենաների վիճակը ոտնահարում է մարդու արժանապատվությունը: Ինքն ի՞նչ է զգացել, երբ աշխատավայր է հասել իրար գլխի կուտակված ուղեւորներով լի միկրոավտոբուսով եւ արդյոք սթրեսի՞ չէր ենթարկվի, եթե ամեն օր ստիպված լիներ աշխատանքի գնալ ու տուն դառնալ այդ պայմաններում: «Այսօրվա դրությամբ ունենք թերություններ` ավտոմեքենաների տեխնիկական վիճակի հետ կապված, դրանց վերականգնման հետ կապված: Դա ես բացատրում եմ նրանով, որ մրցութային ժամանակաշրջանը մոտեցել է, լինելու է նոր երթուղային ցանց, եւ հայտարարվելու են նոր մրցույթներ: Այդ ընթացքում նոր մեքենաներով կհամալրվեն ամբողջ երթուղիները, եւ կթարմացվի մեքենաների տեխնիկական վիճակը: Ծրագրեր ունենք, որ Երեւանում նոր երթուղային ցանց կազմելու ժամանակ կկրճատենք միկրոավտոբուսային երթուղիների քանակությունը, շատ երթուղիներ կդառնան ավտոբուսային: Ցանկացած տնտեսվարող սուբյեկտ ներդրում կատարում է այն ժամանակ, երբ համոզվում է, որ տվյալ երթուղին շարունակելու է լինել ցանցում, ու այդ ներդրումը զուր չի լինելու»,- ասաց քաղաքապետարանի պաշտոնյան, հավելելով, որ եթե ինքը ստիպված լիներ ամեն օր հասարակական տրանսպորտով երթեւեկել, կհամակերպվեր ստեղծված իրավիճակին, քանի որ պատերազմական տարիներին նույնիսկ ոտքով է աշխատանքից տուն գնացել: «Այսօր գտնում ենք, որ ժամանակն է` միկրոավտոբուսները փոխարինել ավելի մեծ տարողությամբ ավտոբուսներով»,- նկատեց նա: Վերջինիս խոսքով նախատեսվում է նոյեմբերին ներկրել 66 նոր ավտոբուս, իսկ մինչեւ 2012 թվականի առաջին եռամսյակի վերջ` եւս 170-190 ավտոբուս: