Դատավորներին վաղ կենսաթոշակի հնարավորություն տվող դրույթը ուժը կորցրած է ճանաչվում. ԱԺ-ում սկսվել է արտահերթ նստաշրջանը

Ազգային ժողովում սկսվել է պատգամավորների նախաձեռնությամբ գումարված արտահերթ նստաշրջանը:

Նստաշրջանի օրակարգում «Իմ քայլը» խմբակցության պատգամավորներ Վահագն Հովակիմյանի եւ Սուրեն Գրիգորյանի հեղինակած նախագծերն են՝ «Սահմանադրական դատարանի մասին» օրենքում փոփոխությունների մասին եւ «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում փոփոխություն կատարելու մասին:

Այս նախագծերով, ըստ հեղինակների, ակնկալվում է սահմանել եւ հստակեցնել հունիսի 22-ի Սահմանադրության փոփոխությունների օրենսդրական հիմքերը եւ ապահովել կատարված փոփոխություններին համահունչ՝ Սահմանադրական դատարանի ձեւավորման գործընթացի ավարտը:

Նստաշրջանը սկսվեց Վահագն Հովակիմյանին ուղղված ծափահարություններով. առիթը նրա ծննդյան տոնն է:

Այնուհետեւ Հովակիմյանը ներկայացրեց վերը նշված փոփոխությունները հատուկ կարգով՝ 24-ժամյա ռեժիմում ընդունելու անհրաժեշտությունը՝ շեշտելով, որ դրանք հրատապ են, քանի որ այս պահին Սահմանադրության հետ հակասություն է առաջացել:

«Հունիսի 26-ին ուժի մեջ են մտել Սահմանադրության փոփոխությունները, այդ փաստով պայմանավորված՝ «Սահմանադրական դատարանի մասին» օրենքի 88-րդ հոդվածի անցումային դրույթները անհրաժեշտ են համապատասխանեցնել Սահմանադրության 213-րդ հոդվածին: Սա հրատապության կարգով պետք է լուծենք, որովհետեւ օրենքը հակասում է Սահմանադրությանը»,- ասաց Հովակիմյանը: 77 կողմ ձայներով ընդունվեց հրատապության ռեժիմով հարցը քննարկելու առաջարկը:

Այնուհետեւ խորհրդարանը սկսեց առաջին ընթերցմամբ քննարկել առաջարկվող փաթեթը:

Սուրեն Գրիգորյանը ներկայացրեց այն փոփոխությունները, որոնք նախատեսվում են. «Նախատեսվում են հետեւյալ փոփոխությունները. փոփոխվում է Սահմանադրական դատարանում առկա թափուր տեղերի համար թեկնածուներ առաջադրող մարմինների առաջադրման հերթականությունը, եւ առաջադրումները կատարվելու են հետեւյալ հերթականությամբ. Կառավարություն, ՀՀ նախագահ, դատավորների ընդհանուր ժողով: Սահմանադրական դատարանում առկա թափուր տեղերի համար առաջադրումները կատարվելու են այդ հերթականությամբ: Այս փոփոխությունը պայմանավորված է այն հանգամանքով, որ եթե հերթականությունները պահպանվեն, ինչպես սահմանված է գործող խմբագրությամբ՝ ՀՀ նախագահ, դատավորների ընդհանուր ժողով, Կառավարություն, կխախտվի 166 հոդվածի 1-ին մասի այն պահանջը, որ առաջադրող սուբյեկտները 3-ական թեկնածու են առաջադրում:

Միեւնույն ժամանակ ամրագրվում է, որ առաջադրող մարմինը թեկնածու չի առաջադրում, եթե իր առաջադրած եւ գործող դատավորների թիվը հավասար է երեքի:

Փոփոխություններ են կատարվում նաեւ Սահմանադրական դատարանի մասին օրենքի 88-րդ հոդվածում, որում փոփոխություններ եւ լրացումներ կատարելու անհրաժեշտեությունը պայմանավորված է հունիսի 22-ին ընդունված եւ 26-ին ուժի մեջ մտած Սահմանադրության 213 հոդվածով սահմանված փոփոխություններով: Նախ, ուժը կորցրած են ճանաչվում այն դրույթները, որոնք նախատեսում էին եւ սույն խորհրդարանի ընդունած նախագծերով հնարավորություն էին տալիս դատավորներին գնալ վաղ կենսաթոշակի:

Հոդվածում նաեւ փոփոխություններ են կատարվում այն բանի համար, որ այն դատավորները, որոնց լիազորությունները դադարել են լիազորությունների ժամկետը ավարտելու հիմքով, նշանակվում է կենսաթոշակ:

Ամրագրվում է նաեւ, որ 3 թափուր տեղերի համալրումից հետո ՍԴ նախագահ է ընտրվում 10-օրյա ժամկետում»,- ասաց Գրիգորյանը՝ հավելելով՝ քանի որ հնարավոր է, որ լիազորությունները դադարած դատավորներին այս ընթացքում մակագրված լինեն գործեր, ուստի հրավիրվում է աշխատակարգային նիստ, որ գործերը վերամակագրվեն, եւ նոր զեկուցողներ նշանակվեն: