Մանկապարտեզներում սաներին զբոսանքի տանո՞ւմ են. ավագանու անդամի հարցումը խնդրի այլ շերտեր է բացել

Երևանի մանկապարտեզներից մի քանիսում երեխաներին զբոսանքի դուրս չեն բերում. ավագանու «Իմ քայլը» խմբակցության անդամ Աննա Ջավախյանն այս խնդրի ծավալը ճշտելու համար հարցում է սկսել ֆեյսբուքյան «Մանկապարտեզը և երեխաները էջում»: «Հայկական ժամանակ»-ի հետ զրույցում նա նշեց, որ երեխաների ծնողներն ու հարազատները տեղեկացրել են ավելի քան տասը այդպիսի մանկապարտեզների մասին: 

Ջավախյանն ասաց, որ զբոսանքի չտանելը հաճախ պայմանավորված է ծնողների դիրքորոշմամբ. չգիտակցելով զբոսանքի կարևորությունը՝ մտահոգվում են, որ երեխաները կմրսեն կհիվանդանան: «Զբոսանքը, թեկուզ 15-20 րոպե, ձմեռային մաքուր օդը շատ ավելի կարևոր են, որ երեխաներն ամրանան, և հենց այդ զբոսանքի արդյունքում նրանք կխուսափեն այն հիվանդություններից, որոնցից վախենում են ծնողները»,- նշեց նա:

Հավաքված տեղեկությունների հիման վրա նախատեսվում է զգուշացնել նշված մանկապարտեզների տնօրեններին՝ երեխաների զբոսանքը կազմակերպել համապատասխան կարգով: «Այնպես չէ, որ մեր մանկապարտեզներում համատարած չեն զբոսնում, մանկապարտեզների մոտով անցնելիս ես հաճախ եմ տեսնում, որ երեխաները դրսում են»,- ասաց Երեւանի ավագանու անդամը:

Հարցումը ևս մեկ՝ հին խնդիր է առաջ բերել. խնդրի մասին բարձրաձայնելու վախերը: Քննարկման մասնակիցներից ոմանք պատմում են դեպքեր, երբ իրենք հրապարակավ հայտնել են մանկապարտեզներում առկա թերացումների մասին, իսկ հետո իրենց նկատմամբ, իրենց երեխաների նկատմամբ «ոչ բարեհաճ վերաբերմունքի» են արժանացել:

Աննա Ջավախյանի խոսքով՝ այս խնդիրը կա, թեպետ ոչ այն ծավալով, որն առկա էր նախկին իշխանության օրոք: «Այն ժամանակ կար մարդ, ով խոսել էր խնդրից, և ամեն ինչ անում էին, որ իր երեխային հանի այդ մանկապարտեզից: Հիմա նման բան չի կարող լինել: Ես ինքս էլ նման պարագայում խոսում եմ թե՛ տնօրենների և թե՛ ծնողների հետ: Բայց միանշանակ է, որ մարդիկ չեն կարող մի քանի ամսում փոխվել»,- ասաց նա:

Խմբի քննարկումները նաեւ փորձում են վերահսկել մանկապարտեզների ներկայացուցիչները: «Տնօրենները լարված սպասում են, որ հանկարծ մի ծնող մի բան գրի և դարձնում են այդ ծնողին անշնորհակալ»,- նշել էր խմբի անդամներից մեկը: Կան ծնողներ, որ նշել են մի հաստատության մասին, մի քիչ հետո կրկին գրառում են արել, թե՝ կներեք, սխալվել էի, պարզվում է՝ զբոսնում են: Թե այս վախն ինչո՞վ է պայմանավորված, Ջավախյանը դժվարացավ ասել, սակայն հավաստեց, որ դիտարկվելու են նշված բոլոր մանկապարտեզները, որոնք շատ չեն: «Այդ մարդկանցից մեկի հետ խոսեցի, հետո նաև՝ տնօրենի հետ, պարզվեց՝ մանկապարտեզի բակում կոյուղագծի նորոգում է ընթանում, դրա համար էլ դուրս չեն բերում»,- ասաց նա:

Ջավախյանն ընդգծեց, որ ինչպես նախորդ դեպքերում, երբ ինքը նախաձեռնել է խոսել որոշակի խնդիրների մասին, այնպես էլ այս անգամ ոմանք իրենց տեղեկությունները փոխանցել են անձնական նամակով: «Դա էլ միջոց է նրանց համար, ովքեր դեռ խուսափում են հրապարակավ խոսել: Ես դեռ վաղուց ինքս եմ օրինակ ծառայում. մշտապես թե՛ մանկապարտեզի, թե՛ այլ ոլորտների խնդիրներից խոսում եմ հրապարակավ, բայց եթե մարդը դեռ գերադասում է անանուն մնալ, թող գոնե այսպես խոսի»,- ասաց նա:

Նշենք, որ առողջապահության նախարարի թիվ 857-Ն հրամանի 8.1 կետով պարտադիր է մանկապարտեզներում ամենօրյա երկկողմանի օդափոխությունը երեխաների բացակայության ժամանակ, իսկ երեխաների ներկայությամբ թույլատրվում է միակողմանի օդափոխություն։ Սակայն Մանկական զարգացման հիմնադրամի «Մանկական զարգացման կրթության հիմքերում» ծրագրի շրջանակներում իրականացված մոնիթորինգը ցույց է տվել, որ ոչ միշտ է կատարվում երկկողմանի օդափոխություն, իսկ ձմռան սեզոնին որոշ մանկապարտեզներում ընդհանրապես օդափոխություն չի կատարվում։

Մոնիթորինգի արդյունքներն ամփոփող զեկույցում առկա են տվյալներ նաև զբոսանքի չտանելու մասին, նշվում է, որ մանկապարտեզները թերանում են նաև երեխաներին օրական երկու անգամ զբոսանքի տանելու հարցում, որը պարտադիր է ըստ նույն հրամանի 8.4 կետի։ Որոշ դեպքերում խնդիրը բակային տարածքի բացակայության կամ անհարմարության հետ է կապված։ Ձմռան սեզոնին մանկապարտեզների մեծ մասում երեխաներին դուրս են տանում օրական մեկ անգամ կամ ընդհանրապես չեն տանում։

Կարմեն Մարտիրոսյան