Վարդան Այվազյանը կատաղել է. «Գլոբալ Գոլդը» մի քիչ բացվում է

Տպագրվել է «Հայկական Ժամանակ» օրաթերթի՝ 2006 թվականի սեպտեմբերի 6-ի համարում

Բնապահպանության նախարար Վարդան Այվազյանը երեկ հրավիրված ասուլիսում հայտարարել է, որ իրենց նախարարությունը «Գլոբալ Գոլդ» ՍՊԸ-ին զրկել է հանքավայրերում ուսումնասիրություն կատարելու իրավունք տվող լիցենզիայից: Այս մասին լրատվական գործակալությունների երեկ տարածած հաղորդագրություններում ասվում էր նաեւ, որ նախարարն իրենց գերատեսչության նման որոշումը պատճառաբանել է «Գլոբալ Գոլդ» ընկերության կողմից ստանձնած պարտավորությունները չկատարելով: Հիշեցնենք, որ Վարդան Այվազյանի կողմից հանքարդյունաբերող ընկերություններից մեկից 3 միլիոն դոլար կաշառք պահանջելու մասին լուրերում մատնանշվում էր հենց «Գլոբալ Գոլդ» անունը: Վարդան Այվազյան-«Գլոբալ Գոլդ» հակամարտությունը առավել բուռն սկսեց զարգանալ հատկապես վերջին շաբաթում:

Սակայն մինչ երեկ այդպես էլ անհասկանալի էր` ի վերջո ի՞նչ է տեղի ունեցել եւ ի՞նչ է տեղի ունենում: «Գլոբալ Գոլդ» ընկերության նախագահ Աշոտ Պողոսյանը երեկ մեզ հետ զրույցում, մեկնաբանելով Վարդան Այվազյանի հայտարարությունը, նախ նրան մեղադրեց ՀՀ օրենսդրությանը հակասող հայտարարություններով հանդես գալու մեջ:  Բանն այն է, որ ՀՀ օրենսդրությամբ հանքային իրավունքի վերաբերյալ լիցենզիաները («Գլոբալ Գոլդ» ընկերության լիցենզիան հենց այս դասակարգման տակ է ընկնում) կարող են դադարեցվել հետեւյալ կարգով. նախ պետք է լիցենզիա տրամադրող մարմինը ընկերության մոտ հայտնաբերի խախտումներ եւ այդ մասին  գրավոր նկատողություն ներկայացնի մասնավոր ընկերությանը:

Եթե տվյալ ընկերությունը 90-օրյա ժամկետում չի վերացնի լիցենզիա տրամադրողի կողմից հայտնաբերված խախտումները, ապա դրանից հետո միայն կարող է լիցենզիայից զրկելու հարց բարձրացվել, որը պետք է լուծվի դատական կարգով: Պողոսյանի խոսքերով, իրենք երբեւէ բնապահպանության նախարարությունից չեն ստացել իրենց ընկերության կողմից թույլ տված խախտումներ հայտնաբերելու եւ դրանք վերացնելու մասին գրություն: Մինչ օրս որեւէ հայց չի ներկայացվել դատարան «Գլոբալ Գոլդին» լիցենզիայից զրկելու պահանջով: Մի խոսքով, գործող օրենսդրությամբ, ամենամեծ ցանկության դեպքում անգամ, բնապահպանության նախարարությունը միակողմանի չի կարող «Գլոբալ Գոլդ» ընկերությանը զրկել լիցենզիայից:

Ավելին, հիշյալ նախարարությունն առաջին անգամ չի հայտարարում, թե իբր «Գլոբալ Գոլդին» զրկում է լիցենզիայից: Պարզվում է, դեռեւս հունիսի սկզբին նախարարությունը ընկերությանն է ուղարկել մի գրություն, որով վերջինիս տեղեկացրել են իրենց լիցենզիայի դադարեցված լինելու մասին: Այդ գրությունը այդպես էլ մնացել է անհետեւանք, քանի որ, ինչպես արդեն նշեցինք, ըստ Պողոսյանի, լիցենզիայից զրկելու օրինական ձեւը բոլորովին այլ է: «Նամակով լիցենզիան չի դադարեցվում»,- ասում է Աշոտ Պողոսյանը:  Մի խոսքով, «Գլոբալ Գոլդը» այդ գրությունից հետո էլ շարունակել է սովորականի պես գործունեություն ծավալել` Հայաստանի մի շարք հանքավայրերում կատարել ուսումնասիրություններ: Վարդան Այվազյանի երեկվա հայտարարությունը եւս, ըստ Պողոսյանի, իրենց չի մտահոգում:

Իսկ ո՞րն է «Գլոբալ Գոլդ» ընկերությունից կաշառք պահանջելու շուրջ տարածված լուրերի էությունը, եւ այդ ի՞նչ «չարաբաստիկ» ձայնագրության մասին է խոսքը: Այս առնչությամբ Պողոսյանի` երեկ մեզ տված պարզաբանումը կարելի է սենսացիոն համարել: Պողոսյանը հաստատեց այն հանգամանքը, որ բնապահպանության նախարարության պաշտոնյաների կողմից իրենց ընկերությանը «կոռուպցիոն պահանջներ» են ներկայացվել: «Այո, եղել են մեր ընկերությանն ուղղված կոռուպցիոն պահանջներ, եւ այդ մասին տեղեկությունները` բոլոր հիմնավորումներով, մեր ընկերությունը ներկայացրել է երկու երկրների` Հայաստանի եւ ԱՄՆ-ի համապատասխան մարմիններին»,- ասաց Աշոտ Պողոսյանը: Սակայն, ըստ նրա, ապացույց ներկայացնելը չի նշանակում հատկապես ձայնագրություն տրամադրել:

«Կոռուպցիան ձայնագրություններով ապացուցելու երեւույթ չէ, կոռուպցիան գործընթաց է եւ ոչ թե` զրույց»,- ասում է Պողոսյանը: Վերջինիս խոսքերով, իրենք ՀՀ կառավարությանը ներկայացրել են ոչ թե ձայնագրություն, այլ առավել հիմնավոր ապացույցներ: «Գլոբալ Գոլդի» նախագահը հատուկ ուշադրություն հրավիրեց այն հանգամանքի վրա, որ ձայնագրությունը ՀՀ օրենսդրությամբ ապացուցողական նշանակություն չունի: Կառավարությունից «Գլոբալ Գոլդի» ղեկավարությանը պատասխանել են, որ ընկերության ներկայացրած փաստերն ուսումնասիրվում են: «Ընթանում է այդ ապացույցները ուսումնասիրելու գործընթաց: Առայժմ չեմ ցանկանում ավելին ասել»,- ասաց Պողոսյանը:

Վերջինս համոզված է, որ ստեղծված իրավիճակը շտկվելու է, եւ բոլոր խնդիրները կկարգավորվեն ՀՀ օրենսդրության շրջանակներում: Իսկ խնդիրների` օրենսդրությամբ չլուծվելու վերաբերյալ Պողոսյանի գնահատականն այսպիսին է. «Եթե բնապահպանության նախարարությունը չենթարկվի ՀՀ օրենքներին, եթե նախարարությունը շարունակի ոտնահարել ՀՀ օրենսդրության պարզ պահանջները, եթե նախարարությունը չի ենթարկվելու միջազգային պայմանագրերի պարզ դրույթներին, ապա տվյալ դեպքում կարող ենք ասել, որ գործ ունենք ներդրումների բռնագրավման դասական դեպքի հետ»:

Վահագն Հովակիմյան