Հայաստանի ճանաչելիությունը գնալով բարձրացել է, մենք միջազգային խաղացող ենք դարձել. Մեխակ Ապրեսյան

Օրերս ՀՀ վիճակագրական կոմիտեն տվյալներ է հրապարակել, համաձայն որոնց՝ 2018 թվականին Հայաստանում մոտ 100 հյուրանոց է ավելացել: Եթե 2017-ին երկրում հյուրանոցների թիվը կազմել է 556, ապա նախորդ տարում այն հասել է 652-ի:

Հանրապետությունում հյուրանոցային համարների քանակը 9521-ից հասել է 10 հազար 274-ի: Միայն Երեւանում բացվել է 70 հյուրանոց: Ըստ տվյալների՝ մայրաքաղաքում 2018-ին, ընդհանուր առմամբ, գործել է 390 հյուրանոց: Հյուրանոցային տնտեսության օբյեկտների աշխատողների տարեկան միջին ցուցակային թվաքանակը նույնպես աճել է՝ 4093-ից հասնելով 4748-ի, իսկ հասույթը՝ 28.427 մլրդ դրամից՝ 34.497 մլրդ դրամի:

Տուրիզմի հայկական ֆեդերացիայի նախագահ Մեխակ Ապրեսյանը «Հայկական ժամանակ»-ի հետ զրույցում ասաց, որ հյուրանոցների թվի ավելացման պահանջարկ կա:

- Պարոն Ապրեսյան, 2018-թվականին 2017-ի համեմատ Հայաստանում մոտ 100 հյուրանոց է ավելացել: Ինչո՞վ է սա պայմանավորված, զբոսաշրջության աճո՞վ:

- Զբոսաշրջության աճ, իհարկե, կա, պահանջարկ կա եւ, ի պատիվ իրենց, մեր մասնավոր հատվածն էլ բավականին արագ արձագանքում է ստեղծված իրավիճակին: Այսինքն՝ ձեւավորված միջավայրը եւ նաեւ գնալով աճող պահանջարկը նպաստում են, որ ներդրումային ակտիվություն լինի ու այստեղ մասնավոր հատվածը բավականին արագ արձագանքում է: Երեւում է, որ հյուրանոցներ են կառուցում ե՛ւ Երեւանում, ե՛ւ Երեւանից դուրս: Նույնիսկ միջազգային հեղինակավոր հյուրանոցային ցանցեր են մուտք գործում Հայաստան: Մենք դեռ չունենք վարչական ռեգիստր, որը, սակայն, անհրաժեշտ է: Այդտեղ արդեն շատ հստակ տվյալներ կունենանք, թե որքանով են ավելանում հյուրանոցները: Այս տվյալները զբոսաշրջության կոմիտեի արած աշխատանքների արդյունքն են՝ համագործակցությամբ մարզպետարանների, Երեւանի քաղաքապետարանի հետ, հավաքագրում են տվյալներ՝ անընդհատ թարմացնելով դրանք: Բայց, ցավոք, դրանք 100 տոկոսանոց չեն: Որքանով էլ հարցումների միջոցով հավաքես, հստակ տվյալ չես ունենա: Զբոսաշրջության կոմիտեում օրենքի մի նախագիծ կա, որն անհրաժեշտ է օր առաջ դնել շրջանառության մեջ: Այդ նախագծով առաջարկվում է վարչական ռեգիստր վարել ոլորտում,  նաեւ հյուրանոցային տնտեսության բոլոր օբյեկտները պետք է գրանցված լինեն այդտեղ՝ ըստ տեսակների, համարների քանակի: Այդ դեպքում մենք կարող ենք հստակ ասել, թե ինչ քանակով, ինչ տեսակի հյուրանոց, հանգստյան տուն, առողջարան, զբոսաշրջային տուն կա: Այդ դեպքում հստակ կիմանանք, թե ինչքանով ենք աճ ունենում:

- Հյուրանոցների ավելացումը գների նվազման բերո՞ւմ է, եւ արդյոք այդ գները մատչելի՞ են զբոսաշրջիկների համար:

- Անպայման, եթե մենք ունենում ենք առաջարկի ավելացում, բնականաբար, շուկայում առաջարկ-պահանջարկ հարաբերակցությունը գնի վրա անդրադառնում է: Լավ է, որ առաջարկն ավելանում է, թե որքանով՝ դա դեռեւս հստակ չենք կարող ասել:

- Վերջին տարիներին Հայաստանում աճում է թե՛ զբոսաշրջիկների թիվը, թե՛ նրանց ծախսած գումարների չափը: Ինչո՞վ է պայմանավորված սա: Ի՞նչն է զբոսաշրջիկներին այդքան գրավում, Հայաստանն այդքան մատչելի՞ երկիր է:

- Մենք 2000 թվականից առ այսօր միշտ ունեցել ենք Հայաստան ներգնա զբոսաշրջային այցելությունների աճ: Միայն 2018 թվականին է, որ աճ չենք ունեցել, այն էլ հիմնականում պայմանավորված է եղել Ռուսաստանում ռուբլու՝ դոլարի փոխարժեքի նկատմամբ էապես նվազմամբ: Դա բացասաբար անդրադարձավ Ռուսաստանից արտագնա զբոսաշրջության վրա, այդ թվում՝ նաեւ դեպի Հայաստան: Ե՛ւ Ռուսաստանից, ե՛ւ Վրաստանից այդ տարի եղավ նվազում, չնայած մյուս բոլոր եվրոպական երկրներից աճ ունեինք, բայց Ռուսաստանի եւ Վրաստանի նվազումը թույլ չտվեց այդ տարի աճ ունենալ:

Այս տարիների ընթացքում շատ լավ, զգալի ռեսուրս է ձեւավորվել: Ենթակառուցվածքներ ենք զարգացրել, Հայաստանի ճանաչելիությունն է բարձրացել, մենք միջազգային խաղացող ենք դարձել, մեզ մոտ լավ զբոսաշրջային արդյունաբերություն է ձեւավորվել: Այդ ամենը ձեւավորված ռեսուրսով է պայմանավորված, բայց նաեւ հեղափոխական գործընթացների շնորհիվ ամբողջ աշխարհի ուշադրությունը սեւեռված էր Հայաստանի վրա: Սա էապես բազմապատկեց Հայաստանի ճանաչելիությունն աշխարհում: Ես միայն չեմ խոսում զբոսաշրջության գրավչությունից: Հայաստանի մասին, ցավոք, դեռեւս ոչ բոլորը գիտեն աշխարհում եւ մենք խնդիր ունենք մեր ճանաչելիությունը բարձրացնելու: Հեղափոխական գործընթացները դրական ազդեցություն ունեցան մեր ճանաչելիության բարձրացման եւ բազմապատկման համար: Սրա արդյունքը մենք ավելի շատ տեսնելու ենք առաջիկա տարիներին: Դժվար թե կարողանանք ասել, որ հենց հեղափոխության տարում էական աճ գրանցեցինք, որովհետեւ այդպես միանգամից չի լինում: Որոշակի ազդեցություն անպայման ունենում է, բայց էական ազդեցությունը զգում ենք հաջորդող տարիներին: Բացի դրանից՝ շատ կարեւոր է, երբ գալիս են եւ իրենց սպասումները գերազանցած են վերադառնում: Բարձր տպավորություններով գնում իրենց հարազատներին պատմում են՝ ինչ լավ երկիր է, ինչը շատ կարեւոր է:

- Զբոսաշրջիկները մարզե՞ր են ավելի շատ ցանկանում այցելել, թե՞ Երեւանում են կենտրոնանում:

- Զբոսաշրջությունը Երեւանից դեպի մարզեր ապակենտրոնացնելու խնդիր ունեցել ենք, ունենք եւ միշտ էլ պետք է ունենանք՝ որպես ոլորտի քաղաքականություն, եւ դա կարծես թե հաջողվում է: Դուք խոսեցիք հյուրանոցների քանակի ավելացման մասին, մեր հյուրանոցային տնտեսության օբյեկտների ավելի քան 60 տոկոսը մարզերում են: Սա ցուցանիշ է, որը խոսում է այդ ապակենտրոնացման քաղաքականության հաջողության մասին, բայց դեռեւս անելիքներ շատ կան: Եթե մի քանի տարի առաջ զբոսաշրջիկները գալիս, մնում էին Երեւանում, այցելում էին մարզ ու նույն օրը հետ էին գալիս, որ գիշերեն Երեւանում, այսօր արդեն պատկերը զգալիորեն փոխվել է: Նրանք Երեւանից դուրս են գալիս, մարզերով շրջագայում են, այնտեղ էլ գիշերակաց են ունենում: Այնտեղ էլ արդեն բավականին շատ հանրային սննդի օբյեկտներ կան եւ ավելանում են: Բայց դա քիչ է, պետք են նաեւ այլ ժամանցի, զվարճանքի օբյեկտներ, պետք են խանութներ: Այն, ինչը զբոսաշրջիկները կգտնեին Երեւանում, պետք է ունենալ նաեւ մարզերում: Այդ զարգացումը ավելի գրավիչ կդարձնի մարզը եւ կյանքը մարզերում ավելի բարեկեցիկ կդառնա ու կակտիվանա:

Տպել
779 դիտում

Գյումրու Վարդանանց հրապարակի եղեւնիները կհանվեն

Կոմպոզիտորների՝ Դիլիջանի ստեղծագործական տունը կարճ ժամանակում պետք է դարձնենք ծաղկուն ու խնամված վայր. Աննա Հակոբյան

Հրաժարվեք Հայաստանում օտարերկրյա ներդրողների գործունեության մեջ քաղաքական ենթատեքստ փնտրել. «ԳեոՊրոՄայնինգ»-ը՝ ԶԼՄ-ներին

Վարչապետ Նիկոլ Փաշինյանի մոտ կայացել է խորհրդակցություն երեխաների որդեգրումների թեմայի վերաբերյալ

«Սիթի օֆ Սմայլ/Ժպիտների քաղաք»-ը անհրաժեշտության դեպքում կաջակցի 21-ամյա Արամի բուժմանը

Կեղծված են և՛ ԱԺ պատգամավորի բլանկի ձևը, և՛ իմ ստորագրությունը. Հրաչյա Հակոբյանը մեկնաբանել է ռուսական կայքի հոդվածը

Նիկոլ Փաշինյանի վերջին այցից հետո զբոսաշրջիկների թիվը Գյումրիում կրկնապատկվել է. Սամվել Բալասանյան

Գերմանիայի պաշտպանության նախարարը հրաժարական է տվել Scorpions-ի «Փոփոխությունների քամի» երգի հնչյունների ներքո

Գտնվում ենք այն քոթեջում, որտեղ ապրել և ստեղծագործել է Առնո Բաբաջանյանը, մթնոլորտը հիասքանչ է. Աննա Հակոբյան

Երեւանի ավագանու նախկին անդամ Սոնա Աղեկյանը ազատ է արձակվել

ԿԳՄՍ նախարար Արայիկ Հարությունյանն ընդունել է Ճապոնիայի դեսպան Ջուն Յամադային

Երևանի թիվ 17 հիմնական դպրոցի կառավարման խորհուրդը հայտարարում է տնօրենի թափուր պաշտոնի մրցույթ

Ձերբակալվել է «Սևան ազգային պարկ» ՊՈԱԿ-ի «Արևիկ» մասնաճյուղի անտառագետը

Արցախում 2 տարեկան երեխան թունավորվել է մոր տված սխալ դեղահաբից

Քննարկվել է «Զվարթնոց» օդանավակայանի ընդլայնման հարցը

«Պոբեդա»-ն այսօր կվերականգնի Գյումրիում ձմեռային չվացուցակով թռիչքների ավիատոմսերի վաճառքը

Սոնա Աղեկյանը քաղաքապետարան է ներկայացել կոյաջրերի տարայով. նրան բերման են ենթարկել

Հայաստանում անշարժ գույքի գործարքները աճել են, եւ աճը մարզերի ու ոչ Երեւանի հաշվին է. Նիկոլ Փաշինյան

Մալաթիայի շուկայի տարածքում հրդեհը բռնկվել է արագ սննդի կետում. մանրամասներ

Ծնելիության ցուցանիշի նվազման տեմպը դանդաղում է. Արսեն Թորոսյան