Շրջադարձ. Սերժ Սարգսյանը  խնդրել է աղոթել

15/05/2019 schedule10:00

Տպագրվել է «Հայկական Ժամանակ» օրաթերթի՝ 2006 թվականի մայիսի 16-ի համարում

ԵՊՀ խորհրդի նախագահ, ՀՀ պաշտպանության նախարար Սերժ Սարգսյանի խնդրանքով Երեւանի պետական համալսարանի ռեկտորի ընտրությունները, որոնք բավական հետաքրքիր ընթացք էին ստացել, երեկ սկսվել են աղոթքով: Բայց անգամ դրանից հետո ԵՊՀ խորհրդի նիստը երեկ առանձնապես հարթ չի անցել: Բանն այն է, որ մարտի 22-ին մի քանի փուլով կայացած անարդյունք ելքով ԵՊՀ ռեկտորի ընտրություններից հետո իշխանությունները ձեռնարկել էին բոլոր հնարավոր միջոցները` իրենց թեկնածուին ռեկտոր դարձնելու համար: Թերեւս դրա համար էր, որ վարչապետ Անդրանիկ Մարգարյանը ընտրություններից 2 օր առաջ փոփոխության էր ենթարկել ԵՊՀ խորհրդի կազմը` ազատվելով խորհրդի բոլոր այն կասկածելի անդամներից, որոնք կարող էին դեմ քվեարկել իշխանությունների թեկնածուին:

Հիշեցնենք, որ ԵՊՀ ռեկտորի թեկնածուներ էին ԵՊՀ իրավաբանության ֆակուլտետի դեկան Գագիկ Ղազինյանը, որը նախորդ ընտրությունների ժամանակ հավաքել էր 36 ձայն, եւ ԵՊՀ պրոռեկտոր Արամ Սիմոնյանը, որը հավաքել էր 20 ձայն, եւ որի համար էլ պայքարում էին իշխանությունները: Մայիսի 11-ին վարչապետի որոշմամբ ԵՊՀ խորհրդի անդամ, արդարադատության նախարար Դավիթ Հարությունյանի փոխարեն խորհրդի անդամ է նշանակվել ՀՀ նախագահի օգնական Գեւորգ Մհերյանը, ԿԳՆ կրթության ազգային ինստիտուտի տնօրեն, ՕԵԿ անդամ Վիկտոր Մարտիրոսյանի փոխարեն` ԵՊՀ շրջանավարտների միության նախագահ Արսեն Քարամյանը, Հանրային հեռուստառադիոխորհրդի նախագահ Ալեքսան Հարությունյանի փոխարեն` Համահայկական միջազգային երիտասարդական կենտրոն-հիմնադրամի տնօրեն Արմեն Սինանյանը:

Գրողների միության նախագահ Լեւոն Անանյանին վարչապետի որոշմամբ փոխարինելու էր եկել Պետական արխիվի տնօրեն Ամատունի Վիրաբյանը, ակադեմիկոս Գեւորգ Պողոսյանի փոխարեն` Հասարակական երկխոսության կենտրոնի տնօրեն Էվելինա Վարդանյանը, Մայր աթոռի դիվանապետ Արշակ եպիսկոպոս Խաչատրյանի փոխարեն` ԱԺ պատգամավոր Արարատ Մալխասյանը: Ի դեպ, եպիսկոպոսը տեղյակ չէր եղել, որ այլեւս խորհրդի անդամ չէ եւ պատրաստակամ ներկայացել էր համալսարան: Բայց նրան աղոթել տալուց հետո ուղարկել էին ետ: Խորհրդի անդամ, ԵՊՀ ռոմանագերմանական ֆակուլտետի ուսանող Ստեփան Ենոքյանից ազատվելու համար նրան, ինչպես տեղեկացրել ենք, ուղարկել են բանակ, քանի որ վերջինս չէր թաքցրել, որ նախորդ ընտրությունների ժամանակ քվեարկել է Գագիկ Ղազինյանի օգտին:

Նրա փոխարեն խորհրդի անդամ էր դարձել կենսաբանության ֆակուլտետի ուսանող Վահագն Վարագյանը: Խորհրդի կազմի սույն փոփոխությունները, որոնց մասին խորհրդի անդամներից շատերն իմացել էին հենց նիստի ժամանակ, բնականաբար, մեծ դժգոհություններ էր առաջացրել: Մեզ հայտնի դարձավ, որ այս հարցը նիստի ժամանակ շատ սուր բարձրացնելուց հետո Սերժ Սարգսյանը բավական կոպիտ ձեւով փակել է խոսակցությունը` հայտարարելով, թե կոռեկտ չէ նման հարցեր բարձրացնելը, եւ դա վարչապետի որոշելու հարցն է: Սույն փոփոխությունները, սակայն, երեկ բավական որոշիչ դեր խաղացին ԵՊՀ ռեկտորի ընտրությունների ժամանակ: Արդյունքում, իշխանության թեկնածուին, այսինքն՝ Արամ Սիմոնյանին, հաջողվեց հավաքել 41 ձայն, նախորդ անգամվա 20 ձայնի փոխարեն: Իսկ Գագիկ Ղազինյանը, որը նախորդ անգամ հավաքել էր 36 ձայն, այս անգամ ստացավ ընտրողների ձայներից ընդամենը 24-ը:

Մի խոսքով, այս պատկերը ստանալու համար մոտ 2 ամիս առաջ նախ ընդունվեց ԵՊՀ ռեկտորի ընտրությունների այնպիսի ընթացակարգ, որը հնարավորություն էր տալու ռեկտոր դառնալու շատ ավելի քիչ հեռանկար ունեցող թեկնածուին պայքարի մեջ մնալ, հետո մարտի 22-ի ընտրությունների ժամանակ Գագիկ Ղազինյանի հավաքած 37 որոշիչ ձայնը, որն էլ անհրաժեշտ էր ռեկտոր դառնալու համար, հաշվիչ հանձնաժողովի շնորհիվ դարձավ 36 ձայն, ճնշումների արդյունքում ԵՊՀ ռեկտորի ժամանակավոր պաշտոնակատար Էդվարդ Չուբարյանը հրաժարական տվեց, եւ նրա փոխարեն նշանակվեց Արամ Սիմոնյանը, ինչը մեծացրեց վերջինիս լծակներն ընտրություններից առաջ, ուսանողների շրջանում ստեղծվեց վախի մթնոլորտ` նրանց ընկերոջը բանակ տանելու արդյունքում: Սերժ Սարգսյանը, բնականաբար, ընտրությունների արդյունքից շատ գոհ էր:

«Ես կարծում եմ, որ ռեկտորի ընտրությունն անցել է շատ լավ` պահպանելով օրենքի տառը եւ բարյացակամ մթնոլորտը»,- հայտարարեց նա: Ընտրություններից 2 օր առաջ խորհրդի կազմի նման փոփոխությունը, ըստ Սերժ Սարգսյանի, ամբողջությամբ համապատասխանում է օրենքին, եւ այստեղ հարցերն ավելորդ են: «Ի՞նչ տարբերություն, թե ով է խորհրդի անդամը` կառավարությո՞ւնը, թե՞ կրթության նախարարությունը...»,- հայտարարեց նա: Այն հարցին, թե տեղյա՞կ է արդյոք ՊՆախարարը, որ խորհրդի անդամ ուսանողին բանակ են տարել, նա ասաց. «Իհարկե, ո՞նց կարող եմ տեղյակ չլինել: Նա առողջության հետ կապված խնդիրներ ուներ, այս անգամ էլ, անցնելով 3 փորձաքննություն, եզրակացությունն այնպիսին էր, որ Ստեփան Ենոքյանն ունի սահմանափակ առողջություն: Բայց այդ սահմանափակ առողջությունը հնարավորություն չի տալիս բանակից ազատվելու: Նա ճանաչվել է պիտանի ոչ շարային ծառայությունում»:

Ինչ վերաբերում է քվեարկության արդյունքների կտրուկ փոփոխությանը, ըստ ՊՆախարարի, 50 օրը բավականաչափ ժամանակ է, որպեսզի մարդիկ վերանայեին իրենց որոշումը: Նա շատ նորմալ է համարում նաեւ այն, որ ռեկտորի թեկնածու Արամ Սիմոնյանը մինչ ընտրությունները նշանակվել էր ռեկտորի պաշտոնակատար: Իսկ ինչ վերաբերում է ԵՊՀ նորընտիր ռեկտոր Արամ Սիմոնյանին, որը հայտարարեց, թե չէր սպասում նման արդյունքի, քվեարկության նման շրջադարձն, ըստ նրա, հիմնականում պայմանավորված էր մամուլում Գագիկ Ղազինյանի տված հարցազրույցներով: «Համենայնդեպս, այն, որ ասում են, թե դա կապ ունի ինչ-որ լծակների հետ, ես համարում եմ ոչ կոռեկտ խոսակցություն, որովհետեւ լծակների խնդիր այստեղ լինել չի կարող»,- հայտարարեց Սիմոնյանը: Ուսանողին էլ, ըստ նրա, բանակ են տարել, քանի որ պարզվել է, որ նա առողջական խնդիրներ չունի: «Կարծում եմ, որ ամեն ինչ կլինի այնպես, ինչպես համալսարանականներն են ուզում, ինչպես որ համալսարանի առջեւ խնդիրները դրված են պետության կողմից, ազգի եւ հասարակության կողմից: Թող դա լինի սկզբնական երդման նման մի բան, որ ես տալիս եմ...»,- հայտարարեց նորընտիր ռեկտորը:

Լուսինե Բարսեղյան

Տպել
637 դիտում

Հայաստանը շուրջ 300 մլն դոլար պարտք է Ռուսաստանին. ամենամեծ պարտքն ունի Բելառուսը

Ռուսաստանցիների համար Հայաստանն ամենապահանջված տուրիստական ուղղությունն է. հետազոտություն

«Քոնթուրգլոբալ հիդրոկասկադ» ՓԲԸ-ն հայտարարում է մրցույթ

Պատգամավորը շրջանառության մեջ է դրել նախագիծ, որով յուրաքանչյուր քաղաքացի կարող է լինել երթեւեկությունը վերահսկող մարմին

Չինարին այլևս չի կարող գնդակոծվել. Հայաստան մտնող գազամուղի անվտանգությունը ևս ապահովված է. Միրզոյան

Դանակով բազմաթիվ հարվածներ է հասցրել 46-ամյա տղամարդուն. բացահայտվել է Լոռիում տեղի ունեցած սպանությունը

Էջմիածնում մոտ 32 հեկտար ցորենի հնձած արտ է այրվել

ՊՆ-ը չի ուզում շատ բարձրաձայնել. դիրքերի բարելավումը մշտական գործընթաց է. Արծրուն Հովհաննիսյան

Միջադեպ Հյուսիսային պողոտայում` Վահագն Չախալյանի մասնակցությամբ. նրան եւ մի քանի հոգու բերման են ենթարկել (տեսանյութ)

Ջերմուկցիները գալիս են Երեւան. սպասվում է թեժ քննարկում

Հատվել է 1462 հատ տարբեր տեսակի և տրամագծերի ծառ. մեղադրանք է առաջադրվել 16 անձի, մեկ անձ հետախուզվում է

Մեկնարկել է Ամուլսարի շահագործման դեմ ջերմուկցիների ավտոերթը դեպի Երեւան

Lոռու մարզպետարանի պաշտոնյան սպանվել է դանակի 17 հարվածով. նոր մանրամասներ (լուսանկարներ)

Հրդեհ՝ Շիրակի մարզում. այրվել է անասնագոմ եւ պահեստավորած անասնակեր

Նռնակ՝ իր պայթուցիչով, 37 հատ տարբեր տրամաչափի փամփուշտներ. կինը զինամթերք է հանձնել

«Թումանյան» կայարանից Օձունի խաչմերուկ ճանապարհը ժամանակավոր փակ է լինելու. ժայռը կպայթեցնեն

«Լիդիան Արմենիա»-ն ներկայացրել է բնապահպանական փորձաքննության եզրակացության առաջարկների մասին պատասխաններ

Շոգը չի նահանջելու նաև այս շաբաթ. ջերմաստիճանը կտատանվի +40-ի սահմաններում. Սուրենյան

Արեգնադեմ գյուղում տնակ է հրդեհվել, ապա պայթել գազի բալոն․ 1 հոգի այրվածքներով հոսպիտալացվել է

Գրանցվել է խոտածածկ տարածքներում բռնկված 48 հրդեհ` ներգրավելով 58 մարտական հաշվարկ, 3 օպերատիվ խումբ