Հանուն «Ջերմուկ Գրուպ»-ի կասեցվեց 18 կազմակերպության գործունեություն. գործարարը դիմում է պատգամավորներին

Այսօր «Հայկական ժամանակ»-ի խմբագրություն է այցելել «Սուպեր Գրուպ» փակ բաժնետիրական ընկերության հիմնադիր եւ տնօրեն Սուրեն Բալայանը:

Բալայանը 1996-ից 1997 թվականներին Վայոց Ձորի մարզի Ջերմուկ քաղաքում հիմնադրել է «Ջերմուկ» հանքային ջրերի գործարանը:

Նա 1998 թվականին դիմել է մտավոր սեփականության գործակալություն՝ «Ջերմուկ» անվանումը որպես ապրանքանիշ գրանցելու համար:

Իսկ 6-րդ գումարման Ազգային ժողովի ՀՀԿ խմբակցության պատգամավոր Աշոտ Արսենյանին պատկանող ներկայումս գործող՝ «Ջերմուկ Գրուպ» ընկերությունը 1999 թվականին է դիմել մտավոր սեփականության գործակալություն՝ «Ջերմուկ» անվանումը գրանցելու համար: Վերջին տարիներին Բալայանի բիզնեսը կասեցվել էր՝ ապրանքանիշի անվանման պատճառով:

«2008 թվականին ես գնացի Էկոնոմիկայի այն ժամանակվա նախարար Ներսես Երիցյանի մոտ: Մենք երկար խոսեցինք: Ինձ ասաց, որ «Ջերմուկ» բրենդը պետք է միայն օգտագործի «Ջերմուկ Գրուպ»-ը: Ասացի՝ ինչի՞ համար, ասաց՝ դե կառավարության որոշում է, ասել են՝ ներքին կարգով»,- ասաց Բալայանը:

Նա նշեց, որ դրանից հետո հանդիպել է՝ դարձյալ այդ ժամանակ պաշտոնավարող վարչապետ Տիգրան Սարգսյանի հետ. «Տիգրան Սարգսյանն ասում է՝ ինչի՞ եք եկել ինձ մոտ, ասում եմ՝ նախարարն է ասել: Ես իրեն բացատրեցի, որ 500 հազար դոլար վարկ եմ վերցրել, ապակյա շշերի գործարանում 6 մլն պատվիրված շիշ ունեմ, որի վրա գրված է «Ջերմուկ» անվանումը, իսկ մյուս կողմում՝ «Սուպեր Գրուպ», ասացի՝ դա էլ մոտ 1 մլն դոլար է կազմում, եթե դուք իմ գործունեությունը դադարեցնում եք, ես ինչպե՞ս կարող եմ վճարել այդ գումարը: Նա ասաց՝ դա ինձ չի հետաքրքրում, այլ անունով գրիր, ինչ պարտադիր է «Ջերմուկ» գրես:

2010 թվականի ապրիլին «Աշխարհագրական նշումների մասին» օրենքով փոփոխություն կատարեցին: Այդ իրավակարգավորումը պարարտ հող ստեղծեց «Ջերմուկ Գրուպ» ՓԲԸ-ի համար եւ նրանք «Ջերմուկ» անվանումը գրանցեցին որպես ապրանքային նշան: Ու արդյունքում գործող մյուս մրցակից տնտեսվարող սուբյեկտներին արգելվեց օգտագործել այդ անվանումը իրենց կողմից արտադրվող ապրանքի վրա եւ «Ջերմուկ Գրուպ»-ը մենաշնորհային դիրք ստացավ:

1 օրվա մեջ 18 կազմակերպություն դադարեցրեցին իրենց գործունեությունը: 612-ից 624 գրանցված աշխատատեղ միանգամից փակվել են: Այսօր այդ մասնագետների մեծամասնությունը Հայաստանից արտագաղթել են»- պատմեց Սուրեն Բալայանը:

Նա նշեց, որ 2015-16 թվականներին 2 մլն դոլար վարկ է վերցրել, ներդրում է կատարել, սարքավորումներ է բերել ու էլի սկսել է աշխատել. «2016 թվականի դեկտեմբերի 1-ին գործարանից զանգեցին ինձ, ասացին, որ ոստիկանության 6-րդ վարչությունը ներխուժել է գործարան, նկարահանել է, ոչ մեկին չի հարցաքննել: Ես ցանկացա կապ հաստատել այդ մարդկանց հետ, մեկ էլ հեռուստատեսությամբ տեսնեմ հայտարարում են, որ Ջերմուկում հայտնաբերվել է հանքային ջրի գործարան, որն ապօրինի է: Դա ի՞նչ է նշանակում, ես 1996 թվականից աշխատում եմ: Հայաստանի բանկերը ինձ 2 մլն դոլար են վստահել աշխատելու համար: Նույն օրը 55 մլն դրամի չափով տուգանք են գրում՝ առանց ինչ-որ մեկից մի բան հարցնելու եւ փաստաթղթերը փոխանցում են պետական եկամուտների քննչական բաժին:

Թավշյա հեղափոխությունից հետո եւ շնորհիվ դրա, նամակ գրեցի համապատասխան կառույցներ՝ վերանայեցին, նույն օրը աուդիտ արեցին եւ այդ 55 մլն դրամի կեղծ տուգանքը չեղարկվեց: Մինչեւ դա էլ 2009 թվականին հարկայինից էլի մարդիկ էին ուղարկել, 20 մլն դրամ տուգանք էին գրել, այդ գործն էլ դեռ ընթանում է դատարանում»,- ասաց Բալայանը:

Գործարարը նշում է, որ 2016 թվականի դեկտեմբերին գնել է Ջերմուկ հանքային ջրի հանքահորերից մեկը. «Նորից վերսկսեցի աշխատել, ինձ հանքի շահագործման լիցենզիա չէին տալիս: Ես 7 նամակ գրեցի Ջերմուկի քաղաքապետարան, որ հանրային լսումներ անեն, սակայն նրանք 1 տարի շարունակ չեն պատասխանել նամակներիս: Դարձյալ թավշյա հեղափոխության շնորհիվ այդ խնդիրը կարգավորվեց: Մի նամակ եմ գրել ՀՀ վարչապետին, նույն օրը արձագանքել են, հաջորդ օրվանից սկսել են հանրային լսումները: 2018 թվականի նոյեմբեր-դեկտեմբեր ամիսներին 50 տարով շահագործելու լիցենզիա են տվել: Քանի որ պարոն Փաշինյանն ասաց, որ Հայաստանում կոռուպցիան 0 է, արհեստական խոչընդոտներ չի լինելու, որոշեցի իմ «Ջերմուկ» բրենդը, որն ինձնից խլել էին, փայ էին մտել, նորից արտադրել»,- ասաց Բալայանը:

Բալայանը դիմում է ԱԺ պատգամավորներին եւ խնդրում է, որպեսզի օրենսդրական փոփոխություն կատարեն եւ հնարավորություն տան բոլորին «Ջերմուկ» անունը օգտագործել՝ հանքային ջրեր արտադրելու համար. «Օրենքը ընդունելու հենց հաջորդ օրվանից պատրաստ եմ 60 աշխատատեղ բացել: Ներկայումս էլ ունեմ շշալցված մոտ 170-180 հազար «Ջերմուկ», որը չեմ կարողանում իրացնել այդ խոչընդոտների պատճառով: Եթե հանքը կոչվում է Ջերուկ ածխաթթվային, ապա էլ ինչպե՞ս կոչեմ դրա անունը: Իմ գործարանի արտադրողականությունը ամսական 5 մլն է, պարտավորություն ունեմ 1-2 մլն արտահանել:

Այս վերջին 8 տարվա ընթացքում «Ջերմուկ Գրուպ»-ի ղեկավարությունն ու Ներսես Երիցյանը ինձ 38-ից 40 մլն դոլարի վնաս են տվել. «Բրենդը ձեռքիցս վերցրել են: Ես փոխհատուցում եմ խնդրում ոչ թե պետությունից, այլ հենց իրենցից: Թող իմ վնասը վերականգնեն: Այդ գումարը ես ինձ համար չեմ ուզում, թող մի մասը ուղղեն Վայոց Ձորի այն 612 աշխատակիցներին, որոնք կորցրել էին իրենց աշխատանքը: Մի մասը ուղղեն Գորիս քաղաքի Խնձորեսկ համայնքի ճանապարհների վերանորոգմանը, իսկ մյուս մասը՝ Գյումրու երկրաշարժից տուժածներին: Իմ նպատակն այն է, որ իմ բրենդը վերականգնվի: Ցանկանում եմ վերականգնել իմ բարի համբավը, կատարել իմ հարկային պարտավորությունները»,- ասաց Բալայանը:

Տպել
15889 դիտում

Մեծ պատիվ է. Համբարձումյանը՝ Մխիթարյանի բացակայության պայմաններում ավագի թեւկապը կրելու մասին

Թիմը դժվարությամբ էր ըմբռնում նոր մարզչի ասածները. ՀՀ ֆուտբոլի հավաքականի ֆուտբոլիստը՝ պարտության մասին

Նախկին պատգամավոր Ալիկ Պետրոսյանը կալանավորվեց. դատարանը հրապարակեց որոշումը

Տղաները մաքսիմում նվիրվեցին, բայց որակական առումով զիջեցինք. ՀՀ ֆուտբոլի հավաքականի մարզիչը՝ Հունաստանին պարտվելու մասին

Քիմ Քարդաշյանն ու Քանյե Ուեսթը վաճառում են իրենց առանձնատունը․ այն գնահատել են 3,5 միլիոն դոլար

Վերջ. ՀՀ ֆուտբոլի հավաքականը պարտվեց դժգույն խաղով ու պաշտոնապես հրաժեշտ տվեց Եվրո 2020-ին

Երեւանում 37-ամյա կինը լույս աշխարհ է բերել 11-րդ երեխային

Քեզ հետ ենք, Վենետիկ․ Իտալիայում ՀՀ դեսպանությունը զորակցություն է հայտնում հեղեղվող քաղաքի բնակչությանը

Նախագահ Արմեն Սարգսյանի հրամանով հետմահու Արիության մեդալով է պարգեւատրվել հրշեջ-փրկարար Սամվել Վարդանի Դևելյանը. ԱԻՆ

Վյաչեսլավ Հարությունովի պաշտպանը դատարանին միջնորդեց դատակոչել Գագիկ Ծառուկյանին, Էդուարդ Բաբայանին, Իվետա Տոնոյանին

Նախագահ Արմեն Սարգսյանն ընդունել է Վրաստանի Համագործակցության հիմնադրամի նախագահին

Բազմամարդ բողոքի ակցիա Թբիլիսիում՝ արտահերթ ընտրությունների պահանջով. 2 օր է՝ երթեւեկելի պողոտան փակ է

Նախագահ Արմեն Սարգսյանը հյուրընկալել է Ղազախստանի խորհրդարանի Սենատի նախագահ Դարիգա Նազարբաևային

Գործկո՛մ, դո՛ւրս. ՀՀ ֆուտբոլի հավաքականի երկրպագուները պահանջում են ՀՖՖ գործկոմի հրաժարականը

Բացառվում է, որ ցանկապատի մեջ ապրենք. Մխիթար Սեբաստացի կրթահամալիրի աշակերտները կենդանի պատ են կազմել

Իսրայելը և Միացյալ Նահանգները ոչ մի բարեկամ չունեն. Հասան Ռոհանի

Վարչապետն ընդունել է Ղազախստանի խորհրդարանի Սենատի նախագահին

Բացահայտվել է Հայոց ցեղասպանության բանաձևն արգելափակած ամերիկացի սենատորի կապը թուրք լոբբիստների հետ

«Իմ Սարյանը» ցուցահանդեսը կշարունակվի մինչև նոյեմբերի 19-ը

ՃՈ-ն ուժեղացված ծառայություն է իրականացնում Ֆրանսիայի հրապարակում