ՀՀԿ հապավումն այնքան վարկաբեկված է, որ չեմ կարծում, թե այդ անունով նորից կհայտնվեն ԱԺ-ում. Հրաչյա Հակոբյան

«Քաղաքացիական պայմանագիր» կուսակցությունն Ազգային ժողովի արտահերթ ընտրություններում որեւէ կուսակցության իրեն մրցակից չի դիտարկում: «Հայկական ժամանակ»-ի հետ զրույցում նման կարծիք հայտնեց ՔՊ անդամ, ԵԼՔ խմբակցության պատգամավոր Հրաչյա Հակոբյանը: «Եթե նայում ենք ներկա քաղաքական իրավիճակին, մի քիչ դժվարանում եմ ասել, որ կան մրցակիցներ: ՔՊ-ն մրցակցությունից բավական դուրս է»,- ասաց պատգամավորը՝ նկատի ունենալով Երեւանի ավագանու ընտրություններում ստացած քվեները:

Խոսելով նոր ձեւավորվող ԱԺ-ի մասին՝ Հակոբյանը կարծիք հայտնեց, որ ՀՅԴ-ն 7-րդ գումարման ԱԺ-ում չի լինելու, իսկ ՀՀԿ-ի մասով նշեց. «50-50-ն է, կարծիքները տարբեր են: Եթե ռեբրենդինգ անեն, ապա այնտեղ կան մարդիկ, որոնց ներկա գտնվելը հաջորդ խորհրդարանում՝ օգուտ կբերի»,- ասաց ԵԼՔ-ի պատգամավորը եւ շեշտեց, որ եթե ՀՀԿ-ն մասնակցի «Հանրապետական» անվան տակ, ապա ԱԺ-ում չի հայտնվի: «ՀՀԿ հապավումն այնքան վարկաբեկված է, որ չեմ կարծում, թե այդ անունով կհայտնվեն խորհրդարանում»:

Էդուարդ Շարմազանովը ՀԺ-ի հետ զրույցում նշել էր մի քանի պատճառներ, որոնց համար քաղաքացիները պետք է ՀՀԿ-ին վստահության քվե տան եւ գործուղեն Ազգային ժողով: Մասնավորապես, Շարմազանովը հայտարարել էր, որ ՀՀԿ-ն միակ քաղաքական ուժն է, որ Նիկոլ Փաշինյանի իշխանությանը կարող է ռեալ քննադատել: «Առողջ քննադատությունը շատ լավ բան է եւ հնարավոր է, որ առողջ քննադատության շնորհիվ քվեներ ստանան, բայց երբ այսքան տարիներ նրանք թալանել են եւ այսօր խոսում են չնչին բաների մասին, հանրության մոտ շատ հարցեր կծագեն: Շարմազանովը ճիշտ է ասում, թող բարձրաձայնեն այդ հարցերը, բայց դա իրենց չի փրկի»,- ասաց Հակոբյանը:

Այնուհանդերձ, Հրաչյա Հակոբյանը նշեց, որ որոշ ՀՀԿ-ականների ներկայությունն ԱԺ-ում ցանկալի կլինի: «Կուզեմ, որ Հանրապետական կուսակցությունից որոշ պատգամավորներ լինեն խորհրդարանում՝ որպես ընդդիմություն: Անուններ չեմ տա, բայց ՀՀԿ-ում կան այնպիսի մարդիկ, որ անսկզբունքային են, եւ մենք չենք ուզում ունենալ անսկզբունք ընդդիմություն»:

ՀԺ-ի հարցին՝ ՔՊ-ի հույսը Երեւանի ընտրազանգվա՞ծն է, թե՞ մարզերի, քանի որ կարծիքներ կան, որ իշխանության թեկնածուները մարզերում թույլ են, պատգամավորը նշեց: «ՔՊ-ի հույսը իր ծրագիրն է: Մենք նույն ծրագրով ներկայանալու ենք ե՛ւ մարզերում, ե՛ւ Երեւանում»:

Հակոբյանը վստահեցնում է, որ որակյալ, պրոֆեսիոնալ մարդկանցից կազմված ցուցակ են ներկայացնելու: Մամուլում շրջանառվող լուերի մասին էլ, որ արդեն քրեական հեղինակություններն ու նրանց բարեկամներն են ՔՊ-ի ցուցակում տեղեր ամրագրել, մասնավորապես, ՀՀԿ-ական պատգամավոր Նահապետ Գեւորգյանի որդին եւ քանաքեռցի Տույի քույրը, պատգամավորը նշեց. «Այս հարցը միշտ ծագել է մարդկանց մոտ, որովհետեւ նոր ուժ է եւ հարցնում են՝ մասնագետներ կա՞ն ձեզ մոտ: ՔՊ-ն վստահեցնում է, որ չի հիասթափեցնի քաղաքացիներին, քանի որ կան լուրջ մասնագետներ: Մամուլում միշտ նման տեղեկություններ շրջանառվում են, բայց ես ձեր նշածների հետ կապված որեւէ տեղեկություն չունեմ: Մի քանի օր մնաց, ցուցակը կհրապարակվի եւ կտեսնենք, թե ովքեր են ներգրավված»,- ասաց նա:

«Ծառուկյան» խմբակցությունից չեն ցանկանում մեկնաբանել Շարմազանովի այն խոսքերը, որ ԲՀԿ-ն օրվա առաջին կեսին իշխանություն է, իսկ դրանից հետո՝ ընդդիմություն:

«Ես Շարմազանովի ասածները մեկնաբանելու ցանկություն չունեմ, երեւի իր ասածները ճիշտ կլինի, որ ինքը մեկնաբանի»,- ասաց նա:

ՀԺ-ի հարցին՝ ի վերջո, ԲՀԿ-ն ընդդիմությո՞ւն է, թե իշխանություն, Պետրոսյանը պատասխանեց. «Այս պահին ԲՀԿ-ն հանդիսանում է ընդդիմադիր կուսակցություն, քանի որ ԱԺ-ում փոքրամասնություն է, իսկ կառավարությունում քվոտաներ չունի: Սա դասական ընդդիմության վիճակ է, բայց ունենալ ընդդիմադիրի կարգավիճակ եւ լինել թշնամի, սա լրիվ այլ բան է: Այս պահին մենք համալրում ենք ընդդիմության դաշտը, բայց գիտեք, որ ունենք հայտնի հուշագիրը, որով մենք պայմանավորվել ենք՝ քարոզարշավն անցկացնել փոխադարձ հարգանքի մթնոլորտում, իսկ հաջողություն արձանագրելու դեպքում անցնել մեր երկրի հզորացմանը: Քաղաքական ուժերի կողմից այս պահի գուշակություններն անպտուղ բան են»:

Հարցին՝ ԲՀԿ-ն որ տեղի համար է մտնում ընտրապայքարի մեջ, Գեւորգ Պոտրոսյանը պատասխանեց. «Ցանկացած քաղաքական ուժ, եթե ունի ներքին բավարար ռեսուրսներ՝ ընտրություններին մասնակցելու, ապա ձգտում է առավելագույնին, բայց ասել, որ պայքարում ենք այսինչ տեղի համար, կնշանակի կանխորոշել ժողովրդի վերաբերմունքը, որը բարոյական առումով ճիշտ չէ»,- եզրափակեց նա: