Ամեն տարի 500-ով ավելի աղջիկ երեխա է ծնվում, հղիություններն ընդհատվում են ավելի քիչ

Վիճակագրական վերջին տվյալները փաստում են, որ Հայաստանում որոշակիորեն վերականգնվում է նոր ծնվող երեխաների սեռերի բնականոն համամասնությունը, ինչի խախտումը հասնում էր մտահոգիչ չափերի. տղաների քանակը էապես գերազանցում էր աղջիկների քանակին: Այս պատկերի ձեւավորմանը մեծապես նպաստել էին հղիության՝ սեռով պայմանավորված ընդհատումները, երբ ընտանիքներում համարում էին, որ աղջիկ երեխաները ցանկալի չեն, ու նրանք չպետք է լույս աշխարհ գան:  

«Հայաստանում ընտանիքի պլանավորման առումով մտահոգիչ պատկերը զգալիորեն շտկվել է: 2000-ի համեմատ 2015-ին մեկ կնոջը միջին հաշվով բաժին ընկնող հղիությունների ընդհատման թիվը կրճատվել է 4 եւ ավելի անգամ: Վերջին 3 տարիներին դրական միտումը շարունակվում է: Հղիության` պտղի սեռով պայմանավորված ընդհատումների դեմ պայքարը եւս զգալի արդյունք է գրանցել. նորածին տղաների եւ աղջիկների համամասնության տարբերությունը կրճատվել է 5 միավորով: Վերջին 5 տարում ամեն տարի ծնվել է 500-ով ավելի աղջիկ երեխա»,- հայաստանյան վիճակագրության այս եւ այլ ուշագրավ ցուցանիշերը ներկայացրել է Հայաստանի առողջապահության նախարարության աշխատակազմի մոր եւ մանկան առողջության պահպանման վարչության պետ Կարինե Սարիբեկյանը՝ հոկտեմբերի 1-2-ին Ժնեւում անցկացված ժողովրդագրության հարցերով համաժողովում:

Հայաստանում սեռերի համամասնության լուրջ խախտման փաստը հանրային հնչեղություն ստացավ ու պետական գերատեսչությունների ուշադրության կենտրոնում հայտնվեց ՄԱԿ-ի բնակչության հիմնադրամի 2011 թվականի հետազոտությունից հետո, երբ պարզ դարձավ, որ մեր երկրում հղիության՝ սեռով պայմանավորված արհեստական ընդհատման պատճառով նորածինների հարաբերակցությունը շեղվել է 1990-ականներից ի վեր՝ 2011 թվականին կազմելով 114 տղա՝ 100 աղջկա դիմաց: Գյուղական համայնքներում՝ 124 տղա՝ 100 աղջիկա դիմաց: Այն դեպքում, երբ բնականոն է համարվում 102-ից 106 տղա`100 աղջկա դիմաց հարաբերակցությունը: Այս ցուցանիշով Հայաստանը հայտնվել էր հղիության՝ սեռով պայմանավորված ընդհատման վատագույն ցուցանիշներ ունեցող երկրների շարքում (Չինաստան, Հնդկաստան, Ադրբեջան, Ալբանիա): Իսկ առկա իրավիճակը համարվում էր լուրջ ժողովրդագրական սպառնալիք՝ կանխատեսվելով, որ դա հանգեցնելու է գենդերային խզման, եւ արգելակվելու է բնակչության աճը:

Սեռերի անհամամասնության կրճատումն արտացոլվում է նաեւ հանրակրթական ուսումնական հաստատությունների ցուցանիշներում: Յուրաքանչյուր 100 աղջկա դիմաց 114 կամ 124 տղա պատկերն այստեղ արդեն չենք տեսնում՝ եզակի բացառություններով:

Կրթության կառավարման տեղեկատվական համակարգի վերջին տվյալների համաձայն, դպրոցներում սովորողների սեռային հարաբերակցությունն այսպիսին է. նախորդ ՝ 2017-2018 ուսումնական տարում օրինակ մայրաքաղաք Երեւանի դպրոցներում սովորել է 50 հազար 358 տղա եւ 45 հազար 462 աղջիկ: Սա նշանակում է, որ յուրաքանչյուր 100 աղջկա հաշվով տղաների թիվը գրեթե 111-ն է: Շիրակի մարզում եղել է 15 հազար 873 դպրոցական տղա եւ 14 հազար 173 աղջիկ: Այսինքն՝ մոտ 112 տղա՝ 100 աղջկա դիմաց: Արագածոտնի մարզում սեռերի տարբերության ցուցանիշն ավելի մեծ է՝ նախկինում վտանգավոր համարված շեմին ավելի մոտիկ: Այստեղ գործող հանրակրթական հաստատություններում նախորդ ուսումնական տարում սովորել է 7 հազար 868 տղա եւ 6 հազար 632 աղջիկ կամ յուրաքանչյուր 100 աղջկա դիմաց 119 տղա: Այս տարբերությունն էապես մեծ է նաեւ Արմավիրի մարզում՝ 100-ական աղջիկ եւ 115-ական տղա: Տեղի դպրոցներում նույն ուսումնական տարվա ընթացքում կրթություն է ստացել 13 հազար 324 տղա եւ 11 հազար 589 աղջիկ: Սեռերի վերաբերյալ ցուցանիշների միջեւ առկա խզումը բավական փոքր է Տավուշի մարզում: Նախորդ ուստարում տեղի դպրոցներում սովորել է 8 հազար 250 տղա եւ 7 հազար 893 աղջիկ: Կամ, որ նույնն է, մոտ 105 տղա՝ յուրաքանչյուր 100 աղջկա դիմաց:

Ինչ վերաբերում է հանրապետության ամբողջ աշակերտների սեռային համամասնության թվային պատկերին, ապա 2017-2018 ուսումնական տարում Հայաստանի բոլոր դպրոցներում սովորել է ընդհանուր առմամբ 174 հազար 944 տղա եւ 157 հազար 959 աղջիկ: Ցուցանիշների ընդհանուր բաշխվածության դեպքում ստացվում է մոտ 111 տղա՝ 100 աղջկա դիմաց: Այսինքն՝ 114-124 տղա՝ 100 աղջկա դիմաց ցուցանիշների համեմատությամբ նվազման միտումն ակնհայտ է, ինչը թերեւս թիրախավորված քարոզչական աշխատանքի արդյունք է:

Տպել
3399 դիտում

Ակցիա ՌԴ 102-րդ ռազմաբազայի դիմաց

Գյումրիում տոնվել է Հայրենիքի պաշտպանի օրը

Իրավիճակը կարգավորելու փոխարեն տնտեսավարողն անհիմն հրապարակումներ է արել սոցիալական ցանցերում. ՊԵԿ

Հայկական պետական մանկավարժական համալսարանի ուսխորհրդի ֆինանսական աղբյուրը՝ անհայտ կամ հույժ գաղտնի․ ՀՊՄՀ Restart

Մեր Կառավարությունը բացարձակապես չի միջամտել ՄԻԵԴ-ում Մարտի 1-ի գործին․ Արտակ Զեյնալյան

Տիգրան Ավինյանն ընդունել է Համաշխարհային բանկի պատվիրակությանը, քննարկել բժշկական ապահովագրության մշակման հարցեր

Երեւանի «Սբ. Աստվածամայր» ԲԿ է տեղափոխվել 9-ամյա տղայի դի․ նշանակվել է դիակի դատաբժշկական փորձաքննություն

Վարչապետը շրջայց է կատարել Վանաձորի տեխնոլոգիական կենտրոնում (լուսանկարներ)

«Իմ քայլը հանուն Լոռու մարզի» բիզնես ֆորումը ցույց տվեց, որ Հայաստանում իսկապես գործարար նոր հնարավորություններ կան

Համոզված եմ, որ հայկական քաղաքական հրաշքին կհաջորդի հայկական տնտեսական հրաշքը. Նիկոլ Փաշինյան (լուսանկարներ)

Արթիկի տարածաշրջանի ավտոճանապարհներին բուք է

Մեկնարկել է Առողջապահության նախարարության խորհրդատուների առաջին երկօրյա խորհրդաժողովը

Շարունակվում է «Իմ քայլը հանուն Լոռու մարզի» բիզնես ֆորումը․ ներկայացուցիչները հարցեր են ուղղում նաեւ ՀՀ վարչապետին

Միայն հիվանդ ուղեղներում կարող էր ծնվել Փաշինյանի՝ իմ քաղաքական հոգեզավակը լինելու ցնորալի գաղափարը․ Լեւոն Տեր-Պետրոսյան

Բժշկական համալսարանի ճաշարանը վարձակալածի հետ պայմանագիրը լուծարել են՝ բուհի պրոռեկտորին բուֆետի «նալոգ» չվճարելու համար

ԿԳ նախարար Արայիկ Հարությունյանը մասնակցել է բուհերի հոգաբարձուների խորհուրդների նախագահների հետ թեյախմությանը

Հայաստանում ԱՄՆ նորանշանակ արտակարգ եւ լիազոր դեսպան Լին Թրեյսին Երեւան կժամանի հաջորդ շաբաթ

Վալերի Օսիպյանն անակնկալ այցելել է ոստիկանության Երեւան քաղաքի վարչության Մալաթիայի բաժին

ԲՀԿ–ն առաջարկում է հարկային արտոնություն տրամադրել բնակլիմայական աղետների հետևանքով 50 %-ի վնաս կրած գյուղատնտեսներին

Անցնող շաբաթ արցախա-ադրբեջանական սահմանին հակառակորդը հրադադարի ռեժիմը խախտել է շուրջ 150 անգամ