Առցանց տաքսի ծառայությունները լիցենզավորվելու են. ո՞րն է պատճառը. պարզաբանում է փոխնախարարը

Մեր տեղեկություններով՝ ՀՀ տրանսպորտի կապի եւ տեղեկատվական տեխնոլոգիաների նախարարությունը մտադիր է օրենսդրական կարգավորումներ մտցնել առցանց տաքսի ծառայություների համար: Նախատեսվում է, որ առցանց տաքսիները անհատ տաքսիների պես պետք է լիցենզավորվեն նախարարության բազայում, որպեսզի հավասար դաշտ ձեւավորվի: Ըստ սոցցանցերում տարածված տեղեկությունների՝ առցանց տաքսի ծառայություններ մատուցող ընկերություններն այդքան էլ կողմնակից չեն նախարարության առաջարկին, քանի որ օնլայն տաքսիներում հիմնականում աշխատում են ազատ գրաֆիկով եւ այսպիսի առաջարկությամբ նախարարությունը ՏՏ ոլորտը չի կարող զարգացնել: ՀԺ-ն զրուցեց տրանսպորտի կապի եւ տեղեկատվական տեխնոլոգիաների նախարարի տեղակալ Արմեն Փամբուխչյանի նախատեսվող փոփոխությունների վերաբերյալ:

- Պարոն Փամբուխչյան, մեր տեղեկություններով՝ նախարարությունը օրենսդրական կարգավորումներ է առաջարկում, ըստ որի՝ առցանց տաքսիները, անհատ տաքսիների պես, պետք է լիցենզավորվեն նախարարության բազայում, որպեսզի հավասար դաշտ ձեւավորվի, չնայած, առցանց տաքսիներն ազատ գրաֆիկով են աշխատում: Ի՞նչ եք նախատեսել անել եւ ինչպե՞ս է հավասար դաշտ ձեւավորվելու:

- Օրենսդրական նախագիծը հիմնված է հավասար պայմանների վրա: Հիմնական բողոքը եկել է անհատ տաքսիստներից: Եւ հիմնական բողոքի թեման այն է, որ հավասար պայմաններ չեն, իրենք մուծում են լիցենզավորման գումար` 12 հազար դրամ ամսական, բայց իրենց զուգահեռ օնլայն տաքսիները չեն վճարում նմանատիպ գումարներ:

Մենք արեցինք այնպես, որ բոլոր առցանց տաքսիները նույնպես հարկվեն, այսինքն՝ վճարեն պետական տուրք: 12 հազար դրամը, ըստ օրենքի նախագծի, կրճատելու եւ դարձնելու ենք 9500 դրամ ամսական եւ այդպիսով՝ ստեղծելու ենք հավասար պայմաններ:

Տաքսի ծառայությունների հետ կապված էլ որոշակի փոփոխություններ ենք նախատեսել, այն ժամանակ տարեկան տուրքը մինչեւ 4 մեքենան վճարում էին 100 հազար դրամ, 4 մեքենայից ավելի՝ 200 հազար դրամ, դրանք վերացրել ենք: Այսինքն՝ մեկ տաքսու լիցենզավորման արժեքը բոլորի համար հավասարեցրել ենք: Էլեկտրոնային տաքսի ծառայություն մատուցող «GG», «Yandex» եւ «Utaxi» ընկերությունների կողմից հետեւյալ առաջարկն է եղել, որ իրենց պատվերից հարկվի: Որպես պատճառ նշեցին, որ իրենք ունեն վարորդներ, որոնց համար դա հիմնականում երկրորդ աշխատանք է, եւ հնարավոր է օրական 1-2 պատվեր կատարեն ընդամենը:

Եթե մենք սկսենք պատվերից հարկել, նորից անհավասար պայմաններ կստեղծվեն, դրա համար մենք առաջարկում ենք այլ լուծում: Առցանց տաքսի ծառայություն մատուցողները ամսական կվճարեն լիցենզավորման գումարի 1/3-րդի չափով, իրենց կտրվի օրական կտրվածքով մի քանի ժամվա լիցենզավորման թույլտվություն: Այսինքն՝ իրենք չեն կարողանա առավոտից երեկո տաքսի ծառայություն մատուցել:

- Իսկ դա ինչպե՞ս հնարավոր կլինի վերահսկել:

- Մի փոքր բարդ է, ճիշտն ասած, վերահսկողությունը, բայց մենք փորձելու ենք իրականացնել: Կարծում եմ՝ այսպես արդար է, քանի որ, եթե օրական կատարում են 1-2 պատվեր, պետությանը դրանից վճարում են ընդամենը 100-120 դրամ:

- Իսկ ֆիքսված ժամ լինելո՞ւ է, թե որ ժամերին պետք է օնլայն տաքսիներն աշխատեն:

- Իրենք ասում են, որ երեկոյան ժամերին են հիմնականում աշխատում, դրա համար մենք ժամը մոտավորապես ֆիքսել ենք 19:00-ից մինչեւ 23:00-ն:

- Սոցցանցերում քննարկվում է, որ առցանց տաքսի ընկերություններն այդքան էլ հավանություն չեն տալիս ձեր առաջարկին եւ որպես պատճառ նշում են, որ իրենք ազատ գրաֆիկով են աշխատում, իսկ այսպիսի քայլով ՏՏ ոլորտը չի կարող զարգանալ:

- Մենք չենք խոչընդոտում: Այսօրվա գործող օրենքի շրջանակներում պարտադիր պայման է հաշվիչի առկայությունը, իսկ հիմա մենք դա պարտադիր պայման չենք համարում: Մենք ասում ենք, որ պլանշետը եւ ծրագիրը ժամանակակից միջոց է եւ կարող են դրանով էլ ծառայություն մատուցել:

Մենք նույնիսկ հաշվի առնելով, որ Հայաստանում կա 38 հազար աջ ղեկով ավտոմեքենա եւ էլեկտրոնային տաքսիների մեծամասնությունը աջ ղեկ են վարում, գնացել ենք զիջման եւ ասել ենք, որ թույլատրում ենք, որ վարեն, չնայած որ օրենքով դա արգելվում է: Բայց հատուկ նշել ենք, որ վարորդի կողքին չպետք է լինի ուղեւոր` ելնելով անվտանգության կանոններից: Այսինքն՝ մենք այս բոլորը արել ենք, բայց տպավորություն է, թե մենք խոչընդոտում ենք էլեկտրոնայինին: Աջ ղեկի թույլատվությունը արվել է միայն էլեկտրոնային մեքենաների համար, քանի որ հին տաքսի ծառայություններն այսպես, թե այնպես չեն ունեցել աջ ղեկով մեքենա, քանի որ իրենք իմացել են, որ չի թույլատրվում:

Տվյալ օրենքը մեղմացումով կընդունենք, կտեսնենք ընթացքում, թե ինչ խնդիրներ են առաջանում, նորից քննարկումներ կիրականացնենք, կտեսնենք, թե ինչ կարող ենք անել:

- Առանց հաշվիչի աշխատող տաքսիները վերանալո՞ւ են:

- Մենք դա թողնում ենք քաղաքացու ընտրությանը: Մարդ կա՝ չի վստահում հաշվիչին, մարդ կա՝ չի վստահում պլանշետին, մարդ կա՝ չի վստահում մեքենայի արագաչափին, իսկ մարդիկ էլ կան, որ վստահում են դրանցից մեկին: Այդպիսով՝ մենք մրցակցային դաշտ ենք ստեղծել եւ այդպիսով կտեսնենք, թե որ ընկերությունն է մրցունակ, ըստ դրա էլ կարգավորումներ կլինեն:

Տպել
3273 դիտում

Իջեւանում՝ մարզպետարանին հարող կամրջից մինչև հիվանդանոցին հարող կամուրջ կտեղադրվեն լեդ լուսատներ

Գյումրու դրամատիկականը «Թռիչք»-ով բացեց 154-րդ թատերաշրջանը

Աննա Հակոբյանը տեսակցել է շենքի 6-րդ հարկից ընկած 2․5 տարեկան Արվին Վիքսոմին (լուսանկարներ)

Արցախի Հադրութի շրջանի եւ Ֆրանսիայի Իզեր նահանգի միջեւ ստորագրվել է բարեկամության հռչակագիր. Արցախի ԱԳՆ

Միքայել Մինասյանի ընկերությունը «Առաջին ալիքին» վճարում է մի սերիալի չափ գումար. կոռուպցիոն սխեմայի վտանգ

ԱԳ նախարար Զոհրաբ Մնացականյանը հանդիպել է Ավստրալիայի խորհրդարանական պատվիրակության հետ

Յուրի Ջորկաեֆը հոկտեմբերի 6-ից 9-ը որպես ՖԻՖԱ-ի հիմնադրամի տնօրեն կայցելի Հայաստան. վարչապետ

Արցախի նախագահը շնորհավորել է ՀՀ նախագահին՝ Անկախության օրվա կապակցությամբ

Առաջին ազատումը՝ Վալերի Օսիպյանի հրաժարականից հետո. 7-րդ վարչության պետն ազատվել է աշխատանքից

Վայոց ձորի մարզի որոշ դպրոցներում իրավիճակի թեժացման փորձերը մտահոգիչ ենք համարում. ԿԳՄՍՆ

Ամուլսարի պաշտպանության համար Երեւանում մեկնարկել է հանրահավաք

Նիկոլ Փաշինյանն ու Լիբանանի ազգային պաշտպանության նախարարը քննարկել են պաշտպանության ոլորտի փոխգործակցության հարցեր

Ադրբեջանցիները թող պատրաստվեն ջախջախվելու՝ սա իսկական առիթ է. Լեւոն Շիրինյան

Ես ոչ մի ծանր բան չեմ արել, զինվորական եմ եղել, նշված հրամաններն էլ ես չեմ գրել․ Սեյրան Օհանյան

ԵՄ-ն շարունակելու է լայն աջակցության ցուցաբերել Հայաստանին. Եվրոպական հանձնաժողովի ներկայացուցիչը՝ Տ. Ավինյանին

Հայ ծանրորդները վաղվանից սկսում են պայքարն աշխարհի առաջնությունում

Երրորդմասցի Լյովիկի եւ նրա ընկերների սպանության գործով Գաստիկի, Ծըգլի եւ Տլեի պատիժը խստացվեց. 18-ից դարձավ 21

Ես հիմա ո՞ւմ գնամ-խնդրեմ՝ երաշխավորի․ դատարանը Սեյրան Օհանյանին թույլատրեց բուժման նպատակով բացակայել երկրից

ԱԱԾ տնօրենը հայտարարություն է արել իր հրամանատարի դեմ, այդ պահին նա դեռ ԱԱԾ ղեկավարն էր. Արտակ Գալստյան

Հայտարարություն մրցույթի մասին